جددينه قوربان اولدوغوم مير گولاب
جددينه قوربان اولدوغوم مير گولاب
1397/01/26
بولگه لر سرويسي: سحر چاغي خوروز بانلاماميشدان اؤنجه، آنامين اوره‌يه ياتان گؤزل قيشقيريقلاري ايله يوخودان ديک آتيلديم. هله يوخومون کال آلمالارين درمه‌ميشديم، گؤزلريمي‌اووا اووا زهر بارداغي اولوب، بال کيمي‌زهر سوزدوردوم. آنجاق آنامين دويونلو قاشقاباغين گؤردوکده، حاليم يئرينه گليب عاغليمي‌باشيما توپ ائله‌ديم. يقين يئنه بو آروادي بيري سانجيب کي ال آياغيني ايتيريب، حيرصيندن چوغوندور کيمي‌قيپ- قيرميزي قيزاريب. باجيلاريمين‌هاميسي قارشيندا رديف دوزولندن سونرا آنام ديله گلدي: “هه! ياخشي قولاق آسين قيزلار، گؤرون نه دئييرم؟!! اوچ گوندور بير زاد يامان فيکريمي‌قاريشديريب. دييه‌سن يئنه بيزي گؤزو گؤتورمه‌ينلر ايشه دوشدولر. حاواسينيز اولسون آماندي! اوچ گوندو سحر چاغي قاپيميزا دنه‌دنه دويو سپيلير. يقين بو ايش نه قوشلارين ايشيدي نه قونشولارين… ائله گؤروم پيس گونه قالسينلار منيم بالالاريمي‌ايستمه‌ينلر! “
آنام نمنه‌قدر اونا بونا قارغيش ياغديراندان سونرا، گؤزلري‌نين ايشيغي مير گولابا زنگ ائتدي. دئييرلر بو جددينه قوربان اولدوغوم سئييد، بوتون موشکوللره قنيمدير. نفسي ائله بيل مؤعجوزه‌دير. هله آنامين دئدييينه گؤره، اونون الي بوتون خسته‌ليک‌لره درماندير. آغزي‌نين سويو، سو درمانلاري‌نين‌هاميسيندان داها تاثيرلي‌دير. هر‌هانسي خسته‌نين آغزينا توپورسه، آني اونون جانيندان خسته‌ليک گئده‌جکدير. توبا! توبا! گوجو سانکي تانري گوجودورو.
بلي… مير گولاب – ائله اونون او اوزون قارا ساققالينا جانيم ماليم قوربان – سانکي بير حکيم اولاراق تشخيص وئردي کي، اوجا بويلو بير قادين، گؤزلري افعي ايلان، ايسته‌يير يئنه باجيمين باختين باغلاسين. آتاملا آنامين او شيرين حياتلارينا آجي قاتسين. بلکه ده او بيريسي باجيمين قارنين قورودوب، بيزي بير سيرا جادولارا سالسين.
آنام دئميشکن: »او عجوزه قاديني قارا گلسين! نئجه کي آغام مير گولابين مؤعجوزه‌سي ايله، قاپقارا قاراليب، يانيب کول اولاجاق…!«
شوبهه‌سيز سئييدين سؤزلري موفته سؤز دئييل. بو دنه دنه دويولر بيزي دنه دنه طيليسيمه سالاجاقدير. او سئييدين جددي وار، ائله بئله موفته‌سينه دانيشماز کي… بير کيتابي وار نه قالينليغا، من اؤزوم بو گؤزلريمله اونون او قالين کيتابين گؤرموشم. او زامانکي عاغليمي‌الدن وئريب، اؤزومدن سفئه بير اوغلانا وورولموشدوم، بو مير گولاب ايدي کي درديمه علاج ائتدي. او گونلر بيلميرم نييه ايکي اوچ يالان سؤزه اينانيب، ـ حکيم حؤکوم اونا گئده‌جه‌يم ـ دئديم. آتامين کؤتکلري کار ائلمه‌ييب، گونو گوندن، اوز آچيب سيرتيليرديم. يازيق آنام – منيم بالام عاغيل درياسي ايدي – دئييب. شوون شوون نئجه آغلاياردي…!
آنجاق سئييد او موقدس کيتابي ايله يئنه داديميزا يئتيشدي. منيم اوزون طالعيمي‌اوخويوب، چوخلو دوعا يازيب، بوتون طيليسيملري قيريب، يئني‌دن او دريايه بنزر عاغليمي‌منه قايتاردي. آنام ايسه ال آياغينا دوشورکن، باشينا دولانيب ميليون ميليون پول قوربان ائله‌دي بو قوربان کسديييم مير گولابا. اوندان بري بو کيشييه اينانيب، ايمان گتيرديم.
بيز اوشاق اولاندان ايندييه قدر، مير گولاب بوتون دويونلريميزي آچيب، يول گؤسترر. او زامانلار کي آناملا آتامين بو شيرين حياتلاري بير آز آجيلانيب بير بيري‌نين جانينا دوشوب باش گؤزلرين ازرديلر؛ آنام تئز بو کيشي‌نين اوستونه قاچاردي. دوغروسو بو کيشي غريبه بير کيشي ايدي. هلم هلم اله دوشمز.
هله باجيمين باختي‌نين آچيلماسيندان دئسم لاپ عاغلينيز چاشار. باجيمين ايييرمي‌ياشي اولماميشدان، آنام فيکره دوشدو کي بوتون دويونلري آچان، جددينين قاداسين آلديغينا بير باش چکيب، گنج قيزي‌نين طالعينه باختيرسين، بلکه طيليسيمدن زاددان اولسا تئز باختيندان سيلديرسين. نييه کي باجيمين بوتون يولداشلاري باخت ائوينه گئديب، آنجاق اونون باختي هله آچيلماميشدي. دئسم دييه‌جکسينيز بلکه اؤزومدن قوشوب، سيزلره گوپلاييرام. آنجاق سيزين او عزيز جانينيزا آند اولسون اؤزوم گؤردوم، ائله بو ايکي گؤزلريمله گؤروب، بو ايکي قولاقلاريملا دا ائشيتديم. باجيما دوعا يازديراندان بير آي سونرا، بختي نين بوتون باغلانميش يوللاري آچيليب، ائولندي.
سونرالار او دوعاني آچيب اوخودوق. اينانمازسيز! آنجاق عجيبه بير شئي گؤردوک کاغاذين دؤرد بوجاغينا جيزيق چکيب هر کونجونده فارسجا يازميشدي: »بخت باز شود«
آنام دئيير: »بو ظاليم اوغلو کيشي‌نين اللري عيسي پئيغمبرين اللرينه بنزه‌يير، آرتيق باشينيزي آغريتماييم. بيز ايندي نئچه گون اولار کي دنه دنه او آغ دويولر ايله دنه دنه دهشتلي طيليسيملره راستلاشميشيق، آنجاق مير گولابين داوا درمان، دوعا او پيتي‌لري ايله بوتون بو جادولارا غاليب گله‌جه‌ييک. ائله! جددينين باشينا دولانديغيم بو سئييد، دوغروسو يامان کيشييدي‌ها…!
منبع :