اصلان ايله انسان نغيلي
اصلان ايله انسان نغيلي
1401/02/04
بولگه لر سرويسي: بيري وار ايدي بيري يوْخ ايدي، آللّه‌دان سوواي هيچکيم يوْخ يدي
چئويردي: سما
بير گون بير اصلان اوْرمانين ميدانيندا اوْتورموش اوشاقلاري‌نين اوْيناماسيني سِير ائديردي. بيردن گوردو ميمونلارلا چاققاللار قاچ ها قاچداديرلار. اصلان سوْروشدو: “نه اوْلوپ نه خبردي؟” ديديلر: “هيچنه، بير انسان اوْرمانا ساري گليردي، بيز ده قوْرخدوق”.اصلان اوز اوزونه دوشوندو انسان چوْخ بويوک حيواندير هلبت. اوْ بيليردي زوْرو هامييا چاتار بونا گوره ده حيوانلاري ديله توتاراق دئدي:-انسانين قوْرخوسو يوْخدو کي!دئديلر:”دوزدور قورخوسو يوْخدور، قوْرخماق ياخشي دگيل آنجاق سيز بو گونه کيمي انسانلارلا قارشيلاشماميسيز، انسانلار چوْخ قوْرخماليديرلار، زوْرلاري دا هاميدان چوْخدور.”.اصلان قاهقاها چکيپ گوله‌رک دئدي:-آرخايين اوْلون! انسان نَدير کي؟ دئو ده گلسه من بورادا اوْلدوغوم سوره‌جه هيچنه‌دن قوْرخمايين!اصلان اوْ زمانا کيمي اوْرماندا ائشيگه چيخماميشدي و عمرونده انسان گورمه‌ميشدي. فکرلشدي ميمونلار و چاققاللاردان انسانين نه اوْلدوغونو سوْروشسا آبروسي گئدر. بو اوزدن ده هيچنه دئمه‌دي. اوز اوزونه دئدي يارين گئدرم اوْ قدر آختاراريپ انساني تاپارام سوْنرا دا لَشيني گتيررم آتارام بورايا کي حيوانلارين قوْرخوسو توکولسون.اصلان صباحيسي گون تکباشينا چوله ساري يوْلا دوشدو. گئتدي گئتدي گئتدي… يئتيشدي بير فيله. دئدي هلبت قوْرخمالي انسان دئديکلري بودور. بو يئکه‌ليکده اندامي اوْلان حتماً انساندير. قاباغا گئديپ سوْروشدو:-منه باخ گوروم، انسان سن‌ميسن؟فيل دئدي:-يوْخ بابام، من فيلَم. من اوزوم انسان اوْغلونون الينده جانا گلميشم. انسانلار گليپ فيللري توتورلار. بئليميزه تخت باغليرلار و اوْنا مينيرلر. سوْنرا چکيش ايله باشيميزدان دويورلر. آياقلاريميزا زنجير باغليرلار يا دا ديشلريميزي سينديريرلار و مين جور بلا باشيميزا گتيريرلر. من هارا انسان هارا…اصلان دئدي:-چوْخ ياخشي، اوزوم بيليرديم، دئديم گوروْم بيردن بئينيوه وورماسين انسان آدي قوْياسان اوزووه!فيل دئدي:-اختياريز وار اصلان جنابلاري، بيز غلط ائيله‌ريک انسان آدي اوستوموزه قوْياريق.اصلان دئدي:-ياخشي سوزو اوزاتما، چيخ گئت ايشيوين داليسيجا!
اصلان بونو ديييپ گينه يوْلا دوشدو. گئديپ گئديپ بير يئکه دَوه‌يه يئتيشدي، دئ?ي بلکه انسان بودور. چاغيريپ سوْروشدو:-دايان گوروم! سن انسانسان‌مي؟دَوه دئدي:-آللّه ائيلمه‌سين من انسان اوْلام. من دَوه‌يم، تيکان يييپ يوک داشييارام. من اوزوم انسان الينده اسير و ذليلم. گليپ يوز باتمان يوک چاتيرلار چيگنيمه، آج- سوسوز قوراقليق چوللرده مني دولانديريرلار. سوْنرا دا ال آياغيميزي زنجيرله‌ييرلر کي قاچماياق. انسانلار بيزيم سوتوموزو ايچيرلر، يونوموزو قيرخيپ عبا- قبا دوزلديرلر، گينه يقه‌ميزده ال گوتورمورلر، ا?تيميزي بيله يييرلر.اصلان دئدي:– چوْخ ياخشي، من اوزوم بيليرديم بونلاري.ايسته‌ديم گورم اوْلمايا آديوي انسان قوْيوپ ميمونلاري، چاققاللاري قوْرخوداسان بيردن.دَوه دئدي:-بيز آنلاماريق آديميزي انسان قوْياريق. منيم هيچکيمه آزاريم گئچمز. ميمون يا چاققال بيله اوْوساريمي چکسه‌لر اوْنلارين يانيجا گئدرم. من زحمت چکن بير حيوانام.اصلان دئدي:-ياخشي دا، چوخ دانيشما، چيخ گئت ايشيوين داليسيجا!
اصلان بونو ديييپ گينه يوْلا دوشدو. گئتدي گئتدي بير اينَگه يئتيشدي. اوز اوزونه دئدي “بو حيوان اوْ بوينوزلاريله حتماً انساندير”. گئچدي قاباغا سوْروشدو: -سن انسان عايله‌سيندنسن؟ اينک دئدي: -يوْخ قربان، انسانين بوينوزو اوْلماز کي. من اينَگم. اوزوم ده انسانلارين اليندن جانا گلميشم، بيلميرم ده هارا گئ?يم کيمه شکايت آپاريم! انسانلار بيزلري توتوپ گئجه‌لري طويله‌يه باغليرلار، گوندوزلري اکين يسرلرينه آپاريرلار و بيزي مجبور ائديرلر يئري شُخوملاياق، خرمن بيچک، عصّارليق چرخيني فيرلاداق. سونرا سوت ده وئرک، آخرده ده بيزي اولدوروپ ا?تيميزي يييرلر. اصلان دئدي:-بلي اوزوم بيليرديم، دئديم اوْلمايا بيردن باشيوا ويرا انسان آدي قوْياسان اوزووه و کيچيک حيوانلاري قوْرخوداسان. چونکي بو ميمونلار، چاققاللار انساندان قوْرخارلار.اينک دئدي:-يوْخ قربان، موضوع بو?ور کي من بو بوينوزلارلا…
اسلان سوزونو کسدي کي:-ياخشي ياخشي، چوْخ دانيشما، چيخ گئت ايشينه!
اصلان اوز اوزونه دئدي:”بس بللي اوْلدو انسانين بوينوزو يوْخدور.و يوْلونا دوام ائيله‌دي. گئديپ يئتيشدي بيراوزون قولاغا. اوزون قولاق دوردنعل چولده قاچيپ باغيريردي. اصلان بير آز اوْنا باخيپ دئدي: بو قاچيپ باغيران حيوان يقين منيم آختارديغيمدير. اوزون قولاغي چاغيريپ دئدي:-آهاي منه باخ گوروم! انسان کي دييرلر سنسن؟اوزون قولاق دئدي:-يوْخ اوز جانيم ايچون! من انسان اوْلامام. من اوزوم انسان اليندن يازيق اوْلموشام. ايندي ده ائله انسان اليندن قوْيوپ قاچميشام. اوْنلار چوْخ قوْرخماليديرلار. اللري بير حيوانا بند اوْلسا، داها يقه‌سيندن ا?ل چکن دگيللر. بيزي توتوپ يوک قوْيورلار بئليميزه. اوزلري مينيرلر بيزه، بيزي ده اله ساليرلار. دييرلر اوزون قولاق اوْلان يئرده پياده گئتميه‌سن گرک. بعضاً چوْخ آجيماسيز اوْلورلار.
اصلان دئدي:-ياخشي ياخشي، اوزون قولاق اوْلدوغونو اوزوم بيليرديم. من گئديرم گورم انسانلارين سوزو نَدير.
اوزون قولاق دئدي:-آنجاق، قربان چوْخ اوزوزدن مواظب اوْلون!
اصلان دئدي:-ياخشي، دا اوزون دانيشما، گئت ايشيوين داليسيجا. من نئيليه‌جگيمي بيلير.
آنجاق اصلان چوْخ تعجب ائديردي. بس بو انسان نه‌جور بير شيءدير، آخي فيلدن، دَوه‌دن، اينکدن، ائششکدن داها بويوک حيوان دا اوْلار مي؟ بير آز دا گئتدي بير آتا يئتيشدي. آتي آغاجا باغلاميشديلار، آغزينا دا توْربا باغلاميشديلار توْربادان آرپا يييردي. اصلان ايلَري گئديپ سوْروشدو:-سن کيمسن؟ من انسان آختاريرام.
آت دئدي:-سوس! ياواش دانيش انسان ايشيدر. اوْ تهلکه‌ليدير. تکجه سن بيزيم انتقاميميزي اوْندان آلا بيلرسن. انسانلار بيزي توتورلار، بيزه اوْوسار باغلاييرلار، بيزي ساواشلارا آپاريرلار، اوْوا آپاريرلار، بيزه مينيپ بيزي قاچيرديرلار، دَده‌ميزي يانديريرلار. باخ نئجه مني آغاجا باغلاييپلار!
اصلان دئدي:-اوز گناهيندير. ديشين وار، اوْوساريوي قير و گئت. بو بوْيدا چول، اوْ بوْيدا اوْرمان.آت دئدي:-بلي دوْغرو دور. آما چولده، اوْرماندا دا قورد وار، قاپلان وار، اصلان وار…
اصلان ددي:-ياخشي، ياخشي، چوْخ دانيشما آرتيق! منيم مهم ايشيم وار يوْخسا بيليرديم سنينله نئيله‌يم. آنجاق بو گون بوتون حيوانلارين اوجونو (انتقاميني) انساندان آلماق ايستيرم.
اصلان بير آز دا يوْل گئتدي، بير مزرعه‌يه يئتيشدي. گوردو بير کيشي آغاجين تخته‌لريني بيربيرينه باغلير، بير بالاجا اوْغلان اوشاغي دا اوْنا يارديم (کمک) ائدير و دال بوداقلاري دسته‌له‌يير.
اصلان اوز اوزونه دئدي:-دييه‌سن بو کاراگلمزلر ده انسان دگيللر آما سوْروشماقدا فايده وار. سوْروشمام بيليمين آچاريدير دييرلر.
گئديب قاباغا ايشله‌ين کيشيدن سوْروشدو:-انسان سَنسن؟کيشي قوْرخوپ دئدي:-بلي منم اصلان خان. من هميشه سيزين حاليزي هر کسدن سوْروشارام.اصلان دئدي:-چوْخ ياخشي، من گلميشم گورم سن کيمسن کي بوتون حيوانلاري اينجيديرسن و هامي سندن قوْرخور؟!
منبع :