سون رومان

بولگه لر سرويسي: ياواش ياواش گؤزلريم آچيلدي. ايکي گول بوتاسي قاباغيمدا ايدي‌لار. يئل اسديکجک گوللر تَرپه‌شيرديلر…

سعيد فيوضات

 بولگه لر سرويسي:  ياواش ياواش گؤزلريم آچيلدي. ايکي گول بوتاسي قاباغيمدا ايدي‌لار. يئل اسديکجک گوللر تَرپه‌شيرديلر…
من داغين باشيندان هئللنديم. به نييه بو ساعاتا کيمين دوستلاريم مني تاپماييبلار؟ دؤنوب هئللنديـييم داغا ساري باخديم. دوستلاريمدان هئچ خبر اَتر يوخ ايدي. ايسته‌ديم يئريمدن قالخام، آما آياغيمين آغريسيندان قيشقيرديم. هله شَلَم چيـيينمده ايدي. شله‌مي آچيب، ايچيندن يئمک گؤتورودوم. آغزيم آچيلمادي. اؤزومو آخارسويون قيراغينا يئتيريب باشلاديم ايمکله‌مه‌يه. هر بير آز قاباغا گئتديگيمده ائله بيل آياغيما قيييق سوخوردولار. ياواش ياواش هئي‌دن گئديب باشيمي يئره قويدوم.
»باشيني قالخيز.«
باشيمي قالخيزيب گؤردوم بير قارا چوخا گئيَن آدام قاباغيمدا دوروب.
دئديم:»سن کيمسن؟«
دئدي: »همان قاراچوخا کي سن ناغيل‌لاريندا يازيب سان!«
دئديم: »اگر منيم قاراچوخام اولسان اوندا گره‌ک منه گؤره هرنه‌يي بيله سن!«
دئدي: »هه، ائله‌دير«‌.
دئديم: »اوندا دئي گوروم، من هانسي ايشي او بيري ايشلردن چوخ گؤرورم؟«
دئدي: »هاميدان چوخ فيکيرلشيرسن«
دئديم: »هاميدان چوخ فيکيرلشن اولارديلار کي ايستيرلر پوللاري کور اولا. اوندان توپ دا وورسالار داغيلمايا«.
دئدي: » ياواش ياواش قاريشديريرام! نئچه‌دنه ايش‌دير‌کي بوتون ايشلردن چوخ گؤرورسن؟!«.
دئديم: »داها دوغروسو ايکي ايش‌دير‌.«
گئده ديشلريني قيرچيلداتدي. اوندان توپانچا چيخارديب دئدي: »ايکيسيني ده دئنن«
دئديم: »وورمايان کيشي دئييل«.
توپانچاسيني آشاغي ساليب دئدي: »حييف، تئز اليمه دوشسه‌ايدين ساچيني يولوب قويارديم قاباغينا، سنده هرنهيي منه دئييردين«
دئديم: » ائله بو؟ بيلسَيديم ائله اولده اؤزوم گلرديم يانينا. آما سن منيم اليمه دوشسَيدن بيليرسن نئيلرديم؟«
دئدي: »نئيلردين؟«
دئديم: »ال قولونو باغلاييب آتارديم پيشيکلريمين قاباغينا. اولار سني يئيرديلر سن ده اؤلردين«
دئدي: »داي بسدير. بئينيم چارتلاردي او ايکي ايشي اؤزون دئنن. من تاپا بيلمه‌ديم«
دئديم: »بيرينجيسي بودورکي ماوالا چوخ گئديرم. ياخشي، بيرينجيسيني دئديم، منه پول وئرهجکسن«
دئدي: »پولو نئيليرسن؟«.
دئديم: »پولو وئره‌جه‌يم اوغلوما«
دئدي: »به بوندان قاباق اؤلوب آخي«
دئديم: »هه دئدين ياديما دوشدو. اوغلوم دوغولاندا اؤلموشدو. آما ائشيتميشم کي رحم اجاره ائليرلر. او پولو وئره-رم رحم اجاره ائله‌رم اوندان دوققوز آي، دوققوز گون، دوققوز ساعات، دوققوز دقيقه، دوققوز ثانيه، دوققوز! داها قالانين بيلميرم.«
گده بيردن آتلاندي اوستومه. بوغازيمدان ياپيشدي. مني بوغوردو. اَليمي قالخيزديم. دئدي: » ياخشي اؤزون دئنن ايکينجي ورديشين نه دي؟«
دئديم: »بورنومو چوخ قوردلاييرام«
گؤزومو يومدوم. گؤزومو آچديغيمدا آخارسويون سسيني ائشيتديم. گورولتوسو چوخالميشدي. گينه باشلاديم ايمکله‌مه‌يه. بيردن خورخور سسي گلدي. يئريمده دونوب قالديم. خورخور سسي منه ياخينلاشدي. بوينومون کؤکوندن باخيب گؤردوم بير آيي گلير منه ساري. باشيمي يئره قويوب گؤزلريمي يومدوم. دوروب قاچماغا اينجاريم يوخ ايدي. آيي ياخينلاشيب باشلادي مني ايگله‌مه‌يه. تهراندا اولان زمانيم ياديما دوشدو. عسگر اولان زمانيمي دئييرم. قارداشيملا بيرليکده قصر ميدانيندان سوووشوردوق. قارداشيم دئدي کي بوندان سونرا داي آتاميزين اوستونده حساب ائله‌يه‌بيلمه‌ريک. اونون داها بيزه اساس بير کؤمه‌يي اولماياجاق. او جار اؤزومو يالنيز گؤروب، چيگنيمده آغير بير يوکو حيس ائتديم. داها قارداشيملا دئييب گوله بيلمه‌ديم. دؤنوب يان يؤرهمه باخديم. گؤزوم توکانلارا دوشدو. مني يانديران بير حسرته توش گلديم. دئديم: »کاش او توکانلارين بيري منيم اولايدي!» ياواش ياواش خورولداماق سسي کسيلدي. باشيمي قالخيزديم. آيي گتميشدي..
***
آرخاسي اوسته دؤنوب گؤيه باخديم. آي الله نه قدر اولدوز وار ايميش گؤيده. گوزلريم پارلادي. بيردن گؤردوم قارداشيم يانيمدادي. دئدي: »قارداش بسدير اؤزونه گل. والله اؤزونه گلمه‌سن سني سيليب پوزارام ياشاييشيمدان«
دئديم: »آي قارداش ياشاييشيمي بير کوپن کيمي وئريبلر اليمه. من او کوپني اود ووروب يانديرميشام. ايندي سن کيمين کوپئنين پوزاجاقسان؟«
اوجار آتام ياديما دوشدو. اونون هئچ بير دوستو يوخ ايدي. اون دؤرد ياشيمدا ايکن بيرينجي رومانيمي يانينا آپارديغيمدا منيم سئوينجيمي گؤروب دئدي:
»انسانين آيدينليغي بو دونيايا بير چاره قيلا بيلمهدي. گوجلولر، آيدينلارين سؤزوندن فايدالانيب فقط اؤز گوجلريني چوخالتماغا چاليشديلار. ياديندان چيخماسين کي چوخ بيلن چوخ چکر. چوخ بيلسن هئچ کيمله دانيشا بيلمهيه جکسن. بو جماعت فقط پوللولارا حؤرمت ائديرلر يوخسا صاباح دئيه‌سن من يازيچييام يا شاعيرم فيلان، اوندا سنين دؤرَن ياواش ياواش بوشالار. ياديندا قالسين چوخ بيلن تک قالار.«
بيردن چوخ مؤمين اولان دوستوم گؤزومون قاباغينا گلدي. دئدي:» آللاها توکل ائله«
دئديم: » من هل البت آللاها توکل ائليرم آما بيليرسن نه وار. ائله بيليرم بوگونکو دونيادا تاري کيشي‌دن بو قاليب کي تکجه وار«.
شيخ فضل الله نوري گلميشدي مشروطهچيلرين ايچينه. دئدي: »درس اوخوماق آزاد‌دير‌. اوغلان اوشاغي اولسون قيز اوشاغي اولسون گره‌ک درس اوخويالار.«
من آز قالديم بوينوز چيخاردام.
دئدي: »هر کيم بيريله دالاشيب يوخسا مال ملک داعواسي وار داها بيزيم يانيميزا گلمه‌سين. گئتسيسن مشروطه ياراتديغي محکمه‌يه. محکمه مستقل اولمالي‌دير‌. بيرينه باغلي اولمامالي‌دير‌.«
اوياندان بورخئسي گؤردوم. گولوب دئدي: » خاورميانه‌نين تاريخي دوّار‌دير‌«.
بير ده گؤردوم بلانشو قيشقيرير: »سن دانيشما! قوي ايچينده‌کي فاجعه‌لر دانيشسينلار. حتي سکوت ايلا!«
اوندان سونرا گؤردوم کي خيام بير قدح گؤتوروب. منه باخيب دئدي: »اوخودوقلاريني و بيلديکلريني حياتا اوزلَشدير. اوزامان دوغرو و يانليشي آييرا بيلرسين.«
دئديم: »آي عمر خيام قارداش بونو احمد کايا دئييب«
دئدي: »فرقي يوخدور او دا بيزدن‌دير«.
بيردن شهرين مفتيسي ياخينلاشدي. آخي ياز فصل ايدي. هر حالدا او دا چيخميشدي يازلانا، يوخسا دا يازي بهانه ائلهييب چيخميشدي چؤله کي گؤره کيم چاخير ايچير. خيامي گؤرن کيمي ائششه‌يين آغزيني دؤندردي خياما ساري. باخيب گؤردوم عمر خيام قدحيني چمنلر آراسيندا گيزلتدي. اؤز اؤزومه دئديم بو قاضي مني گؤرسه خورتدان بيليب، منيم قتليمه فرمان وئرر. آخي او دونيادان گلنلر تزه‌دن اؤلومه محکوم اولورلار. قاچديم آما چوخ اوزاقلاشا بيلمه‌ديم. ائله اونلارا ياخين بير يئرده گيزلنديم. مفتي خياما ياخين بير يئرده ائششک‌دن دوشوب خياما سلام وئردي. خيام دا اونو چوخ خوش قارشيلادي. مفتي خيامين يانيندا اوتوروب باشلادي خياملا دانيشماغا. اوندان عالمين وارليغي حقينده سوروشدو. خيام دا باشلادي بطلميوسدان بئله ارسطو و افلاطوندان دانيشماغا. بير ده گؤردوم مفتينين ائششه‌يي باشيني قالخيزيب منه باخير. چوخ ال ائله‌ديم کي قاباغا گئتمه. ائششک کي ائششک. اولمادي. اوتلايا اوتلايا گئديب قدحه يئتيشدي.
 ائششک اؤزونسن. ياني بئله دولانيرسان کي بيلميرسن او قدحين ايچينده نه وار. منيم خالام دا الان بيلير اونون ايچينده نه وار ايميش. ياخشي من گؤزلريمي يومورام آي ائششک سن ده ائله بيل کي قدحده سو وار اييل اونو ايچمه‌يه. دئ گؤروم سن ائششک‌سن يوخسا ام آي سيکس مامورو کي خيامي اله وئرهسن. ددهنه لعنت اولسون آي ائششک ائششک. منه شينه‌ييب اَييلدي قدحه. ياني سو ايچيرم. سنين رژيستورونا لعنت. آخي بير آکتور اولاراق اؤز نقشيني داها دوزگون اوينايا بيلميرسن؟  آردي وار

منبع :