آنا اوره‌يي

بولگه لر سرويسي: بؤيوک چيلله‌دن بئش- آلتي گون گئدير. هاوا چوخ سويوق شاختادير. داغ‌لارا باخاندا ائله بيل آغ يومورتاديرلار. هر ياني قار بورويوب، آغ- آپباق چاديريني زيروه‌لرين باشينا اؤرتوب‌دور. ائله شاختادير کي، توپورورسن گؤيده دونور. بيريان‌دان دا سازاق، هر نفس چکه‌نين جانيني آلير.

داود پيرعليلو

 بولگه لر سرويسي: بؤيوک چيلله‌دن بئش- آلتي گون گئدير. هاوا چوخ سويوق شاختادير. داغ‌لارا باخاندا ائله بيل آغ يومورتاديرلار. هر ياني قار بورويوب، آغ- آپباق چاديريني زيروه‌لرين باشينا اؤرتوب‌دور. ائله شاختادير کي، توپورورسن گؤيده دونور. بيريان‌دان دا سازاق، هر نفس چکه‌نين جانيني آلير.
 سکوت داغ‌لارا حاکيم‌دير، امما هردن قوردلارين اولاماسي داغ‌لارين سس‌سيزليييني سينديرير، او داغ‌دان- بو داغا دوشوب، انيسانين جانينا زهم اوتوردور. بوتون حئيوان‌لار يئمک بابتيندن چوخ مضيقه‌ده‌يرلر. قارين چوخلوغو هر زادين اوستونو اؤرتوب‌دور، اونا گؤره بير زاد تاپا بيلميرلر يئسينلر. ايللاه قوردلار کنده هوجوم گئتيريب، کندده ياشايان‌لارين حئيوان‌لارينا و اوشاق‌لارينا حمله ائديب، يارالايير يا دا آپاريرلار.
 بير قادين، اوچ بالاجا اوشاق ايله کندين لاپ قورتاران باشيندا، بير ياماجين اته‌يينده ياشايير. اونون دار دونيادا اولدوغو بير باش مال‌دير کي، اونون سوتو ايله ائوده ياشايان‌لارين ياوانليغي‌ني تامين ائدير.
کندده هاي دوشوب، هئچ کيم گئجه لر ائشييه چيخماسين کي، قوردلارين سوروسونه راست گلمه‌سين. قوردلار آج قاليب، بير زاد تاپا بيلميرلر، هر نفس چکه‌نه هوجوم ائده‌رک اونو توتوب، آپاريب ييرتيب، يئييرلر.
گئجه ياريسينا آز قاليب، او قادينين لاپ بالاجا اوشاغي يوخودان دوروب، آناسيندان سو ايسته‌يير.آنا گئدير کوزه‌نين باشينا سو گتيرمه‌يه،گؤرور کوزه‌ده دامجي دا سو قالماييب. ائولري پالچيق‌دان، قاپي- پنجره‌لري تاختادان‌دير. قاپي- پنجره‌لري آچيب اؤرتَنده جيرهاجير سسي هر ياني گؤتورور. آنا، ائوين قاپي‌سيني جير ها جير ايله آچيب، حيه‌ط‌ده تالارين آلتيندا کي سئينگ‌ين باشينا گئديب، گؤرور اوندا دا سو قالماييب. هاوا بوران- شاختادير، ائودن ائشييه چيخيب، قاييدانا قدر اينسانين الي- آياغي دونوب، بوز باغلايير. ائو قاپيسي‌نين دمير دستگيره‌سينه ال آتاندا آدامين اَلي ياپيشجاق دونور قالير اوندا.
 قادين او حال ايله ائوه قاييديب،گؤرور اوشاق سودان اؤتور يئنه ده آغلايير. بيرآز دايانير بلکه اوشاغي يوخو توتوب ياتا. آمما اوشاغين سسي گئت به گئت اوجالير
. آنا اوره‌يي‌دير دا نه دئمک! او بيري اوشاق‌لاري يوخودان اويالدير، تصميم توتور بولاغا گئديب، کوزه‌ني سو ايله دولدوروب، گتيرسين. باش- گؤزونو برکيدير، ائوين قاپي‌سيني دالدان يئزه‌له‌يير. اوشاغي آغلايا- آغلايا قويوب، ائوي بولاغا ساري ترک ائدير.
ائو ايله بولاغين آلتي- يئددي يوز مئتير آراسي واردير. هر يئر شوشه بوز باغلاييب، آياق قويورسان زويور. قادين آدديم‌لاريني ياواش- ياواش گؤتوره- گؤتوره، هردن ده بوزون اوستونده زويوب ييخيلا- ييخيلا بولاغا ساري گئدير.گؤي‌ده ده آي‌دان خبر يوخ‌دور، هر يئر زيل قارانليق‌دير. قوردلارين اولاماق سسي داغ‌لاردان باج آلير، هر بير نفس چکه‌نين باغريني چاتلادير .آمما آنا، آدديم‌لاريني ياواش- ياواش گؤتوره‌رک گئتمک‌ده‌دير.
اولدوزلار هرگئجه‌دن برک پارلايير. او شاختانين، بورانين، سازاغين ايچينده گؤي ائله گؤزل‌دير کي، هر باخاني اؤزونه غرق ائدير. قادين آدديم‌لارين گؤتوردوکجه “بسم الله” دئييب، گئدير. بولاغا بير آز قالان بولاغين شيريلتي‌سي قاريشير قوردلارين سسينه. قادين اولدوزلو بولاغا يئتيشيب، کوزه‌سيني سو ايله دولدورور. بير نئچه لحظه ال‌لريني هوولاييب، قولتوق‌لاريندا قيزديرير. سونرا کوزه‌ني گؤتوروب، ائوه ساري يوللانير. بير آز گئدندن سونرا آياغي زويور، بوزون اوستونده ييخيلير، آمما کوزه‌ني اليندن اؤتورمور.
 آياغي برک اينجيسه ده، يئنه کوزه‌ني گؤتوروب، او هاوادا ائوه ساري گئدير. بيردن کندين ايت‌لري ده‌يير بير- بيرينه؛ قوردلار کنده گيريرلر. قورخو، اوشومه‌يي قادين‌ين ياديندان چيخاردير. داها سويوغو بيلمير. ائوه بيرآز قالاندا، بيردن قوردلارين سوروسو قادين‌ين قاباغيني کسير. ايستيرلر قاديني توتالار. قوردلارين خورولتوسو هر نفس چکه‌نين جانينا ترپَم ساليب، تيتره‌دير. آمما او حالدا دا آنانين يئنه فيکري اوشاغي‌نين يانيندا‌دير.
قادين کوزه‌ني يئره قويوب، بيردن چيغيرير. “آي… هاوار!… گلين، قوردلار ايستيرلر مني يئسينلر، يارديما گلين! آي… هاوار!…” کيم‌دير اونون سسيني ائشيدن؟! قوردلار ياواش- ياواش قادينا ياخين‌لاشير، ياخين‌لارشير…لاپ توتان لحظه‌ده، بيردن بير يئکه قوردون گؤزلري پاريلدايارکن، کئچير قوردلارين قاباغينا، قويمور قوردلار قادينا ديش باتيرسينلار. قادين دئيير بس قوردلارين قاباغيني کسن، کندين ايت‌لريندن‌دير.
قارانليق‌دا کوزه‌ني گؤتورنده قوردلار يومولوب، قاباق‌لاريني کسن قوردو ائله ييرتيشيب حيواني لاپ يارالاييب جاندان سالانا قدر قادين اؤزونو ائوين قاپي‌سينا يئتيرير. قاپيني آچاندا، ائوده يانار فانارين ايشيغي دوشوب، قوردلاري بير آز قورخودور، قوردلاري دالي‌يا قايتارير. قادين تئز اؤزونو ائوه يئتيريب، قاپي‌نين داليسيني برکيدير. ال‌لري تيتره‌يه- تيتره‌يه اوشاق‌لارا دئيير:– نه دير گول بالا لاريم؟! نيه چيغيريرسيز؟! آناز بودو گلدي، قورخمايين!
آنا بو سؤزلري دئيه- دئيه اوشاق‌لارا اورک وئريب، اونلاري اُووداندان سونرا، بير ساخسي سئيين گؤتوروب، سو ايله دولدورور. سونرا اوشاغين بويونو اوخشايا- اوخشايا اونا سو ايچيردير. ساناسان هئچ بير زاد اولماييب، اوشاغين سويونو وئريب، لايلا چاليب، اونو ياتيردير.
او بيري اوشاق‌لار دا آنالاري‌نين لايلا سسي ايله يوخولاري توتور، ياتيرلار. آمما قوردلار هله ده ال چکيب گئتمه‌ييبلر. او يارالي قورد دا، يارالي- يارالي اونلارين قاباغيندا دوروب.اوشاق‌لار ياتاندان سونرا دا، هله قادين‌ين ال‌لري‌نين تيترتمه‌سي آرادان گئتمه‌يب. ال‌لري تيتره‌يه- تيتره‌يه قاپي‌نين چاتيندان قوردلارا باخير.
 گؤرور قوردلارين قاباغيني کسه‌ن، بير آنا قورددرو،کندين ايت‌لريندن دييل. قادين لاپ باخا قاليب حئيران بو سورونا کي، او قورد نه دن قوردلارين قاباغينا چيخيب، قاديني اؤلوم‌دن قورتاردي. او حالدا، قورد قولاق چالاندا قادين گؤردو قوردون ساق قولاغي‌نين بير طرفي کسيليب.
 بيردن يادينا دوشدو نئچه ايل اوندان قاباق، او قوردو ايکي بالاسي يانيندا ايکن کندين ايت‌لري بوغوردو. او بوغوشمادا اونون قولاغي قوپوموشدو، اؤزو ده برک يارالانميشدي. قادين او قوردو ايت‌لرين اليندن قورتاريب، نئچه گون بير طؤوله‌ده او قوردو ساخلاييب، يئمک وئريب، درمان ائله‌ميشدي.
سونرا اونو آزاد ائله‌ميشدي. بو همن توختاديب،آزاد ائله‌دييي آنا قورددور. .او قوردون نئچه سوت امه‌ر بالاسي وار ايدي. اونلارين يوواسي، قادينين ائويندن بير آز او يانليق، ياماجين اته‌يينده، دره‌ده ايدي. قادين، اونلارا دا جماعت‌دن گيزلي يئمک آپاريب آتاردي کي، آجلاريندان اؤلمه‌سينلر.
قادينين بير اَل آغاجي وار ايدي. ال آغاجيني هميشه قاپي‌نين داليسينا قوياردي. ال آتيب تئز اونو گؤتورور، باشينا بير آز کؤهنه پارچادان زاددان باغلاييب، اونا اود وورور. ال آغاجي يانا- يانا قوردلارا ساري گئدير. قوردلار اودو گؤروب، اوردان اوزاق‌لاشيب گئديرلر. او يارالي قورد دا دوروب او قادينين اوزونه باخاندان سونرا ايسته‌يير اوردان اوزاقلاشسين، قادين ائوه قاييديب، بيرآز چؤرک گؤتوروب قاييدا کي، او قوردا آتا يئسين. گؤرور قورد يئره دوشوب اوزاندي.قورد، قادين ياخين‌لاشانا جان وئريب اؤلدو. قادينين بير اَلي اولور بير باشي. دونيا دولانير باشينا کي، نيئه او قورد اؤلدو.
قادين ناراحات ائوه قاييدير، سحره تک ياتا بيلمير. سحر گون چيخاندان سونرا او قوردو آدام کيمي دفن ائله‌ييب، اونون اؤلوسونه بيله احترام‌لا ياناشير. او گوندن تنديره کوت ساليب پيشيرير، گئجه‌لر ائولري‌نين چئوره‌سينه قويور کي، آج حئيوان‌لار تاپيب، يئسينلر .
او حيوان يئرتيجي اولا- اولا بونو دوشونور کي، قادين اونا ياخشي‌ليق ائديب، جانيني، بالالاريني قورتارميشدي. قورد، ياخشي‌ليغين قاباغيندا جانيندان کئچيب، بونو ثابت ائدير کي، ياخشي‌ليق ايتمز، ياخشي‌ليغين قاباغي ياخشي‌ليق‌دير.
تاسف‌له بير تعداد آدام‌لار اؤزلريني اشرف مخلوقات بيليب، او ييرتيجي حئيوانجا يوخدورلار. ياخشي‌ليغا يامانليق ائديرلر. بئله اينسان‌لار محبت گؤزه‌سيندن سو ايچمه‌ييب‌لر بلکه ده…

منبع :