قارا بولودلار گونشين قاباغيني آلديلار‌

بولگه لر سرويسي: باليقچيلار اونون لشيني چوخلو زحمت‌ايله باليق توروندان آييريب‌، چايين قيراغيندا يئره اوزالتديلار. قوجا تيتره ين اللري ايله توتون قوتوسونو تيتره ين ديزلرينين اوستونده آچيب‌، تله سيک بير سيگار ائشيب قورو دوداقلارينين اورتاسيندان سارالميش ديليني سيگار کاغاذينين اورتاسينا چکه‌رک آليشديراندان سونرا درين بير نفس ووروب “اونو چايا بوراخين گئتسين، يوخسا شيديرقي بير ياغيش ياغاجاق” دئدي.

محمد سرافراز قراملکي

بولگه لر سرويسي: باليقچيلار اونون لشيني چوخلو زحمت‌ايله  باليق توروندان آييريب‌، چايين قيراغيندا يئره اوزالتديلار. قوجا تيتره ين  اللري ايله توتون قوتوسونو تيتره ين ديزلرينين اوستونده آچيب‌، تله سيک بير سيگار ائشيب قورو دوداقلارينين اورتاسيندان سارالميش ديليني سيگار کاغاذينين اورتاسينا چکه‌رک آليشديراندان سونرا درين بير نفس ووروب “اونو چايا بوراخين گئتسين، يوخسا شيديرقي بير ياغيش ياغاجاق” دئدي.
کيمسه اونون سؤزونه اؤنم وئرمه‌دي‌. گنج اوغلان بير حالدا کي ايندي اؤزونه گلميشدي جنازه‌يه باخاراق  دالي – دالي قاييديب، قوجانين يانيندا اوتورب “ايندي نه اولاجاق؟” –دييه سوروشدو قوجادان‌. قوجا گينه بير درين  نفس  ووروب چايا باخاراق “هئچ‌، چاي جوشاجاق ” دئدي‌.کوله بؤرکونو باشيندان گؤتورب الينين داليسي ايله آنليندان آخيب اوزونه ياييلان تر داملالاريني سيله رک، اونو تانيسين دييه دققتله گؤزدن گئچيردن سونرا “بونو چايدا بوغوبلار” دئدي‌.نازيک اوزون ايسه‌، نفس – نفس ووراراق ديل آلتي “بيزه نه کيم بونو بوغوب‌. بو دا بو گونوموزون شانسيندان‌، اؤزگه لري تور آتار‌ قيزيل ان آزيندان اؤلو باليق گلر تورونا، بيزه ده اؤلو باليق کي سهل‌دي قارني ياريق بير بدبخت اؤلو گلر. آللاه جلاليوا چوخ شوکور‌.
اوزو چاپيق‌، جنازه نين دؤره سينه نئچه دؤور دولاناندان سونرا باش بارماقلاريني قاييشينين داليسينا سوخوب “يوخ – يوخ‌، مندن سوروشسوز دييرم بووووونووووو اول اؤلدوروب، سونرا سويا بوراخيبلار” دئدي‌.کوله : “هه بو دوز دئيير. بونو اؤنجه اؤلدوروب، سونرا سويا بوراخيبلار” دئدي‌.گنج اوغلانين دييه سن قورخوسو تؤکولموشدو‌. بيراليني قوجانين چيينينه قويوب اينجه – اوزون بوينون جنازه يه ساري اوزالديب باخاندان سونرا “من بونو تانيرام. هر سحر – آخشام گون چيخيب باتاندا ائله بو دؤوره برده اولار. من اوزاقدان گؤرموشم. چايا باخاراق دانيشار، آمما هئچ واخ بيلمه ديم  نه دئييردي ” دئدي.
اوزو ياريق “نه دييجاقيدي بئکار بير آداميدي دا‌، حتما” او شئيي کي گؤرمه يه جاغيدي گؤروموشدو، ائله اونا گؤره ده  داها هئچ زاد گؤرميجاق ” دئدي‌.قوجانين سيگارينا ياغيشين ايلک داملاسي  دوشه رک، آليشان کؤزو تاااااااس دييه  سؤندو‌. قوجا گؤيه باخاراق  “اؤزونوزه  بير اؤرتو تاپين‌، ايندي ديکي ياغيش ياغا ” دئدي‌.
گنج اوغلان گؤي اوزونه باخاراق  دوداقلاريني بوزوب  يولداشلاريني گؤزدن گئچيردي‌.
قوجا نوه سينين يالنيش دوشوندوگونو آنلاييب گينه  سؤنموش سيگارينا درين بير نفس  ووردو‌. سؤنموش سيگارين زهره لي قوخوسو پيچاق کيمي‌بوغازيني ياردي‌.  بو گونه جن سيگاري نييه ترک ائله يه بيلمه‌ديگيني دوشوندو‌.
اينجه اوزون ” هه هه آي بالا سن بو ده ده وي بير طبيبه گؤستر ” دئدي گنج اوغلانا.کوله ساغ  بؤيرو اوسته اوزاناراق ” اولان بو نه درددي بو گون بيز دوشدوک ؟ بس باليق توتماغيميز نه اولاجاق ؟ بيز بير تيکه چؤره ک داليسيجانيق‌، بو قوجا دا چئرت – پئرت دانيشير. ياغيش ياغاجاق‌ چاي جوشاجاق ” دئدي‌.اوزو ياريق ؛ قوجا و باشقا يولداشلارينين سؤزلرينه اؤنم وئرمه دن بير موفتتيش کيمي‌“چوخ عاميلي وار‌. اولا بيلر آروادي ايله ساواشا‌، بورجلو اولا، يا مخديره تاپانمايا‌، يا يا يادا نه بولوم آللاه شيطانا لعنت ائله سين‌، هئچ کس دن باش تاپماق اولماييري” دئدي‌.
ايلديريم سسي باليقچيلارين سؤزلريني بوغازلاريندا بوغدو‌، قارا بولودلار داغلارين داليسندان يوگوروب گونشين قاباغيني آلديلار‌.‌هاميسي هراسان گؤي اوزونه باخاراق قوجانين سؤزلرينين دوز اولدوغونو دوشوندولر‌.
 ياغيش دورمادان ياغماغا باشلادي؛ گؤي اوزو جيريلميش دوغرودان‌. آز گئچمه‌دي سو داغدان آخيب ايلان کيمي‌يئرده سورونمه يه باشلادي. کيمسه جنازه يه اؤنم وئرمه دن قاچيب اؤزونه بير امن يئر تاپدي‌. گنج اوغلان قوجانين اليندن ياپيشيب باليقچيلارين يانينا گئتمک ايسته دي  آمما قوجا ” بوراخ اليوي گئت ” گنج اوغلانا دئدي‌. گنج اوغلان باشدان آياغا ايسلانميش بير بيچيمده ” بوردا اوتورماغين نه فايداسي  وار؟ آخي  چايين سويو يوخاري گلمکده دير گؤرمورسن مگر ” دئدي قوجايا‌.
قوجا اليني گنج اوغلانين اليندن آييريب جنازه يه باخاراق “سن گئت اؤزونه بير يئر تاپ.
 من ايسته ييرم بو نون سون دفعه چايا نه سؤز دئديگيني بيلم ” دئدي‌. باليقچيلار اوزاقدان گنج اوغلانا اوجا سسله ” اده اونو بوراخ اونون بئيني بوشدو، گل بورايا ؛ اوردا قالسان اؤلمه‌يين  حتمي‌دير” دئديلر‌. گنج اوغلان آغلايا – آغلايا قوجايا يالوارماقا باشلادي؛ آمما دييه‌سن قوجا کار اولموشدو؛ بير هئيکل کيمي‌ايکي گؤزون جناره يه زيلله ييب  باخيردي‌. گنج اوغلان اؤزونو باليقچيلارين يانينا يئتيردي‌. قوجا ايسه جناره نين کناريندا اوتورب آچيق قالميش آغزينا گؤز تيکميشدي‌. داغلاردان آخان سو چايين سويونو داها يوخاريلانديردي، ائله کي سو قوجانين آياقلارين آلتينا آلدي‌. قوجا سويا اؤنم وئرمه‌دن جنازه يه باخيردي‌. سو  يوخاريلانديقجا جنازه ني يئردن قالديريب حرکته سالدي‌. قوجا جنازه‌يه مانع اولمادي. چايين سويو جنازه‌ني قورد کيمي‌سوروتله يه – سوروتله‌يه گؤتوروب آپاردي‌.
قوجا اونو گؤزدن ايتينجه ايزله دي؛ نهايت‌ده جنازه دنيزه ساري گؤزدن ايتدي‌. ياغيش داها آچميشدي‌. گنج اوغلان ييخيلا – ييخيلا اؤزونو قوجايا يئتيردي؛ قوجانين ايکي گؤزو چايدا قالاراق؛ بدني بير هئيکل کيمي‌قوروموشدو‌. گنج اوغلان قوجاني باغرينا باساراق اوجا سسله آغلاماقا باشلادي‌. قوجانين آغزيندان هوف چيخدي. بير سؤز دئمک ايسته ييردي گنج اوغلانا‌. اوغلان قولاغيني قوجانين آغزينا ياپيشديريب ” نه دئمک ايسته ييرسن ” سوروشدو قوجادان‌. ” اونو کيمسه اؤلدورمه ميشدي. او اؤزو – اؤزونون اؤنجه قارنيني بيچاقلا يارميشدي، سونرا سويا بوراخميشدي اؤزونو؛ تا سودا بوغولاندان سونرا سويون تکينده قاليب؛ اوزه چيخماسين ” قوجا دئدي‌. سونرا درين بير آه چکه رک بولورسن چايا نه دئييردي او؟ گنج اوغلان ايتميشيني تاپان بيريسي کيمي‌” هه هه نه دئييردي او چايا ” سوروشدو قوجادان‌. “هامينيزدان زهلم گئدير، دئييردي چايا ” دئييب، نفسي کسيلدي قوجانين‌.

منبع :