سونقار
سونقار
1401/02/18
بولگه لر سرويسي:بالاجا کندين تکجه کارخاناسي صوبحدن آخشاما تاراق- توروق ايشله‌ييردي. اونلار قلم استحصال ائديرديلر. هاميسي بير رنگده، بير آربادا. کول رنگي. اوردا طبيعتدن باشقا هر نمنه کول رنگده ايدي. اونونچون او کندين آديني »قارا کند« يوخسا »کوللو کند« قويموشدولار.
سحر خياوي
بولگه لر سرويسي:بالاجا کندين تکجه کارخاناسي صوبحدن آخشاما تاراق- توروق ايشله‌ييردي. اونلار قلم استحصال ائديرديلر. هاميسي بير رنگده، بير آربادا. کول رنگي. اوردا طبيعتدن باشقا هر نمنه کول رنگده ايدي. اونونچون او کندين آديني »قارا کند« يوخسا »کوللو کند« قويموشدولار.
بو کندين شهرلر ايله او قدر ايلگيسي يوخ ايدي. آداملاري چوخلوق بوتون عؤمورلريني ائله بالاجا يوردلاريندا ياشاييب اوردا دا اؤلوردولر.»دانيار«کندلري باره‌ده چوخ دوشونوردو. آناسيندان حئيرتلنديريجي سورغولار سوروشوردو:– آنا نه دن بيزيم کندي، کوللو آدلاييرلار؟!
– نه دن حيطيميزده، باغيميزدا اولان او گؤزلليک، رنگارنگ‌ليک ائولريميزده يوخدو؟!
– يوخسا بو قارا دووارلار گؤزلليک‌لرين قاباغيني آلير؟!– نه‌دن ائويميز، پالتارلاريميز بو قدر کيفير و اوره‌ک توتان دير؟!
آناسي اونا دونوخوب بو سورغولارين هئچ بيريسينه جاواب تاپميردي. ديلي دولاشارکن:
– ن….نه بيليم آخي آي اوغول، آتا- بابالاريميز دا ائله بوردا بئله ياشاييب، بئله اؤلوبلر. سن ده باشيني آشاغي سال، درسيني اوخو، باشيندان بويوک دانيشما. آتا- بابالاريميزدان مثل‌دير »اوزون ديل باشيني بلايه سالار«.دانيار باشيني آشاغي ساليب دينمه‌دي. آمما پيرتلاشيق فيکيرلر اونو دينج قويموردو. بير ايش گؤرمه‌لي ايدي.لاپبادان بير فيکير ذهنيني ايشيقلانديردي.
رسيم دفتريني آچيب کول رنگي قلمي ايله بير باغچا-باغلي ائو چکدي. سونرا حيطلرينه گئديب گول- چيچکدن، يارپاقدان اوتاغينا گتيردي. گونشين شعاعلاريني گونه باخان گوللري ايله، گوللري گول يارپاقلاري ايله، آغاجلاري آغاج يارپاقلاري ايله و….هر نه‌يي سهمانلا اؤز رنگينده، طبيعتدن ايلهام آلاراق، ياپيشقانلا ياپيشديريب، اؤزونه رنگلي- بزکلي بير رسيم حاضيرلادي. رسيمي، ائولرينده کي کول رنگلي خالچايا يوخ، بويالي، اوره‌ک آچان خالچايا بنزه‌ييردي.رسيمده کي آچيشقالارا کول رنگي پرده‌لر يوخ، گوللو-چيچکلي پرده‌لر آسيلميشدي. آخي دانيار چکديگي پرده‌لره ده گول يارپاغي ياپيشديرميشدي.رسيمده کي ائو- ائشيک پار- پار پاريلداييردي.صاباح اوخولدا رسيمي اؤيرتمنه گوسترنده، اؤيرتمن تعجوبلندي. اونا مرحبا دئييب، اوشاقلارا دفتريني گؤستردي.– اوشاقلار سيز ده دانيار کيمي بئله گؤزل رسيملر چکين. گؤرورسونوزمي طبيعتدن نه گؤزل فايدالانيب؟!سونرا اؤز- اؤزونه دوشوندو: »ائله بئله اولوب دا بو کندين آداملاري بو قدر يازيق و کول باشلي اولوبلار!! تانينمايان قارا اللر بوتون گوزلليک‌لري بو يازيق کوتله‌دن اسيرگه‌ييب‌لر.«اوشاقلار دا دانيارين رسمينه باخيب، اونون نئجه بئله بير فيکير ذهنينه گلمه‌سيندن شاشيرديلارسا دا، اونو آلقيشلاديلار.
گلن دفعه اؤيرتمن کنده گلنده، شهردن اؤزو ايله شاگيردلرين ساييجا بويالي قلم‌لر آليب گتيردي. هر بسته ييرمي دؤرد رنگ.
اوشاقلار او گوندن بويالي رسيملر چکديلر. هله يوخولاري دا بوتون رنگلي اولدو. آخي بوندان قاباق کول رنگي يوخولار گؤروردولر. کؤرپه‌لري قارا باسيردي. قاپ- قارا کابوسلو يوخولار گؤررکن قان-تر ايچينده ديکسينيب آغلاشيرديلار. برک- برک آنالارينا ساريليرديلار.
بو حاديثه کارخانين مودورونه خوش گلمه‌دي. سان کي اونلار آداملاري شاد و خوشبخت گؤره بيلميرديلر. سئوينجلي اينسانلار گؤزلرينه تيکان باتيريردي. اودور کي بير گئجه ياريسي يوک- ياپلاريني کنددن چکيب بير کره‌ليک باش گؤتوروب قاچديلار. البته گئتمه‌ميشدن قاباق اَجلافليقلا کارخاناني اودلاديلار.رنگلر ياواش- ياواش ائو اشيالارينا دا کئچدي. کند اهلي لاپبادان يوخودان آييلان کيمي ائولريندن ايللر قازاماتين توزونو تؤکدولر. ائولرينه دسته- دسته گول- چيچک قويدولار. اونلار بويالارين نه قدر ياشاملاريندا شنليک ياراتماسيني دوشوندولر. شهردن ائولرينه رنگلي- بزکلي شئيلر آلديلار.کند ايشيق- ياراشيق ايچينده پار- پار پاريلداييردي.اورا داها کوللو کند يوخ، گوللو کند آدلانيردي.
گؤزل بويالار کندين آداملارينين اوره‌ييني آچيب، اوزلريني شافاخلانديرميشدي. قيز- گلين‌لر آل- الوان گئيينيب، بزه‌نيرديلر. هامي اوره‌کدن گولوب، سئوينيردي.کند اهلي ده يئني ايلده اونلارا او قدر اوغور و سعادت گتيرن، بويالار کارخاناسينين يئني دن برپا ائتمه‌سينه فيکيرلشيرديلر. اونلار ييرمي دؤرد رنگده قلم استحصال ائده‌جکديلر.صاباح ايل بايرام ايدي. قيشين سون گئجه‌سي دانيارين آناسي اونا بير آللي- گوللو قارداش دا دونيايه گتيردي.دانيارين سئوينجي باشيندان آشيب- داشيردي. بو کيچيک اوشاق اونا ان گوزل بايرامليق ايدي. اونون اؤنريسي ايله بالاجا قارداشينين آديني »سونقار«(سون قار) قويدولار. »قدملري کنديميزه، ائليميزه اوغورلو، خئيير-برکتلي اولسون«دئديلر. دانيار او آدين معناسيني هاميدان ياخشي دوشونوردو!!
منبع :