اَسي دايي

بولگه لر سرويسي: سامبوران گديگي‌نين يوخوشوندا، کَهَر آت قدم‌له‌ييب، جيب ماشينيني آرخادا قويوب، کئچيب ـ گئتديکده، ماشيندا کي مسافرلرين گؤزلري بره‌لي حالدا ـ ماشاءالله، ماشاءالله ـ سؤزو، حئيرت ايچينده ديللريندن قوپموشدو.

حبيب فرشباف

بولگه لر سرويسي: سامبوران گديگي‌نين يوخوشوندا، کَهَر آت قدم‌له‌ييب، جيب ماشينيني آرخادا قويوب، کئچيب ـ گئتديکده، ماشيندا کي مسافرلرين گؤزلري بره‌لي حالدا ـ ماشاءالله، ماشاءالله ـ سؤزو، حئيرت ايچينده ديللريندن قوپموشدو.
هوراند جاداسيندا، مجيدآباد قفه‌خاناسي‌نين قاباغيندا، سوروجونون گؤزو کهر آتا ساتاشديقدا تئز ماشيني کنارا چکيب ساخلاميشدي. مسافرلر در حال ماشيندان تؤکولوشوب، آتين قاباغيندا صف باغلاييب، حئيران ـ حئيران کهرين تاماشاسينا دوزولموشدولر…سوروجو ايچري کئچيب، قفه‌چي‌دن آتين يييه‌سيني سوروشدوقدا؛ قفه‌چي يوخاري باشداکي، قليان الينده بير لبه‌دارلي کيشي‌يه اشاره ائديب: کهر آت بو گؤزل کيشي اَسي دايي‌نين‌دير ـ دئميشدي…
اَسي دايي بند يوخوشونون سيلديريمينا چاتديقدا، (بو دؤنه آتدان ائنمه‌ييب)، آياقلاريني آتين بؤيرونه ديره‌ييب، کهرين جلوونو اهمال ترپتديکده، کهر بو اشاره‌ني آلان کيمي، نال‌لاريندان اود پارلايا ـ پارلايا، بندين داشلاريني سيچراييب، قالخميشدي. بئله اولاندا، اَسي دايي ـ اَيه نه ياخشي کي آتين ناللاريني دونن تازالاميشديم ـ دئميشدي.
***
اَسي دايي مؤهورلنميش پول پاکاتيني هوراندين ماليه اداره‌سيندن تحويل آليب، اونو يهرين آلتيندا مؤحکم ـ مؤحکم گيزله‌ديب، اوچونجو گون آرخايينجاسينا اهره ساري گئري دؤندو.هله بندين دارينا کئچمه‌ميش، باشي‌نين اوستونده‌کي سال قايادان ـ اَيه دايان! ـ سؤزونو ائشيتديکده، يوخاري باخارکن، سالين باشيندان بير توفنگين اونا ساري ساللانديغيني گؤرجک، آتدان ائندي. بو آن ايکي پيادا بير داشين بوسقوسوندان چيخيب، آتين جلوونو اونون اليندن آليب، ـ آرخامجا ـ دئيه، دره ائنيشي شوتودولر. هوراند جاداسيندان اوزاخلاشديقدا، اونلار سولاري شير ـ شير آخان، آغاجلي بير دره‌ده بير تونقال باشينا چاتديلار. بو آن، اوجا بوي بئش آچيلانلي يول کسن، اوز گؤزونو شال‌لا بوروموش، بير آغاج داليندان چيخيب، دايي‌يا ياخينلاشدي.دايي گوزلريني قيرپمادان، توخداق ـ توخداق سلام وئريب، داياندي. قاچاق عليک‌السلام ـ دئيب اونو سورغو ـ سؤالا توتدي: هاراليسان؟ بورالاردا نه گزيرسن؟! دايي ديک اونون گؤزلرينه باخاراق، ـ اهرده‌نم، اوردا ماغازام وار؛ هورانددا قوهوم اقربامين يانينا گئتميشديم ـ جواب وئردي (آنجاق اَسي دايي دئمه‌ديکي گاهدان‌دا ماليه اداره‌سي‌له همکارليق ائدير و ايندي‌ده بو ايش ايچون هوراندا گليب).
قاچاق ياواش ـ ياواش ايره‌لي‌له‌ييب، دايي‌نين لبه‌داريني توفنگين اوجويلا يوخاري قالخيزيب، اونون اوز ـ گؤزونو ماريت ـ ماريت سوزمگه باشلادي. بيردن ـ اَيه اوشاقلار بوکي اَسي دايي‌دير ـ باغيرارکن، شاليني اوز گؤزوندن آچيب، داييني باغرينا باسميشدي.
دايي‌ايسه، هاننان ـ هانا، قاچاق بالاجاني تانيديقدا، اونون اوز گؤزوندن اؤپوب:ـ اَشي سن بورالاردا نه گزيرسن؟! سنين سوراغيني کوردوستان داغلاريندان آلميشديم ـ دئميشدي. مشه بالاجا باشيني ييرقالاياراق ـ آي پير اولموش اوچ گوندور بيزي بوردا کئشيگه قويموسان! بيزه هوراندا گئده‌ن بير پوللو تاجرين سوراغيني وئرميش‌لر ـ دئيه، اوزونو يولداشلارينا توتوب:
ـ اَيه سيز نه‌يه داشا دؤنوب دايانميسيز! تئز اولون قالخين کيشي‌يه يئمک حاضيرلايين؛ يامان روزولو قوناقيميش‌سان آي دايي! دونن اوشاقلار بير آرقالي اوولاييب‌لار ـ آرتيرميشدي. اَسي دايي يئييب ـ ايچيب اؤزونه گلديلده:
ـ بگ سنين گئري دؤندويونو بيلميرديم ـ دئينده، مشه بالاجا:
ـ تبريز زندانيندان قاچديقدا، بير نئچه ايل کوردوستان داغلاريندا دالدالانديم، آنجاق آتالار دئميشکن
عزيزيم وطن ياخشي
کؤينه‌يي کتان ياخشي
گزمه‌يه غريب اؤلکه
اؤلمه‌يه، وطن ياخشي
غربت يامان‌ايميش آي دايي، دؤزه بيلمه‌ديم، وطن دئيه قاييتديم. نه ويلادي هوراند داغلاري‌نين ماغارالاريندا گون گئچيريرم. گاهدان‌دا لالا قاري کنددن بيزه چؤرکدن، آغارتي‌دان گتيرير. يئري گلنده‌ده گيريميزه کئچن بوينو يوغون‌لارين قولاغيني کسيب بير طهر کئچينيريق، تکجه تمبه‌کي‌سيزليق بيزي يامان اينجيدير آي دايي! ـ دئينده، دايي ديک آياغا قالخيب، کهرين اوستوندن خورجونو آچيب گتيريب، هورانددان آلديغي تنبه‌کي‌نين بير گؤزونو دسترخانا بوشالدارکن، مشه بالاجا سئوينجيندن ديک آياغا قالخيب، دايي‌نين اوز ـ گؤزوندن اؤپوب: اَيه نه ياخشي کي هوراندا گئده‌ن آتلي بير تاجر يوخ بيزيم اَسي دايي‌ايميش، چوخ ساغ اول کيشي گؤزلريم ايشيقلاندي، دئميشدي.آيريليق چاغي گليب چاتديقدا مشه بالاجا تفنگيني جوانلارين بيرينه وئريب: اَيه بو کيشيني آپاريب ساغ ـ سالامات اهره چاتديريب قاييدارسان! بري باخ اِي! بونون باشيندان بير توک اسگيک اولورسا، توکونو داغيدارام دئميشدي. اَسي دايي قاچاق‌لا ساغولللاشيب، آتيني يئده‌گينده چکه ـ چکه يولا دوشدو. اونلار دره‌دن چيخيب هوراند جاداسينا چاتديقدا، دايي نه کي يالواردي پيادا آتين ترکينه مينمه‌ييب، ـ دايي نايران اولما يورولمارام دئدي.دايي اونون آديني سوروشدوقدا؛ او، آديني دئمه‌ييب، گولومسه‌يه‌ره‌ک ـ بوردا مني بالا کيشي چاغيريرلار ـ دئينده، دايي‌نين اونون هوشيارليغيندان خوشو گليب، اونو دانيشديرماغا باشلادي:ـ بالا کيشي مشه بالاجا سنين نه‌يين‌دير؟ سوروشاندا ـ مشه بالاجا منيم داييم‌دير ـ دئدي، البته دايي باجي اوغلو سؤزونو بو گون دؤنه ـ دونه مشه بالاجانين آغزيندان ائشيتميشدي، آنجاق دايي اونو دانيشديريب، يولا نردووان قويماق خياليندايدي. دايي بالا کيشي‌نين ياخين آدام اولدوغونو بيلديکده، آرخايينجا صوحبته باشلادي:ـ بالا کيشي داييندان برک موغايات اول، او چوخ کارا کيشي‌دير! او، لاپ کيشي‌لر تک کيشي‌دير. قاچاق سؤزو دئييلنده بير پارا بونو يالنيش باشا دوشه‌بيلر، بالاجا بگ، مردم‌آزار دله ـ دوزلار کيمي اونا ـ بونا دولاشيب ائله بئله چوللره دوشوب، قاچاق اولماييب‌دير. اونون تعريفيني آمباستالي‌لاردان چوخ ائشيتميشم. او ايگيت انسان‌دير. اونون نئجه بؤيوک‌خانين ناخيريندان، مال ـ قارالاري گيزليجه گتيريب، کندين يوخسول‌لارينا پايلاديغي شهرده ديل‌لر ازبري‌دير. ائله اونون زندانا دوشمه‌سي‌ده، بئله ـ بئله ايشلردن اولوب. بو کيشي‌نين تبريز زندانيندان قاچما ماجراسي‌دا، ائل ايچينده داستانا دؤنوب. تأسّف کي بيزيمکي‌لري يازان اولمور! بو کيشي ايندي او تايدا اولسايدي، بونون‌دا، نبي کيمي، کوراوغلو کيمي شأنينه کتابلار يازارديلار. هامي بيلير بو کيشي بير قاچاق يوخ، بلکه ظالم خانلارا، پاشالارا دشمن کسيلن بير قوچاق‌دير. بئله ـ بئله کيشي‌لرين قدريني بيلمه‌لي‌ييک، اوندان مغايات اولون! اَسي دايي‌نين سؤز ـ صؤحبتي بالا کيشي‌نين يامان خوشونا گليردي. اونلار يول اوزونو هئچ بيلمه‌ديلر هاچان گليب قالاجيق کندينه چاتديلار. بيردن اَسي دايي اؤزونه گليب، گون باتان سمته باخديقدا، سولغون گونشي کئچي قيران داغلاري‌نين باشيندا گؤرجک ـ اي دل غافل گونو آخشام‌لاميشيق ـ دئييب، آتين جلوونو دارتيب، آتدان ائندي. هاوا يامان سازاقلي‌ايدي ـ هاوا سويوق‌دور، ناسازلارسان ـ دئيه، ديراب پالتوسونو چيخاريب، يالوار ـ ياخارلا، بالا کيشي‌يه باغيشلادي. نهايت بالا کيشي‌له، چوخ منتدارليق‌لا ساغوللاشيب، اونو گئري قايتاريب، اؤزو ايسه اهره ساري يولا دوشدو. هاوا ياواش ـ ياواش قارالماغا باشلاميشدي.
اَسي دايي پاپيروزونو قورتارانادک، اهرين چيراقلاري اولدوز ـ اولدوز گؤز اوخشاييردي…

منبع :