ماوي ايتين گؤزلري

او، ديقتله منه باخيردي منسه، بو قيزي اولّلر هاردا گؤردوگومو ياديما سالا بيلميرديم.

بولگه لر سرويسي:او، ديقتله منه باخيردي منسه، بو قيزي اولّلر هاردا گؤردوگومو ياديما سالا بيلميرديم.
اونون نم و مأيوس باخيشلاري کئروْسين لامپاسي‌نين تيترک ايشيغيندا پاريلدادي و من خاطيرلاديم کي، بو اوتاق و بو لامپا هر گئجه يوخوما گيرير، هر گئجه بوردا ايضطيرابلي گؤزلري اولان بو قيزلا گؤروشورم. هه-هه، من هر گئجه يوخو ايله گئرچک‌ليگين غئيري موعين سرحدّيني آشاراق محض اونو گؤرورم.
ستولا سؤيکه‌نيب آغيرليغيمي اونون آرخا آياقلاري اوستونده تارازلاشديراراق سيقارئت آختاريب يانديرديم، آجي توستو حالقالاري هاوايا قالخدي. بيز سوسموشدوق.  من ستولدا ييرغالانير، او ايسه آغاپپاق اوزون بارماقلاريني لامپا‌نين شوشه‌سينده قيزديريردي. اونون گؤز قاپاقلاريندا کؤلگه‌لر تيتره‌ييردي. منه ائله گلدي کي، نسه دئمه‌لي‌يم، اودور کي، فيکيرلشمه‌دن ديللنديم: "ماوي ايتين گؤزلري".
 او دا غمگين-غمگين جاواب وئردي: "هه. آرتيق بيز بونو هئچ واخت اونوتماريق". او، لامپا‌نين دايره‌وي ايشيغيندان کنارا چکيلدي و تکرار ائتدي: "ماوي ايتين گؤزلري. من بونو هر يئرده يازميشديم". او چئوريلدي و توالئت ستولونا ياخينلاشدي. آي ايشيغي دوشموش گوزگوده اونون اوزو - اوزونون عکسي، لامپا‌نين ايتيرک ايشيغيندا يوخ اولماغا حاضيرلاشان اوپتيک اوبرازي، اوخشاري گؤروندو.
 سويوق کول رنگلي غمگين گؤزلري کدرله منه باخدي و يئره ديکيلدي، صدفدن دوزلديلميش پودرا قوتوسونو آچدي، پودرا ياستييني آلنينا، بورنونا توخوندوردو."من قورخورام کي، دئدي، بو اوتاق باشقا بيري‌نين يوخوسونا گيرر و بوردا هر شئيي قاريشديرارلار".پودرا قابيني شاققيلداداراق باغلادي و آياغا قالخيب لامپايا ياخينلاشدي. "سنه سويوق اولمور؟ سوروشدو. "هردن اولورجاواب وئرديم. اوشوين اللريني آچيق لامپا‌نين اوستونه توتدو، بارماقلاري‌نين کؤلگه‌سي اوزونه دوشدو."
يقين کي، سويوقلاياجام،شيکايتلندي، عمللي باشلي بوز شهرده ياشاييرسان" دئدي.قيزين دريسي کئروسين آلوووندا پارلاق قيرميزي ميس رنگده گؤرونوردو. "سنين درين بورونجدندير، دئديم  هردن منه ائله گلير کي، سن اصيل حياتدا هانسي بير موزه‌يينسه کونجونده هئيکل اولماليسان". "
عکسينه، دئدي هردن سول بؤيروم اوستده ياتاندا يا دا اورگيمين دؤيونتوسونو ائشيدنده منه ائله گلير کي، مئتالدانام"."من سنين اورگي‌نين نئجه دؤيوندوگونو هميشه ائشيتمک ايسته‌ييرم"."اگر بيز آييقليقدا گؤروشسک، قولاغيني سينمين اوستونه قويوب ائشيده بيلرسن"."اگر بيز آييقليقدا گؤروشسک…" او، اليني لامپا‌نين شوشه‌سينه توخوندوروب ديللندي: "ماوي ايتين گؤزلري. من هر يئرده بو سؤزلري تکرارلاييرام".ماوي ايتين گؤزلري. بو ايفاده‌‌نين کؤمگي ايله او مني رئال حياتدا آختاريردي، بو سؤزلر بير-بيريميزي آييقليقدا تانيماق اوچون پارول ايدي. او کوچه‌به‌کوچه گزيب اؤزوندن آسيلي اولماياراق تکرارلاييردي: "ماوي ايتين گؤزلري".رئستورانلاردا دا سيفاريش وئرديکدن سونرا گنج اوفيسيانتلارا پيچيلداييردي: "ماوي ايتين گؤزلري". اطرافداکي اينسانلار تعجّوبله چيگينلريني چکيردي، اوفيسيانتلارسا لاقئيدجه باشلاريني ترپه‌ديرديلر. بير دفعه اپتئکده اولاندا يوخولاردان تانيديغي قوخونو دويدو و آپتئکچي‌يه دئدي: "يوخودا گؤردوگوم بير گنج وار.
او هميشه دئيير: "ماوي ايتين گؤزلري". بلکه سيز اونو تانيييرسيز؟" آپتئکچي جاوابيندا ايستئهزايلا گولوب پيشتاختا‌نين او بيري طرفينه کئچدي. او ايسه آپتئکين تزجه وورولموش کاشي دؤشمه‌سينه باخيردي و تانيش قوخو اونا عذاب وئريردي. دؤزمه‌ييب ديزي اوسته يئره چؤکدو و آغ پليته‌لرين اوستونده پومادا ايله يازدي: "ماوي ايتين گؤزلري".آپتئکچي اونا تپيندي: "سئنيوريتا، سيز دؤشمه‌ني کورلادينيز. اسکيني گؤتورون و دؤشمه‌ني تئز سيلين!"بوتون آخشامي او، ديزلري اوستده ايمکله‌يه‌رک حرفلري سيليردي و گؤز ياشي آخيداآخيدا دئييردي:"ماوي ايتين گؤزلري. ماوي ايتين گؤزلري". قاپيدا ايسه، دلي‌يه باخماغا ييغيشان آوارالار قهقهه چکيب گولوردولر. او سوسدو، منسه ستولدا اوتوروب ييرغالانيرديم."هر سحر،  من دئديم،سني تاپماق اوچون دئيه‌جه‌يم ايفاده‌ني خاطيرلاماغا چاليشيرام.
يوخودا منه ائله گلير کي، اونو ياخشي ازبرله‌ميشم، آما آييلديقدان سونرا بيرجه سؤز ده ياديما دوشمور". "سن کي، بو سؤزلري اؤزون اويدورموسان"."هه. بو سؤزلر اونا گؤره عاغليما گلدي کي، سنين کول رنگلي گؤزلرين وار. لاکين گوندوز سنين اوزونو ده خاطيرلايا بيلميرم". او، نا اوميد بارماقلاريني سيخدي: "آه، اگر شهريميزين آديني بيلسيديک!".دوداقلاري‌نين کناريندا غمگين قيريشلار عمله گلدي. "من سنه اليمي وورماق ايسته‌ييرم" ،دئديم. او، گؤزلريني قالديردي، آلووون ديللري ببکلرينده اوينادي."سن بونو هئچ واخت دئميردين" ،ديللندي. "ايندي ايسه دئييرم". او گؤزلريني آشاغي سالدي و سيقارئت ايسته‌دي. "نييه من ياشاديغيم شهرين آديني هئچ جوره خاطيرلايا بيلميرم؟دئديم. او مأيوس-مأيوس گولومسه‌دي:  "بو اوتاق منيم نئجه يوخوما گيريرسه، سنين ده ائله‌جه يوخونا گيرير". من قالخيب لامپايا طرف گئتديم، او ايسه آراميزداکي گؤرونمز خطي کئچه‌جگيمدن احتياطلانيب قورخا-قورخا گئري‌يه چکيلدي. اونا طرف اوزاتديغيم سيقارئتي آليب، لامپا‌نين آلوووندا يانديردي. "يقين کي، دونيا‌نين هانسي شهرينده‌سه بوتون ديوارلارا "ماوي ايتين گؤزلري يازيليب" ، من دئديم.اگر من بو سؤزلري خاطيرلاسام، سني آختارماق اوچون گونو صاباح دونيا سياحتينه چيخارام".اونون اوزو سيقارئتين قيرميزيمتيل کؤزو ايله ايشيقلاندي، درين بير قوللاب ووروب سيقارئتي نازيک بارماقلاريندا فيرلاداراق دئدي: "آللاها شوکور، دئيه‌سن، قيزينماغا باشلاييرام" ، و يازان پئروْنوُن آردينجا تکرارلاييرميش کيمي سؤزلري اوزادا-اوزادا دئدي: "من … قيزينماغا…  بارماقلاريني ائله ترپتدي، سانکي بورو شکلينده يومرولانميش گؤرونمز کاغيذ ورقيني جيردي  باشلاييرام…"کاغيذ قورتاردي و بوزوشه‌رک کوله دؤنوب دؤشمه‌يه دوشدو."
لاپ ياخشي اولدو دئديم - سن اوشوينده من هميشه قورخورام". بئله‌جه بيز نئچه ايللردير کي، گؤروشوروک. هردن ائله اولور کي، يوخولارين لابيرينتينده بيربيريميزي تانيديغيميز واخت، باييردا کيمسه قاشيغي اليندن سالير دؤشمه‌يه و بيز آييليريق. آز دا اولسا بيز آجي حقيقتله باريشميشيق - بيزيم دوستلوغوموز چوخ عادي اشيالاردان آسيليدير.
 صوبح چاغي عادي بير قاشيق دا بيزيم قيسا گؤروشوموزه سون قويا بيلر. او، لامپا‌نين آرخاسيندا دوروب منه باخير. ائله باخير کي، لاپ بيرينجي گئجه‌ده‌کي کيمي. او واخت من يوخودايکن اؤزومو لامپا و گوزگو اولان غريبه اوتاقدا گؤردوم، قارشيمداسا کول رنگلي گؤزلري اولان قيز دايانميشدي.من سوروشدوم: "سيز کيمسينيز؟" او ايسه "خاطيرلايا بيلميرم" دئدي،  "آما، دئيه‌سن، بيز آرتيق گؤروشموشوک."اولا بيلر. سيز بو اوتاقدا منيم يوخوما گيره بيليرسينيز"."دوزدور!" - دئديم."من سيزي يوخودا گؤرموشم". "چوخ غريبه ديردئييب گولومسوندودئمه‌لي، بيز يوخولاردا گؤروشوروک؟" سيقارئتين کؤزرن اودونا باخاباخا بير قوللاب دا ووردو. يئنه ده منه ائله گلدي کي او ميسدندير، آما سويوق و برک يوخ، ايستي و يومشاق ميسدن. "سنه توخونماق ايسته‌ييرم"  تکرار دئديم. "هر شئيي محو ائدرسن، قورخويلا ديللندي، منه توخونسان يوخودان آييلاريق و بير داها گؤروشمه‌ريک".يوخ دئديم، باشيميزي باليشا قويان کيمي، يئنه ده گؤروشه‌جه‌ييک". من اليمي اوزاتديم، آما او ترپنمه‌دي. "سن هر شئيي محو ائده‌جکسن… او پيچيلدادي.اگر خطي کئچيب گلسن، بيز دونيا‌نين آيري آيري طرفلرينه آتيلميش حالدا آييلاجاغيق". "اولسون" ، من تأکيد ائتديم، آما او يالنيز کيرپيکلريني ائنديردي: "بو گؤروشلربيزيم آخيرينجي شانسيميزدير. سن کي، سحر آچيلاندا هئچ نه‌يي خاطيرلاميرسان". من داها هئچ نه دئمه‌ديم. او ايسه اليني لامپايا قويوب شيکايتلندي: "بيز گؤروشدوکدن سونرا من هئچ واخت ياتا بيلميرم.
گئجه‌‌نين ياريسيندا آييليرام و داها گؤزلريمي يوما بيلميرم باليش اوزومو يانديرير و من هئي دئييرم: "ماوي ايتين گؤزلري. ماوي ايتين گؤزلري". "تئزليکله سحر آچيلاجاق،  دئديم،آخيرينجي دفعه من ساعات 2-ده آييلميشديم، ايندي همين واختدان چوخ کئچيب". قاپييا ياخينلاشيب دستکدن ياپيشديم "احتياطلي اول، خبردارليق ائتدي، قاپي‌نين آرخاسيندا آغير يوخولار ياشايير"."هاردان بيليرسن؟" "بو ياخينلاردا من اورا گيرميشديم چوخ چتينليکله گئري قاييتديم. آييلاندا گؤردوم کي، اورگيم طرفده، سول بؤيرو اوستده ياتميشام".
بونونلا بئله من قاپيني آچديم. يونگول مئه چؤلدن مونبيت و شوملانميش تورپاغين قوخوسونو گتيردي. من باشيمي اونا طرف چئويريب دئديم: "بوردا دهليز يوخدور. من تورپاق ساحه‌لري‌نين ايييني حيس ائديرم"."اوردا، قاپي‌نين آرخاسيندا، دئدي،يوخوسوندا تارلا گؤرن قادين ياتير. او هميشه کندده ياشاماغي آرزولاييب، آما هئچ واخت شهردن کنارا چيخا بيلمه‌ييب".
قاپي‌نين آرخاسيندا هاوا ايشيقلاشيردي و هر يئرده اينسانلار يوخودان اويانيرديلار. "مني، يقين کي، ناهارا گؤزله‌ييرلر"  ئديم. تارلالاردان اسن کولک ضعيفله‌دي، سونرا ايسه تامام داياندي. اونون عوضينه ياتاقدا اينديجه او بيري بؤيرو اوسته چئوريلميش آدامين نفسي ائشيديليردي. کولک داياندي و اونونلا بيرليکده قورخولار دا اؤلدو."صاباح بيز حؤکمن بيربيريميزي تانيياجاييق،دئديم من ديوارلارا "ماوي ايتين گؤزلري" کلمه‌سيني يازان قاديني آختاراجاغام." او، غمگين-غمگين گولومسوندو و اليني لامپا‌نين سويوماقدا اولان شوشه‌سينه قويدو: "سن گوندوزلر هئچ نيي خاطيرلاميرسان". اونون کدرلي سيلوُئتي صوبح ايشيغيندا آرتيق يوخ اولماغا باشلاييردي. "سن غريبه آدامسان، دئدي يوخولاريني هئچ واخت خاطيرلاميرسان".

منبع :