دلي خانا

بولگه لر سرويسي: ائله بيل گئنه ده چاش باش وورورام. آخي بو نه دئييم اولسون يئکه ساعات آمانيمي قيريب. تيق تيق تيق … بيلميرم هانسي گون حيرصيمي يئمه‌‌ييب ووروب بو ساعاتي اوووق اووق ائله‌يه‌جه‌يم. اوندان آنام منه تپيله‌جک کي واي دده اؤکوزوم اؤلوب باشي قيزيلدان. بير دؤنه بو ساعاتين باشينا قيشقيريب هده بيچيرديم:

سعيد فيوضات

 بولگه لر سرويسي: ائله بيل گئنه ده چاش باش وورورام. آخي بو نه دئييم اولسون يئکه ساعات آمانيمي قيريب. تيق تيق تيق … بيلميرم هانسي گون حيرصيمي يئمه‌‌ييب ووروب بو ساعاتي اوووق اووق ائله‌يه‌جه‌يم. اوندان آنام منه تپيله‌جک کي واي دده اؤکوزوم اؤلوب باشي قيزيلدان. بير دؤنه بو ساعاتين باشينا قيشقيريب هده بيچيرديم:
– سني بئله بئله ائله‌يه‌جه‌يم، دوغرام دوغرام ائله‌يه‌جه‌‌يم، او منه باخان اوزونه بير تپيک گئيديره‌جه‌يم…
ائله اوندا بوينومون کؤکوندن باخيب گؤردوم واي ددم واي، آنام آستانادا دوروب منه باخير. ساغ اليني سول الينين اوستونه چيرپيب دئدي:
– باشيما خئيير. بو لاپ دلي اولوب.
من ده دئديم:
– سؤزوم گل گير آغزيما.
اؤلومدن قورخمورام آما دلي خانادان قورخورام. آخي اورادا آدامي ژاکت‌له قولبند ائله‌ييرلر. ايندي بيردن بورنونون اوجو يا کوره‌ييين قاشيندي نئيله‌يه‌جکسن؟ کيمي باشا ساليم کي اورا ائله جهنمين سول تايي‌دير؟ دئسم دئيه‌جکلر، يوخ شيطانا لعنت. اورا دلي خانا دئييل، اورا دا ائله بير تَهَر مريضخانادير.
بئله من سنه دئييم، ائله دلي خاناني اؤيه‌جکلر کي ائله بيله‌جکسن کمبريجدن، کالجدن زاددان‌دير. اؤزو ده ديپلومي نه‌دير؟ بو آغا دلي ايدي بوردا ياتميشدي. ياخشي بير نومره ايله بوردان ماذون اولدو…
سيزه بير خاطيره دئييم: سون دؤنه دلي خانادا اولاندا، دلي‌لرين بيريسي گليب اوتوردو منيم يانيمدا. منيم قلم دفتريم بؤيرومده ايدي. قلمي گؤتوروب اووجوندا توتوب منه دئدي:
– اووجومدا نه وار؟
قلمين ياريسي دا اووجونون ائشيگينده قالميشدي. دئديم:
– گاميش.
قلمي يئره آتيب دئدي:
– کوو دؤوور. گؤردون.
او زاماندان بويانا قلمه گاميش دئييرم. قوي بيرين ده دئييم آما يوخ دئمه‌سم ياخشي‌دير. چون دئيه‌جکسيز پا آتاونان. گئنه ده بو دئيينگن گليب باشيميزين اوستونده اوروس آللاهي کيمين دوردو. آما من اؤلوم داها قالانين دئمه يين ها کي حتما آناسي انگ اتينه يئريکله‌ييب اؤزو ده گيروانکاسيلا. اؤزوم جهنم، قوي ننه مين حؤرمتي قالسين يئرينده. هردن اؤز اليمدن زارا گليرم. او قدر دانيشيرام کي انگيم هئچ سول قولاغيم يورولوب مجبور اولورام اونو سوندوره‌م ياني تئرن آف ائله‌يم. سوروشساز به ساغ قولاغين نه اولور دئييم کي ساغ قولاغيم بئيار‌دير. هئچ مني سايمير کي يورولسون. ساغ قولاغيم فقط پول سؤزونو ياخشي سئچير. بو بورادا قالسين، قاييداق ساعاتين مسئله‌سينه. سوروشورلار آخي سنين دردين بو ساعاتلا نه‌دير؟
دئييرم:
– بونون سسي باشيما دوشور. هر تيق تيقدا بيليرم کي ايکي تيق تيق قده‌ر قوجالديم، هئچ نمنه ده اولماديم. بير ده مني لاپ دلي ائله ين بودور کي او دقيقه عقربه‌سينه نه قده‌ر باخيرام، اونون ترپشمه‌سيني گؤرمورم!
دئييرلر:
– بابام جان اونون حرکتيني هئچ کيم گؤرمز. سن نئجه اولوب کي بونو اؤزونه بير درد ائله‌ييبسن؟
دئييرم:
– به نجور اولور بارماق بويدا لي لي پوتون شاهي اونون حرکتيني گؤرور من بويدا ايگيد گؤره بيلميرم؟
سوروشورلار کي لي‌لي پوت نه‌دير. دئييرم:
– گاليوئرين کيتابين دا اوخوماساز کارتونونو کي گؤروبسوز. (آها، گرک لي لي پوتون يئرينه دئيم فئرلتيشييا). فئرلتيشييا دئيينجک دئييرلر:
– آخي او کارتون دي!( باهو گؤر نه تئز يادلارينا گلدي).
دئييرم:
– به نئجه اولور کي بير آز باشيم قال اولوب تزه‌دن دؤنوب باخينجا گؤرورم عقربه‌نين يئري ده‌ييشيليب؟ هله هردن ساعاتين دا عقربه‌سي ده، بئله من گؤرمه‌ميش، من بيلمه‌ميش يئري ده‌ييشيلير! آما او جينقيلي لي لي پوت شاهي اونو گؤرور؟
آخيردا اله عاغيل وئرسين دئييب چيخيب گئديرلر.
هله بيرين ده دئييم. واي واي او تلوزيونون اليندن. بير يالانلار دئيير کي آياغيم يئره ياپيشير. او ايره‌لي تروي فيلميني وئريردي. ترويو هومر، ايکي مين ايلدن بير آز چوخ قاباق، ياني ميلاددان قاباق، ايلياددا يازيب. ايکي مين ايلدي کي هامي بيلير پريام اوغلو پاريس، منلائوسون ياني آگا ممنونون قارداشينين آروادي، ياني هلني قاچيرديب. بيزيم تئلوزيوندا منلائوس گئتميشدي هکتورون اوستونه کي نييه قارداشين منيم قيزيمي اوغورلاييب؟ هله اوشين قالسين. بابا اؤزومو ساخلايا بيلميرم دا. هر دؤنه بو يالانلاري گؤرنده تلوزيوني يامانلاييرام. دؤنوب تلوزيونا ساري ديشيمين ديبيندن چيخاني دئييرم. دئييرم:
– يالان دئيه نين دده سينه لعنت.
خاطايا قالميشام. گونده آذان واختي دورونجاق او تيق تيق‌لا تلويزيونون يالانلاري ياديما دوشوب يامان يوووزا باشلاييرام. خالق نامازين قيليب کله پاچاسيني يئييب آغيز بورنونو تميزله‌يير هله منيم يامان يوووزوم قورتارمير…
بير گون گليب مني ديوانا آپارديلار. قاضي دئدي:
– اوغلوم سنين دردين نه‌دير؟ نييه بئله ائليرسن؟
سوسدوم. دئدي:
– اوندا يازيرام گئده‌سن دلي خانايا.
دئديم:
– باشينا دولانارام قاضي مني اورا يازما اوردا هامي دلي‌دير.
دئدي:
– سن نه دئييرسن اوردا ياخشي ياخشي دوقتورلار وار.
دئديم:
– اورادا بير سؤزلر دانيشيرلار کي لاپ بئينيم قاريشير.
دئدي:
– مثلا نمنه دانيشيرلار.
دئديم :
– بير گون او دئديگين دوقتورلارين بيري، دلي لرين بيرينه دئييردي کي کئچميشيني بوراخ گئتسين. هر نه اولوب قورتاريب گئديب. اينديکي زامانا گل. کئچميشه کئچميش دئيرلر. دلي دئدي، به نييه دئييرسيز اولاجاغا چاره يوخدور؟ دوقتور دئدي، بابا گله‌جه‌يي بوشلا، ايندي دن دانيشيرام سنه. دلي دئدي، آخي دوقتور، ائله لاپ الان منه دئديگين کئچميشه کئچدي قالدي کئچميشده. کئچميشي بوراخيم، گله‌جه‌يي بوراخيم به نه يي توتوم؟ دوقتور دئدي، حال حاضري توت. دلي دئدي، آخي من ايسته‌ديييم الان غايب‌دير! اونو ائشيدن‌دن بيلديييمي ده قاريشديرميشام. باشينا دولانارام جناب قاضي او گاميشي آل الينه منيم عفوي ياز گئديم ائوه.
قاضي پؤرتوب دئدي:
– نه؟ نه گاميشي؟
دئديم:
– من قلمه گاميش دئيه‌رم!
قاضي بير آز منه باخيب سونرا دئدي:
– حقينده چوخ راپورتلار وار. تلوزيوني نييه يامانلاييرسان؟
دئديم :
– آخي يالان دانيشير.
قاضي جينله‌نيب دئدي:
– به سن بيلميرسن تلوزيون دولتين وکيلي، سؤزجوسودور؟ سن دؤلته يامان دئييرسن؟ هله ساعاتي نييه يامانلاييرسان به سن بيلميرسن ساعات بيزيم شرعي واختلاريميزي گؤرسه‌دير. سن يا ضد انقلاب سان کي الان يازيرام سني باسسينلار زيندانا يا دا دلي سن کي گرک اوندا يازام دلي خانايا!
زندان سسيني ائشيدينجک بوغازيم قورويوب بئينيم تاققيلدادي.
قاضي دئدي:
– تئز اول دئنن سن نمنه سن؟ دلي سن يا يوخ؟
دئديم:
– يوخ، من دلي دئييلم، زير دلي‌يم.

منبع :