قورخولو
قورخولو
1397/02/16
بولگه لر سرويسي: ايتييي ايتميشدي،هارالاردان آختاريب، تاپاجاغيني بيلميردي؛ چوخ آختارميشدي، هئچ يئردن تاپا بيلمه‌ميشدي، نه ائشيکده‌ايدي نه ائوده، نه تلويزيادا، نه پنجره داليسندا، نه ياتاق‌دايدي نه دوراق‌دا، نه ياستيق آلتيندايدي نه ده ....
اوره‌يينده تيکه قالان کيمي‌بئينينده دويونلنميشدي، نه آچيليردي، نه رد اولوردو، اومموشدو سانکي، اومسايدي دا بيلميردي ندن. پري ده يوخ‌ايدي بير تيکه توتوب گيزليجه، بيردن کوره‌يينين اورتاسيندان چاليب، دئيه، اومدوغون بو اولسون، بو دا قورخا، اومماق ياديندان چيخا، کورک آغريسي چکه.
قورخوردو، چوخ قورخوردو، يئنه چوخلو ايتيره‌جه‌يي اولمايايدي؟ گؤره‌سن‌هامي‌منيم تک فيرتينادان بئله قورخورموش؟ ناغافيل اؤلومدن نئجه؟ اؤزوندن سوروشدو. گولي دئيردي قورخولو باش سلامات اولار، پري ده دئيردي هئچ نهدن قورخما، هر نهدن قورخسان، گلر باشيوا. بيلميردي گولي دوز دئيير يا دا پري.
بوندان اولکي فيرتيناداکي ايتيرديک‌لرين هله ده تاپانماميشدي. آخي گولي دئيردي ايتميش‌لري تزده‌دن راحات تاپماق اولار.
ائله بيل پري دوز دئيرميش، اينديکي سؤزلرين ده اثري يوخدي. فيرتينادان بتر قورخوردو، بير ايش گؤرمه‌ميش، ال چکمزدي، آرخايين‌ايدي. چوخ قورخولو بير زاد‌هاميسي‌نين يولونو گؤزلوردي؛ چوخ قورخولو.
بو ديلسيز، آغيزسيز، جانسيزـ جانلي طبيعتين دينه‌ني يئنه بتر توتولموشدو؛ دولوايدي؛ پيچاق وورسايدين، باتمازدي. اوره‌يين بوشالتماسايدي هيرسي سويومازدي. اونون اوره‌يي‌نين ده بوشالماسي بونلارا چوخا باخاردي!
اوندا دا نئچه گون فيرتينا اولموشدو، چوخ قورخموشدو، پري‌يه دئميشدي، يئنه بو طبيعتين باشينا نم نه اويون گليب، دينه‌ني چوخ بتر هيرسله‌نيب، زلزله‌دن، سئل‌دن زاددان گتيرمه‌يه بيردن؟ اودا گولوب دئميشدي، ال چک بو سؤزلريندن، طبيعتين ديلماجي اولوبسان بلکه‌ده خبريميز يوخدي.
جاوابين وئرسه‌ايدي، داها اليندن قورتارمازدي، لاغا قويوب گولردي، سوسموشدو. صاباحي‌سي اهرـ ورزقان دا زلزله اولموشدو. آدي گلدي اؤزو گلمه‌سين، دئيه‌رک، يومروغون دؤنه ـ دؤنه اؤز کوره‌يينه ووروب بيز ائششک اتي يئميشيک دئدي. نه قدر يئر تيتره‌ميشدي زلزله‌دن سونرا. اينديه‌دک بئله بير زاد گؤرمه‌ميشدي. ايندي ده يادينا دوشنده بوتؤو گؤوده‌سي تيتره‌ييردي. پري زنگ آچيب دئميشدي آي بالا کؤينه‌ييندن بير تيکه ده بيزه ساخلا، گولموشدولر.
ايندي ده چوخ قورخوردو، يئنه فيرتينادان دانيشيردي، بيرده قورخوسوندان. گؤرن نه‌لر اولاجاق، بيلميرم. ائشيتمه‌ميسن اردبيله گلن بورولغاني؟ ائولري وئران قويوب، دمير ديره‌ک‌لري ائله تيتره‌ديرميش، آز قالا يئريندن چيخاردا، بيري دئدي.
اينانيب ـ اينانماز حالدا باشلادي دانيشماغا، بيليرسيز نه وار، بئواخت اولماميش اؤزوموزو بو قورخولو دوروم‌دان چيخارتماق گره‌ک، بونا دا يالنيز بير يولوموز وار، يالنيز بير يول. طبيعتين آناليق حققيني يئرينه يئتيرمک، تزه‌دن اونون قوجاغينا قاييتماق، اونو دوشونمک، اونلا دوست اولماق، ... اونلا دوشمنليک ائيله‌مک مه‌يه‌ر بو راحاتليقدادي، مه‌يه‌ر اونونلا باجارماق اولار؟ يقين بيلين اولماز. ائله بير فيرتينا سالار کي فيرتينا اولسون، بورولغان ائيلر، سئل‌لر، سولار آشديريب، داشديرار، يئري ائله تيتره‌در، بؤلوم ـ بؤلوم ائيلر، يئکه تيکه‌سي گؤزه گؤرونمز، داغلاري ييخار، بو بينالار بير زاد ده‌يير اونون الينده، ايکي اولماميش يئره يئتيرر بو اويونجاق‌لاري؛ گؤيدن داش ياغديرار...
بتر باش آليب گئديرسن، خاطا اولمادي، يئنه بير بورولغاندان دانيشديم، آغزيوا داش‌ـ تورپاق، بسدي داها، گؤزلريوي آچ،هامي‌گئديب، من‌ده گئديرم، دئدي.
گؤزلرين آچاندا، بيلمه‌دي‌هاواختدان تک باشينا قاليب، اؤز ـ اؤزونه دانيشيردي. گؤزلليک‌لردن داها دانيشانمادي. کيمسه قالماميشدي اوردا.
حيکايه‌سين بوردا قورتاريب، آتميشدي بير يانا؛ بير ايکي گون قالسين، دم آلسين، سونرا اوخويوب بير آز ال دولانديريب يوللارام، دئميشدي.
سحريسي نپالين آغير زلزله‌سين ائشيتدي، توپراق آلتيندا قالانلاردان اولدو، نفسي داها يوخاري گلميردي. صاباحي‌سي دا پاکستانين فيرتيناسين، فيرتينايلا، سئل‌ايله گئدن‌لره قاريشدي. ايتيک‌لري گونو گوندن چوخالماميش، حيکاسينين لاپ سون نقطه‌سيني قويمالي‌ايدي…
منبع :