ايبو اورا تهراندي…

بولگه لر سرويسي:گون اورتادان سونرا هاميميز بير يئره ييغيشديق.ايبو ايله دانيشيب، کئچميشلريميزي ديريتديک.

بولگه لر سرويسي:گون اورتادان سونرا هاميميز بير يئره ييغيشديق.ايبو ايله دانيشيب، کئچميشلريميزي ديريتديک.
زامان بيزه آمان وئرمه‌دن توو ايله قاناد چاليب اوچوردو. آخشام ساعات 8:30 دا آژانس دان تاکسي چاغيريب هامي ايله ساغوللاشيب تئرمينالا گئتديک.تئرمينالدا بير آز اويانا گئت- بويانا گل، ايبو ايسه يولداشلارينا، رئيس‌لرينه جويز حالواسي ايله اورمو نوغولو آلاندان سونرا اوتوبوسا مينديک.ساعات 10اولوب اوتوبوس تهرانا ساري يولا دوشدو. يولدا من بير آز فيلم ايله مشغول اولدوم، قالانين دا مين بير مصيبت ايله يالاندان ياتديم.
آنجاق ايبو قولاقلاريندان هندزفئري‌ني هئچ چيخارتمادي. ساعات 8حدودوندا تهرانا يئتيشديک. اوشاقليغيمدان بو اوچونجو دؤنه ايدي تهرانا گليرديم. قاباقجا ايکي دفعه تهرانين اولوسلار کيتاب سرگي‌سينه گؤره گلميشديم. آما بو دفعه اوره‌ييم هئچ خوش دئييلدي. يامان چيرپينيردي. تهرانين هر‌نه‌يي بيله‌مه آلا-بولا گليردي. آزادليق مئيداني گؤزومه ايري-اويرو گؤرونوردو؛ کلله‌-ماياللاق دورموشدو ائله‌بيل. قوشلاري اوچماق يئرينه، سانکي باليقديلار دئيه اوزوردولر. آنجاق نئچه دقيقه‌يه کيمي من بو بولانديريق حال- هاوادان آيريلا بيلمه‌ديم. بير کيشي‌نين منه توققوشماسي ايله اؤزومه گلديم. بلي من تهراندايديم.يئنه ترافيک، يئنه باساراق، يئنه کيفير هاوا، يئنه غريبه آداملار، و…!– هارا گئده‌جه‌ييک ابراهيم؟!– محمد تحمل ائله، بيله‌جکسن!ايبو آپاران يئره‌جن تاکسي‌دان خيياوانلارا، اوجا تيکينتي‌لره و …. باخديم. اوره‌ييمده حسرت يئيييرديم. بيزيم گؤزه‌ل، يام- ياشيل، صفالي شهريميز او جور، بورا دا باشکنددير دئيه بو جور!– محمد گؤزلرين چوخ خواب آلود‌دي. صبر ائله سني بهشته آپاريرام. اورادا دا دويونجا استراحت ائله.– ساغول ابراهيم- اينشاللاه…..ايکي ساعات خياوانلاردان يايين ايستي‌سين‌ده گزندن سونرا، يئتيشديک ايبو آپاران يئره! تاکسي‌دان يئنيب اوزبه‌اوزوموزده اولان خيياوانا گئتديک.محمد بورا تهرانين بالا شهري‌دي، بيزگئديريک او آسمان‌خراشا. گؤروسن؟– هه گؤرورم.– اورانين واحيدلرينين نصفي بير شرکت خارجي‌نين نماينده‌لرينين الينده، من ده اورادا اولورام.ايبو گؤرسه‌دن گؤي‌دلن تيکينتي‌يه چاتاندا، ايبو، آيفونون 11جي قاتينين دويمه‌سين چالدي. آيفون گؤرونتولو و يئني چيخان آيبفونلاردان ايدي.– ابراهيم خوش اومدي بيا بالا!، دئيه، بير قيرجانان سس ايله بيري دانيشدي.قاپي آچيلدي. آسانسورا مينيب، 11جي مرتبه‌يه گئتديک.اورادا اوچونجو واحيدين زنگين چالديق. بير قيسا مانتولو- عالمين بزه‌يين اؤز- گؤزونه ياخيب آداما بنزه‌مه‌ين- قادين بيزه خوش گلدين ائديب، بيزي ايچه‌ري آلدي.بيز موبل اوسته اوتوراندان سونرا، قادين منه ساري باخيب دئدي:– محمد جان خيلي خوش اومدي. خوب کاري کردي اومدي. ابراهيم جون، تعريف شما رو خيلي کرده!
من دانيشماميش، ايبو دئدي: خانم عزيزي‌ حالا کجاشو ديد‌ي! برادرم کار نويسندگي رو هم شروع کرده. کتابشم 3ماه ديگه چاپ ميشه.– آفرين، از قيافش معلومه جوون با استعداديه!اوره‌ييمده دئديم: هن ائششک اؤزنسن، قارپيز وئرمه قولتوقلاريما…بونلارين بو موفته تعريفلري منه خوش گلميردي. ميز اوستده‌کي تاختانين يازيسيندان بيلديم بو خانيم بورانين رئيسي‌دي. آنجاق هله بيلميرديم نه ايش ائده‌جه‌يم. قادينا باخيب دئديم:– ممنونم، شما لطف داريد… (البته بيلميرديم دارين دئيه‌م يا داريد، خولاصه آغزيما داريد گلدي)– خواهش عزيزم! اميدوارم همکاراي خوبي برا همديگه باشيم…– ابراهيم کارتو برات شرح داده؟ايبو اؤزونو ايتيره‌رک دئدي:آره خانم عزيزي، کم و بيش آشناس!منده جينقيريمي چيخارتماييب، آلاي- قولاي باشيم‌لا ايبونون سؤزونو تأييد ائله‌ديم. سونرا قادين دئدي:– پس بزار من تکميلش کنم. آقا محمد! شرکت ما کارش بيزينسه، در کنار اون داره اعضا جمع مي‌کنه تا با پول سهام اونا دست به انجام پروژه‌ها‌ي بزرگي بزنه. از امروز شما هم مسئول ثبت اسناد اين اعضا هستيد. هر سوال يا مشکلي هم داشتي با من تماس بگير. شما در طبقه دوم واحد 2 مشغول ميشي. اميدوارم موفق باشي…ضعيف سس تونويلا، ايچيمده راضي اولمايا- اولمايا دئديم: خيلي ممنونم خانم عزيزي، همچنين .– آقا ابراهيم، بقيه کارها هم با شماس، حالا ميتونيد بريد…خانيم عزيزي ايله ساغوللاشيب. آسانسور ايله 2‌جي مرتبه‌يه گئتديک. اوراداکي ? واحيد‌دن بيري دفتر، قالاني ايسه بو تيکينتي ده چاليشانلارين استراحت يئرلرييدي.ايبونون ياتاق يئري ده 3جو واحيد‌ده اولدوغو اوچون، مني ده اورا آپاردي. قاپيني آچيب ايچه‌ري کئچديک. ايچه‌ري‌ده 20 دنه ياتاق وار ايدي. فقط بئشي بوش ايدي. بير آن عسگرليييمي خاطيرلاديم.اورادا اولان‌لار ايبو ايله اؤپوش- گؤروش ائديب، ايبو ايسه مني اونلارا تانيتديردي.خئيلک دانيشاندان سونرا، ياتاغيمدا اوزانماغي مصلحت گؤردوم.محمد، محمد… سسي ايله يوخودان اوياناندا، باش تاپديم يورقونلوغومدان بيلمه‌دن يوخلاميشديم.
– محمد پاشو- نهار اومده!سونرا ياواشجا قولاغيما دئدي: « فارسي دانيش!» من ده هئچ‌زادان خبريم اولمادان فارسجا اوندان تشککور ائله‌ييب آياغا قالخديم.سوفرا باشيندا ايله‌شيب ناهار يئديک. زهرمار ايدي، ناهار دئييلدي کي! يئديييم هر تيکه‌ده سانکي بير آغير داشي قارنيما اودورام. نه ائده‌ بيله‌جه‌ييمي هئچ بيلميرديم. زامان مني اؤز ايچينده اويناديردي. اللريمدن توتوب، اؤزونه مخصوص اولان ديوارينا ميخلاميشدي. نه قورتولا بيليرديم نه ده زامان ايچينده يوخ اولوردوم. من ايسته‌مه‌دن، بيلمه‌دن، آنلامادان يامان بير يئرده دويونلن‌ميشديم…
او گونو، داريخمالاريملا، استرس‌لريمله گوندوزو آخشاما باغلاديم. اوره‌ييم کنديميزه داريخدي، آنامين دئيينمه‌لرينه، آتامين ايکي ياستيغي بير- بيرينين اوستونه قويوب بالاجا راديوسونو قولاغينا توتوب راديو دينله‌مه‌سينه داريخديم، خرمنلييه، فوتباليميزا، اورمونون گون‌باتانينا، مش اسماعيل عمي‌نين کندين مسجيدينده دئدييي اذان‌لارا، اورمويا، اؤزومه داريخديم.ايلک آخشامدان باشيمي باليشا قويوب ياتديم. سحر چاغي يئنه‌ ده ممدين سسي ايله يوخودان اويانديم.– محمد پاشو صورتتو بشور، ساعت شش‌ونيم، صبحونه ميدن. بعد ساعت ? ميريم آفيس!بير نئچه قورو و دمير آداملارنان قليان‌آلتيني يئييب ساعات ? اولانا کيمي حاضيرلانيب، ايبو ايله ايش واحيديميزه گئتديک. ايکي بالاجا اوتاق. بورادا فقط من‌له ايبو ايديک.
– ايبو نه خبردي؟ بورا هارادي مني گتيريب آزديردين؟!!– يواش!! سسيميزي ائشيدرلر. ائله دانيش بيلمه‌سينلر بيز فارس دئييليک؟– اوغلان قاچ آتيلماغييين داليجا. بيرينجي‌سي هم سنين هم ده يولداشلاريين لهجه‌لري دئيير هاراليديرلار. بو اوندان کيم اولدوغونو گيزله‌دير او دا بوندان! عجايب ايشه راست گلديک ها…– برو بابا!! سني ده بلا گتيرديم!                               آردي وار

منبع :