سوروجو آتا اؤنده اوتوران اوغلويلا، دالي اوتوراجاقدا کي گلينينه گؤز گزديريردي. اوغلانين سوسقون باخيشلاري اؤنوندن باشقاسيني سئزميردي. دوشونجه‌لره اويوموشدو: – “مني بو قيزدان نيه آييرديلار؟ بو قيز حايات يولداشيم دئميشديلر. آمما آتام داها دئييل…داهااااا حايات يولداشين دئييل دئيه باغيردي! من‌مي‌حايات يولداشي سئچديم؟ من ائولنمه‌يي بئله دوشونمه‌ديم. آرتيق ائولنديريلديم. من کيمسه‌ايله بئله ياخين اولماديم. آتام موبايليمدان اونون هر ايزيني سيلدي. ندن مني ايکي ايل باشقا بير ياشاما يؤنه‌لتديلر؟ ندن؟ من اؤز ايچيمده ياشاييرديم. يالنيز اؤز ايچيمده…» اوغلان قانريليب حسرت دولو باخيشلاريني قيزا تيکدي. آما قيز سرت بير باخيشلا اوندان اوز چئويردي. –« من دلي دئييلم. من خسته‌يم. چوخ شئي‌لري باشا دوشه بيلمه‌رم. هر ايشيم آخساقدي. يئرسيز يئره گولورم، آغلاييرام. داورانيشلاريم باشقا اينسانلاردان فرقليدير. بو دونيادا منه بير گؤرو وئريلمزدن اونا آياق باسميشام. دئييرلر آتامين پولو بونلارين‌هاميسينا اوستون گلير. سانکي سو کيرلري يويوب آپاران کيمي پول دا مني يويوب آپارير.»بير داهادا قيزا باخدي آنجاق قيز بونون فرقينده دئييلدي. اوزگون اوغلانين ترسينه او چوخ موتلو گؤرونوردو. – «من‌هارا سن دلي‌هارا؟ اوولدن بيليرديم يانيليرام آنجاق پول آدلي بير آت ميدان چاپديريرسا بونلار اؤز دَيه‌ريني ايتيرر. هله قايين‌آتام مندن آجيقليدي! بو منه لاپ ايلگينج! عؤمور بويو دلي اوغلوايلا نئجه ياشامالي. ياتاغي دا بئله باشا دوشموردو. آآ…باخ من يازيغين شانسينا! ياريمچيليق آغلينا سيغيشديرا بيلمزدي بونلاري. ايکي ايل حسرتله ياشاديم. دوغال اولاراق باشقالاريلا ايلگيله‌نديم. پئشمان دئييلم. بوشانديم‌دا، آنجاق بو آرادا اودوزان اونلاردي. آلديغيم کبين عؤمور بويو مني يئتر. بونلار قالسينلار اؤز‌هايلارينا. اؤلورسه‌لرده، بو دلييه منه تاي بير گؤزلي تاپيلماز. »بو آن قيزين موبايلي سسله‌نه‌رک، يازيشماغا باشلادي.آتا ماشينين گوزگوسوندن گؤزلريني قيييب سينيرلي- سينيرلي قيزا باخيردي. – «اوجقار يئردن بير قيز آليب يوخاريلارا گتيرسن بوندان آرتيق اولماز. منيم پولوم بونو قودورتدو. اؤزلويوندن اولوب، آبيريمي‌تؤکدو. منيم اوغلوم ساغلام اولسايدي سني ايت يئرينه قويمازديم. هله قالسين ائويمه گلين گلهسن. بير گون بو يارامازي آلميشديمسا، اينديسه ساتديم. داها يانيلمارام. بوندان آرتيق قويمارام اوغلوم اوزولسون. بير آيريسيني تاپميشام… آتا دؤنوب اوغلونون اوزگون گؤزلرينه باخدي. قار دورمادان ياغيردي. ماشين‌سا اؤز يولوندا. بير آزدان بير داريسقال کوچه‌نين آغزيندا داياندي. قيز موبايل‌ايلا يازيشارکن ماشيندان ائنيب کوچه‌يه ساري يورودو. اوغلان قار اوستونده آياق ايزلرينه باييلميشدي… گئجه ياريسي قار سورکلي ياغيردي. اوغلان ايستي اوتاغيندا تير-تير اسه‌رک باخيشي پنجره‌دن آيريلماييردي. بئله بير آنلاري ياشاماميشدي. ايللر اؤنجه، بئله بير قيش گئجه‌سينده قيزديرمادان آلوو توتوب ياناراق، بو گونه‌دک سؤنمه‌ميشدي. يانيب، ياخيلميشدي. آما بو گئجه آجي بير سويوق قيزديرمانين يئرينه اوره‌يينه چؤکموشدو. من چوخ آغلارام، بوگئجه گؤز ياشلاري ياد اولوب منه. آغلاماق سسيمدن آنامين گليشيني ايسته‌يه‌رم. گؤز ياشلاريمي‌سيليب، منيم بو آجيناجاقلي طالئعيمه آغلاسين دئيه. حايات يولداشي سانديغيم قيز سون گئديشينده بير دفه‌ده اولسون بئله باخمادي منه. من دَلي‌يم. ائله بوندان دولايي چيلغينجاسينا سئويرديم. سئومه‌يين آنلامي‌ندير؟ بونلاري من باشا دوشه بيلمه‌رم. آنجاق اونو بيليرم ايندي بوردا اولماسي چوخ ياخچي‌ايدي. اوتوروب موبايلي‌ايلا باشيني قاتميشدي. منسه ايچدن‌ليکله اونا باخيرديم. هردن گوله‌رديم، دانيشارديم، يئنه مني سايمازدي. بئله بير دوروم ساعاتلارجا سوره‌ردي. من موتلوايديم، چوخ موتلو. او بوردايدي، چيزگيلي دونوايلا اوتورموشدو. آما گئتدي. حاياتيمدا سئويلمه‌ديم. آجيناجاقلي باخيشلار سئومک قاورامي‌داشيدي. بو قايغيلاردان، بو دويغولاردان يورولدوم. اينديسه بو قارلي- قارانليق گئجه‌ده يالنيز بوراخيلميشام.قار دورمادان شَهرين اوستونو قاپسادي آرتيق. سانکي اينسان ياشاماييرميش کيمي. اوغلان آجي دوشله‌ره داليب، سويوق اوره‌ييندن بئينيمه ساري يوکسه‌ليردي…
بولگه لرسرويسي:قار ياغيردي. ماشين سس‌سيزجه خياباندا ايره‌لي‌له‌ييردي.