گونش ذيروه‌لري قيزارديردي

بولگه لر سرويسي: گونش تزه تزه ذيروه‌لري قيزارديردي کي جاني ننه قويونلاري ساغيب سوت بايداسيني آلاچيقين قاباغيندا يئره قويوب ايچري گيردي. اللريندن قوپان تزه سوت قوخوسو آلاچيقي بورودو. ياواشجا نوه‌سي اصلانين باشي اوسته گئچيب، سسله‌دي:

مسعود آذر

بولگه لر سرويسي: گونش تزه تزه ذيروه‌لري قيزارديردي کي جاني ننه قويونلاري ساغيب سوت بايداسيني آلاچيقين قاباغيندا يئره قويوب ايچري گيردي. اللريندن قوپان تزه سوت قوخوسو آلاچيقي بورودو. ياواشجا نوه‌سي اصلانين باشي اوسته گئچيب، سسله‌دي:
– اصلان، اصلان، دور بالام دور، دي دور بالامسان، گون اورتا اولدو.
اصلان جاواب وئرمه‌ييب اهمالجادان بؤيرو اوسته فيرلانيب، يورغاني باشينا چکدي.
جاني ننه بيرده سسله‌دي:–  اصلان، دور بالامسان دور، قويونلاريميز آجيندان قيريلديلار‌ها!
اصلان دوداغي آلتدا ميزيلدادي:–من گئد‌نمه‌رم، ايمران گئتسين، دونن‌ده من گئتميشديم.
– آخي قارداشين کئفسيزدير، گئدنمز، دور بوگون‌ده سن گئت، صاباح‌دا اونو گؤندرريک.
 اصلان دئيينه – دئيينه يورغاني قيراغا آتيب، آلاچيقدان چؤله چيخدي. دان يئري آغارارکن شئيورين هوندور قايالاري گؤز قارشيسيندا صف چکيب، اوباني دؤوره‌له‌ميشدي. ياخيندان، اوزاقدان قارالان قايالار، گونش چيرتداياندا باشدان قيزاريرديلار. اوبادا قويون – قوزو مله‌شيردي؛ کئچي‌لر داريخيب چپردن ائشيگه آتيلماق ايسته‌ييرديلر؛ ايت‌لرده هره‌سي بير داش ديبينه سيخيليب، باش قويوب قوللاري اوسته گؤز آلتيندان هنده‌وري ايزله‌ييرديلر.
اصلان ال – اوزونه سو ووروب، آلاچيقا قاييتدي. پالتارلارين گئييب، منده‌سيني چينينه ساليب، ال آغاجيني گؤتوروب، ائشيگه چيخيب چپرين قاپيسين آچدي. کئچي‌لر دارتينيب اؤنجه باييرا چيخديلار، اونلارين آردينجا قويونلار. اصلان سورونو اوزو آشاغا قاطارا دوزوب، ائل چيمنيندن کئچيريب، ماهي گؤلونده سوواريب، سونرا دره‌دن آتلاديب، قره‌داش گونئيينه ساري آپاردي.
گون اورتايا قالميش يئنه‌ده سورونو ماهي گؤلونده بره‌يه قايتاردي. سورو ماهي گؤلونه چاتاندا، آناسي گول‌صنم ايله باجيسي قرنفيل  الده بايدا – دولچا، قويونلاري ساغماغا گليرديلر.
اصلان اونلاردا اولان اضطرابي گؤروب، اوره‌يي چيرپيندي؛–آنا نييه نيگرانسيز؟
–بالا ايمرانين حالي ياماندير، اود ايچينده يانير، بدني آلوو تپير.
–آپارين شه‌هره دا.
–عمين گئديب کنده ماشين دالينجا.
اصلان بير – بير قويونلارين باشين توتوب ساخلاييردي و آناسي ايله باجيسي‌دا ساغيرديلار. آمما نئجه ساغديقلاريني هئچ اؤزلري‌ده بيلمه‌دي‌لر. تئزجه بله- بؤيورد ائديب، اوبايا ساري قاييتديلار. اصلان‌دا بير کاسا سوت ساغيب، ال چؤره‌ييندن دوغراييب يئدي. سونرا دوروب قويونلاري ترپه‌ديب، شئيورين ياشيل چيمنلي، سال‌داشلي دؤشلرينه يايدي. گون اورتا چاغي يئنه‌ده سورونو ماهي گؤلونه قايتاريب سوواريب سونرا بوراخدي داشلارين کؤلگه‌سينده ياتيشسين‌لار. ياخين فاصله‌دن گلن ساز سسي و نئچه آدامين‌هاي – کويو، اصلاني بولاق باشينا ساري چکدي. نئچه نفر داغچي بولاق باشيندا اوتوراق ائتميشديلر. بير گنج اوغلان سازي باسيب سينه‌سينه، يانيق کرمي‌چاليردي. اصلان ايره‌لي گئديب، سالام وئريب، بولاق باشيندا اوتوروب، ال اوزونه سو ووروب، بير اووج‌دا سو ايچدي، سونرا بير داش اوسته چيخيب اوره‌ک تئللرين اوخشايان سازين سسينه دالدي.
–  چوبان کيشي نئجه سن؟
بو بير اورتا ياشلي داغچي‌نين سسي‌ايدي کي الين قويموشدو اصلانين چينينه. اصلان اؤزون ييغيشديريب اوتانا–اوتانا جاواب وئرير:
– ساغ اول ياخشييام.
–  چوبان کيشي آدين نه دير؟
–اصلان.
–دوغرودان‌دا ائله قوچ اصلان‌سان.
– اصلان بيزه بير آغيز اوخويا بيلرسن؟
– يوخ، من نه اوخوياجاغام؟
–نه اوخوياجاقسان؟ آ کيشي بير عاشيق ماهنيسي اوخو.اصلان اوتانا اوتانا دئدي:
– هه، نه دئييرم، اوخويوم دا.
اصلان گليب ساز چالانين يانيندا اوتوروب، کؤکسونو تميزله‌يير، سسيني صافالدير.
– اصلان بي‌هانسي‌هاواني چاليم؟
-هاوانين آدين بيلميرم، آمما سوزلري “سالامات قال”دي.
–ديلينده بير‌هاواني گل.
اصلان ديلي ايله‌هاواني چالير.
– لاي لاي لايلاي لالاي، لايلاي لالاي لاي …
–هه گؤيجه گولودور، نه گوزه‌ل. اوخو اؤلمييه‌سن سني آکيشي!
اصلان اوخويور:بلکه بو يئرلره بيرده گلمه‌ديم،
دومان سالامات قال، داغ سالامات قال     ….
–ساغ اول!!!   – ساغ اول!!!
 هامي‌داغچي‌لار ساغ اول دئييب، اصلاني ناهارا قوناق ائديرلر. اصلان‌دا بير بؤيوک کاسا سوت ساغيب، اونلارا وئرير. دسترخان آچيلير، يئمک گلير، يئييب – ايچيب، يئنه ده ساز چالينير، اصلان‌دا اوخويور.
بير آز زامان کئچمه‌ميشدي کي اصلانين داييسي قوتاز و عميسي اوغلو صابر، اوبادان قويون ايچينه گلديلر. هر ايکيسي‌نين گؤزلري قيزارميش، احوالاتي پريشان‌ايدي. صابر اصلاني گؤرجک، هؤنکوروب‌هاي –‌هاي آغلايير. اصلانين سسي بوغازيندا قورويور. ساز چالان بو احوالاتي گؤرجک اللري آغيرلاييب، دايانير. سازين سيملري سيزلاييب، سوسور. اصلان موضونون نه اولدوغونو دوشونوب، اللرين اوزونه قويوب، زولوم – زولوم آغلايير.
قوتاز ايکي ارکک سورودن آييريب، قاتيب قاباغينا، اوزو يوخاري اوبايا ساري يولا دوشور. صابرده آغير – آغير قوتازين آردينجا.
داغچي‌لارين گؤزلري دولوب، اوره‌کلري سيخيلير، هره‌سي بير طرفده الي قوينوندا اوتوروبلار.

منبع :