بولگه لر سرويسي:پري ايله داغ پئنجري درمکدن گليرديک؛ حيات يولداشيميزين عميسي‌ني گؤردوک. زميسي‌نين قيراغيندا چاره‌سيزجه گؤزلريني بير گئچينين داليسيجا زيلله‌ميشدي. بيزي گؤرجک دئيينمه‌يه باشلادي:ـ بير بئله قويون ايچينده باخ بو گئچي مني زارا گتيريب, داي اينجاريم‌دا قالماييب دوشم داليسيجا؛ قوردلاردا دا چيخار يوخدو، بونو توتوب يئيه‌لر، ياخام قورتولا…! پري گوله‌ـ گوله:»آي نورعلي عمي، من قورد. ايستيرسن اونو توتوم يئييم؟« دئيه سوروشدو. نورعلي عمي گولومسه‌ييب دئدي:ـ باخ، بو گئچيني توتا بيلسن يئ، نوش‌جانين اولسون! پري اؤز قايناتاسي‌نين جانينا آندا وئريب سوروشدو:ـ نورعلي عمي سني مش‌قوربانين جاني، توتسام گئچي منيم اولاجاق؟نورعلي عمي:»باخ هم مش‌قوربان، هم ده مش اوروج (منيم قايناتام) جانينا آند اولسون هر هانسيز بو گئچيني توتساز، سيزيندي. توتون منيم ياخام قورتولسون!« دئدي. من بو سؤزلري بير ظارافات سانديم. نورعلي عمي‌نين يانيندا اوتورارکن کئف ـ احواللاشديم. پري، کيشي‌نين سؤزونه اينانيب، دوشدو گئچينين دالينا. ها بوردا، ها اوردا نهايت توتدو. اوره‌يي دؤيونه ـ دؤيونه گئچي قوجاغيندا گلدي نورعلي عمي نين يانينا. تؤشويه ـ توشويه: »الوعده من‌الوفا، نه دئييرسن ايندي؟« دئيه سوروشدو. نورعلي عمي بيرآز قيزاريب، بوزاريب، اؤزونو سينديرمادان دئدي:ـ کيشي کيمي سؤز دئديم، گئچيني توتسان سنين، توتدون ايندي سنيندي. اما بيرشرطي وار، اونو قوجاغيندا کنده کيمي آپاراسان!پري بير منه باخيب، بير عمي‌يه بير ده قوجاغيندا کي گئچييه هئچ‌نه دئمه‌دن يولو قاتدي قاباغينا دوز کنده ساري. ائله گئديردي کي من الي‌بوش اونا چاتا بيلميردم. قايناتام‌گيله چاتديق. گئچيني يئره سالدي، بير قاتما ايسته‌ييب، گئچيني بَييرده ـ بَييرده آياقلاريني باغلادي. بير بئله زور ايشي گؤره بيلديگي اوچون اؤزدو ده تعجوبلويدو. هئچ ـ هئچينه بير گئچي قازانديغي اوچون سئوينيردي. قايناتام‌گيلده قوناق اولدوغونا گؤره کيمسه بير سؤز دئمه‌دي. اونلارين ائوي شهرده اولدوغو اوچون هئي: »اوروج عمي دئييرسن بو گئچيني ساتيم، يا کسيب اتين يئيک؟« دئييردي. هردن ده سئوينديگيندن بير سؤز ديلينه گتيريب، يا دا اوشاق يانا بير رفتار ائديردي. شام دا يئيه بيلمه‌دي. گئجه ياتيب ـ ياتماماغيني بيلمه‌ديم.سحر شافاق آتارـ آتماز اوشاغيمي آياق يولوندان گتيريرديم. قاپي چاليندي. اؤزـ اوزومه »خئير اولا گؤره‌سن کيمدي؟« دئديم. »کيمدي؟« دئيه سسلنديم.نورعلي عمي‌نين حيات يولداشي خانيم خالا قاپي داليندان سسلندي:ـ منم! گئچيني گتير، گلميشم گئچيني آپارام!قاپييا ساري گئده ـ گئده:ـ خانيم خالا سنسن؟ حيرصلي ـ حرصلي جوابلادي:ـ سن هله اؤرگشمه‌دين منه »عمي جاني«دئمه‌يي؟ نه خانيم خالاسيدي با!!؟گولومسه‌ييب دئديم:ـ اولسون اؤرَنرم خانيم خالا حيرصلنمه!خانيم‌خالا دئمه‌ييمه فيکير وئرمه‌دن:»هاني گئچي؟« دئيه اوجا سسله سوروشدو.ـ هانسي گئچي؟تعجب‌له اوزومه باخيب: «دونن گتيرديييز گئچي دا!»دئييب آرتيردي: بيزيم کيشيده عاغيل اولسايدي نييه باششاقچي اولوردو، او قويونلار هاميسي هالخيندي (خالقيندي) او گئچي ده هالخيندي. او آغزيندان بير سؤزدو بوراخيب، سيز نييه اينانيبسيزها!!؟بو سؤزلري دئيه ـ دئيه گئچيني قيچي باغلي ـ باغلي قوجاغينا آليب، زيققينا ـ زيققينا اورادان اوزاقلاشدي. قايناتام گيل ده پنحره‌دن باخيرديلار. من ده هئچ‌نه دئمه‌دن حيط قاپيسيني باغلاييب، ايچري گلديم. سسيمي چيخارتمادان يئريمه گيريب ياتديم.حيطه‌ده اوجالان سسدن يوخودان آييلديم، گونش ساچاقلاريني هر يئره ياييميشدي. پري ايدي. »هاني گئچي؟« دئيه بورـ بوجاغي آختاريردي.پنجره‌دن باشيمي چيخارديب:»آياقسيز قمار ايدي، داها اوتوزدون!…« دئديم.
بولگه لر سرويسي:پري ايله داغ پئنجري درمکدن گليرديک؛ حيات يولداشيميزين عميسي‌ني گؤردوک. زميسي‌نين قيراغيندا چاره‌سيزجه گؤزلريني بير گئچينين داليسيجا زيلله‌ميشدي.