بو جهنم او جهنم‌دن داها ياخشيدير!

بولگه لر سرويسي: »بو خارابا اوتاخدان بي چؤله چيخ دنه. گولسارا خالا گئنه سني سوروشور. داي اوزوم ده گلمير دئيه‌م کيتاب اوخويور. دئيير هاي دوشوب قيزون بوشانير. گؤرورسن؟! سؤزلريمي قولاغوندا سيرغا ائله‌مه‌دون، بو دا آخيري.«

سولماز جمالي

بولگه لر سرويسي: »بو خارابا اوتاخدان بي چؤله چيخ دنه. گولسارا خالا گئنه سني سوروشور. داي اوزوم ده گلمير دئيه‌م کيتاب اوخويور. دئيير هاي دوشوب قيزون بوشانير. گؤرورسن؟! سؤزلريمي قولاغوندا سيرغا ائله‌مه‌دون، بو دا آخيري.«
آنام حيرصلي-حيرصلي يوخاري‌دان آشاغي مني سوزور. آجي باخيشلاري‌لا آز قالير مني دئشيک-دئشيک ائله‌سين… يان دؤوره‌مه نيفرت‌له گؤز گزديرير. ديرسکلريمي سؤيکه‌دييم ماسانين اوزه‌ريندن گؤتوروب اوتوراجاقدا ديک اوتورورام. گؤزومو اوخودوغوم کيتابين سطيرلريندن آليرام. اللريم‌له هر ايکي ياندان ساچلاريمي ييغيب باشيمين آرخاسيندا توپالاييرام. »او آرواد هئچ نه‌يين آغيني بوزونو بيلمه‌دي. هميشه قازاني قاريشديرير، چاخناشما سالير. غرورو، بيجلييي، سايقي‌سيزليغي يئره گؤيه سيغمير.«دئييرم.– »دوشموشوک آغيزلارا؛ آنجاق سنين آغزيندان هله ده گولسارا خالا دوشمور. نييه باشا دوشمورسن؟ سود‌امر اوشاغدا بيلدي بونو، سن بيلمه‌دون.«
کوره‌ييني داياديغي ديواردان گؤتوروب منه ساري گلير. ماسانين اوزه‌ريندن اوخودوغوم کيتابي قالديريب اللريني آلتدان اونون هر ايکي طرفينه قويور؛ شاپبيلتي‌لا باغلاييب ماسامين اوزه‌رينه توللايير. اوره‌ييمده اينجه-اينجه آغري‌لار دولاشير.– »اؤزوزو آللاتمئيين، اورتادا منيم »قيز« دوغولماغيمنان باشقا بير پروبلم يوخدو. سيز هله ده يوز ايل بوندان قاباغين دبينه اويوب اونون بونون سؤزينن قيزلاريزين گونون توتوسوز گؤي اسکي‌يه. آلي قيزي اونو دئيير، اوروج قيزي بونو دئيير. اؤزل سؤزلريزي بئله اوننان-بوننان پايلاشيرسيز.«دانيشديقجا ايچيمده اسيرديم. نفسيم گوجله چيخيردي.
– »اوتوروب اونون بونون داليجاق دانيشماق هونر ده‌يير. او آروادين بو آروادين باشماغيننان دوْنوننان دانيشماغي ائله هامي باشارار.«
ساغ اليمي آلنيما قويوب ائهمالجا اؤوکله‌ييرم. ال آتيب اؤزومو ساچلاماق ايسته‌ييرم.
– بئش ياشيمدان هئي گؤزونو آغارتدين، ديليني ديشله‌دين. دئدين اوجادان گولمه؛ اوروج قيزي دووارين دئشيييندن گؤرر، حاج جليل ائشيدر. اويناما! آلي قيزي نه دئير آداما!!؟ اونو گئيمه، بونو گئيمه.«نه زامان آغلاديغيمي، گؤزومون ياشي نئجه اوزومدن بوينوما آخيب گئتدييني بيلميرديم.– ساغ-سولومو تانيمادان مني بي‌بي‌م اوغلونا وئرديز؛ آنادان اولجاق بيزي دئييلگي ائتميشديز. من هله تزه- تزه، اوشاقليغيمدا، قوهوملاريميزين من‌له اونو بير يئرده گؤردوکلرينده قاش گؤز اويناتمالاري‌نين، شوخلوق دولو گولوش‌لرينين ندنين آنلئييرام«گونش آلوولانميشدي. يومشاق اسينتي باجانين طول پرده‌لريني يونگول-يونگول ترپه‌ديردي.– »آروات آجي باغيرساق کيمي اوزاتديقجا اوزادير. قيرميزي-قيرميزي بئله سؤزون يئتيرير سانکي ايرضا سنه گؤره آروادين بوشئيير. او دا قورخور دنه يازيق آروات. ..«
آنام اللريني اؤوکله‌يه-اؤوکله‌يه تيترک سس‌له داوام ائله‌يير.
اوتوردوغوم يئرده ائله‌جه قورويوب قاليرام. بير نئچه آنليق ماسامين‌ اوزه‌رينده تيکانلي يارپاقسيز، اتلي گؤوده‌سي اولان کاکتوس گولومه گؤزوم ساتاشير. آچيق باجادان جيريلتي‌لاري ايچري دولوب اوتاغين سس‌سيزليييني پوزان جيرجيرامالارين سسي، قفيل هؤنکورتومون ايچينده ايتير. آنام ال_آياغيني ايتيرير:
– »قيزيم قيناما بيزي. بيز ده گؤزوموزو آچيب بئله گؤروب اؤرگشميشيک. باشووا دؤنوم آي بالا داي سنه هئچ نه دئمييه‌جم.«
قيوراقجا قاپي‌دان چيخارکن:-»آيناز باخ آغلاما ها، ايه‌م بيرده سنه بي سؤز دئديم، نه دئسن دئ.« دئييب گئدير.قارداشيم‌لا آنامين پيچيلتيلاريني دويورام. مني گؤرونجه سس‌لري اوجالير:
– »هله باشي آچيق عکسين قويور اينستايا تئلگيراما! سنون اختيارون کئشگه منده اولوردو.«
قارداشيمين گؤزلريندن نيفرت فيشقيرير.
– »ايندييه‌جک بئبيله کيتاب اوخويوبسان نولوب؟ بوينوننان ميدال آسيبلار؟ جيبووي پولنان دولدوروبلار.«آنام هر زامانکي کيمي سرت باخيشلاريني گؤزلريمه توشلايير گؤزلريني بره‌لدير. اللريني اؤلچه-اؤلچه دوداغيني ديشله‌يير:– »من اولسام کيتابنان اؤزومو اؤلدورمک يئرينه قشح دورارام ماهنيني قويارام قيزيمنان اوينئييب دينگيلده‌رم. گئديب گليب ميوه‌دن‌ يييه‌رم، قيزيمي يئديردرم. آااز ائله بيلئيسن آرواتسان؟ سن هئچ. .. دا دؤورسن.«
اوره‌ييمده‌کي آغري، بوتون جانيمي دولاشيب آياق‌لاريما آخير. آشاغي سس‌له ميزيلدانيرام:
– مني آسساز دا کس‌سز ده، او دئديکلريزي سئوميرم.«چؤکوب اوتوردوغو يئردن سيچراييب اوز به اوزومده دورور. نفسيني درمه‌دن بير دوزونه دانيشير:– آي قيز هامي سنين اوجوز  کتدي مودئل پال-پالتاريني دانيشيرئه. ..«
آنامين آغزي کؤپوکله‌نيردي، دامجي‌لاري اوزومه سيچراييردي. آماجي مني ساققالاماق اولدوغو اوچون ايسته‌ديکلريني زورلا بئينيمه يئريتمک ايسته‌ييردي. اونون بو حاليني گؤرنده اوشاقليغيمدا‌ مني قفسده ساخلاديغيني خاطيرلاييرکن، همن قورخو مني چولغاييردي… خاطيره‌لر گؤرونتو کيمي گؤزومون اؤنونده بولانيب اؤزو-اؤزونه دالغالانماغا، ايتيپ تاپيلماغا باشلايير.بيرگون اولمادي آنام‌لا قارداشيمين يئرينه اؤزوم بازارا گئدم. ايسته‌ديييم پال-پالتاري بيه‌‌نيب سئوه‌رک آلام. هئچ ائله‌بيل بيزلرله اونلارين آراسيندا بو بويدا زامان مسافه‌سي يوخ‌ايدي. آنجاق و آنجاق گئييملريميز ده‌ييشميشدي.گون باتماق اوزره‌دير. يئر اوزو آلا-بولا اولور. گون عرضينده سسلري چيخمايان قارانقوشلارين قيوراق اوچوشلاريني سئير ائديرم. ائيواندا توپلانيب اوردان-بوردان دانيشيرلار. حيه‌طين ساغ بوجاغيندا دامي  ديواري چؤکموش تنديرخانايا ساري بويلانيب باخيرام. اوشاقليغيمي خاطيرلاييرام؛ تنديرين باشيندا ايله‌شيب آياقلاريمي ايچينه ساللاماق ايسته‌ييرم. يانان آغاجلارين چيرتا-چيرت سسي اؤزل قوخوسو، تزه‌ چؤره‌يين اييسي هرياني بورويوب. تنديرخانانين ديوارينداکي ميسمارلادان چوواللار، توربالار آسيليب.
کئچميشده گونش، چيي کرپيج‌له تيکيلميش تنديرخانانين کيچيک دئشيييندن اوزون، ساري بير قيلينج کيمي ايچري دورتولردي. پاييزدا تاوانيندان دامان ياغيشين ايزلري گؤرونردي. ايندي ايسه ديوارلاري چؤکموش تنديرخانا کؤلگه‌سيني کول‌ کوسون، اوتلارين اوزه‌رينه توتقون خالچا کيمي دؤشه‌ميشدي. گؤيلوک بؤجه‌کلري يام-ياشيل اوتلاري سارميشدي. بير واخت‌لار همن او اوتلارين اوزه‌رينه اوزانيب کوره‌ييمده، بوينومون داليندا اينجه توخونوشلاريني حيس ائدرديم. بعضن قانادلاري خاللي کپنک‌لر اوتلارين آراسيندا ائهمال حرکت‌لرله يوخوشلو ائنيشلي اوچوشاردي‌لار، اونلارا قيسقانارديم. ائشيتديييم آجي سؤزلر اوغولتوايله بئينيمه ايشله‌ييب قاسيرغا قوپارديغي آن، حيط‌ده گزيشيب گؤز ياشلاريمي سيله-سيله چيچک دررديم، يارپاق دررديم. ايچيمده بؤلوک-بؤلوک بولودلار دولوب_بوشالاردي. .. اوت‌لارين آراسيندان آجيليق‌لا دولو يوخويا بنزر حياتيمي هله ده دفعه‌لرله کابوس کيمي گؤرورم:
– »آي بالا بئله ال آياغووون سوموگو گؤرسه‌نيرئه. باشووو زيندگووه، ارووه، اوشاغووا قات. يالاننان نه‌يه دوروب گليبسن؟«
ياشليليقدان قيريشميش دوداقلارينين قيراغيندا آشاغيلاييجي بير ايفاده واردي. ايري آياغيني يانا چکيلميش تومان‌ کؤينه‌ييندن گؤروردوم. آياغي‌نين بارماقلاريني اويناديردي:
– گولساراني هله ده بعضي گئجه‌لر اري دؤير. اؤزوده هئسادين اوستونده…«
ننه‌م ناراحات_ناراحات دئيير.
– »هه نولسون؟ آرواتدا آغيل اولماز. ..«
گولسارا خالا سسيني اوجالدير.
– ايرضا جاني، اوروج قيزي دئييردي او گوله‌بتي‌نين اريننن بوشانان قيزي يوخدو؟«
ننم‌له آنام »هه، هه« دئيه-دئيه باشلاريني ترپه‌ديرلر.– »دئييرلر آلاهي کيشي‌نن توتوبلار. بي تونلوک وارايميش. تيفاغون داغيلسين قيز اولان بنده. بيزيم زامان اولسئيدي دده‌سي، قارداش‌لاري شاققالاردي‌لار قيزي.«قييا باخديقجا کيچيک گؤزلريله ائله بيل اوره‌ييمين دوز ايچينه گيرمک ايسته‌يير.– »تاي هاممي توکو توکدن سئچير. هاميميز يوللاري، ايزلري، جيغيرلاري، اوبالاري بير-بير گزيب بورا چاتميشوق.«حيله‌لي باخيشيني گؤزلريم‌دن چکمير. بو خينا او خينادان دئييل‌دي دئيه‌سن.گونشي ايچينه سوموروب کؤلگه‌سيني يان دؤوره‌سينه سره‌ن تندير‌خاناني سوزورم. اورادا خاطيره‌لرين تانيش قيرينتي‌لاري کؤپوکله‌نيردي.– »اوره‌ييمي قارا-قارا شبهه‌لر گميرير. باشيميزا کول اله‌نه‌جک.«آنام بو سؤزو آز قالا پيچيلتي‌ ايله اؤزو-اؤزونه دئيير. ديزي اوستونه قويدوغو الي آستاجا اسمه‌يه باشلايير.
يونگول يئل اسير. تيکانلي اوت‌لارين، کول-کوسون اييسي، تزه چؤرک ايييسي‌ قوخويان هاواني چولغايير. هئي‌سيز، اوتانجاق سس‌يم سورونوب بوغازيمدان چيخير:
– »من ايسته‌ميرم سيزه اوخشييام.«
ايللر بويو او قادينا، ننه‌مه، آناما اوخشارام دئيه چوخ قورخارديم. اونلارين گولوش‌لري باخيش‌لاري بئله چوخ قورخونج ايدي. قورو تورپاق کيمي چات-چات اولموش اوزلرينده يوخسونلوغون دولاشديغيني سئزيرديم.
ننه‌م اؤرت-باسدير ائله‌ييب سؤزون يؤنونو دييشديرمه‌يه چاليش‌سا دا اوخ آرتيق ياي‌دان چيخميشدي. قاشلاري چاتيلير. بارماقلاريني سانکي گؤزومه تپه‌جک کيمي هاوادا اوينادير. قادين بيردن گؤتورولور. سؤزو آغزيندان فيشقيرير:– »لئچه‌يو اؤرت چؤله دوشموش! اوردان بوردان باخان اولار.«سسي ياواش-ياواش سرتله‌شير. کولک  اليمده برک-برک توتدوغوم »اؤزگه« کيتابين‌ين قيراقلاريني خيشيلدادير.
»قادين«، قادين دوغولمور، »قادين« اولونور. بو جومله بئينيمين قارانليغيندا يئلله‌نير، گؤزومون دنيزينده لپه‌له‌نير. لپه‌له‌نيب لپه‌له‌نيب بوتون وجودوما ياييلير، يازيلير. سانکي چاي‌لارين بولاق‌لارين شيريلتيسينا بئله قاريشير.
آنامين گؤزلري قيرپيلمادان ‌بير نقطه‌يه ديکيلميشدي. ننه‌م آيسونون کيچيک اللرينه سيغال چکه‌رک کئفسيز و يورغون سسي‌له آغير_آغير اوخويوردو:
آي‌سو بالام بي قطره/گئده بولاغدان سو گتيره/سويو وئره آتاسينا/آتاسي تؤکه زميسينه/
آيسو اللريني بير-بيرينه چيرپير، سئوينجک قيشقيرير: -»ائلچين آتام؟«
آلتي گؤز چؤنوب منه باخير. ننه‌م دوشونجه‌لرينه دالير. او، موتککه‌يه ديرسه‌کله‌‌نيب نالچا اوسته اوزانميشدي. ديلي‌نين آلتيندا حزين-حزين باشقا بير باياتي اوخويور:آي مستانا مستانا/آيسو گيريب بوستانا/قورخييام ياغيش ياغا/قيزيمين دونو ايسلانا/
آيسو اوغونور. ننه‌م چاتيق قاشلاريني گؤيه قالديرير:– دوز دان يئري سؤکولندن اويانميشام. خمير ائله، گود آجيسين. کونده‌له، تنديري سال کولفه‌ني آچ، تاختا اوخلونو ايلفيده‌ني ايراهلا سورا ياي، ياپ بيشير. داي دوز اؤلورم بالا(آناما باخاراق) جانيم چيخير.«
دوداغيم قاچير. گؤزآلتي گولسارا خالانين ننه‌مه قارشي باخيشينا باخيرام.
– آي قيز تاي يازيخ‌لارا آز قان اوتدور. قشه ار هلم-هلم تاپيلماز. ارون بئناوادي بيرين ده دوغ قوي اوغلو اولسون.«اوز-گؤزونو تورشودور. بير زهمله باخير کي ساناسان اؤدومو ياراجاق. قادين‌ين آجيغي هله ده سويوماميشدي.
ننه‌م ايچين_ايچين گولمه‌يه باشلايير. نسه خاطيرلاميشدي:– ياديمدادي تک محمدي دوغموشدوم. گؤردوم آلي قيزي، اوروج قيزي ايکيسين دوغوب اوچونجوسونه بويلودولار. ائله‌بيل قارنيما ايلان سوخدولار. دوردوم قاچديم زرنيسه‌نين يانينا، دئديم قارنيمي باغلا اوشاغا قاليم.«شاققيلداييب گولورلر.
– »ننه‌م نالي ميخا دؤيور ميخي نالا. باااه ددؤنن مني قينييان.«اوتاقدان آتامين من ائشيديم دئيه اوجا سس‌له دئدييي سؤزلري دويورام:– »تاي بي سئري اؤزومو اؤلدوره‌جم بو قيزين اليننن. ائوين-ائشيگين بوشلئييب گليب بورا کي نولا؟ او کيتابلاردا نه وار؟! گئجه ياريسيناجان يوخو گؤزومه گيرمير، يئرين ايچينده ‌سحر آچيلينجاق چابالئييرام.«قاپيني آچيب اوتاقدان چيخيرام. آتامين حيرصلي باخيشلاري سينيرلريمي گرير. کيچيک قارداشيم دوداغي قاچميش منه زيلله‌نير.
– »من باشيمي آشاغي ساليب سئوديييم ايشي گؤرورم. بونون نه‌يي سيزه آغير گلير؟ بورنومو اونون بونون حياتينا سوخمورام. بير-بيريميزين دوشونجه‌سينه، گئييمينه، ياشاييشينا سايقيميز اولسون لوطفن.«يئنه ديليم سؤز توتمور. دولاشيق-قاريشيق سؤزلر بير-بيرينه قاريشير.قارداشيم ميسميريغيني ساللايير. سرت باخيشلاري اوزومده دونوب قالير:– »ائله بو بؤيوک-بؤيوک دانيشماق‌لاري او کيتابلاردان اؤرگه‌شيسن. بيزيم آبريميزي آپاريب ساليبسان آغيزلارا هله اوتانمادان دانيشيسان دا. بوردا شؤنگويوب گؤزونو کيتابنان اينستايا زيلله‌مک يئرينه گئت اوتور ائوينده ارووه اوشاغووا محبت ائله. ائله محبت گؤرميين ار جانو آليب اونون بونون يانينا گئدر.«آتاما باخيب گورولدايير:
– »کيتابلارين اوتدئيون، موبايلين سيندورون. بي شيلله ده ياپيشدورون آغزينا بلکه آدام اولدو.«
– »بو ائوده مني اينجيدن سايقينين اولماماغيدي عدالتسيزليکدي، آيري سئچکيليکدي. بؤيوک کيچيک ساييلمير بو ائوده. نجور اولور دا مني آدام گؤرموسوز!؟« آتاما باخيب قارداشيمي توشلاياراق دئييرم.– »آز سن فرلي قيز اولسئيدون دئيردون دده‌مين ننه‌مين سؤزو يئره دوشونجک قوي منيم باشيم يئره دوشسون.«
سس-کويلو آرسيز قارغالار چيلپاق بوداقلارا شيغييان کيمي آنام کسکين سؤزو‌ايله اوستومه شيغييير. بيردن-بيره اوزو گؤم-گؤي گؤيه‌رير. هؤنکوروب بوْزلايير.
– »سويوندور با سؤزونو. دئمه‌يين ندي؟«
آتام نه‌يي‌ايسه بئينينده گؤتور-قوي ائديردي. توتقون اولوب قاتي حيرصلنميشدي.
بو سؤزلري سحر چاغي ائودن چيخيب گئجه ياريسي ائوه دؤنن آتام‌دان ائشيديرم. واختينين چوخونو عايله‌سيله يوخ دوستلاري‌لا پايلاشان آتام‌دان. ماشيني گؤتوروب سحردن آخشاما خيابانلاري بوشونا دولاشان، او قيزا بو قيزا قوللوق ائدن، يوکسک ‌ليسانس علمي درجه‌سي اولان و مندن ياشجا خيردا اولان قارداشيم‌دان ائشيديرم. کيشي دوغولوب بوتون قيرميزي جيزگي‌‌لري کئچه‌بيلمه‌يي کشيليک‌لرينه دوغرو بيلن‌لردن ائشيديرم.سؤزلري داراق کيمي بير-بيرينه کئچيريلميشدي؛ بيليرديم بو سؤزلرين سونو هارا يئتيشه‌جک.– »قاييت اؤز ائوينه ناغايرئيسان اوردا ائله. سن يولونو آزيبسان دئيه‌سن.«آتام گؤزلريني يومور. ساغ الي‌له آلنيني تومارلايا_تومارلايا آستادان ديلله‌نير. اوره‌ييمده نسه، ائله‌بيل ساپ قيريلير. -»نه زامان داياق اولدون کي«، ديشيمي-ديشيمه سيخاراق ميزيلدانيرام. گؤزلريني گؤزلريمه ديکير:
– »گوناهووي اوز-گؤزونده يوخ، اوره‌يينده گز تاپ.«گؤزلريمي عايله‌م دئدييم انسانلارين اوزونده گزديريرم. -»سيزلر منه بير »حيات« بورجلوسوز.« دئييرم. آتامين مات قالميش گؤزلرينه زيلله‌نيرم:– »او اللريني هميشه قيزيندان اسيرگه‌دين.«آتام آياغا دورور، حوزون دولو بير باخيش آتير منه ساري؛ هئچ بير سؤز دئمه‌دن آغير-آغير چؤله چيخير. اوره‌ييم زوققول_زوققول زوققولدايير. حياتيمين هر آنيندا منه ياشاتديغي و قارشيسيني آلماديغي بو حيس‌ هئچ اونوتماياجاغيم بير شکيلده يادداشيما جيزيليردي. حاضيرلانيرام؛ هئچ بير زامان منيمسه‌مه‌ديييم اوْ ائوه قاييديرام.باجانين يان ديوارينا سؤيکه‌نيب قارانليق حيطه زيلله‌نيرم.
– »قاييتدين؟«
بيرآز سوسورام. بئينيمده دالغالانان، لپه‌لنن ايستک‌لره، آرزولارا نيسگيلله‌نيرم. بو شه‌هر بؤيويه-بؤيويه روحومو اودموش، منليييمي، اينسانليغيمي کولتورون، توپلومون سيخليغيندا سومورموشدو. بو آجيليق‌لاري، ايرينلي يارالاري اوره‌ييمين مزارليغينا ييغا-ييغا اؤزومو گؤمموشدوم. کؤلگه‌لر سوسقون حيه‌طده گزيشيردي‌لر. آغيزلاري-باشلاري بللي دئييلدي. باجانين شوشه‌سيندن گؤزونو بيزدن چکمه‌ين قيزيمي گؤرورم. قولچاغي قوجاغيندا بيزدن بيرآز آرالي بارداشين قوروب يئرده اوتوروب.باجانين ائنلي تاخچاسينا دوزدويوم دوغال گوللريمه زيلله‌نيرم. -»بو جهنم او جهنمنن داها ياخجيدي.«دئييرم.– »قارداشين زنگ ائله‌ميشدي. دئدي سنه دئيم کيتابلارينين داليجاق گئتمييه‌سن.«
گؤزلريمي گوللريمدن آليرام. چؤنوب قيزيمين اوزونه گولومسه‌ييرم. سکسکه‌لي اوره‌يي‌له قولچاغيني داها دا اؤزونه سيخيب گولومسه‌يير.اللريني شالوارينين جيبينه سالير. قيميشير:– »هاميسين تنديرخانادا قالاييب يانديريب‌لار…«

منبع :