عؤمرونون ميوه‌سي بير تک ائولادي »ائلناز« ايندي ايسه بخت ائوينه يوللانيردي. چولاق اسماعيل نه قدر اؤزونو اودا- کؤزه ووراندان سونرا دا ائله‌يه بيلمه‌ميشدي قيزي اوچون- هئچ اولمازسا بير آز قيوير- زيوير- جئهيزليک آلسين. بونا گؤره ايچه‌ريده اؤز- اؤزونو دانلاييردي:»اؤله‌سن، ارييه‌سن بئله کيشي! عؤمرونده بير ائولاد صاحيبي اولدون، آنجاق اونو اوزو سولو ار ائوينه يولا سالمادين!«

بو فيکيرلرله اونو لاپ آغلاماق توتوردو. آنجاق ديلينين آلتيندا- گلينين داليسينجا آغلاماق اوغورسوز اولار- دييه‌رک، اؤزونو ساخلاشديريري…

ائلناز ايري و قارا گؤزلريني ماشينين شوشه‌سينين آرخاسيندان قوجا آتاسينا تيکميشدي. کيشي‌نين يالقيز قالماغيني دوشونه‌رک، اونو دا آغلاماق توتوب، ياز بولودو کيمي‌دولموشدو. بو گون و ائله بو آنلار آناسي دا يادينا دوشوردو. اونون مهربان باخيشيني و دوداغينداکي تبسسومونو خاطيرلاييردي. يازيق آرواد اونون اوچون نه آرزيلار ائله‌ميشدي:» آي بالا، بير بخت ائوينه گئدن گونونو گؤرسئيديم اؤلمزديم!«. آمما اجل اونا آمان وئرمه‌ييب، 6 ايل اؤنجه اورک خسته‌لييي ايله دونياسيني دييشميشدي. آتاسي اسماعيل اونون داوا- درمانينا پول تاپمادي. او خسته قادين، اريني و بير تک قيزيني باشسيز قويوب گئتدي…

گونش داغلار داليندا ايتيب و قارانليق ياواش- ياواش شهره قاناد گريردي. ماشين يوللانيب و ائلنازي دا اؤزو ايله آپاردي. چولاق اسماعيل نملي باخيشلارلا اونو بير آز ايزله‌ييب، سونرا گئري دؤنوب آخسايا- آخسايا ايچه‌ري گيردي. ائوه غريب بير سکوت چؤکموشدو. اوتاغين قاپيسيني آچدي. قاپي جيريلداييب، چيرپيلدي. کيشي اؤزونو کؤهنه کيليمين اوستونه ساليب، هؤنکور- هؤنکور آغلاماغا باشلادي. سويوق و سس سيز- سميرسيز بير ائوده تک باشينا قالماغينا هله ده اينانا بيلميردي. آنجاق بير او ايدي، بير سکوتا دالميش ائو، آروادينين اؤلومونون آجي خاطيره‌سي، قيزينين جئهيزسيز بخت ائوينه يوللانماسينين دردي و بير ده يالقيز قالماغينين آغير غمي…

چولاق اسماعيل هله ده تاوانين هيس باسميش ديرک‌لرينه گؤز تيکميشدي. گؤزلرينين دؤوره‌سي قيزاريب، گؤينه‌ييردي. نفسي تنگه دوشوب و اوره‌يي يارالي قوش کيمي‌چيرپينيردي. ائله کيرپيک‌لري لاپ تزه‌جه بير- بيرينه يوووشماق ايسته‌ينده، کوچه‌دن ائشيديلن‌هاي-‌هاراي سس لري اونو اؤزونه گتيردي. باشيني يئردن قالديريب اوتوردو. سس‌لر لاپ ياخينلاشيردي. 

اليني دووارا سؤيکه‌ييب، آياغا قالخدي. اوتاقدان چيخيب، قيچيني چکه- چکه کوچه قاپيسينا ساري گئتدي. قاپيني ياري‌يا قده‌ر آچيب، کوچه‌يه بويلاندي… بير دسته آدام کوچه‌نين باشينا ساري يول باشلاميشديلار. چولاق اسماعيل گيلدن اوچ قاپي آشاغيدا ياشايان »حاجي جاواد« ايکينجي دفه »مکه« ‌يه مشرّف اولدوغونا گؤره جاماعات اونو يولا ساليردي…

ياي-