گوناهسيز گوناهکار

بولگه لر سرويسي: ماشينين سيقنالي‌يلا يوخودان آييلميش کيمي، باخيشلاري قهقهه ايله اوزاقلاشان ماشينداکي گنج‌لرين آرخاسيندان آسيلي قالدي.

عبدالله يالچين

بولگه لر سرويسي: ماشينين سيقنالي‌يلا يوخودان آييلميش کيمي، باخيشلاري قهقهه ايله اوزاقلاشان ماشينداکي گنج‌لرين آرخاسيندان آسيلي قالدي.

تک‌يونلو خياواني آدلاييب، چوخدا بؤيوک اولمايان و دؤرد باش عائله‌نين چؤره‌ک داغارجيغي حسابلانان اوفيس‌ين آستاناسيندا دوردو. بيرنئچه کره کليدي فيرلادي. قاپيني آچيب ايچري گيردي. هميشه »احتياط ايگيدين ياراشيغي‌دير« سؤزونه عمل ائده‌ر، احتياطي الدن وئرمزدي. وعده‌يه ياريم ساعات قاليردي هله. آنجاق او هميشه‌کي کيمي تئز گلميشدي. تر-تميز و سليقه‌ايله اوتولنميش کوتونو آسقي‌دان آسدي. اوستولونو سهمانلادي. حقوق کيتابلاريني يئر به يئر ائله‌دي. اونون حقوق اوزره تحصيلاتي اولماسادا، عالي تحصيللي‌لر دارا دوشنده يانينا گليب، مصلحت آلارديلار.ساعات بئش راده‌لري ايدي قاپي آچيلدي. ايچري گيرن – »سالام! يوبانماديم کي؟« دئدي. »ايلياس« -»يوخ! واختيندا گليبسن. بويور ايلش!« جواب وئردي.خوش- بئش‌دن سونرا »وقار« ماسانين سولونداکي اوستولدا يئرلشدي. اؤزونو راحات گؤسترمه‌يه چاليشسا دا اوز- گؤزوندن يورغونلوق و نيگارانليق ياغيردي. يايين قورا پيشيرن ايستيسينه باخماياراق ايچيني شپه وورموش – قيروو باغلاميش کيمي حس ائديردي. يوماق کيمي قيوريليب اوستولون تکينده بوزوشدو.ايلياس قوولوقداکي کاغاذلاري بير- بير واراقلاييب نظردن کئچيريردي. هردن چاتما قاشلاري بوزوشوب، سوموک دولو سيسقا صيفتينده او قدر ده ايري اولمايان گؤزلري کيچيليردي. آرا سيرا باشيني دا بولاييب خيسين- خيسين آجي گولوش ده قونوردو اوزونه.گؤزلويونو اينجه بورنونون زيروه‌سينه دايادي.گؤزلويون اوستوندن زهيملي- زهيملي باخاراق، قوولوقدان بيرکاغاذ گوستريب: – »نه‌دن … آخي نه‌دن؟!« سوروشدو. سانکي بيرقورشون ثقلتي، سيندان جينگيلتيسي وار ايدي بو »نه‌دن؟!« سورغوسوندا. وقارين روحونو ازيب، جمده‌يينه ائنيردي بو آغيرليق، بو جينگيلتي. او، ايلياس‌ين ايتي و اوزوجو باخيشلاريندان ساوونماق اوچون باشيني آشاغي تيکميشدي، آمما يئنه ده او نئشتر باخيشي، اؤز اوزه‌رينده حس ائديردي. اوندان قاچا بيلميردي. – »بو دوسيانين هانسي وريندن توتورامسا باليق کيمي اليمدن زويوشور دوشور.« دئدي ايلياس. وقار اؤزونو مودافيعه ده ائده بيلميردي؛ کؤکسونده بير آغيرليق حس ائديردي.
بير مشتري‌نين ايچري گيرمه‌سي دوروما بيرآز يوموشاقليق گتيردي. مشتري درديني قورالاييب، شيکاتيني سؤيله‌دي. مشتري‌نين گلمه‌سي ايله بير آز اؤزونو اله آلدي وقار. يازي اثناسيندا تزه گلن آدام دوداق آلتي ميزيلدانا – ميزيلدانا: – »الله بو دونيادا آدامي نه ساوادسيز نه ده آدامسيز ائله‌مه‌سين« دئدي. ايلياس گولومسه‌ييب، زارافات‌لا سوروشدو:– نه‌دن عمي‌جان؟
مشتري، دريندن بير آه چکيب فيسيلدايارکن، -»ساوادسيزين باشي بؤرکسيز قالير قادان آليم، آدامسيزين دا ايشي.« دئدي. ايلياس -»ائله‌دي عمي‌جان، ائله‌دي« دئيه‌رک، »عريضه‌ني يازارام، انشالله صاباح گل آپار!« دئييب، مشتريني يولا سالدي.داها گوندوزله گئجه‌نين دوداق -دوداغا گلن واختي ايدي. گونش يئني بير سحري باشلاماغا دينجلمک اوچون يوخويا گئديردي. ايلياس اوزونو وقارا توتوب دئدي:– قوولوقداکي‌لاري بير ده دريندن باخمالي‌يام، آمما دوزگون قرار اوچون حادثه‌ني بوتون دئتاللاريلا، هئچ نه‌يي اونوتمادان بيرداهادا دئمه‌لي‌سن.ايلياس، سسيني ديشلري آراسيندا سيخاراق – »بوتون دئتاللاريلا« سؤزونو داهادا وورغولادي.قاش قارالميش، وعده اؤتموشدو. ايلياس وقارلا ساغوللاشيب، اونونلا اوفيس‌ين ائشييينه قده‌ر آياقلاشدي، سونرا يئني‌دن وعده‌لشيب آيريلدي‌لار.ايلياس واختين کئچمه‌يينه باخماياراق هله ده اوفيسي او باش بو باش آدديملاييردي. دوستونون نئجه ده دلي‌سوو، ايستي قانلي و چيلغينليغيني ياخشي بيليردي. حاقسيزليغا دا نئجه امانسيز و عنادکار اولدوغونو دا اونوتماميشدي….:{ابتدايي صينيفي بيرکيلاسدا اوخويوردولار. شيديرغي ياغيش ياغيردي. يوخاري صينيف اوشاقلاريندان بيري صينيف يولداشيني ايته‌له‌ييب پالچيغا بولاشديرميشدي. وقار دا دؤزمه‌ييب آغيز- بورنونو ازيشديرميشدي. آناسيني مدرسه‌يه چاغيريب، اونا اوشاغي‌نين تربيه‌سيز اولدوغونو دا سؤيله‌ينده، او يئنه ده گناهسيزجاسينا زوراکيليغا معروض قالديغيني سؤيله‌ييب و اؤزونون حاقلي اولدوغونو دئميشدي مديره.}ايلياس بونلاري خاطيرلايارکن وقارين بئله بير دولاشيق دورومدان نئجه قورتاراجاغينا يول آختاريردي. بير آز دا اونونلا انصافسيزجاسينا داورانماسيندان پئشمانچيليق حسي کئچيريردي؛ آنجاق دوستونون دا بوز کيمي ارييب يوخ اولماسينا دؤزه بيلميردي.
***
گئجه ياريني اؤتموش، دان يئري ياواش –ياواش آغارماقدا ايدي؛ وقارين يوخوسو سانکي عرشه چکيلميشدي. فيکير خيال آردي آردينا بوتون وارليغيني چولقاميشدي. گؤزلري اؤنونده گول يارپاغي کيمي سولان »آي‌نور«ونو، جانيندان آرتيق سئودييي »نازلي«سيني و داها عادت ائتدييي »نورگول« ننه‌نين آغري سيزيلتي‌لاريني دوشونرکن، اؤزونو درين بير قارانليق قويويا دوشموش کيمي حس ائديردي. دوستاق اولما احتيمالينا دا دوشوندوکده، بو قويو داهادا درينلشير، داهادا قارانليقلاشير ظن ائديردي. باشي آغيرلاشيب، گؤزلري سانجير، کؤکسو سيخيلير و سونو گؤرونمه‌ين اضطراب اونو اؤز جايناغيندا سيخيب، سيخيب سيخيشديريردي. بيردن اوره‌يينه اوشوتمه دوشدو؛ جاني قيزيشدي. اؤز- اؤزونه – »ايلاهي، اولمايا نورگولوم ده منيم کيمي آتاسيز بؤيويه، نازليم آنام کيمي قاپي‌لار دوشگونو اولا؟!« سيزيلدادي.
قه‌هر بوغازيندا دويونلندي؛ نفه‌سي آغيرلاشدي؛ سير-صيفتيندن قان قاچدي.يان اوتاقدان آناسي نورگول‌ون سيزيلتي‌لاري وقاري اؤزونه قايتاردي:– نه اولوب آي ننه!؟»– آياقلاريم زوق-زوق زوققولدايير بالا! سومويوم سانجير؛ آز قالير جانيم چيخسين. بير يوللوق اؤلوب قوتارسئيديم سيزده راحات اولارديز، من ده«

منبع :