اوخولون ايلک گونو

بولگه لر سرويسي:ساعات چالاري‌نين سسي ايله گؤزومو سيْخيب آچاراق يوخودان اويانديم. ال آتيب ساعاتين سسيني کسديم.گئجه ياريسينا کيمي ياتا بيلمه‌ميشديک، آللاه بيلير نه زمان يوخو توتوب. جانيمين هر يئري زوققولدايير، ائله بيل گئجه سحره کيمي داش داشيميشام.

بولگه لر سرويسي:ساعات چالاري‌نين سسي ايله گؤزومو سيْخيب آچاراق يوخودان اويانديم. ال آتيب ساعاتين سسيني کسديم.گئجه ياريسينا کيمي ياتا بيلمه‌ميشديک، آللاه بيلير نه زمان يوخو توتوب. جانيمين هر يئري زوققولدايير، ائله بيل گئجه سحره کيمي داش داشيميشام.
 خزل آييندا، اسن يئلين کوشولتو سسي پنجره‌دن اوتاغا گيريردي. باشيمي ساغا چئويريب آيدين-ا باخديم، گئنه يوخودا ديغيرلانيب يئريندن آرالي دوشموشدو؛ يورقان- دؤشک بير ياندا، اؤزو بير ياندا ايدي. قول‌لاريني چارپاز ووراراق قارنينا چکميش، ديزلري دؤشونه کيمي يوخاري‌يا گلميشدي.سولمازين خورولتو سسي هله‌ ده گليردي، اون ايل اورتاق ياشاميميزدا هله ‌ده بو خورولتو‌يا آليشماميشديم. سول اليم‌له اونو ترپه‌ديب، “سولماز دور! “- دئديم.يئردن بالاجا يورقاني گؤتوروب، آيدين-ين اوستونه چکيب آياغا قالخديم.– من گئديرم چؤرک آلام، سن ده دور چاي قوي!سولمازين گؤزلري قيپ- قيرميز ايدي، اونون دا گئجه‌ني ياتا بيلمه‌دييي بللي ايدي. سسيمه آيدين گؤزلريني آچدي. سحر يئمه‌ييني يئييب ائودن چيخديق.اؤزومون ايلک گون اوخولا گئتديييم گؤزوم اؤنونده جانلانيردي. دوز 30 ايل اؤنجه، 1367 .هاوا سرين‌لميشدي، آنام‌لا ساغ اول‌لاشيب، تک باشيما ائودن چيخديم.قونشوموزون اوغلو، بايرام، قاپي‌دا مني گؤزله‌ييردي. او مندن ايکي ياش بؤيوک ايدي، اوخول‌داش ايديک. کوچه‌لردن کسديرمه سالاراق، خيياوان‌لاردان ايراق، اؤزوموزو اوخولا چاتديرديق.آيدين ماشين‌دا قاباق قولتوق‌دا اوتورموشدو، سولمازسا آرخا قولتوق‌دا. هئچ بيلميرم نئجه گلديک، ساده‌جه بير آن اؤزومو اوخولون اؤنونده گؤردوم. يول بويو اوخولومون ايلک گونو بئينيمدن چيخميردي.بايرام اليمي سيخاراق مني اؤزونه ساري چکيب:-حسن، هوشون باشيندا اولسون آااا! ناظيم “اوّل‌لر” دئينده گؤر هارا دئيير گئت اورا.ناظيمي بورا کيمي کوچه‌ميزده گؤرمه‌ميشديم، بايرامين اوزونه گولوب، باشيمي ترپتديم. دوداق‌لاريمدا گولوش اولسايدي دا اوره‌ييم يامان دؤيونوردو، ايچيم تيتره‌ييردي. هردن بير بوينومدان قاوزانان ايستي، ياناق‌لاريمي قيزيشديريردي.آيدين اوزومه باخيب، گولومسه‌ييردي. آغزيمي آچيب “آيدين اوغلوم!… ” دئديم، سؤزون قالانيني گتيره بيلمه‌ديم؛ سؤزلر بوغازيمدا قالميشدي، نه دئيه بيليرديم نه اودا بيليرديم.بايرام دئدي:– گؤزله کيف-ين نيمکت‌لرين تيمينه ايليشمه‌سين چکيب جيْرار.نيمکت-ين نه اولدوغونو بيلميرديم، هله‌ليک گؤزوم اوخولون حيه‌طينده ساييسيزجا دولان اوشاق‌لاردا ايدي. بو ياشيما کيمي بير بئله اوشاغي بير يئرده گؤرمه‌ميشديم. اوشاق‌لاردا باشدان-باشا تَزه پالتار- باشماق گئين ده وار ايدي، ييرتيق-ياماق‌لي گئيينن ده. آرا بير اؤزومه تاي تَزه باشماق، ياماق‌لي شالوار، تميز کؤينک گئين ده گؤروردوم. سس يوکسلديجي‌سي (بلندگو) سسلندي ” اوّل‌لر گلين بويانا!” اوزو بيزه ساري اولان اوجا بوي، بيْغلي بير کيشي سول اليني گؤيه قالديريب سول يانا ترپه‌ديردي، اؤز- اؤزومه ” ائله بيل بو ناظيم دير” دئديم. بايرام مندن بير آز آرالي ايدي. “حسن! حســـن اده گئت!”- دئيه، منه باغيريردي. هله‌ده بايرامين سسي قولاغيمدا جينگيلده‌ييردي.آيدين-ين اليندن ياپيشيب، اوخولونا ساري آپارديق. سولمازين اوزو گولوردو. گئجه دئديک‌لري ياديما دوشدو؛
-حسن، گؤره‌سن نه‌جور اولاجاق؟ بو ائله چوخ فارسي باشارمير، قورخورام کيلاس ‌دا دانيشا بيلمه‌يه. آخي دئييرلر ايندي بوتون کيلاس‌لاردا فارسي دانيشيلير. بلکه هئچ اؤيرتمن‌لرين دئديک‌لريني بيلمه‌يه!-احَحح! دئمه سن آللاه! اؤز اوشاق‌ليغيم ياديما دوشور. بيز هئچ نه بيلمزديک، نه دئسه‌يديلر دوروب اوزلرينه باخارديق، سونوندا آنا ديليميزده دئيرديلر باشا دوشرديک؛ ايندي راديو، تلويزيون اوشاغين بئينيني دولدوروب، ائشيک‌ده فارسي دانيشان اوشاق دا آز دئييل.سولماز درين بير آه چکيب، آيدين-ا باخدي.اوخول اولدوقجا تر-تميز ايدي، حيه‌ط‌ده بئش-اون اوشاق آتا-آناسي ايله بيرگه وار ايدي. اوشاق‌لار هاميسي بير ساياق‌دا گئيينميشدي، گئييم‌لري تَزه ايدي. اوخول‌لار آچيلماميشدان ايکي هفته اؤنجه هانسي اوشاغين هانسي درس اوتاغيندا اولدوغونو بيزه دئييب، يونيفورم وئرميشديلر. آيدين ائله ايلک گوندن “من قاباق صندل‌ده اوتوراجاغام!” دئييردي. اؤن قولتوق‌دا اوتورماغا آليشقان ايدي.ناظيم-ين چيغير-باغيري ايله سيْرايا دوزولوب، درس اوتاغينا گئتديک. کوله، قاراشين بير قاديندرس اوتاغينا گيردي، قاپي‌دان ايچه‌ري کئچديکده درس اوتاغي‌نين ديبينده اوتوران‌لاردان “دوساله” دئييلن بيريسي “بَرپا” دئدي. بو قدر دو ساله آداش-ين بير يئرده اولدوغو مني شاشيرتميشدي. “د ساله” آدلي اوخوجولار آياغا قالخاراق بيري بيزه ده “دورون، آياغا دورون” دئدي."برپا"نين نه اولدوغونو بيلميرديم؛ آنجاق من ده او بيري اؤيرنجي‌لر کيمي داورانديم، برپا سؤزو ايله آياغا قالخيب "بَرجا" سؤزو ايله يئريميزه اوتوردوق. من هئچ "برجا" سؤزونون آنلاميني دا بيلمه‌ديم. آيدين‌ـ‌ي درس اوتاغينا بوراخيب اؤزوم ده اوخولون حيه‌طينده دايانديم. بوگون آيدين-ا آرخا دوروم دئيه، ايش يئريندن قويو (اجازه) آلميشديم. اوره‌ييم يامان سيخيليردي. اوخولون بيتمه‌سيني، ائويميزه دؤنمک ايسته‌ييرديم. اؤيرتمن بير- بير آدلاريميزي، هابئله آتالاريميزين نه ايش گؤردويونو سوروشوب، "کيتاب‌لاريزي آليب آپارارسيز ائوده جيليد توتارسيز و... " دئييردي.چالار سسي گلدي. بير آن اوخولون بيتديگيني دوشونوب، اؤيرتمن‌ين آرخاسيجا سئوينجک چانتامي گؤتوروب، ائشييه قاچديم. آزجا قاليرديم قاپي‌يا چاتام، “حسن هارا؟؟؟؟”، آرخاما دؤنوب بايرام-ي گؤردوم،-” من دئديم بس مدرسه قوتاردي”، دئديم. بايرام گولوب “هـــن! هله هاراسي‌دي، ايکي زنگ ده هله قالير!” –دئدي. سانکي باشيما بوزلو سو تؤکدولر، دونوخوب يئريمده قالديم. بايرام، “توالئته گئتسن اورا توالئت دير.”- دئدي. “يوخ، يوخوم!”- دئديم.يئني دن درس اوتاغينا دؤندوک. اورتالاردا بير نيمکت‌ده اؤزومه يئر سئچميشديم، بونو بايرام منه اؤيرتميشدي. بيراز اوتوردوقدان سونرا همان قاراشين قادين يئنه گلدي. “برپا…. برجا”، بيزسه دوروب، اوتوردوق. اؤيرتمن بير آز دانيشديقدان سونرا “دو ساله” اؤيرنجي‌لرين بيريني “مبصر” ليک اوچون سئچدي. او اوغلان هاميميزدان بويلو- بوخونلو ايدي. داراق بويو ووردورولموش ساچ‌لاري، چاتما قاش‌لاري، گوبود ديش‌لري اونا قورخونج بير گؤرونوم وئرميشدي. اونا باخديقجا قارنيم سانجيلانيردي.توالئته گئتمک ايسته‌ييرديم، اوزومدن گلميردي اؤيرتمه‌نه دئيم. نئچه دقيقه بئله سانجي چکه‌رک کئچدي. ايکي دؤنه ايسته‌ديم دوروب ائشييه گئدم، بايرامين “کلاسدان ايسته‌سن چيخاسان گرک خان معلم‌دن اجازه آلاسان، اجازه وئرسه گئده بيلرسن” دئديکلري ياديما دوشدو. ايکي-اوچ دؤنه اؤيرتمن‌ين اؤنونده اولان ماسانين اوستونه باخديم هئچ نه يوخ ايدي، اجازه‌نين اولماديغيني دووشوندوم. آياغيمي تيتره‌ديب، اؤزومو آرتيق ساخلاماق اوچون ديش‌لريمله دوداغيمين اتيني ديش‌لَييرديم. قارنيمين آلتي جيريليردي، کئشکه اؤيرتمن‌ين الينده اجازه اولسايدي، او زمان دئيرديم بيريني منه وئرردي، گئدرديم توالئته. داها دايانا بيلميرديم بير آن ايليق بير سويون قيچيمدان آخيب آياق قابيما دولدوغونو باشا دوشدوم. سويون يئرده آخماسي ايله، سودوک اييي درس اوتاغيني بورودو. ياناق‌لاريم پؤرتموشدو، اوره‌ييم قولاق‌لاريمين ديبينده دؤيونوردو. اؤيرتمن اوجا سسله “دو چيخ ائشييه، بي‌شعور!” دئدي. اوشاق‌لار گولوشمه‌يه باشلاديلار. باشيمي آشاغي تيکيب ائشييه چيخيب، تک باشيما ائوه ساري قاچديم. يولون تئز بيتيب ائويميزه چاتديغيني ايسته‌ييرديم.اوخولون اؤنونده سولمازلا دانيشارکن بير بالاجا اوغلانين ايسلانميش شالوارلا اوخول‌دان ائشييه چيخيب، قاچديغيني گؤردوک.سولماز تله‌سيک دئدي “آيدين ايدي!”.دايانمادان آيدين-ين داليسيجا قاچيب، اوخول‌دان بير آز آرالي اونو توتدوم. سولماز اؤزونو بيزه چاتديردي، اوره‌يي آغزينا گلميشدي. جيب تئلفنوم زنگ چالدي:-سلام آقاي عليزاده، آيدين مدرسه‌ده اؤزونو باتيريب، چيخيب ائشييه قاچدي… ”– من ايندي آيدين‌ين يانيندايام، ياشايين. – دئييب، تئلفونو باغلاديم. آيدين بير سؤز دئيه بيلميردي، دوداق‌لاري تيتره‌ييردي، گؤزلريندن ياش اله‌نيردي. سولماز، آيدين‌ين اوست- باشينا باخماياراق قوجاق‌لاييب باغرينا باسدي. ديله توتوب، ماشينا مينديريب ائوه ساري گلديک. يول بويو آيدين تئز-تئز آرخا پنجره‌دن بويلانيب يولا باخيردي. او، يولون تئز قورتارماسيني، تئز ائوه چاتماغيميزي ايسته‌ييردي.ائوه چاتيب بيرگه يويوندوق. اؤزوم سؤزون اوستونو آچميرديم، دئييرديم قوي اؤزو دئسين. يويونوب، چيخاندان سونرا گئديب بير آز اوزاندي.آخشام باشي گليب اؤنومده اوتوروب دئدي:– آتا بيليرسن نييه شالواريما ايشه‌ميشديم؟دئديم-يوخ، دئنه گؤروم نولوب ؟!اؤيرتمن درس اوتاغينا گيريب، باشلادي دانيشماغا. سلام زاد دئييب کئفيميزي سوروشدو، اما بوتون دانيشيغي آلاهي ديلده‌يدي من ائله باش تاپميرديم، هر کيم بير سؤز ايستيردي دئيه دئييردي “مگر سيزه مهدده فارسجا اؤيرتمه‌ييب‌لر؟ ” من ده مهدده هر نه اؤيرنميشديم، هاميسي ياديمدان چيخميشدي. دئييردي فارسجا دانيشين. نه قدر فکرلشديم توالئته گئتمه‌يين فارسي‌سين بيلمه‌ديم اونا گؤره اجازه آلانماديم. اؤزومو ساخلايانماديم شالواريما ايشه‌ديم.سولماز کئچه-کئچه گولومسه‌يه‌رک دئدي:-هله تئلويزيون نم نه قدر ائتگي‌له‌ييب هااا!

منبع :