قوناق ائو يئيه‌سي‌نين دوه‌سي‌دير

بولگه لر سرويسي: دده‌م هرگون دئييردي: »قوناق ائو يئيه‌سي‌نين دوه‌سي‌دير، هاردا خيخلاسان اوردا ياتار«

بؤيوک‌آغا افندي

بولگه لر سرويسي: دده‌م هرگون دئييردي: »قوناق ائو يئيه‌سي‌نين دوه‌سي‌دير، هاردا خيخلاسان اوردا ياتار«
ميرزه اممد ‌منيم بي‌بي‌مين اوغلو ايدي. ائولري ورزقاندا اولاردي. هر ايل قيشي گلردي بيزه، بير آي، آي ياريم قالاردي، بايرامدان سونرا دئيردي:
– دايي ايجازه وئرسن صاباح‌ من گئديم؛ ياواش- ياواش کندين ايشي چيخير، دده‌م تک‌دي.دده‌م ده دئيردي:
– من نه دئييرم کي بالا، بورا سنين اؤز ائويندي؛ هر واخت سئوسن گل، هر واختاجا دا سئوسن قال.بو ايل ده ‌ميرزه‌اممد هر ايلکي کيمي قيشدا گلميشدي بيزه. دونن گئجه يالان اولماسا بير ‌مئتير قار ياغميشدي. سحر يوخودان دوردوقدا، ننه‌م دئدي:– مئشه بؤيوک‌آغا،‌ منيم نردوانا گوجوم چاتماز؛ دور آنباردان کوره‌ک‌نن نردواني گتير قوي داما، سيز گئدندن سورا‌ من اوشاقلارلا چيخيم دامي کورويوم.
دده‌م دئدي:– آرواد، داما چيخدي ندي؟ ايسته‌مز سن دام تؤکه‌سن. ‌من اؤزوم ايندي چيخيب کورويه‌رم.
دده‌م اوزون توتوب ‌ميرزه اممده دئدي:
– ‌ميرزه‌اممد بالامسان، دور او کوره‌ک‌لري گتير، نردواني قوي داما چيخ، او قاري تؤک. من ده گليرم.
‌ميرزه اممد حيطه چيخماق همان دده‌م صبحانه‌سين يئييب گئتدي ايشه.
دده‌م فرش يودوتدوراردي، ايپ بوياردي؛ ائله همن يئرده دوگو آل- وئري ده ائلردي. توکانا گيرنده هرياندان آسلانان رنگ به رنگ ايپ گؤرونردي. دوگو تايلاري دا توکانين بير گوشه‌سينده اوست اوسته قالاناردي. توکانين داليسي بؤيوک بير حيط ايدي. دده‌مين اوردا بئش آلتي ايشله‌يني واريدي: ايکيسي چؤپجو ايدي، فرش‌لري يوماميشدان اؤنجه اونلاري آسارديلار، هره‌سي بير آغاج گؤتوروب دوشرديلر فرشين جانينا، وور ها وور دوشردي. او قده‌ر وورارديلار کيفرشين تورپاغيندان بير اثر قالماسين و تميز يوولماغا آماده اولسون. سونرا فرشي سالارديلارحيطين يئکه حوضونا، گئجه قالاردي، سحره‌جه ايسلاناردي؛ سحر يووارديلار. يوولموش فرش‌لري دام- دوواردان، حيطده‌کي اؤزه‌ل ‌ميله‌لردن آسارديلار کي قوروسون. ايپ بويايان گونلر حيطده يئردن گويدن رنگ به رنگ بوياقلي ايپ ساللاناردي. تيانين بوياق قوخوسو حيطي بورويردي.
دده‌م هرگون ناهار گلردي ائوه، ناهارين يئييب بالاجا بير هوشلانيب، سونرا دوروب يئنيدن گئدردي ايشه. نيشان بو نيشان کي دده‌م ناهارا گلميشدي، ‌ميرزه‌اممد هله دامي تؤکوب قورتارماميشدي. دده‌م حيطدن بير سينيق- سالخاق سوپورگه تاپيب جلد نردواندان قالخدي داما؛ ‌ميرزه‌اممده دئدي:– يورولما باجي اوغلو، قورتارماميسان هله؟چوغوندور کيمي قيزارميش ميرزه‌اممد بوغلويا بوغلويا دئدي:– دايي جاني والله اون خالوار قار تؤکموشم.
دده‌م دئدي:– اللر وار کيشي. يئديگين چؤره‌ک حلالين اولسون.دده‌م سوپورگني دامدا يئره آتيب دئدي:– داي بيرزاد قالمير بالا. اورالاري دا کورو، سورا بو سوپورگه ايله سوپور، قوي گل آشاغي، ناهاريميزي يئيک.
***
سحري دده‌م يوخودان دورماق همان، ‌ميرزه‌اممدي ده يوخودان اوياديب دئدي:
– دور بالامسان، چاي- چؤره‌گيني يئه، گئده‌ک کرخانايا. جانين اوچون زمانه ائله خاراب اولوب اؤزگييه ايش اومود اولماق اولمور. بايرام قاباغي او قده‌ر فرش گتيريبلرکي قالميشيق الينده. چاييني ايچ، گئده‌ک. دور او کارگرلرين باشي اوسته، قوي ايشله‌سينلر.دده‌م بونو دئييب، ديک قالخدي آياغا. پالتوون گئييب، بؤرکون قويدو باشينا. ميرزه‌اممدي سالدي داليسينجا، گئتديلر کرخانايا. چؤپجولر دوشموشدولر فرشلرين جانينا. تاپپا تاپ سسي دونياني گؤتورموشدو. کرخانايا گيرجک دده‌م ايشچيلرينه اوز توتوب دئدي:– اشي، سيز ده ايشله‌ين‌سيز؟الين ‌ميرزه‌اممده طرف توتوب سؤزونه داوام وئردي:– ايشله‌ين بئله اولار با. دونه‌نين قارين تک جانينا من صبحانه‌مي يئيينجه تؤکدو. هره‌لري سوپوردو، حيطده کي قارلاري تؤکدو کوچه‌يه، قويدو گلدي. سيز اؤله‌سيز باخ بئشيز ‌ميرزهاممدين بير ديرناغي اولا بيلمزسيز. ‌ميرزه اممد بالا يئري او آغاجلاردان هانسي کي الينه ياتير گؤتورگل بولارا گؤرست ايشله‌مک نجور اولار.ميرزهاممدين قولتوقلارينا سانکي قارپيز قويموشدولار. پورسوق کيمي شيشميشدي. ائله دوشموشدو فرشلرين جانينا، آدامين فرشلره رحمي گليردي. ناهاراجا تک جانينا اوچ نفرجه ايشله‌ميشدي. دده‌م گئديردي- گليردي دئييردي:
– اوغول بالا، ميرزه اممد کارگر دئييل ها، او بيزيم اربابيميزدي. ‌مندن سورا بوراني ‌ميرزه‌اممد ايشله‌ده‌جک.آخشام اوستو ‌ميرزه‌اممدين، ايشچي‌لرين، فرشلرين جيريغي چيخميشدي. هاميسي آچيلا قالميشديلار. هره‌سي بير طرفده سره‌لنميشديلر يئره. ايستکاني لاپ زورلا اوسته قووزاييرديلار.
ميرزه‌اممد توکاندا دوگو تايلارينين اوستونده اوتورموشدو. آبي نيسان توکانين قاباغيندا داياندي. شوفئر دده‌مي گؤرجک دئدي:– حاجي اوچ تن دوگودو، بودا بارنامه‌سي.
دده‌م اوزون توتدو کارگرلرينه دئدي:– بيليرم بتر يورولوبسوز، آمما ميرزه‌اممد بوردادي، قويون او چيخسين اوسته وئرسين، سيز گتيرين توکاندا ييغين اوگوشه‌يه. ائله ييغين او بيري دوگولره قاريشماسين. اؤزو ده اون- اون ييغين کي راحات ساييلسين.دده‌م گؤز آلتي، ميرزه‌اممده ايشاره ائله‌دي. ‌ميرزه اممد دئدي:– دايي سنين خيالين راحات اولسون. سن شوفئرينن بير چاي ايچينجه بيز بولاري بوشالداريق.
***
گئجه ساعات دوققوز ايدي ‌ميرزه‌اممد جنگدن قاييدان عسگر کيمي يورغون آرغين، آشا- آشا ائوه گلدي. شيرين- شيرين قار ياغيردي؛ دوننکيندن ده بتر. بئله گئتسه سحره‌جه يئنه ‌مئتير ياريم قار قوياجاق يئره.ميرزه‌اممدي سوفره باشيندا يوخو توتوردو. ديلي توتار توتماز دئدي:– دايي ايجازه وئرسن ‌من سحر ايسته‌ييرم گئديم.
دده‌م دئدي:– من نه دئييرم کي بالا، بورا سنين اؤز ائويندي؛ هر واخت سئوسن گل، هر واختاجا دا سئوسن قال. امما گئتمه‌ميشدن قاباق سحر دور چاي چؤره‌ييني يئه‌. من ايپ بويوياجاغام، سن ده بو دام- داشي کوره گئت! باجيما دا سلام يئتير، اوشاقلارين دا اوزوندن اؤپ!
ايندي او گئده‌ن قارداشدي کي ‌ميرزه‌اممد اون بئش ايلدير بيزه گلمير.

منبع :