ايکي پنجره؛ اوستاد حبيب ساهير حاققيندا خاطيره‌لر
ايکي پنجره؛ اوستاد حبيب ساهير حاققيندا خاطيره‌لر
1400/12/01
بولگه لر سرويسي: قاباقجا ساهيرين فارس ادبياتيندان ترجمه ائتدييي نمونه‌لردن دوزه‌لينن »سونمين گونشلر« آدلي بير کيتابي، 1361 نجي ايلده، دوکتور صديق باشچيليق ائدن »کانون فرهنگ آذربايجان(آذربايجان مدنيت اوُجاغي)« نشري توسطيله چاپ ائتديرميشديم.
مرتضي مجدفر
بولگه لر سرويسي: قاباقجا ساهيرين فارس ادبياتيندان ترجمه ائتدييي نمونه‌لردن دوزه‌لينن »سونمين گونشلر« آدلي بير کيتابي، 1361 نجي ايلده، دوکتور صديق باشچيليق ائدن »کانون فرهنگ آذربايجان(آذربايجان مدنيت اوُجاغي)« نشري توسطيله چاپ ائتديرميشديم.
بو کيتابا، اوستادين تورکجه ترجمه‌لريني احتيوا 8 غزل حافظدن، 11 حئکايت سعدي‌دن و 60 رباعي خيامدان، فارسجا متن‌لري ايله برابر داخيل ائديلميشدير. کيتاب چاپ اولدوقدان سونرا، او گونکو ارشاد اداره‌سي طرفيندن، کيتاب ساتان مغازه‌لردن و ناشيرين دفتريندن ييغيشيلدي و هاميسي خمير اولوندو. ايندي بو کيتابدان، اللرده اولان تعداد، ايکي بارماق ساييسينا دا چاتماز. کيتابين خمير اولونماسي، اوُستاد ساهيرين روحيه‌سينده، چوخ آغير منفي تأثير بوراخدي. حافظ الفت مقاله‌سينده وئريلميش ايکي غزلي هَمَن کيتابدان گوتورموشدوم.
مقاله چاپ اولان گون، آخشام باشي همشهري‌يه گيررکن، قاپيداکي نگهبان، دئدي:»تئزليکله گئت کرباسچي‌نين دفترينه!« کرباسچي، او زامان شهردار و همشهري‌نين مسئول مودورو ايدي. او عموميتله گئجه ساعات اوندان اويانا گلردي، حاضيرلانميش صحيفه‌لره باش چکيب، گوروب، گوستريش وئريب، امضالاييب، گئدردي.
تحريريه‌يه چاتديم و کيفيمي هله ميز اوسته قويماميشديم کي تحريريه‌نين منشي‌سي ده، مني هده‌له‌دي:»تئز اول گئت اوسته، کرباسچي‌نين اوتاغينا!« دئديم:»مگر کرباسچي واردير؟!« جاوابيمدا دئدي:»من بيلميرم… تئز گئت اوسته!«
1364نجو ايلين مرداد آييندا منه ووُرولان تئلفون ياديما دوشدو. بير داها قورخو جانيمي بوُرودو. خمير اولموش کيتاب ذهنيمده جانلاندي و بير آندا، بوُ دوُر اوزومو کرباسچي‌نين اوتاغي‌نين قاباغيندا گوردوم:»منه دئييبلر آقاي کرباسچي‌نين منله ايشي واردير…« اوتاغين منشي‌سي دئدي:»آقاي کرباسچي‌نين سحر چاغي سنله ايشي وار ايدي… شهرداري‌دان زنگ وورموشدولار… تاپانماديق سني! ايندي آقاي جمالي‌بحري‌نين سنله ايشي وار… کئچ ايچري!«
مهدي جمالي‌بحري، او گونلر، تهران بلديه‌سي‌نين روابط عمومي اداره‌سي‌نين مسئولو و همشهري‌نين صحيفه‌لرينه نظارت ائدنلردن بيري ايدي. من ايچري گيررکن، دووارين قيراغيندا بويوک بير گول دسته‌سيني گوردوم، هم ده جمالي‌نين يانيندا موبل اوستونده اوتوران قوجا بير قادين و اورتا ياشلي بير کيشي‌ني. جمالي مني گورجک، فارسجا دئدي:»ياشا آقاي مجدفر! عجب گوزل ايش گورموسن…« داها قادين و کيشي‌ني تانيميشديم. اوُستادين خانيمي، اوغلو حميد ايله برابر اورادا اوتورموشدولار. قورخوم، ائله هَمَن بئشينجي طبقه‌دن قانادلاناراق، اوچوب هارايا گئتدييني بيلمه‌ديم.
ائله بيل، سحر غزئته چيخديقدان سونرا، حميدگيل مقاله‌ني گوروب، آناسي ايله بير گول دسته‌سي توتدوروب، مرکزي شهرداري عمارتينه گئديب، کرباسچي‌نين گوروشونه چاتميشدير. کرباسچي ايسه، اونلارلا دانيشيقدان سونرا، غزئته‌يه زنگ آچيب، مني آراميش و سونرا، اونلاري مرتبط اولدوغو اوچون، جمالي‌بحري‌يه ارجاع وئرميشدير. جمالي ايسه، حميد ايله قاباقجادان دوست اولدوغو اوچون، اونو قارشيلاييب، ناهاردان سونرا، همشهري‌يه گليب، اونلارين منله گوروشدوکلريني ايسته‌ميشدير.
جاليب بو کي حميدله، آناسي، مجدفر آدلي بير کيمسه‌ني تانيميرميشلار، چون کي من ايچري گيررکن، ساهيرين خانيمي، ائله تورکجه دانيشارکن، دئدي:»بو کي مورتوز دور! ساهيرين دوستو…« دوز دور کي بو اتفاق مني نه قده‌ر شنلنديردي، آنجاق چکيب کئچميشلره ده آپاردي. سَحَردن آخشاما قده‌ر ساهيرين يانيندا اولدوغوم واختلار، ساهيرين گليني سيما خانيم‌دان بير باشقاسي، ساهيره باش دا وورمازديلار. او اوزونه سئچدييي تاخما ايمضالارين ايکيسي کيمي، »غريب« و »آقجاناباتلي غريب« ايدي. ساهيرين اوره‌يي چوخ توتولان واختلار، يولداش و انقلاب يولوندايا يوللاديغي يازيلارين، بو ايمضا ايله چاپ ائتديرردي. اونون سون وضعيتي و اولوم احوالاتي دا بو غريب‌چيليکدن اوزاق دئييلدي.
او يازي، ايران مطبوعاتيندا ساهيرين حاققيندا چيخيش ائتمه‌يين تابوسونو سينديردي و سونرالار، نئچه‌نئچه يازي‌نين انتشارينا مختلف مطبوعاتدا شاهيد اولدوق. حتي 80نجي ايللرده، من همشهري‌ده ساهيره ثابت »گوشه« يا فارسجا مطبوعاتدا دئييلن کيمي »ستون«، آچديم و مرتب اولاراق، اونون فارسجايا چئوريلميش شعرلريندن نمونه‌لر وئرديم.
بو يازي‌نين چاپيندان نئچه گون سونرا، حميدين خانيمي سيما خانيم، همشهري‌يه گلدي. اونون منيم ساهيرين هر نه جور خطله يازيلميش يازيسيني اوخودوغومدان خبري وار ايدي. او ساهيردن بير شعر گتيرميشدي و دئييردي بو شعري اوخويا بيلميرلر. ائله بيل کي ساهيردن بير مجموعه حاضيرلاماقدا ايديلر. شعري منه گوستردي. جانيم آلوولاندي: هَمَن ايکي پنجره شعري ايدي، هَمَن کي ساهير، اصليني منه وئرميش و اوزونه بير باشقا نسخه يازميش و ساخلاميشدي، هَمَن کارکاغاذلاريمين آراسينا قويولموش ايتيرديييم شعر.
سيما خانيم تعجبلنه‌رک، شعري راحاتجاسينا، باشدان باشا اوخودوم. سونرا ايسته‌ديم شعري بير باشقا کاغيذدا يازيم و بير فتوکپي دا اوزومه گوتوروم. قبول ائتدي. يازديم. کپي چکديم. سيما خانيم گئتدي و ايگيرمي آلتي ايل او زاماندان کئچديکدن سونرا، ميانالي دوست‌لارلا وعد ائتدييم گون گليب چاتدي. يوخاريدا يازديغيم سوزلردن علاوه، بئله قرارا گلديم کي سوزلريمي، چوخ آز ياييلان »ايکي پنجره« شعري ايله سونا چاتديريم. دقت ائتمه‌لييک کي شعر، 1355 نجي ايلده سويله‌نيليبدير. البته شعري، نئچه ايل قاباق اوستاد سونمزه گوسترديم. اوستاد سونمز، اوچ يئرده غلط اوخودوم سوزجوکلري تصحيح ائتدي.
منبع :