کيشي اللري بئلينده، ايتييي ايتميش کيمي، حيطين بويوندا وار-گل ائدير. گوللو قوناق اوتاغيندا سيزيلدايير. زاريلدايير. قمر اکيزتايي اوغلانلاري پيلله‌کان اوستونده اوتوردوب، نوبه‌ايله قاشيق- قاشيق يئمک يئديردير. کيشي نين يومورتاسي ترسه دوشوب سانکي. بير يئرده دورا بيلمير. بير آن قوناق اوتاغيندا‌هاي قوپور. کيشي ايکي اللي باشينا چالير:» ائويم ييخيلدي!« دئيير. قمر کيشي‌يه باخمادان اکيزتايي‌لارا يئمک يئديردير.

ـ »قمر!… قمر!… قمر!…« قمرايسه کيشينين سسيني ائشيتمه‌ميش کيمي‌يئريندن قالخمير. سيزيلتي سسي هر‌هانکي بير خارابادا يووا سالميش بايقوشون سسيدي سانکي ائويني بورويوب. اونا ائله گلير کي »قمر« سؤزو هيجا- هيجا دهليزده‌هاوالانديقدا دام- دوواري کرپيچ- کرپيج باشينا ييخيلير. اويسه ييخيق دووارين آلتيندا قالير…

-»قمر…قمر…قمر…« ندنسه بو گئجه کيشي‌نين سيزيلتي‌سي گوللونون سيزيلتيلارينا اوخشايير قمر دفعه‌لرجه اوريينده دئيسه‌‌يدي ده، گوللو آيدين- آشکار حيطين اورتاسيندا کيشي‌يه باغيرميشدي:»سني گؤروم پيس درده دوشه‌سن« دئميشدي. قمر اؤنونده‌کي قارين وئرميش دوواريلا دانيشيردي سانکي:»نه ده پيس درده دوشدو کيشي! دردين آغيرليغي گوللونون اوزرينه يوخ، خاراباليخ کيمي‌منيم باشيما چؤکدو. ساعتدان بير قانا بولاشميش سودوکلو ملفه‌لري ييغيشديران گوللو دئييل‌ کي، پوخلو، قانلي، سودوکلو ملفه‌لري سودا يوماخدان اللري قارييان گوللو دئييل کي،بئلينين قاتي آچيلمايا- آچيلمايا، کيشي‌نين لشيني قالديريب، ال- آياغينين پوخ- پوسورون ساهمانلايان گوللو دئييل کي!« -»قمر…قمر…قمر…« »آللاه سني باغيشلاماسين گوللو! ائله قارغيش ائيلييردين کي، عوضيني ده اؤزون اؤدويردين آخي!« قمر گؤزونو اؤنونده کي قارين وئرميش دووارداکي سينما پرده سينه زيلله‌ييب… قاپي آچيليب، کيشي گوللودن اؤنجه حيطه گيردي. گوللوايسه قيپ‌قيرميزي دوداقلاريلا کيشي‌نين آرخاسيندان اونا باخيب، ريشخندايله گولدو. گوللو او ائوين يابانجيسي دئييل‌دي. کيشي‌نين قارداشي اؤلندن بري، کيشي داها هميشه‌کيندن آرتيق قارداشينين ائوينه گئت- گل ائديردي. قمر باشقا قادينين قوخوسونو کيشي‌نين وجودوندا حيس ائتميشدي. قمر سس‌سيز سميرسيز تشتين ايچينده‌کي کيرلي پالتارلاري چنگه‌له‌دي. کيشي گوللويله اوتاغا کئچمه‌ميش: »قوناق اوتاغيني گوللو اوچون حاضيرلا! بو گوندن، او دا بو ائوده قالاجاق« دئدي. قاپي داليندان، »اوشاق‌لاري قويما گيرسين« دئييب، پنجره‌لرين پرده‌سيني سالدي. قمر وار گوجويله الينده‌کي چنگله‌له‌ميش پالتاري کيرلي سويا چيرپدي:« ائوين ييخيلسين، ائويمي‌ييخدين کيشي!« -»قمر…قمر…قمررررررر« گوللو سيزيلدادي:» بو نه اوددو دوشدو جانيما قمر… قمر‌ايسه قوناق اوتاغينين پنجره‌سينين هئره‌سينده اوتوروب، يورغان دؤشک ايچينده ياتميش گوللونون ساپ-ساري سارالميش گؤزلرينه باخدي. آغ- آپباق بنيزينه سانکي بئش ميثقال ساري کؤک اله‌ميشديلر. قاريني طبيل کيمي‌اولموشدو. نئجه ده اونون خسته لييندن خبرسيز گونو گوندن شيشن قارنيني يئني دن قيسقانميشدي. بويلو اولدوغونو سانميشدي. -» قمر…قمر…موشتولوغومو وئر؛ اوغلاندي…« کيشي گوله- گوله قمرين اوتاغينين قاپيسيني آچيب، باغيرميشدي. قمرايسه جوت قيزلاريني باغرينا باسميشدي. کيشي گئتديکدن سونرا اليني يئددي آيليق بويلو اولان قارنينيا چکميشدي:» آللاه! مني اوزو قارا ائله مه« دئميشدي. -»قمر!…آي قمر…« قمر زيققيلديا- زيققيلديا زور وئرير. قارني دوغراق- دوغراق اولور. بئلينين موهره‌لريني بير بيريندن آيرييلار. دوداغيني ديشي‌ايله سيخير. باغيرماغي گلير. حئيوان کيمي‌نعره چکير… -» اوغلاندي …اوغلان….موشتولوغومو وئر، اوغلاندي، اوغلان!« قابيله‌يه يارديم ائدن آناسي‌دير قاپيني آچيب کيشي‌يه سؤيله‌يير. قمرايسه سود گؤلونه دوشور. وجودونو سونسوز بير آرخايينليق بورويور. ياش گيله‌لري ياسديغيني ايسلادير… -»قمر…قمر…‌هارداسان قمر؟« قمر اوغلو نو باغرينا باسيب، دهليزدن حيطه چيخير. گوللو قوناق اوتاغينين ائيوانيندا اوتوروب اوغلونو اميشديرير. کيشي ايسه الينده‌کي سيجيللي لري قمره وئرير:» ائله ايکيسيني ده سنين سيجيللينه يازديرديم. ايکي آي بير شئي دئييل کي! ائله اکيز تايي يازديرديم، قوي اکيزتايي قارداش کيمي‌اولسونلار بير-بيرلرينه…« قمر دونوخوب،ائيوانداکي گوللويه باخير. گوللو کؤرپه‌سيني دؤشوندن آليب، ائيواندان قوناق اوتاغينا قاچارکن:» سني گؤروم پيس درده دوشه‌سن کيشي! اوغلومو اليمدن آلدين…« -» قمر…قمر…قمر…« قمر اليني دووارا داياق ائديب يئريندن قالخير. دووارين قارين وئرميش گچ‌لري خالچانين اوزرينه توکولور. ايکي قات اولموش بئليندن توتوب، کيشي‌نين اوتاغينا ساري گئدير. گئجه‌نين قارانليغيندا‌هاردانسا بايقوش سسي گلير…. قمر…قمر…      قمر…قمر…