بابالاري اؤيمه، سؤي!

بولگه لر سرويسي: بو سؤز، يازيچي دوستومون يازماق ايسته‌دييي بير حکايه‌نين باشليق سؤزو ايدي. ائله بو باشليغي گؤرورکن جيک قاليب اونا دئديم:– بو نه سؤزدور؟ ياني نه اولسون؟

سعيد فيوضات

بولگه لر سرويسي: بو سؤز، يازيچي دوستومون يازماق ايسته‌دييي بير حکايه‌نين باشليق سؤزو ايدي. ائله بو باشليغي گؤرورکن جيک قاليب اونا دئديم:– بو نه سؤزدور؟ ياني نه اولسون؟
دئدي:– آدام گونده تزه بير سؤز ائشيتمه‌سه قولاقلاري کار اولار. بو دونيا ائله سوخا سوخ بير يئر اولوبدور کي هر نه اولا بيلر. ائله بيري ده، بو سؤزدور.
دئديم:– آخي به بابالار نئيله‌سين؟
دئدي:– قولاق آس دئييم. جاوانليق چاغلاريندا بير گون ائوه ساري گئديرديم. بير ده گؤردوم بيري يئره کيتاب دؤشه‌ييب ساتير. منيم ده کي آزاريم وار. دوروب او کيتابلارين هاميسينا باخماسام گئده بيلمه‌رم. دوردوم باخماغا. ائله باخا باخا گؤزوم بير کيتابا ساتاشدي. کيتاب روس يازيچيلارينين ياشاييشينا، بير ده، ياراديجيليغينا گؤره ايدي. کيتابي واراقلاييب گؤز گزديرنده، داستايوسکي‌نين آديني گؤردوم. اونون آديني گؤرونجک ساتيجي‌دان سوروشدوم: بو کيتاب نئچييه؟ دئدي: اوچ يوز تومن. او زامان اوچ يوز تومن چوخ پول ايدي. دئديم: اوجوز وئر مشتري اولاق دا.دئدي: چيخماغا يئري يوخدي. بير ده دئيينجک گؤردوم گده لاپ برکيدي. کيتابي يئره قويوب دوزلديم يولا. گئجه يوخودا گؤردوم کي قارانليق بير چؤللوکده‌يم. اوزاقدان بير ايشيق گليردي. ياخينا گئديب گؤردوم بير بالاجا ائودير. پنجره‌سيندن باخينجا گؤردوم داستايوسکي استول آرخاسيندا اوتوروب يازي يازير. قاپيني آچيب گيرديم اوتاغا. او دؤنوب منه باخينجا دئديم: سلام جناب داستايوسکي. سيزي چوخ خوش گؤردوک. من سيزين يازيلاريزا وورغون بير اوخوجويام. دوغرودان دا قلميزدن اولماز و من سيزين اثرلري چوخ سئويرم. بير باشدان آياغا منه باخيب دئدي: چوخ سئويرسن؟ دئديم: بعلي چوخ چوخ سئويرم. دئدي: چوخ ايستهسَيدين اوچ يوز تومن وئريب او کيتابي آلاردين!
غرض؛ اوزون زامان ادبيات اوزره چاليشا چاليشا فرهنگي ميراثين دا باجاسيندان بير باخديم. گؤزومون قاباغيندا دوران، بيرينجي قاباريق مسئله، بابالاريمين معاريف يولوندا آتديغي آديملارلا بيرگه اونلارين ايلک مدرسه قورانلاردان بيريسي اولمالاري ايدي، آما اليميزده هئچ بير بلگه يوخ ايدي.
دئديم:– به نييه يازيلي بلگه يوخ ايدي؟ به آتان يوخسا عمي‌لرين سيزه بير بلگه ساخلاماميشديلار؟
دئدي:– آتام و عميلريم بو قونودا تکجه بابالارين خاطيره‌سيني، ناغيلا بنزر بير شکيلده دئميشديلر.
دئديم:– نييه؟دئدي:– واله اونو دا دئمه‌ييبلر!
دئديم:– سنين اؤز گؤروشون نه دير؟
دئدي:– بونون نييه‌سيني بيلمه‌يه او زامانين پيرتلاشيق دورومونو آرشديرماليييق. او چاغدا مدرسه‌يه اوشقوللا دئييرميشلر و اصول‌-ي جديد مدرسه‌سي دئيه‌رَک بو مدرسه‌لري آچانلارا يامان يوووز دئييب اونلاري اينجيديرميشلر.
دئديم:– دئمک سيزين ده بابالاري اينجيتميشديلر؟
دئدي:– همي ده چوخ. ائله کي يازيقلار باشلاريني گؤتوروب بورادان قاچيب، ائي، ايللر سونرا، هاي کوي ياتاندان سونرا قاييتميشديلار.
دئديم:– آما من بيلن سن بو ايشه گيريشدين. يوخ؟دئدي:– بعلي. مدرسه‌ميزين تاريخه کئچمه‌مه‌سي منيم اوچون بير سيخيجي دوروم ايدي.
دئديم:– آما خاطيره‌سي کي قالميشدي. خصوصا او مدرسه‌ده درس اوخويانلار بيليرديلر نه وار نه يوخ؟
دئدي:– بيليرسن نه وار؟ بئله بير ايش اولموشدو‌سا، تاريخي بير حادثه ايدي و يالنيز خاطيره شکلينده قالماسي هئچ دوز ايش دئييلدي. چون او مدرسه‌نين شاگيردلرينين ياشي دوخساندان چوخ ايدي، چوخو دا رحمته گئتميشديلر. بو اولانلار بيزدن سونرا گلجک نسلين خاطيره‌سيندن پوزولاجاقدي. قالسين کي بو تکجه بيزيم عائيله مسئله‌ميز يوخ يوردوموزون تاريخي ساييليردي.
دئديم:– ياديمدادير کي قول چيرماييب بو يولدا آدديم آتدين. يازيلي بلگه تاپا بيلدين مي؟
دئدي:– يازيلي بلگه‌لر تاپا بيلمه‌سم ده، آختاريب او مدرسه‌نين او چاغدا حياتدا اولان شاگيردلريني تاپيب يئترينجه شيفاهي خاطيره و سس بلگه‌لري توپلايا بيلديم.
دئديم:– قوي قالانين من دئييم. سونوج اولاراق بابالارينين قوردوغو مدرسه‌نين کئچميشي يوردوموزون تاريخي يادداشينا کئچدي، هه. حتي خاطيرلاييرام کي نئچه اؤيکو و رومان کيتابيندا بو قونويا گؤره يازيب، بيلگيلر وئردين. دوغرودان دا ساغ اول.
دئدي:– بو ايش، يوردوموزون تاريخينه و آتا بابالاريمين زحمتلرينين قارشيسيندا منيم بورجوم ايدي.دئديم:– به سؤيمک هاردان چيخدي؟
دئدي:– هه گل ايندي ائشيت منيم عائيلَمدن. گون او گون اولدو کي آتا طايفاسينين قيزلاري بيزه قوناق گلديلر. من بو قونويو اونلارا آچيقلاييب يازديغيم کيتابلاري دا اونلارا اؤنَريب بابالاريميزي اؤيدويومدن دانيشديم. هرحالدا چوخ ماراقلانماديقلاريني دويدوم. قوناقلارين گئتمک واختي يئتيشينجک آرخالاريني او کيتابلارا چئويره‌رک دوروب گئتديلر. بو ايش منه بير بوتون دَيدي بير ده پارا. غرض. آي دولاندي ايل دولاندي، آيري سئچگي چيليکدن حاليم بولاندي. بيليرسن نه دئييرم.
دئديم:– بيليرم نه دئييرسن. ائله چيراق اؤز ديبينه ايشيق سالماز. ايندي دئ گؤروم، سؤيوش وئرندن سونرا نه اولدو؟دئدي:– همان آرخالاريني چئويريب گئدنلر قيامت قوپارديلار کي بابالارين روحو واي، واويلا، وا مصيبتا… بيليرسن نه وار، بابالاري ديريلتمک ايسته‌سن اونلاري اؤيمه، سؤي. اوندا گؤررسن بابالارا نه قده‌ر ده‌ير وئرن وار!

منبع :