بير بئله گونه‌باخان‌هاردان منيم ذهنيمه دولوب
1398/08/19
بولگه لر سرويسي: اوره‌ييوه آلما، ونگوکو شوخلوقجا دئديم. سنين بير بئله گونه‌باخان رسم ائتمه‌يين ونگوکو منيم ياديما سالدي. دئييرم ياني سن کي رسامليق ائله‌مزدين! نه اولوب بيردن- بيره رسامليغا دوشگون اولوبسان!؟ اؤزو ده گونه‌باخان رسمي!»آذرين ده رسم‌لريني من چکرديم. آمما آذر هميشه 19 آلاردي، منسه 16«
گؤيلوم ايستير اوتانمادان اونون ديشلرينه زيلله‌نيم. خوشوم گلير اونا بير جور هؤشنه وئريم. اؤزوم ده بيلميرم کيمين آجيغيني بئچارا نفيسي‌دن آچيرام؟ قيرخ ايل قاباغين، يوخسا اينديکي احوالاتيمين؟ نفيسي منيم احوالاتيمي‌هاردان بيلسين؟! اونون نه گوناهي وار؟ اؤزوم بيلمه‌ين يئرده، او نئجه بيلسين بير بئله گونه‌باخان‌هاردان منيم ذهنيمه دولوب، کاغيذلارا بوشالير!منيم سؤزومه گولوب، دئيير: »حتما معليميز چوخ هوشلويدو. سنه 16 وئرمه‌يينن ايستيردي سنه توبا‌لاتما وئرسين، تا بير ده يولداشيوين رسميني چحميه‌سن. تغللوب، تغللوبدي. فرق ائله‌مز 10 سوآلين جوابيني تغللوب وئره‌سن يا دا يولداشيوين رسميني چکه‌سن!«خانيم نفيسي قولاغيمي‌بوراخيب، دئيير: »زنگ وورولاناجان گئت دور حيطده. دوز ائله کيلاسين پنجره‌سي‌نين قاباغيندا. بوردان باخيرام.«کيلاسدان چيخاندا آذرين سسيني ائشيديرم: »خانيم قويون کوْتونو گئيسين، ائشيح شاختادي!«
منسه دايانميرام. قاپيني آچيب ائشييه چيخيرام. آذر آرخامجا قاچيب، کوْتومو اليمه وئرير: »هئچ اولماسا بونو گئي، سَتَلجم اولارسان آخي!« کوْتومو آذرين اليندن آليب، کوْريدورون اورتاسينا تولازلاييرام. حيطه چيخيرام.هاوانين شاختاسينا اوزومون دريسي بيز- بيز اولور. کيلاسين پنجره‌سي‌نين اؤنونده قالاقلي قارين اوستونده دورورام. بوردان من ده کيلاسي گؤره بيليرم. خانيم نفيسي‌دن علاوه، قيزلار دا بويلانيب منه باخيرلار. اويسا دري هوجئيره‌سي‌نين کناريندا بير آيري هوجئيره رسم ائله‌يير. نه دئدي‌ييني ائشيتميرم. آمما هوجئيره‌نين باشيندان اولدوزا بنزر بير قويروق اوزانيب. خانيم نفيسي درسي دئمه‌ميشدن اؤزوم اوخوموشام، بيليرم سينير هوجئيره‌سي‌نين شکيليدير. آياق بارماقلاريم سوْيوقدان کئهي‌ييب. پوْتونلاريمين ايچينده بارماقلاريمي‌ترپه‌ديرم بلکه قيزيشسين. گئت- گئده ال بارماقلاريم دا اوشويور. سونرا کئهي‌يير. کيفيمي‌قيچلاريمين آراسينا قويوب اللريمي‌قولتوقلاريمين آلتينا سوخوب قيزديريرام. بارماقلاريم ايستي- سويوق اولوب، آجيشير. آغلاماغيم گلير. کاش خانيم نفيسي »گئت تووالتده دور«، دئيردي. هئچ اولماسا اوردا دويونجا آغلارديم. خانيم نفيسي پنجره‌دن منه اشاره ائله‌ييب »گل ايچري«، دئيير. منسه اؤزومو سايمامازليغا وورورام. ائوميزه گئتمه‌ييم گلير. ائوده کورسو يوْرقاني‌نين آلتينا تَپيليب، راحات- فاراغات آغلارديم. آرخامي‌خانم نفيسي‌يه چئويريب، بارماقلاريمي‌هوْولاييرام.نفيسي اؤز يئرينده قايناشير. بو دؤنه ايلشمه‌سينين مودئليني دَييشيب، موْبلون دسته‌سينه ديرسکله‌نيب، منيم اوزمه تبسّوم ائلير.»قيزيم سن کي اؤزون هنرمندسن. قاباخکي کيمي‌ناغيل ياز. رومان ياز. قوْي رسّاملار دا رسم‌لريني چَحسيننر دا… بير ده اَيه تفنّون اوچون رسم چکيسن، هر شئيدن چَح. گول چَح. ساختمان چَح. نه بولوم، بو قديمي‌مودئللره باخ گؤر نه چکييب‌لر. اولماز کي آدام ايکي آي دالبادال گونده 10- 15 دنه گونه‌باخان چَحسين کي..!«ائله دانيشير، دييه‌سن قيرخ ايلدن سونرا گئنه ده منه مدرسه تکليفي وئرير. جينيم کله‌مه ويرير. ايستيرم دئيَم: »بيليسن ندي؟ گئت‌هامي‌يا دئه کي منيم ذهنيم گونه‌باخان اسهالي توتوب«. آمما ايندي‌يه‌جن نفيسي‌نين يانيندا بير کلمه بئله ادب‌سيز دانيشماميشام. حتي قيرخ ايل بوندان اوّل، مدرسه‌ده اونون امريله جزالانديغيمي‌بئله اونوتموشدوم.دئييرم: »چوخ ايستيرسيز بيله‌سيز نئيه بير بئله گونه‌باخان چکيرم؟«»دوزون آختارسان تَک من يوخ،هامي‌ايستير بو گونه باخان‌نارين سيرّيني بيليسن. سنين بو گونه‌باخان‌نارين‌هاميميزي هويوخ قويوب.«»خانيم نفيسي، ذهنيم اسهال اولوب گونه‌باخان ائشييه گئدير.«»ياني نمنه؟ بو دا تَزه سؤزدي؟«»ياني ذهنيم اجازه وئرمير گونه‌‌باخان‌نان سورا آيري بير شکيل چکيم«
نفيسي آوارا- گوْر منه باخير. يئريندن قالخيب کي گئتسين. منيم سؤزلريمدن يورولموش کيميدي. اونا اوره‌ييم يانسا دا، حياتيما باش اوزالتماسي، سينيرلاريما توخونوب. تيکاني لاپ ديبه‌جن باتيرماق هوسي بير آن بوراخمير مني.
»بير ديقه اَيله‌شين. ايندي ياديما دوشدو، آيري بير شکيل ده چکه بيللم«، دئييرم.
اويسا سيرّلي- شوبهه‌لي منه باخير. آنجاق اَيله‌شير. منسه بير واراق آغ کاغيد گؤتوروب قهوه‌اي پاستل‌له بيرمکعب چکيرم. ايچينده ميتوکوْندري (Mitochondrion)، توک غده‌لري و اونون کيمي‌باشقا نارين آيين- اويون چکيب مکعبين باش طرفيني ديش- ديش رسم ائليرم. اورتاداکي ايکي ديشي ده او بيري‌لري بويدا چکيب، اونو بير تابلو کيمي‌نفيسي‌يه ساري توتورام. نفيسي جين گؤرموش کيمي‌يئريندن قالخيب، تله‌سيک پالتونو گئييب، شاليني باشينا ساليب، »خداحافظ« دئمه‌دن بئله، قاپيني چيرپيب گئدير.
قاپي چيرپيلاندا اللريمي‌قولاقلاريما قويورام. قولاقلاريم قيزيشيب. بلکه ده پؤرتوب. قالميشام پؤرتوشموش قولاقلاريملا نه ائديم. دئيرم بس نفيسي قاپيني چيرپاندا، منيم ده قولاقلاريم يئريندن لاخلا‌ييب. اؤزومدن قورخورام. قولاقلاريمدان قورخورام. پنجره‌نين هئره‌سينه دوزدويوم گونه‌باخانلار بئله، مني قورخودور. ايندي‌يه‌جن اؤزومو بئلنچي خياللاريمين اختيارينا بوراخماميشديم. ايندي‌يه‌جن کيمسه‌يه نفيسي کيمي‌تيکان باتيرماميشديم. منه نه گليب بيليمرم!يئريمدن قالخيب، ميز اوستوندن نفيسي‌نين ياريمچيليق قالميش چاي ايسته‌کانين گؤتوروب، آشپازخانايا آپاريرام. گؤزوم پيچاغا ساتاشير. قولاخلاريم بتردن قيزيشير. قورخورام. تلم- تله‌سيک پيچاغي گؤتوروب، کابينئتين آلتينا آتيرام. اللريم قولاقلاريمدا، پنجره‌دن خياوانا باخيرام. نفيسي خياوانين او تايينا آتلايير. پيچاق و قولاق سؤزلريني ذهنيمدن پوزمالييام. بير يول تاپيب، اؤزومو مشغول ائله‌مه‌لييم.
کامپيوتري يانديريب، گوگلين آختاريش کادريندا »ونگوک و گونه‌باخان« سؤزونو يازيب اينتئر دويمه‌سيني باسيرام. يازيلارين بيريني آچيب اوخويورام. ونگوک ساري بؤرکونون آلتيندان بير جوت دوْمبا گؤزلريله منه ياناکي باخير. نه ياخچي کي منيمله گؤز- گؤزه گلمير.
119 ايلدن سونرا »ونگوک«لا»پل گوگن« آدلي فرانسسيز بير نقاشين بير- بيرلرينه يازديغي مکتوبلارا گؤره بللي اولوب کي، »ونگوک«ون قولاغيني اؤزو دئييل، بير داعوادا گوگن کسميشدي. تعجّوبله يازيني اوخويورام. يعني 119 ايل ونگوکا گؤره يالنيش دوشونجه‌لر يالنيش فيکيرلر…
يازيني اوخودوقجا قولاقلاريمين ايستيسي آزالير. آياغا قالخيب، پنجره‌دن ائشييه باخيرام. نفيسي هله ده خياوانين او تاييندا دايانيب، تاکسي گؤزله‌يير. بيليرم، آذر آيي‌نين شاختا سازاغيني دؤزه بيلمه‌دي‌يي قدر ياشلي‌دير. تيکاني ديبينه‌جن باتيرسام دا، اونون شاختادا دورماغينا راضي دئييلم. پنجره‌ني آچيب اوجادان قيشقيريرام:
»خانيم نفيسي، ياديمدان چيخميشدي دئيَم کي، بيزيم خياوان چوخداندي بيرطرفه اولوب دؤزون آژانسا زنگ وورم.«نفيسي تاکسي‌ده اَيله‌شنده دؤنوب منه باخمير. بيليرم سويوقدان جاني کئهي‌ييبدير. ستلجَم اولماغيني هئچ ايسته‌ميرم.پنجره‌نين هئره‌سيندن گونه‌باخان شکيللريمي‌ييغيب، پوشه‌نين ايچينده‌کي آيري شکيللرين اوستونه قويورام. ياريمچيليق قالميش اون‌اوچونجو گونه‌باخاني ساري پاستل‌له رنگله‌ييرم.
منبع :