ماندئللانين پايي اؤلکهسينه، ساواشين دايانديريلماغي، اؤلکهني بوتون يان دورانلارين بيرليگي ايله دوزلتمهلهري اولدو. نيفرتي ووجودلاردا آزالداراق، سؤندورمهيه چاليشدي. بوگون؛ اورتا دوغو آدلانان بؤلگهده، حاقسيزليغا اوغرايان طرفلر، اؤج آلماق آرزيسيلا ياشاييرلار. أللري بير يئره يئتيشديرديکده أللريندن گلهني أسيرگهميرلر. بو تکجه قوروپلار آراسيندا يوخ، بلکه تک-تک اينسانلارين آراسيندا دا يارانير. حاقسيزليغا اوغرايانلار گوجه يئتيرديکلري زامان، ايللر بؤيو ييغديقلاري نيفرتي توپلومون اوستونه قوسورلار(بو کلمهني ايشلتديکده بوتون اوخوجولاردان عوذور ايسته ييرم، بون کلمهني ايفاده ائلهيه بيلهجک باشقا کلمه تاپماديم يازماغا). بؤلگهده ياشانانلار، اؤز توپلوموموزون ايچينده ياشانانلار هر دن آدامي ائله قورخودورلار کي، گلهجک نسيللرين يوز ايللر بويو بو نيفرتدن قورتولماغي دوشونمک اولمور. گون گئتديکجه، نيفرتلر داها چوخ آرتير. ماراقليسي بو دور کي، بو نيفرتي ياشادانلار هر دوشونجهنين آيدينلاري توپلوما داشيييرلار. اؤزلريني موطلق گؤرن آيدين اينسانلار، نيفرتي تکجه اؤزلرينده يوخ، بلکه توپلوملاريندان دا يايماغا چاليشيرلار. او اوزدن ده، ساغ سولو، سول ساغي، ميللتلر بيربيرلريني، شاعير-شاعيري، مودور-مودورو، يازيچي-يازيچيني، دوشمن اولاراق چئورهلرينه تانيتديريرلار. هر دن دوشونورم، تاريخ بويو ايچ-ايچه ياشايان اينسانلار، نئجه بير-ايکي ايلده قانلارينا يئريکلهييرلر. تکجه تاپا بيلديگيم جاواب، قودرتي أله آلماق ايستهينلرين اوزوندن اولور. قودرتي ياشاماق اوچون، نيفرتدن يارارلانيرلار. قودرتي أله آلماغا، ياشاديغي يئرلرين يئترسيزليکلريني رقيبلرين بويونلارينا ييخيرلار.بو دورومدان قورتولماغين تکجه يولونو، دوشمن تانيتديرديقلاري رقيبلرين يوخ اولماغيندا گؤرورلر.باتي اؤلکهلري، بو سورونو اؤز آرالاريندا، بئله چؤزوبلر: هئچ بير گوج يئيهلهنن ايستهين گوجلري بير يوللوق سيلمک اولماز. سيلمهيه چاليشماق، ياشاديقلاري يئرلرين ابدي اولاراق، چاتيشمالاردا ياشادار. اونلار، اؤز آرالاريندا گئرچکلري گؤروب، گئرچکلرين اوستونده اؤزلوکلريني اولوشدوردولار. بو اولوشوم، باتينين آياغ اوسته قالماغينا ندن اولدو. دوغونو گوجلري آلتينا چکمهيه ندن اولدو. اؤزلريني وارسايييب، اؤزگهلرين گئرچکلريني بيلهرک، وارساييب، اؤزگهلره اؤزلريني يوخ سايديرماغا ندن اولدو. يالنيش دوشونمهيين، باتيني هر نهيه سبب اولان گؤرستمهيه چاليشميرام. اونلارين نئجه اؤزلرينين گئرچکلريني گؤردوکلريني وورغولاماغا چاليشيرام. بيزلرين اؤزوموزو اولدوغوموز کيمي گؤرمهيه سسلهنيرم. بيري تاپيليب دئيه بيلر، "قارداش سن اؤزون هر نه جور گؤرمک ايستيرسن گؤر، کيم دير سنين قاباغيوي آلان". هر کسين اؤز گؤروشو اولاجاق، بيز ايستهسک ده ايستهمهسک ده! بيزيم بيزليکده گؤروشوموزون اولوشماسينا، بوردا ياشايان هر کسيمين گؤروشو گرکلي دير.
بولگه لرسرويسي:نئلسون ماندئلانين اؤزلليگي، حاقسيزليغا اوغراديغينا رغمن، گوجو يئيهلنديکده، اونا حاقسيزليق ائدهنلره، اونا قارا گون ياشادانلارا قارا گون ياشاتماق يئرينه، هر کسين حاقي قوروناراق نئجه ياشاماغي اؤيرتدي.