– ”صاباح اوشاقلارين گؤزلري يولدا قالار. من اونلارا سؤز وئرميشم آخي“ دئديم. مسعود ايسه: کدرلنمه،‌ سن صاباح گون آچيلماميشدان کنده چاتا بيلرسن. دئدي. چايچي‌ اسنه‌يه‌رک منه سؤز وئردي کي، صاباح هله مني آلا- توراندا، يوخودان آييلداجاقدير.  چايخانانين سؤنن ايشيغيندان، ‌مسعود ايله منيم کؤلکم ديشاردا، قارلارين اوستونده دؤشنميشدي. قارين آلتيندا بوتون آغاجلار قينميش و ديوارلارين قارا- قورخو… سايه‌لري هر يئره هوپموشدو. صاباح آلا- توراندا گئتمه‌ييمه راضيلاشديم. اؤزومو سوبايا طرف چکديم. سوبانين ايستيسينده قيزينديم. مسعود چايچي‌نين تاختيندا ياتدي. مسعودلا بير مکتب‌ده اوخوموشدوم. سونرالار اودا منيم کيمي‌معلم اولموشدو. يئرده اوزانيب ياتميش قوجا بير کيشي خورولداييردي. کنددن تزه‌گلميشدي؛ گئجه ايدي. قار ياغيردي… چايخانانين سوکوتو، چايچي‌نين خور- خورو- و مسعودون يوخودا چئينه- توپور دانيشيغي: صاباح … آلا- توران … گئتمه‌لييک … قار …بيردن قوجاکيشي‌نين باغيرتيسي‌هاميني يوخودان ديک قالديردي: آي‌هاراي داديما چاتين … اوغورلاديلار … داديما …چايچي دئيينه- دئيينه:“نه خبرين کيشي … شوکورلر کي بيز زاددا يئمه‌ييبسن“ دئدي.قوجا کيشي يوخولو- يوخولو:“يوخودا گؤردوم کي، پوللاريمي‌اوغورلاييرلار“ دئدي. چايچي استهزا‌ايله سنين پوللارين‌هاردايدي آي بختي قارا- جاواب وئردي. سوکوت باشلاديقدا يئنه‌هامي‌ياتديلار. ديشاردا الکتريکا آغاجلاريندان آسيلان لامپالار دارا چکيلميش کيمي‌ايدلر. آنجاق هر يئر ايشيقدا جانلانيردي. قارلار، ياغا- ياغا سوزمان کيمي‌اويناقلايير و الکتريکا آغاجلارينين آياقلاريندا يئره قونوردولار، بير دسته گؤيرچين کيمي، سانکي … بيريسي مني ييرغالاييردي. چايچي ايدي. هله‌ده قارانليق ايدي. آنجاق لامپالار ديشاردا سؤنمه‌دن يانيرديلار. قار دايانمادان ياغيردي. من پوتونلاريمي‌آياقلاريما گئيديم. مسعود تاختين بير کونجونده سيغينميشدي. اودا کنده، مندن گئج گئده‌جک ايدي. چايچي:“بير زاد يه- ايچ، اوره‌ييني توتسون“ دئدي. من ”يعقوب خان، اوندا گئجيشه‌رم“ جاواب وئرديم. يوخولو حالدا، اشاره‌ايله:“الجک‌لرين قالماسين“ دئدي. چانتامي‌گؤتوروب، وداعلاشديم. قار ديزه‌جک قالخيردي. اوفوقده يالنيز، بير ايزجه ايشيق گؤرونوردو. خوروز بانلاييردي. چانتام کتابلا دولو ايدي. قارايسه آياقلاريم آلتيندا قيريچ- قيريچ ائديردي. بيردن دايانير، قارلارين آياقلاريم آلتدا سينماسيني دينله‌ييرديم. داها، قارا ياغميردي. کنديولونو ياخشيجا ايزله‌يه‌ بيليرديم. آغاجلار جيليز قول- بوداقلاريني يولدا سرميشديلر. کوچه‌لرده گليب- گئدنلرين اؤنونده، ديلنچيلره ‌تاي، باشيمي‌يئره سالميشديم. آغاجلارا: مني آرتيق اوتانديرمايين آغاجلار، آخي وار يوخومو، بوتون کتاب آلميشام دئييرديم، آغاجلارا. چانتامي‌يوخلاديم. ‌هاوا سويويوردو. اوزاقدان شهرين باشيندان ائله‌ بيل کي توستو قالخيردي. يولو يارييادک گئتميشديم کي، اوزاقلاردا گؤروندو.‌هامان، اؤزو ايدي يعقوب‌خانين دئدييي. بير آز منه ساري گلير، قاييدار، کومالارين آرخاسيندا اؤزونو گيزله‌ديردي. بير آزدان يئنه گلدي. دوز منيمله ياناشي؛ يولدان بري. اوشاقلارين‌هاي-‌هارايي قولاقلاريمدا دولاشيردي:“بيزه نه کتابلاري گتيرميسينيز، آغا؟“ ”گئجه، سحره دک سئوينجدن ياتماميشيق“. ”صمد‌دن‌مي؟! … گتيرميش‌سينيز؟!“

اؤزونو گيزله‌دَر، قاييدير، منه ياخينلاشيردي. قارين اوستونده سوروندويونو حس ائديرديم. ايشاران گؤزلريني منه ديکميشدي. کؤکسوم آغير اؤتورولوردو. قورخو کوره‌ييمده قالاخلانميشدي. آياقلاريم سوستلاشميش، کمريمده بيرنسه ذوققولداييردي. آغزيمين سويو قوروموشدو. آغزيم آجي قوخويوردو. يئنه يولا دوشدوم. اودا منيمله گلدي‌هاماش- بير ايزده.

هاوا چوخ اوزاقلاردان آچيلير و گونشين ضعيف شعاسينين قارلارين اوسته انعکاسي گؤزلريمي‌دؤيوردو. کند لاپ اوزاقلاردان چونبه‌لتمه وورموش، قارلارين اوستونده اوتورموشدو. يولون قيراغينداکي آغاجلار، باشلاريني يئره ديکه‌رک دورموشدولار. چانتامي‌يوخلاديم. قورد‌هارلانميشدي. بوتون وار يوخ دقتيني منه ديکميشدي. قاييتديم، قاييتدي. اوتوروب بير اوووج قاري اللريمده کونده‌له‌ديم. آنجاق قوردا طرف توللاماديم. قورخدوم کي قوردو حيرصلنديرم. تپه‌ني آشاغي طرف يولا دوشدوم. کند آپ- آچيق گؤرونوردو. قورد ديشلريني قيجيردي. بير نئچه قورددا‌هارادان تاپيليب- گلميشديلر. قورخومدان دالي- دالي گئديرديم. چانتامي‌کؤکسومده يوخلاييرديم. قورد جلدلشه‌رک منه ياخينلاشيردي. ديشلريني بتردن قيجيردي. من بيردن کنده ساري گؤتورولنديم. آرخامجا قاچيردي. چانتامي‌اليمه کئچيره‌رک قوردا ساري دؤندوم. وار گوجومله قوردا هجوم گتيرديم. کتابلاريمدان بير نئچه‌سي چانتامدان آچيليب، واراقلاناراق هنده- وريمده قارلارين اوستونه توللاندي. قورد قورخدو. دايانيب- دالي اوتوردو. منده اوتوروب کتابلاريمي‌ييغماق ايسته‌ديمسه، قورخوردوم. قوردلار ايندي داها، مني دؤوره‌له‌ميشديلر. قولاقلاريما نه‌ايسه بير آت آياقلارينين سسي دَيدي. کنددن‌هاي-‌هاراي قاوزانميشدي. بير آتلي منه ساري گليردي. جرئتلنه‌رک يئني دن چانتاملا قوردلارا يوگوردوم. آياقلاريم بيردن زويوشوب اوزوم اوسته قارلارين اوستونده سره‌لنديم. اوزوم بير داش کيم‌يه توخوندو. درد بوتون جانيما سوواشدي. اؤز بوغولموش‌هاراييمي‌ائشيد‌ر، هوشدان گئتديم. بيرينجي، نعمتين سيماسيني گؤردوم. خيرداواتچي ايدي. سحر ائرکن يوکونو چاتار خيرداواتلاريني ساتيش اوچون ياخين کندلره آپاراردي. دوداقلاريم يانير و بورونوم گؤينه‌ييردي. اؤز اوتاغيمدايديم. اوستومده يورقان سالينميشدي. اوشاقلاردان بير نئچه‌سي بيرده قونشولوقداکي خانيم، کدرلي حالدا دؤوره‌مي‌آلميشديلار. چتين بير حالدا ”نعمت جان، کتابلاريم … کتابلاريم … ” دئيه- سيزلاديم.– آغا، قوردلاري دَيه‌نکلريميزله قووالاديق، دئدي- نعمت. قارقا قاريلتيسي کيمي‌بوغازيمدا قاريلدانديم. کتابلاريم … کتابلاريم … نعمت‌ايسه بو دؤنه:“باخ، اودور، ‌اوتاغين کونجونده …‌هاميسي ساغلام دير“ دئدي. راحاتلاشديم، آستا- آستا اوزومو چئويرديم؛ اوتاغين بير کونجونده چانتامي‌گؤردوم. سانکي دانيب- سينه گرميشدي. ائله‌بيل کي اوره‌کدن گولوردو چانتام. بير نئچه‌سي کتابلاريمدان يئره دؤشه‌نيلميشدي. کتابلار يئري ايسلاتميشدي.