سئودا (پووئست)
سئودا (پووئست)
1400/07/25
بولگه لر سرويسي: بدري بارماغين ديشله‌يه‌رک دئيير:
نريمان ناظيم
بولگه لر سرويسي: بدري بارماغين ديشله‌يه‌رک دئيير:
– وآآ، آبا؟!حاج اکرم خانيم قيزينين سؤزون آلير، آمما اؤزون اوندا قويماييب دئيير:
– دور آياغا، دور او سووو وئر منه!
فروغ آناسي‌نين بير لحظه سو ايچمه‌سين فرصت سانيب، سؤزو آلير:
– بدري اينان، قرانا آند اولسون بير آي تمام گزديک. داي آدام قالمادي کي سوروشموياخ. چوخون دئديلر، آمما هاميسي کر- کتلي‌دي. آخي نه جور اولاندان سورا او بو خانواده‌‌نين بير عضوي اولاجاغيدي. دئديک ياني بيرين تاپاخ کي آدام ايچينه چيخارتمالي اولسون، اوتوروب دوروشوغون بيلسين. بو دا افسر آرواديدي. سونسوز‌ايدي. بورالي دئييلدي. هر شئيين حسابين گئتديک واللاه. دئديک بئله اولسون کي قوهوم – قونشو ايچينده سؤزه قويماسينلار؛ اؤزون کي بيليرسن د‌ليک آختاريرلار بارماق ائلييه‌لر. هله هئش زاد اولماميش صفيه‌خانيم دئميشدي: »قيزا نه آرواد آخي، اکرم اؤزونه کيلفت آختارير دآآ!«
بو سؤزو ائشيدجک حاج اکرم خانيم قووورغا کيمي چيتلايير:
– خئير، من بيليم ايمانيم بو سؤز صفيه‌‌نين سؤزو دئييل، بو لاپ سنين اؤز سؤزوندو. بونو قاباق دا بير ايکي يول دئييبسن، جوابووي دا آليبسان. ايندي ده دئييرم باجي من کنيز آختارميرديم. لاپ بئله طيب خاطيرينن دئميشديم گئتسين بيرين آلسين، آمما بئله باجيما قوربان دئميشديم آرواد آلسين، جيندا يوخ، قاندين؟
بدري يئنه ده يالواريجي لحن‌ايله اعتراضا قالخير:
– آبااا، الله‌ها خاطير آبا، بو سؤزلر سندن بعيددي. پيسدي آخي!
حاج اکرم خانيم يالقوزاق کيمي بدري‌يه ساري چؤنوب چيمخيرير:
– کس سسيوي سن! آبا، آبا، جيندا‌نين قويروغو اولار، جيندا دئييل بس نه‌دي؟ آياغين بو ائوه قويوب قويماميش يئددي ائولي قونشو هالا – هيرناسيننان ديله گلديلر. لاققيلتي –شاققيلتيسيندان دام دوواري ييخيردي او. باخ بونا، بو دا منيم قارينيمنان چيخان اوشاق! باخ گؤروم! اولمويا اونا بير سؤز دئينده سيزه توخونور؟ لابد تعصصبين چکيرسيز، هه؟؟ ”
بدري بورنونون اوجوناجان سارالير. ديلي توتار- توتماز دئيير:
– وآآ، کول منيم باشيما! نه تعصصبي؟ دئييرم هر نه اولاننان سونرا او ايندي آا جا‌نين آرواديدي دآآ، يوخسا او کيم من کيم؟حاج اکرم خانيم قيزينين مظلوم گؤرکمين گؤروب بالاجا يوموشانير:
– قيز، بيلميرسن کي بو ايکي آيدا کي بوردايدي نه اويونلار گتيردي منيم باشيما. خانيم ساعات سکگيزده يوخودان دوروردو، باش آچيق انيردي گليردي آشاغي، ال اوزون يويوردو، قاييديردي اوسته. باجي گؤزله گؤزون وار اولسون کي خانيم انيب گله‌جک قليان‌آلتي‌يا؛ بير ساعات تمام آينا‌نين قاباغيندايدي، ياخ ها ياخ. چاي قاليردي قورودا دوشابا دؤنوردو. هاچاندان هاچانا خانيم گليردي. اؤز اؤزومه دئييرديم قيزا بو تويا گئده‌جک گؤره‌سن؟! قيز آخي هر شئيين بير حددي وار. سيزه شوغلوزوممه اولوم اگر من گلين گئد‌ه‌ن گئجه بير بئله بزنميشديم. خيلاصه، گليردي کئچيردي آشپازخانييا، سلقئيله صبحانه‌سين يئييردي قاييديردي اوسته. بير ايشين قولپوننان ياپيشا تووبا، الين آغدان قارايا ويرميردي. سونرا حاجي‌يا دئديم. دئدي قيزقئييته دئ قوي گلسين ائوين ايشين گؤرسون. اؤز اؤزومه دئديم: وئي بالام نه جور اولدو؟! قيزقئييت هفته ده بير گون گليردي منيم ايشيمه ال آتيردي جانون چيخيردي پولون وئره‌سن، ايندي دئييرسن هر گون گلسين. اوننان کئچنده قيزقئييت نه گونده پيشميش پيشره‌جکدي بيزه؟! مخلص اؤزو ييخيلان آغلاماز. جانيم بوينومايدي گرگ کي چکئيديم. صوبدن ناهارا پيشيريب دوشورورديم، تووبا دئيه‌سن آياغين آشاغي قويوردو، يوخ. دئيه‌سن هئش بو آددا آدام بو ائوده يوخوموش. ناهار چاغي حاجي قاپيني چيققيلاتجاغين گؤروردوم اؤزونو جاني بي نفس يئتيردي قاپي‍يا، آچدي. اينان آلله‌ها امان وئرميردي بير قورو سلام عليک ده ائلييم کيشي‌نن. خيلاصه سيفراني ساليرديم، آزدان – چوخدان دؤشويوردوم. قيزا گؤروردوم پيرنخاب‌لا گلدي اوتوردو سيفرا‌نين باشيندا! وي‌ي سنين قارينيوين ايچي يانسين آرواد! بس آدامدا بير اوتاناجاق اوز اولماز؟ داي باجي سيفرا باشيندا نه اويونلاردان کي چيخميردي. بير قاش گؤز اويناتما کي دئمه‌يه گلمز. قويموردو او بير تيکه زهرمار دا بوغازيمدان آشاغي گئده. ائله دؤنه دؤنه حاجي‌نين بوشقابين دولدوروردو. بير گون دئديم کي، بالام گؤرک بو اوشاغدي، يوخسا اؤزونون الي يوخدو؟! قيز جاواب عوضينه دوندو منه هيريلدادي! دئين اولمادي آخي قه…، لاالاهه الا الله! هه… نه دئييرديم؟ هه ناهاري يئين‌دن سونرا قابلارين ييغيب يوماسينا بيرآلاي – قولاي ال آتيب اکي وئريب چيخيردي اوسته. حاجي دا بئش اون ديقه يالاننان باشين گيلله‌ييردي، سورا سوزولوب گئديردي اورا. سيزه شوغلوزوممه اولوم او ايکي آيدا بيرجه گون قويمادي کيشي ايکيندي چاغي گئده دوکانا. قاش قارالينجا اونو ساخلاييردي اوتاغدا. ائله اوزوم بال شربتيي‌‌دي کي داشيييردي اوسته. اؤزونون کي الله‌ها شوکور ديني ايماني يوخودو، مني ده مچيد منبريمنن قويموشدو. قيزا واللاه قوخوردوم! قورخوردوم ائويمنن چيخام، اريمي کي اليمنن چيخاتميشدي، ائوه ده صاحاب چيخا، اينا‌نين! بيلميرسيز نه عفريته‌دي او…
گون ال – آياغين ييغيشديران زامان فخرالسادات گلير. بير بوکوم امتحان ورقه‌سي قولتوغوندا، اوغلونون اليندن ياپيشاراق ايچري گيرير. حاج اکرم خانيم اورتانجيل قيزين گؤرجک دئيير:
– آي فخري سن الله ديل دوداغيم قورويوب او سماوارا بير باخ! ناهاردا نئجه کي قويوب گئديبسن ائله ائله‌ييک. بير ايستيکان چايدا بدري‌‌نين قاباغينا قويياماميشام. ائله سؤيله‌نيرم دا، فقط سؤيله‌نيرم. داي نئينيم دا، دردلي دئيينگن اولار.فخري سماوارا سو توکوب يانديرير، بير الينده مئيوه سله‌سي، بير الينده پيش‌خوري بوشقابي گلير.
منبع :