بيري اوزاق‌دان باخيردي، بيري ياخيندان.‌ اوزاق‌دان باخانين آدي ائله اوستونده‌ايدي.‌ اوزاق‌دان باخان، بالاجا نسنه‌لري گؤره بيلردي‌مي؟ نه اوچون اوزاق‌دان باخانا قاش‌سيز، کيرپيک‌سيز، اوزـ گؤزو شيشميش، قيريشيق‌لي بيريسي‌ايدي، ياخيندان باخانا هله ده گنج.‌ بلکه ده اوزاق‌لارا باخيب نئچه ايل سونراسين گؤستريردي.‌ بلکه ده اؤزو دوربين‌ايدي، ياخيني ياخشي سئچه بيلميردي.

بلکه ده بونلارين بيري يا دا هر ايکيسي، بلکه ده اؤزو جيغالليق ائيله‌ييردي.‌ هر حال‌دا شکيل‌له، گوزگونون آراسيندا آسيلي قالميشدي.‌ بلکه ده دوربينده گؤز، گؤزو اوزاق‌دا گؤروردو، آمما گؤز، گؤزدن اوتانيردي گوزگوده؟

اؤزونو ايکي جور ـ بير جور گؤروردو.‌ بيلميردي شکيلين چکديرسين يا دا گوزگونون قاباغيندان دالي چکيلمه‌سين.‌ بيري شکيل ايسته‌ينده اؤزونو گوزگو قاباغيندا گوستره بيلردي‌مي؟ شکيل وئرمه‌لي اولسايدي دا، بير گوزگو يانيندا آپاريب، بير دؤنه ده گوزگوده اؤزونو گوسترمه‌لي‌ايدي.

دوز اولسايدي «گؤزلين شکيلي ياخشي چيخماز.‌» اوره‌يي بير آز ساکين‌له‌شردي، بلکه ده بو جور دئييب‌لر، هئچ کيمين اوره‌يينه ديمه‌سينلر؟ اؤزـ اؤزونه دوشوندو.‌ يادينا دوشدو اونا دوزلي دئينده ده اؤزونه دَيَردي.‌ هر دن ده فيکيرله‌شير اصلن گؤزل نه جور اولار، دوزلي نه جور؟ کيم دئيه بيلر گؤزل کيمدي، دوزلي کيم؟ بعضي يئرلرده بورداکي اؤلچولرده بيريسي تاپيلماز، اونلارين ايچينده ياني گؤزل‌دن، دوزلودان يوخدي ديبيندن؟ اولا کي اونلارين دا اؤز اؤلچولري وار؟ بو اؤلچولري کيم قويوب؟ اصلن بو اؤلچولر دوزدي؟

بير کارانداش‌لا کاغيذ گؤتوردو، نئچه جور آدام چکدي.‌ آدام‌لارين هر يئرلريني (قاش، گؤز، کيرپيک، بورون، آغيز، باش، توک، ال، آياق، گؤوده و ...) بير دؤنه اوچ بوجاقلي، بير دؤنه دؤرد بوجاقلي، بير دؤنه گيرده، بير دؤنه.‌.‌.‌، هر بويادا چکدي.‌ هره‌سي بير جور اولسايدي‌دا‌هامميسي اونا باخيردي،‌هامميسي اونون‌لا دانيشيردي.‌‌هامميسي‌ني هر دوروم‌دا چکدي، گولومسر، هيرسلي، شاشقين.‌.‌.‌ بيلميردي گؤزلديلر يوخسا دوزلي؟ بيري اوچ بوجاقلي باخيردي، بيري دؤرد بوجاقلي، بيري گيرده.‌.‌.‌ باخيش‌لاريندان اوتاناراق، اؤز عالمينده، خواهيش ائليرم اوچ بوجاقلي، دؤرد بوجاقلي، گيرده ... گؤزلرينيزله باخيرسينيز دئيه گولومسه‌دي.‌ سونرا بونلاري بيرـ بيرينه قاريشديردي.‌ اوچ بوجاقلي‌نين گؤزلريني چکدي دؤرد بوجاقلي‌يا، گيرده‌نين آغيزيني چکدي اوچ بوجاقلي‌يا.‌.‌.‌ بيريني آغلاتدي، بيريني يوخلاتدي، هر نه اويونو وارايدي چيخارتدي، بونلارين‌هامميسيندا،‌هامميسي يئنه اونا باخيرديلار، اونون‌لا دانيشيرديلار.

بونلاري نه جور آييرا بيلردي.‌ آييرا بيلسئيدي ده او دئودي بو ملک، يا عکسينه اولان زامانينا قاييتماق ايسته‌ميردي.‌ مه‌يه‌ر ايکيسي‌ ده بير يئرده اولا بيلمزدي؟ هم دئوليک، هم ملک‌ليک،‌هابئله هم دوزلولوق، هم گؤزلليک، هم قوجاليق، هم گنج‌ليک، هم.‌.‌.‌ هم.‌.‌.‌؟ بلکه ده خط‌کش‌له آييرماق اولموردي بونلاري داها.‌ ائله سيخ بيرـ بيرينه ايليشميشديلر کي، آيريلسايدي‌لار دا اوندان بونا ياپيشاردي، بوندان اونا.‌ هر دن بير ده يئرلريني دييشيرديلر، يئرلريني دييشنده آرا بير بير بيرينين اوستونو توتوردولار، بيري گؤرسه‌نيردي.‌ اوندا اونا دئو دئمه‌لي‌ايدي يا ملک، دوزلي يا گؤزل، قوجا يا گنج؟