بسته‌لنمه‌ميش ماهني

بولگه لر سرويسي: اوره‌يينده کي آلوولار يوکسه‌لير، اوزوندن باشيندان چيخيردي. اونو اؤلدورمک ايسته‌ميردي، ان آزي بو شکيلده. اووجونو آچيب رنگ‌به‌رنگ حب‌لره باخدي. نه دوشوندوسه الينده‌کيلري توالته بوشالديب سيفونو چکدي.

رقيه‌هاشم‌زاده(خان‌صنم)

بولگه لر سرويسي: اوره‌يينده کي آلوولار يوکسه‌لير، اوزوندن باشيندان چيخيردي. اونو اؤلدورمک ايسته‌ميردي، ان آزي بو شکيلده. اووجونو آچيب رنگ‌به‌رنگ حب‌لره باخدي. نه دوشوندوسه الينده‌کيلري توالته بوشالديب سيفونو چکدي.
 لامپاني يئرينده برکيديب اوردان چيخدي. اوتاغين کونجونده‌کي اوزون آينادا انداميني سوزدو. اليني شورتونا ساليب فيکيره‌گئتدي.
قارشي ديوارداکي شکيلده ‌،بروسلي، الينده‌کي “نانچيکو”يلا اؤزونو آينادان گؤزه سوخدو. سانکي اونو دؤيوشه چاغيريردي.
گولومسوندو. آغلامسيندي.سيندي…سيندي…
ديک آتيليب درحال اليني شورتوندان چکدي. آناسي چيغير-باغيرلا يورقاني اوستوندن چکميشدي.
– مين دفعه دئميشم دورمياجاخسان او ميراث تلفونون آلارميني سؤندور. سحردن وورهاي چالير، دا باشيم شيشدي.
يوخومو گؤرموشدو؟ ساعاتا باخارکن ماسانين اوستون‌ ده گؤزدن کئچيرتدي. اون‌ايکي ياريم ايدي. قلمدن کاغاذدان اثر يوخ‌ايدي. ايکي درسي قاچيرميشدي. صينيفده‌کي‌لر ايندي ياواش-ياواش سئلفه گيريردي.
“اولار يئمک‌لريني يئيينجه دوش آليب يئتيشه‌رم” دئيه دوشوندو. ياتاقدان ائندي. ايپيني دارتاراق زئبرا پرده‌ني يوخاري ييغيب، پنجره‌ني تاي با تاي آچدي.
بادام آغاجي چيچک‌لري‌نين عطريني هر طرفه ياييردي. قوللاريني ايکي ياندان سون درجه آچدي. عطيرلي هاواني جييرلرينه سيزديريب گرنشدي.
 سونرا بير الي‌له خفيف يوموروق‌لاري سينه‌سينه دؤشه‌ييب کؤکس اؤتوردو.
صينيفه گيرديينده، سئودا ويديو پروژئکتور پرده‌سيني آچاراق کنفرانسا حاضيرلانيردي. هر طرفده اوچ بئش نفر توپلاشيب، اوغلانلي- قيزلي دانيشيغا مشغول‌ايديلار؛ آغيز دئيه‌ني قولاق ائشيتميردي.
اوستاد هله گلمه‌ميشدي. يئرينده ايله‌شيب تاريخ کيتابيني چانتاسيندان چيخارتدي. بيرينجي دفعه بو درسه ماراق گؤسته‌ريردي. عموميتجه يا صينيفه گيرمز يا ياريدا بوراخيب بير بهانه‌يله ترک ائدردي. سئودا، تريبون آرخاسيندا دوروب لپ‌تاپي‌‌ايله قورتدالانيردي. دوشوندو کي: او، بو يونيفورمون ايچينده بئله روس گؤزل‌لريندن سئچيلمزدي. اونو وصف ائتمه‌يه هر کلمه‌يه أل آتير هئچ بيريني لاييق گؤرموردو. يئني و بيرچوخ کلمه‌لره احتياج دويوردو. قوجاغيندا قيميلدانان اورقانا و اونا قارشي اولان هئچ بير حيسسينه باشقا رغبت‌لري کيمي گؤز يوما بيلميردي. بونلاري،موطلق ياشاتماق ايسته‌ييردي.
“آننم آننم بن نه گون‌لر گؤردوم. آننم آننم بن نه آجيلار چکديم.آننم آننم…”
سوکوت، ال‌لريني هر کسين آغزينا ياماسادا بونو ياخشي باجارمادي. هر طرفدن بير آتماجا سسي قووزاندي.
– جاناااااا!
– قيز! عاغيللي آدام دا آيفونا بو زنگي قوشار؟
– اووووفففف!
– جان ملک!
آناسيني جوابسيز قويا بيلمزدي.کوريدورا چيخيب تلفونو جاوابلادي.
– آلو. هه ماما؟
سس گلمه‌دي. باغلانتي کسيلميشدي. سون آرامالاردان آناسي‌نين آديني تاپيب اوستونه ووردو.”The person you have called can not be reached…” باغلانا بيلمه‌دي.
آنتئني يوخدور دئيه دوشوندو. تلفونو ويبره مودونا قويوب صينيفه قاييتدي.
اوستادلا بيرگه قاپييا يئتيشيب ايچه‌ري گيرديلر. ايندي اؤز يئرينده شومشه کيمي اوتوروب، اؤنه دوغرو باخان آکوستيک کيرلي‌لييي يارادان سايکوپات‌لارين نفس سسي بئله دويولموردو.
اوستاد سئودايا “باشلا”دئدي. اونا باخماقدان دويمور يورولموردو. سيماسيندا هانسي‌سا بير ملک گؤرور گؤزلرينده هئچ بسته‌لنمه‌ميش بير ماهني‌نين يازيلماميش سؤزلريني اوخويوردو. اونو آياق باسيلماميش آدالار کيمي باکيره، آزاد سولار کيمي درين، تاريخده باسديريلميش خزينه‌لر کيمي زنگين، گؤروردو. سئودا او خزينه‌لردن دانيشيردي.
ساغ بودونو قيجيشديران تيتره‌ييش اونو اؤزونه گتيردي. تلفونونو جيبيندن چيخاريب آناسيندان گلن مئساژي آچدي: “بابان نوخوشلويوب، تئز کرخانييا گل”
کيتابيني تلفونونو چانتاسينا آتيب ايذين آلمادان تلم-تله‌سيک صينيفدن چيخدي.
فابريک‌ين اوجسوز بوجاقسيز حيطينده آناسيني گؤردو.
عاييله‌ وکيل‌لري ده گلميشدي. آمبولانس و پليس ماشين‌لاري دا وارايدي. اوست-باش‌لارينا پانبيق سوواشميش ايشچي‌لر، باش‌لاريني يئره ديکميشدي. بيري‌نين قوينونداکي ال‌لري او بيري‌نين باشماغي‌نين بورنونو بير چينقيل اوزه‌رينده اويناتماسي، آغير بير حاديثه‌دن خبر وئريردي.
آناسي اونو گؤرر-گؤرمز قاباغينا قاچيب قوجاقلادي. هؤنکور-هؤنکور آغلايان قاديني باغرينا باسيب اونا توختاق اولماغا چاليشيردي. جنازه‌ني قارا بير کيسه ايچينده آمبولانسا داشيديلار. پليس مأمورلاري‌نين بيري گؤنده‌ريلن اورژانس دوکتوري له دانيشيردي.‌
آناسيني يانينا آليب قولونو اونون بئلينه دولادي. بير نئچه آدديم آتيب اونلارا چاتديلار. اؤلوم سببيني اؤيرنمک ايسته‌‌دييينده ايلک معاينه‌ده “اينفارکت” تشخيص وئريلدييني دئديلر.
آناسيني يانينا آليب قولونو اونون بئلينه دولادي. بير نئچه آدديم آتيب اونلارا چاتديلار. اؤلوم سببيني اؤيرنمک ايسته‌‌دييينده ايلک معاينه‌ده “اينفارکت” تشخيص وئريلدييني دئديلر.
ايچينده‌کي کدر، گؤزلري آلماياجاق قدر آغير و نهنگ ايدي.
آلمانيادا ياشايان قارداشي اؤزونو دفن مراسيمينه يئتيرميشدي.
باشيني قالديريب باداملاردان بيريني بوداقدان اوزدو. ايکي بارماغيندا توتوب قولاغي‌نين ديبينده لاخلاتدي”هههه ايندي قينيندان چيخماغا حاضيرسان”دئييب قاققاناق چکدي.
بينايا دؤنوب اوتاغينا تپيلدي. ماسانين آرخاسيندا يئرله‌شرکن يازماغا باشلادي.
اون اون‌بير ياشلاريمدا او بيري قيزلاردان فرقلي اولدوغومو آنلاديم. اورتا مکتبده بو داها دا آيدين شکيلده اؤزونو گؤستردي.
 توالتده گؤردويوم قانلي پد‌لر، آينا قاباغيندا قورخويلا هيجان قاريشيق ماتيک ياخمالار، مکتب ديشي اوغلان‌لارلا گيزلين گؤروشمه‌لر و نه‌لر نه‌لر کي من هئچ بيريني بو ياشا کيمي تجربه ائله‌مه‌ديم.
 قولچاقلاريم هله ده ال‌ديمه‌ميش قالير آمما، اوره‌ييم ايسته‌دييي قدر توفنگ سينديريب، توپلار ييرتديم.
آنام اوشاق ياشلاريمدان بونو سئزسه ده منيم قيز اولدوغوما اينانير، قيز کيمي يئتيشديرمک ايسته‌‌ميشدي.
 تام باشقالاشميش بير گؤوده‌ ايديم. اون‌دؤرد ياشا کيمي ائله ده چتينليک چکميرديم آما، هر ياشا دولدوقجا، هر يئني بير فرقي کشف ائتديکجه روحوم سيخيلماغا، و داريلماغا باشلاييردي. سانکي بو بدن اونون اوچون چوخ اينجه، چوخ داريسقال‌ايدي. ائوده تمامن بير اوغلان کيمي دولانسام دا قاپيدان چيخينجا اويونچولوق باشلاييردي. آرادا بابامدان گيزلين آنامي قوروب آزمايشه گئتمه‌ييميزي ايسته‌ييرديم. بونو باشارسام دا هئچ نه دييشمه‌دي.
 ترنس سکشووال اولدوغوم ايثباتلانميشدي. بوتون سندلر و مدرک‌لره داياناراق هشتاد فاييز اوغلان اولدوغوما رغمن، بابام جينسيت دييشمه‌ييمه مانع اولوردو. عمل اوچون ميليونلار پول احتياج ايدي. باباما گؤره بو پول ائله ده چوخ دئييلدي آنجاق کونازليغينا ساليب “وئرميرم کي وئرميرم” دئييردي.
ايندي آرادا هئچ بير مانع يوخدو. بابامين دفن مراسيمنده قارداشيمي گؤردون. بوردايکن چوخ يارديمي کئچدي. تک جانينا بوتون ايشلريمين داليسجا قاچيب هامي‌سيني يولونا سالدي.سندن اونا چوخ دانيشميشام. گؤزلليييندن. خانيمليغيندان. يئني دوغولموش کؤرپه‌لر قدر حيات‌دان دولو و عينادلا داشي ياريب حياتا باشلايان چيچک‌لر قدر اوميدلي اولدوغوندان. اوزون سوزون قيساسي، سني دليجه سئودييمدن.
ايندي گؤزله‌ييريک؛ او آلمانييا دا مني، من بورادا ويزامي.
ايمضا: ؟ (ملک)
کاغاذي بوکوب پاکاتا قويدو.
مملکتين سون اون ايلده گؤردويو آغير قيش‌لاريندان بيري‌ايدي. تبريز هر زامانکيندان داها گؤزل، داها تمکينلي گؤرونوردو. قوجاق دولوسو چيچک‌له اونو داياناجاقدا قارشيلايان آناسيني ائوه بوراخيب “من بير ساعاتا قييده‌رم ” دئدي. دانيشماغا هله چوخ سؤزلري وار ايدي. آناسي اليني سئيرک ساققالينا چکيب” سنه قوربان اولوم قوورما سبزي پيشيره‌جييم تئز قييد” دئييب، ماشين گؤزدن ايتينجه داليسيجا باخدي.
يولونون آغزيندا چيچک‌‌ساتان دوکانا دؤنوب قيرميزي هلند رزلاريندان بير باکس چينلتدي. بيلديييي آدرسه دوغرو دورمادان، سوردو.
شاختا ياريم آچيق شوشه‌دن چيرپيليب اوزونو قامچيلاييردي. اوره‌يينده کي يارالي سئرچه اوچماغا جان آتير، اؤزونو او يان بو يانا چيرپيردي. سئودانين، اونو نئجه قارشيلاياجاغينا چوخ ماراغلي‌ايدي. بو تابلو قورخو آدلي بير چرچيوه ده يئرلشميشدي.
کوچه‌يه گيردي. قاپييا بيرآز قالان دايانيب کؤکسونده ييغيشان هاواني بوراخيب، دردي. اؤنده‌ پارک اولان ماشيندا، ايکي قيز گؤردو. سئويشيرديلر. ” لزبين” سؤزجويونو يادداشيندان ائنديردي. درين بير آه چکيب” نئيله‌مک، سيزده حياتدان بئله لذت آليرسيز” دئدي.
بيردن گؤزو قاپيدان چيخان قيزا ساتاشدي. مارال ايدي. همين ماشينين دال قاپيسيني آچيب اوتوردو. ماشين يولا دوشدو. بير آن ايچينده دوز قولاغي‌نين ديبيندن کئچديلر. اؤنده اوتوران‌لارين بيري سئوداايدي. تبريز بوز دؤورونه قاييديردي…
سون

منبع :