*تانيش‌ليق اؤلكه‌ميزين باشقا شهرلرينه تاي اورمودادا قيز ايله اوغلان ايسلامي‌قايدالاري قوروياراق بير-بيريني سئويب، موضوعنو آتا-آنالاري ايله آرايا قويوب، ائلچي گئتمك قرارينا گليرلر. بو آرادا كولتور ايله دوشونجه ياخينليغي چوخ اولورسا، بو ايلقارين باغلانماسي داها باشاريلي (موفق) اولاجاقدير.

*ائلچي‌ليك قيز عاييله‌سي طرفيندن ائلچي گئتمك ايجازه‌سي، اوغلان عاييله‌سينه وئريلندن سونرا، اوغلان آدامي(اوغلان قوهوملارينا دئييلير) ائل-طايفاسي‌نين آغ ساققاللاري‌نين بير نئچه‌سي ايله بيرليكده، قيز ائوينه گئديرلر. اوغلان عاييله‌سي يانلاريجا شيرينليق ايله گول ده آپارارلار. بو مراسيم ده ايكي عاييله آنلاشاندان سونرا، قيز ايله اوغلان بير آز صحبت ائديب، ياشام بويو بيرليك ده ياشاياجاقلاري اوچون دانيشيرلار.

ائلچي‌ليك باشاريلي اولاندان سونرا، صاباحيسي يوخسا بيرگون سونرا قان سيناوي (آزمايشي) وئرمك اوچون، ساغلامليق (بهداشت) ايداره‌سينين شعبه‌لرينين بيرينه گئديرلر. قيز ايله اوغلانين يانيجا ايكي-اوچ نفر ياخين قوهوم لاردان اورادا حضور تاپير. قان سيناوينين نتيجه‌سي مساعد اولاندان سونرا، اورا گئدنلر، شيرينليك يئمه‌يي اوچون بي اوغلانا قوناق اولورلار.

*كبين كسمه  قندسينديرما قيز ايله اوغلان آدامي‌طرفيندن بللي اولونان بير گونده، كبين كسمه مراسيمي‌قورولار. بو مراسيم يا كبين كسه‌نين دفترينده ويا قيز ائوينده چاغيريلميش قوناقلارين يانيندا كسديريلير. بو مراسيمدن سونرا شام اوچون، بي اوغلان عاييله‌سي، قيز عاييله‌سينه قوناق اولار.

كبين كسمه مراسيمينين يانيندا و يا نئچه گوندن سونرا قيز ائوينده قند سينديرما مراسيمي‌كئچيريلير. چاغيريلميش قوناق‌لار، قيز ائوينه گئديب، بي اوغلان عاييله‌سي طرفيندن گتيريلميش بزكلي كله قندي سينديريب، قندين باشيني تئز يئردن گؤتورنه پاي وئريلر. بو مراسيم ده آشيق لاريندا حضورو اولار. مجليسين گنجلري قند سينديراني دؤوره‌له‌ييب، قند سينديران قندي سينديران چاغدا قندين باشين گؤتورن مجليسين ان غرورلو اينساني اولوب، قيز عاييله‌سي طرفيندن ايسه انعامين آلار.

*آداخلي‌ليق (نيشانلي‌ليق) نيشانلي قالماق، ايكي سئوگيلينين ان خاطيره‌لي دؤوره‌لريندن ساييلير. بو گؤزل گونلر آلتي آيدان بير ايله قده‌ر زاماني واردير. بعضي عاييله‌لر ايسه نيشانلي قالماغي هئچ سئومه‌ييب، كبين كسديريلندن بير-ايكي هفته سونرا توي مراسيمين توتارلار. بو دؤوره اوچون قيز عاييله‌سي بي اوغلانا و اوغلان عاييله‌سي گلين خانيما نيشان اوزوگو آلارلار. نيشانلي‌ليق دؤوره‌سينده اؤزل گونلرده، بي اوغلان عاييله‌سي طرفيندن قيز ائوينه پاي گوندريلر. بو اؤزل گونلردن؛ قوربان بايراميني، اوروجلوق بايراميني، چيلله گئجه‌سيني، آخير چرشنبه‌ني، ايل بايراميني و… آد چكمك اولار. بو عزيز گونلرين ايچينده آخير چرشنبه پايي، چوخ مهم ساييلير. ايلين آخير چرشنبه‌سينده، دب اولاراق آخشاما ياخين، اوغلان عاييله‌سي مختلف پاي‌لار حاضيرلاييب، قيز ائوينه آپارارلار. پاي؛ قيزيل، گلين خانيما دون، اتك‌ليك، لئچك، گلين خانيمين عاييله‌سينه هئچ اولماسا بير جوت جوراب يادا كؤينك، شيرينليق و… اولور. قيز عاييله‌سي ايسه پاي گتيرنلره انعام وئرر.

*تويا قوناق چاغيرماق توي گونو بللي اولوب، قوناقلارين سايي ليسته اولاندان سونرا، قيز ايله اوغلان توي كارتي تاپشيريغي اوچون بازارا گئديب، توي كارتيني به‌يه‌نيب، تاپشيريق وئريرلر. گئتديكجه كارتلارين چوخو توركجه يازيلير. كارت لار حاضير اولاندان سونرا، هر ايكي عاييله اؤز قوناقلارينين كارتيني يايار.

*پارچا بيچمه تويا بير-ايكي گون قالان، اوغلان عاييله‌سي قيز عاييله‌سينه پالتار تيكديرمك اوچون پارچا آليب آپارار. بو گون ياخين قوهوم لار دا دعوت اولارلار. مراسيم بير بالاجا شنليك ايله سونا چاتار.

* حنا گئجه‌سي توي مراسيمينين ايلك گونو “حنا گئجه” آدي ايله دئييلير. حنا گئجه نين زاماني، قوناق لارا وئريلن توي كارتلاريندا بللي اولونار. گون اورتادان سونرا حنا گئجه باشلانماميش دان 2-3 ساعات قاباق، اوغلان ائوينين قاباغيندا “بؤيوك توي” چالينيب، اورمو ياللي‌لاري گئديلر. بويوك توي، اورمو توي‌لاريندا مخصوص بير يئره صاحيب‌دير. ايندي ده چوخلاري بؤيوك توي گتيريب، ياللي گئدرلر. حنا گئجه‌نين چاغي، توي كارتلاريندا 19 دان 24 قدر يازيلسا دا، اورمو توي‌لارينا چاغيريلانلار او گئجه‌نين يوخوسونو گؤزلريندن آتماليديرلار. حنا گئجه معمولا ساعات 10 دان باشلانيب، گئجه ياريسينا قدر واخت آپارار. بو مراسيمي‌بير نفر حنا گئجه آغاسي (توي دا بَي دئييلر) ايله بير نفر ائل آغاسي ايداره ائدر. بو مراسيم چوخ واختلار تالار لاردا قورولار. بوتون قوناقلار بو گئجه شنليك ائديب، بي اوغلانا اونودولماز بير گئجه ياراديرلار. بو مراسيمين ان دويغوسال (احساسلي) چاغي، بي اوغلانين آتا-آنا سيندان تشككور ائتمكي‌دير. مراسيمين ياريلاريندا، قيز ائويندن خون (خونچا) گتيريلر. بو خونچالاردا (تقريبا 4-5 خونچا اولار) دامادا آلينين حنا، پالتار، باشماق، چانتا، آينا-شمعدان و… قويولار. سونرا خونچ گتيرنلردن تشككور ائديب اونلارين پاي‌لارين وئررلر. حنا گئجه‌نين سونلاريندا بي آتا-آناسيني مجليسه گتيريب، اونلاردان حلالليق آليب، ياشام بويو اونا چكن امك‌لردن تشككور ائدر. بو آرادا، خون دا گتيريلن حنادان كوره‌كه‌نه وئريب، اووجونا ياخار. مجليسده اولان سوباي لاردا بو حنادا اوووجلارينا يوخسا چيلتيك بارماقلارينا ياخارلار. البته بودا بختلرينين آچيلمالارينا سيمگه‌دير.