سوس!.. گلديم
سوس!.. گلديم
1401/03/29
بولگه لر سرويسي: آوتوبوس داياناجاغيندا دورموشدوم قولتوغومدا کيتاب، اليمده کي بئش تومن ليک بيليطي بارماغيما دولاييب آچيرديم. داياناجاغين آرخاسي گؤزل چمن ليک و چمن ليين اورتالاريندا بير نئچه آغاج گؤيرميشدي.
همت شهبازي
بولگه لر سرويسي: آوتوبوس داياناجاغيندا دورموشدوم قولتوغومدا کيتاب، اليمده کي بئش تومن ليک بيليطي بارماغيما دولاييب آچيرديم. داياناجاغين آرخاسي گؤزل چمن ليک و چمن ليين اورتالاريندا بير نئچه آغاج گؤيرميشدي.
بو آغاجلارين کؤلگه سينده آداملار، اؤزلليکله اؤيرنجيلر اوتوروردولار. بو چمن ليين اوزونلوغوندا آرابير نئچه اسطول دا قويولموش و بو اسطوللارين اوزرينه آغاجلارين کؤلگه سي دوشموشدو. چمن ليين ايچينده هرگون الينده گونده ليگ اولان بير نفر اوتوروردو، اونونلا اوتوروب دورانلار دئييرديلرکي؛ »او، دلي دير«. آنجاق اونون گؤزل گئييمي، ساققاللي-بيغلي بَنيزي، قورخونج هئيکلي و بير ده گونده ليک آليب اوخوماسي، اونون حاققيندا دئييلن بوتون سؤزلري اينانماسينا گتيريب چيخاريردي. دوغرودور دفعه لرله اونون دلي-سوولوغونو گؤرموشدوم آنجاق باشقا ياندان ايسه، گونده ليک اوخويوب اولايلاردان دانيشماسي آدامي تعجبلنديريردي.
-بعلي، سوس!.. گلديم.بو سس مني آرخايا باخماغا مجبور ائتدي. آخي او، آوتوبوسون سسيني ائشيتمکله، چمن ليين اوستوندن قالخيب قيشقيراراق آوتوبوس داياناجاغينا طرف گليردي.
هامي آوتوبوسا مينمه يه تله سيردي. من سيرادا دوران آداملارين آخيمييلا آوتوبوسا مينديم. لاپ سونا قالاني من ايديم. بونا گؤره سوروجونون کناريندا، آوتوبوسون اؤن سيراسيندا آياق اوستو دوردوم. آوتوبوسون ايچه ريسينده سوروجونون آرخاسيندا اولان بير دمير بوروسو اوتورانلاري سوروجو ايله آييريردي.-بعلي، سوس!.. گلديم.-دئيه او دلي-سوو، آوتوبوسون سوروجوسونون يانينا چيخاراق بالاجا بير چارپايي نين اوستونده اوتوردو.هه..! نه جورسان شيرممد. کئيفين کؤکدي دئيه سن آ- دئيه سوروجو اليني اونون بؤيرونه ووراراق قيديقلادي. بو آندا او، اوجا سسله و نهايت غضبله »بعلي، سوس!.. گلديم.«- دئيه سوروجونون باشينا قيشقيردي. اونون قيشقيرماغينا هامي گولدو. آنجاق من آلنيمين قيريشلاريني بير-بيرينه سيخاراق اونون سؤزونون آرديني گؤزله ييرديم. بير نئچه ثانيه دن سونرا، اونون سؤزونون آردي اولماماسيني دوياندا، آلنيمين قيريشلاري آچيلاراق آوتوبوسداکي آداملارا قوشولوب من ده آلتدان-آلتدان گولومسه ديم. سن دئمه کي اونون بوتون عؤمور بويو اؤيرندييي ائله بو اوچ سؤز ايميش.
دوغروسو سوروجو اونون بؤيرونه اليني ووراندا و اونون »سوس!.. گلديم« سؤزونو ائشيدنده و اونلارين بير-بيرييله ايلگيلي اولماماسيني دوياندا تعجبلنديم. سن دئمه کي او تکجه بو سؤزلري بيليرميش؛ و ان ماراقليسي بودور کي بو سؤزلري نهايت گوج و غضب ايله دئييردي.شيرممد بوتون »بازار-وليعصر« آوتوبوسلاري نين سوروجوسو ايله تانيش ايدي. آخي سوروجولر اونو بو يوللارين اوزونلوغوندا آپاريب گتيريرديلر.»تپلي باغ« داياناجاغينا آز قاليردي. شيرممد يئنه ده اوجا سسله تکجه »بعلي« سؤزونو دئيه رک هامي نين دققتيني اؤزونه چکدي. ظنيمجه نئجه قيشقيرديغي نين گوجونه وارسايدي او هئچ زامان بو اوچ سؤزونو ده ديلينه گتيرمزدي.
اونون گور سسي آوتوبوسون ايچينده اولان آداملاري ديسکينديردي. سوروجو ساعات وورماق اوچون يئره يئندي. بو آندا داياناجاغين کناريندا بير قارغي و قارغي نين اوجونا بير قاتما ايله ساري آلما باغلاميش قيسا بوي و آريق بدن بير دلي-سوو گؤروندو.شيرممد اونو گؤرمکله يئنه ده هميشه کي سؤزونو قيشقيراراق سسلندي. او دا قارغيسيني الينده توتوب »ووو، ووو، ديديت، ديديت« دئيه رک ماشين سورن آداملار کيمي شيرممده طرف گلدي. شيرممد هله او يئتيشمه دن »بعلي، سوس!.. گلديم.« سؤزونو تکرار ائتدي.
-دلي، دليني تاپدي- دئيه آوتوبوسون ايچينده اولان بير نفرين سسيني ائشيتديم. بعضي لري، اونلارين بير-بيريله علاقه سيني گؤره رک گولمه يه باشلاديلار. آنجاق بعضي لري ده »اونو ماشين نان سال يئره« دئيه رک آجيقلانيرديلار.– »آخي گوناه شوفئرده دي، ائله بيل کي سووغاتدي. نه يه مينديرير مونو بيلمييم؟«- دئيه شيرممدين دلي-سوو دوستو آوتوبوسون کناريندا يولونو آليب گئتدي.سوروجو اسطولوندا اوتوراراق يولا دوشدو. ماشينين ايچينده کي او ايکي نفر هله ده بير-بيريله دانيشماقدا ايدي. اونلار بير-بيريله ياواش- ياواش دانيشيرديلار، حتتا سسلريني ياخينليغيندا اولان آداملار ائله من اؤزوم ده بئله ائشيده بيلميرديم. گؤز آلتي شيرممدي ايزله ييرديم. او، هردن باشيني قالديراراق او ايکي نفره هيرسلي-هيرسلي باخاراق سانکي هميشه کي سسي ايله قيشقيرماق ايسته ييردي. اونلار ايسه هله ده اؤز شيرين صحبت لرينه داوام ائديرديلر. من داها ائشيديرديم کي اونلار سؤزلريني توپلومدا گئدن اولايلارلا باغلاياراق توپلومدا اولان بعضي چاتيشمازليقلاري پيسله ييرديلر؛ و اؤزلري اوچون بير بؤيوک دوشونجه صاحيبي اولموشدولار. شيرممد بئله ساندي کي اونلار هله ده اوندان دانيشيرلار. بو آندا او، اللريني گونده ليين اوستوندن گؤتوروب يومروقلاريني توتاراق يئنه ده گور سسي ايله قيشقيردي: » بعلي، سوس!.. گلديم.«بو آندا اللريني گونده ليين اوزريندن گؤتورمکله بالاجا و يئتيشمه ميش ايکي بؤيوک نار يئره دوشدو. سونرا بيلديم کي بو نارلاري هميشه گونده ليين آلتيندا ساخلاييرميش.شيرممد داها اؤزوندن چيخميشدي. ايسته ييردي کي آرادا اولان دمير ميله لري گؤتوروب او ايکي نفري وورسون. ائله هيرسلنميشدي کي هئچ بير کيمسه اونو ساخلايا بيلميردي. سوروجونون باشينا قيشقيردي. سانکي سوروجو اونون داورانيشينا تانيش اولان کيمي بو دفعه او دا قورخاراق آوتوبوسو يولون کناريندا ساخلاياراق يالوارماغا باشلادي.آنجاق بو ايشلردن کئچميشدي. او، ايکي نفرين اوستونه دارتينيردي. ايکي نفر ايسه، گاه سوروجونون، گاهدان دا شيرممدين باشينا قيشقيريردي. ايندي شيرممده گولن بوتون آداملار آرتيق اوندان هويوخلانماغا باشلاميشديلار. بونلار اونو بو دورومدا گؤرن کيمي ايکي نفري ساکيتلشديرمه يه چاليشيرديلار. ايش اورا يئتيشدي کي اونو ساکيتلشديرمک اوچون ايکي نفرين بيريني، آوتوبوسدان دوشمه سينه راضي ائتديلر. آوتوبوسون قاپيسيندان دوشن زامان شيرممد –هله اونون ال-قولونو توتماقلارينا باخماياراق- اونون اوستونه جوماراق باشينا بير يومروق دا ووردو. هله ايسته ييردي اونون آرخاسينجا گئتسين، آنجاق سوروجو قاپي نين دويمه سيني ووراراق باغلادي. سوروجو و ماشيندا اولان آداملار شيرممدي ساکيتلشديرمه يه چاليشيرديلار. نهايت بير تَهر ساکيت اولدو.آخير کي اؤز مقصديميزه يئتيشديک. هامي دوشدو. او ايکي نفرين بيريسي، مئيداندا اولان پوليس ماشينينا طرف گئديردي. شيرممد ايسه ماشيندان دوشمه ميشدي. او سوروجو ايله دانيشماغا مشغول ايدي کي بير پوليس گليب هم شيرممدي و هم ده سوروجونو پوليس اداره سينه آپارماسيني ايسته دي. شيرممد ايسه، پوليسي گؤرمکله يئنه ده گور سسي ايله:-»بعلي، سوس!.. گلديم«.
منبع :