بولگه لر سرويسي:چارراهدا دايانميشديم و تاکسي گؤزلوردوم کي ائوه گئدم. ماشينلارين نئچه‌سي مسير سوروشور آما ساخلاميرلار. نئچه‌سي‌ده قاباغيمدان آرام گئدير آما شوفئر باشين چئويرمير گؤروسون من هانسي مسيري دئييرم. آما من اومودومو الدن وئرمه‌ييب سسليرم و دايانميشام.نهايتده آغ رنگده قديم مودئل بير پيکان ساخلايير. شوفئرين کناريندا اگله‌شيرم. مندن سونرا بير آيري موسافير ده آرخا صندلده اگله‌شير.ماشين يولا دوشور. يولدا آيري موسافيرلر يئنيب مينيرلر. مسير اوستونده چارراهلارين بيرينه قالميش بير صحنه‌يه شاهيد اولوروق کي پارکدان چيخان بير ماتيز ماشيني, فرماني اورتا ياشلي بير چرخلي‌نين قاباغينا آلير. چرخلي قارداش‌دا, ايکي دمير پارچاسي آراسيندا ازيلمکدن قورتولماق اوچون مجبوراً تورموز ووروب دايانير. آما ماتيزين بو ايشي اونو حيرصلنديريب؛ اوجادان قيشقيرير:»سنه تصديق وئره‌ني گؤروم فيلان فيلان اولسون!«بيزيم شوفئر کي قيافه‌سي تانيش گلير و ياديما گلن قاباق گونلرين بيرنده بونون ماشينينا مينميشديم بو صحنه‌يه دؤزنمه‌ييب, بيزه خيطاباً دئيير: »آخي بو شوفئر ايشتيباه ائله‌ييب, اونا تصديق وئرن نئيله‌سين؟«شوفئره دستک اولوب جواب وئرديم: »دوز بويوروسوز, دوزدور کي تقصير ماتيز شوفئرينده‌ايدي و اونا اؤيره‌دن‌ده دوزگون اؤيتمه‌ييب, آما او سؤزلري‌ده دئمک ياخشي دئييلدي.«صؤحبت قيزيشدي و نهايتده من دئديم:»جاميعه‌ده کي افرادين او قدر ده تقصيري يوخدور. تقصير بيزلرده‌دير کي وظيفه‌ميزه دوزگون عمل ائله‌ييب جماعته اخلاق اؤيره‌ده بيلمه‌ميشيک. بير ميثال ووروم؛ بير شيرکتين ماشينلاري خراب اولسا , او شيرکتين ميکانيکي مسئولدور. کي آغا سن بو ماشينلارا نئجه يئتيشيبسن کي ايندي بو حالداديلار. ايندي ده جاميعه‌ده اخلاقي و ايجتيماعي موشکول اولورسا تقصيري بيزلرده‌دير.بو آندا آرخا صندلده اوتوران موسافير کي بو لحظه‌يه‌دک ساکيتيدي ديله گليب دئدي: »يوخ حاج‌آغا ! تقصير سيزده دئييل. تقصير اونون اؤزونده‌دير. بللي‌ايدي کي اونون آيري يئردن ناراحاتليغي واريدي و اؤزونو تخليه ائتمک اوچون اوجور دانيشيردي. مسئول اينسانين اؤزو و خانيواده‌سيدير کي گرک تربيتي دوز اولسون.«جواب وئرديم:»دوزدور کي اينسانلارين اؤزلري‌نين‌ده تقصيري وار, آما بيزلرين‌ده وظيفه‌ميز ايجاب ائدير کي جاميعه‌ده, اخلاقي دوزگون شکيلده پياده ائدک و جماعته اؤيره‌دک«. من هميشه ميثال وورارام؛ پيغمبريميز حضرت محمد (ص) جاهيل عربلرين ايچينده مبعوث اولدو و تک جانينا اونلارا اخلاقي اؤيرتدي و ايسلامي اونلارا تانيتديردي, او قدر کي بوگون دونيانين باشا باشي ايسلاملا تانيش اولوب. جاميعه‌ده اخلاقي موشکولون اولماسي بونو نيشان وئرير کي بيز وظيفه‌ميزه دوزگون عمل ائليه بيلمه‌ميشيک.»سؤز بورا يئتيشنده آرخاداکي موسافير ديله گليب دئدي: « حاج‌آغا ! من اؤزوم روانشيناس دؤکتورم و جماعتين موشکوللرين حل ائده‌رم, آما بيري کؤمک ايسته‌مه‌سه و اؤيرنمک ايسته‌مه‌سه, اونا اؤيرتمک اولماز. من‌ده بئله بير اينسانا کؤمک ائتمه‌رم چونکي اؤزو ايسته‌مير.»من‌ده فورصتي موناسيب بيليب دئديم: «ايندي کي روانشيناس‌سيز لاب ياخشي! تقصيرلرين بير قيسمتي‌ده سيزيندير. سن ايله من باشارماميشيق جماعتميزه اخلاق اؤيره‌دک. اؤيره‌دنمه‌ميشيک خياباندا آيريلاري ايله نئجه دانيشماق و نئجه رفتار ائتمک لازيمدير. حتي اونلار ايسته‌مه‌سه‌لر ده و بيزيم اوستوموزه حمله ائت‌سه‌لر ده, بيزيم وظيفه‌ميز وار اؤيره‌دک چون وظيفه‌ميزدير. ميثال اوچون بير پيشيک آغاج باشيندا گيره دوشوب قالاندا, بيز چاليشاريق اونو قورتاراق. آما پيشيک کي بونو بيلمير اليميزي آتاندا, کي اونو گؤتوروب يئره قوياق, بيزيم اليميزي جيرماقلار. آما بيز يئنه ناراحات اولماريق, چون بيليريک اونون بو جيرماقلاماسي نه اينکي دوشمنچي‌ليکدن بلکه جهالتدندير.جيناب دؤکتور دئيير: »ايختيلاف نظر چوخدور و اوتوروب دانيشماق لازيمدير.« بو آندا من مقصده چاتيرام و ايستيرم يئنه‌م. دؤکتور دئييرکي من بير آز تئز دوشمه‌لي‌ايديم آما سيزي موشاييعت ائله‌ماق اوچون يئنمه‌ديم.هر ايکيميز ماشيندان دوشوروک. من کي بو لحظه‌يه‌دک دؤکتورون اوزون گؤرمه‌ميشديم, قاييديب اونا باخيرام و خوش هئکل بير کيشيني قارشيمدا گؤرورم. بير-بيرميزله ال وئريريک و تانيشليغيميزا سئوينمه‌ييميزي بيلديريريک. دؤکتورون ايصراري وار مني قاپيميزا دک موشاييعت ائله‌سين آما من دئييرم ياخشي اولار اوتوراق نيمکتلرين بيرينده و دانيشاق.هر ايکيميزين دردي بيردير. جاميعه‌نين گئديشي بيزي ناراحات ائلير. قورخوروق بئله گئتسه ايشلر داهادا پيسله‌شه. دانيشا-دانيشا بير موتورلي قاباغيميزدان ردّ اولور. دؤکتور دئيير: »بو اوغلان منطقه‌نين آل وئرچيسي‌دير. چوخ کؤنلوم ايستير بو جوانلارا ايش اولسون و منطقه‌ميز پاکلانسين«من‌ده سؤزونو تصديقله‌ييرم: »حرفه‌اي موجروملرين سايي چوخ آزدير, دئنه ميليوندا بير, بيز گرک جورم يارالدان عاميل‌لري آرادان آپاراق و سونرا قالسين او حرفه‌اي موجروملر کي اونلاري کونترول ائله‌مک راحاتدير.« دؤکتور تعريفله‌يير :»تاکسي‌يا ميننده سيزدن قاباق من بير تاکسي‌دايديم. سيز کي مسير دئديز, شوفئر ساخلامادي. سوروشدوم کي بيز همان مسيره گئديريک دا ! نيه ساخلامادين؟ جواب وئردي:»ماللا مينديرسم ماشينيم خراب اولار.« من اونون بو سؤزونه دؤزنمه‌ييب دئديم: »دانيشديغين بيليرسن هئچ؟ ساخلا من‌ده يئنيرم.« و بئله اولدو کي گليب سيزينله بيرليکده مينديم ماشينا. »ياريم ساعت دردله‌شندن سونرا تيليفون نومره‌لري و اينترنت آدرسلري تبادول ائله‌ديک و بير داها گؤروشمک اومودو ايله آيريلديق.دؤکتور تعريفله‌دي کي بئش ايل اولار وطنه قاييديب. قاباق ايللر تورکيه و اوکرايندا اولوب. اؤلکه‌ميزين ورزيش زمينه‌سينده بؤيوک ايفتيخارلاريميزداندير و روانشيناسي و مئتافيزيک ساحه‌سينده بؤيوک اوستاددير«.
چارراهدا دايانميشديم و تاکسي گؤزلوردوم کي ائوه گئدم.