سانکي يوخودا روشوت ايسته‌ييردي
سانکي يوخودا روشوت ايسته‌ييردي
1397/07/15
بولگه لرسرويسي: ياغيش گؤز آچماغا امان وئرميردي. قاپيني آچار_آچماز اؤزومو تپديم چؤره‌کخانايا. زولاق-زولاق ياغمور دنه‌لري سير -صيفاتيمدان اوزو آشاغي ديغيرلانيردي. اوستو باشيم جوم-جولوق سوايدي. ايکي نفر نؤبه‌ده آيدي.
– قارداش سيزدن ساوايي کيمسه نؤبه‌ده وارمي؟- دئيه سوردوم.
– يوخ
– امما خميرين ده آخيري‌دير چاتا چاتمايا!- شاطير سسلندي.
اوست- باشيمي‌سهمانلاييب يئمکدن اوميد ياخشي دئييب، گؤزله‌ديم.
گؤيون گورولتوسي شيمشکين شاققيلتيسي خياوانداکي اداملاري دا توز- تورپاق کيمي‌تميزله‌ميشدي؛ قيي وورسايدين قولاق توتولاردي. نؤبه منه چاتميشدي.
ايچري بيرنفر ده گيردي. شه‌وه ساققاليني تومارلاييب، گؤز-قاش آتيب ايهاملا نسه شاطيرا آنلاتدي. منسه هله شيديرغي ياغان ياغيشي دوشونوردوم. چؤره‌ک حاضير اولدوقدا شاطير چوره‌گي گؤز- قاش آتان اوغلانا اوزاتدي. سسلنديم:
– شاطير قارداش! نؤبه منيمدير.
شاطير سايمازيانا: او سندن قاباق نؤبه توتموشدي- دئيه پئشخاندان اوزاقلاشدي. بير آن قان کلله‌مه
ووردو. حيرصيم نفسيمي‌کسمه‌ده ايدي. چؤره‌کخانانين کونجينده‌کي دمير پارچاسي سانکي هير-هير اوزومه هيريلداماقدا ايدي. بيردن سحرچاغي عدليه ده کي قولو قانداللي گنج ياديما دوشدو. ياناشي اگله‌شن کيشي‌دن گوناهيني سوروشدوم شيکايتلندي:
– قارداش ميللت‌هارينلاييب، قودوز ايت کيمي‌دير. بيلينمير کيم کيمي‌توتور.
بيرآز نفسيني دردي:
– تاکسي شوفيري‌دير.هانسي‌سا حالال سوت امميشي بونون نؤبه‌سينه گيريب موسافيريني چالماق ايسته‌ييب.
سونرا سؤزونه بيرآز ايستهزا قاتدي، خيسين خيسين گولومسه دي:
– بودا نه قويوب نه ده گؤتوروب؛ همن حالال سوت امميشي عمللي باشلي ازيشديريب. کوپک اوغلو ائله بيل ايکي موسافيرين اؤلوسو ايميش… بيرآز سويوق سو ايچر، آغلي باشينا گلر.
سانکي يوخودا ايديم اوستومه سو چيله‌ديلر. هوشوم باشيما گلدي. ديليمي‌ديشيمه توتوب، ياغيشي سايمادان ائوه يوللانديم.
ائوده‌کيلر مني چؤره‌کسيز گؤرنده ميزيلداديلار. من ده الله‌دان اه‌يري گؤز ايسته‌ين کور آدام کيمي‌بوتون حيرصميي اونلارين اوستونه بوشالتديم. بيرآز کئچدي. داها آتش‌بس باشلاميشدي. هره بيرياندا ميسيب، اؤزويله مشغول ايدي. گوشيمي‌اله آليب، سانال دونيادا بوگون گلن مئساژلاري اوخوماغا باشلاديم. گئجه تانينميش بير يازاردان پايلاشديغيم يازي‌يا گوروپداشلارين فيکريني بيلمک ايسته‌ديم. اصلينه بو يوللا اؤزومو اووتماق ايسته‌ييرديم مئساژلارين ياريدان چوخونو آلت- اوست ائله‌ديم؛ بيرشئي چيخمادي.
بيرآز اؤزومه گلديکده دوشوندوم: -نه کي يازماليديلار. من کي يازاري دئييلديم؛ نه گؤزله‌مه‌ليديم کي! – دئييب اؤزومه تسکينليک وئرديم. داها ياواش ياواش راحاتلانيرديم. مئساژلاري اوخوماغا داوام ائتديم.
بير نئچه مئساژ اوخوموشدوم کي منيم مئساژيمي‌تانينميش بير گورپداش فوروارد ائتميشدي. گولله‌سي هدفه ده‌ين آدام کيمي‌بيرآز هوسلنديم.
مئساژلاري يئني‌دن اوخوماغا باشلاديم. چيچک‌لر قوجاق- قوجاق دوزولموشدو بو پايلاشمانين آلتيندا. تعريف‌لر ياغيش کيمي‌ياغيردي.هامي‌ياشا، لايک، نه گؤزل پايلاشما-دئيه باغيريردي.
سحر تئزدن راست گلديگيم اولايلار بير- بير گؤزومون اؤنونده رئژه گئتمه‌يه باشلاديلار. باشيما سانکي بير قازان قاينار سو تؤکولدو.
گوشيني بير طرفه توللاييب، ياتاغيما گيرديم. دوشوندوم: بلکه ياتسام احواليم بيرآز دوزه‌له؛ آنجاق ايلان ووران ياتار من ياتمارام. ياتاقدا نه قده‌ر او اوز- بو اوزه چويدومسا، گؤزومه يوخو گلمه‌دي. سانکي يوخودا روشوت ايسته‌ييردي
منبع :