چوخ چوخدان ايدي سني آختاريرديم
1398/05/20
بولگه لر سرويسي: آرتور نرده‌لرين ديبينده دايانيب، قاپيچيني گؤزله‌دي. ايشين شووقوندان تئز دورموشدو بوگون. قيزيشماق اوچون اللرين بيرـ بيرينه سورته‌رک، نرده‌لردن ايچرييه گؤز تيکدي.هاچاندان‌هاچانا کيشي گليب چاتدي. قاپي‌نين قيفيلين آچيب، آغير دمير چرچيوه‌ني چکدي، قاپي ياواش آچيلدي.
«گون آيدين آرتور! بوگون نئجه‌سن؟»«شانس اوسته!»سئوينجک سوروشدو:«ياني ايشين ايشدي بوگون، هه؟»«هه، دئييرم به ائله اولا.»آرتور گولومسه‌دي. قاپيچي دا اوتاغينا قاييتدي. آرتور آستاجا ماشين يولونا ياخينلاشيب، سونرا داياندي. دونن‌هاردان قالديغي يئر يادينا گلميردي. قاباقکي هوشـ باشي قالماميشدي. پالتوونون جيبيندن نقشه‌ني چيخارديب، سونونجو گيره‌‌جگي يوخلادي. جان مکلاود، سپتامبرين ??. بوکي اوچ گون قاباغا قاييديردي. يا ليستي‌ني بئله تازالاماغي اونوتموشدو، يا کؤکوندن بو ايشي گؤرموردو.
«آرتور، گايين بيري گايسان لاپ!» دئيه‌رک، چيين‌لرين آتدي. «داها نئيله‌مک، ائله بو جان مکلاوددان باشلاماليام.» نقشه اوزويله يولونو، ايسته‌ديگي يئره کيمي‌تاپيب، ايشي عيارلادي.
بير رديفي قورتاراندان سونرا، اومبالاري باشلادي اويون چيخارتماغا. ياخينداکي نيمکت اوسته اوتورورب، قيچين اوغدو.
سونرا ناهارين آچدي. سئوديگي خورگي ايدي؛ چؤرک آراسينا قويولموش، خردللي قويون اتي ايله سوغان. ساندويچين يئديکده، اسکي گونلرين فيکيرينه دالدي. بعضن اولوردو، اونو آپ‌ـ آشکار آنيمسايا بيليردي. اوزو دوز خيالي‌نين اؤنونده آيدينلاشيردي؛ باخ، او گؤزلري، اونا گولومسه‌ين دوداقلاري. آنجاق سونرا ائله گونلر اولوردو کي، چتين‌ليک‌له، اونو ذهنينه گتيره بيليردي. ياديندا قالماق اوچون گرک هر زادي يازايدي؛ هميشه اولاسي چتين ايشلردن بيريدي، بو ايش. بيردن قورخو دوشدو جانينا. اونون آديني اونودموشدو. قورخدوغو ايش، باشينا گلميشدي.
«نه‌ايدي آدي؟ … اَگنس … اِدنا …؟ يوخ اولا بيلمز … آليس …؟» آدلار بيرـ بيري‌نين آرديندان، ذهنيندن اوچوب، کئچيردي؛ هئچ بيري نظرينه دوز گلمز‌دن.«تانري خئيرينه … بير آز فيکيرلش …» اَلين آلنينا چکدي. «اِليز … اَمندا …»فايداسي يوخ ايدي. آدي يادينا دوشسون دئيه، تکجه بير ايش گؤره بيلردي: ايشين دالين توتماق! ناهارين قورتاردي، آياغا قالخيب، قالديغي يئره قايتدي.
قارشيسينداکي داشين اوستونه باخدي. ويليام رني ????ـ?????
فيکيرلشدي. «ياخشي، بو کي او دئييل.» او سيرانين آردين توتدو. مارگريت فورسايت ????ـ ????? باش داشينا گؤز تيکيدي.
«گؤره‌سن مارگريت ايدي؟ يوخ … اينانميرام.» باشقاسينا کئچدي و باشقالارينا …؛ گليب او سيرانين سونونا چاتدي. يئنه نقشه‌ني چيخارديب، سونونجو آدي يازدي. فرانک گيلروي ????ـ ????، ?نجي رديف، سپتامبرين ??سي. بئله‌ليکله يئنه باشلادي. سيرالاري، بير به بير گزدي، بلکه بير زادا راست گله، ذهنين ايشه سالا. بونون‌لا بئله، آدي خاطيرلامادي کي خاطيرلامادي. اينديه کيمي‌بير بئله اوزون زامان اونوتماميشدي اونون آديني. بيلميردي نئيله‌سين. قيچي دينجلسين دئيه، يئنه اوتوردو. نئچه قورتوم ويسکي ايچيب، نقشه‌يه باخدي.«سککيز رديف قورتولدو … ايکي رديفه‌ده باخسام، بو گونومو گؤرر.» دئدي. آغير نفس چکيردي. يئريمک؛ حافيظه‌سيني سيخيشديرماق، اونو لاپ آياقدان ساليردي. باشقا بير سيراني باشلادي. رابرت هيوز ????ـ ?????قاش قارالماقدايدي. ايشدن دايانماق‌هاييـندا، بير بالا قبير داشي‌نين ديـبينده داياندي. يازيلميشدي:سئوگيليم اِديت??ـ ????جنت‌ده دينجل
نفسي چيخميردي. آرخايا آخيندي، سونرا اؤزونو ساخلاشديردي.«اِديت … آدي اِديت ايدي. اؤزودو.» فيکيرلشدي، آرتيقلاشا، ايناندي.
«آمان تانري، اِديت … سني تاپديم.» اَييلدي. الي‌نين دالي‌سين، اونون اوزونه چکديگي کيمي، داشين اوزه‌رينه چکدي.
«سئوگيليم … اِديت! … چوخ چوخدان ايدي سني آختاريرديم. نئجه قيـييردين منه؛ کؤمک ائله‌ميردين سني تاپام؟» ياناغين سويوق مرمر داشين اوزه‌رينه قويوب، آغلاماغا باشلادي. دييه‌سن چيـيينلريندن يوک گؤتورولموشدو. بير بئله ايللر اونسوز سوووشموشدو؛ سونوندا، ايللر اؤنجه اليندن گئتديگي قادينا اوخشاييردي يئنه‌ده.
مزاريـنين دؤره‌سيني گؤزدن کئچيردي. هر ياني اوتـعلف باسميشدي. داشين اوزونده قازيلميش يازيلاردا يووسون بيتميشدي.«گؤر اؤز باشينا نه گتيريبسن؟» دئدي. «گؤزل بير سلقه ـ سهمان ايسته‌ييرسن.» اويناق-لاري‌نين آغريسينا باخماياراق، بير ديزي اوسته يئره چؤکوب، اوتلاري يولماغا باشلادي.«اؤزونو گؤر نه يامان کؤکه ساليبسان. مني ايستيرسن سندن موغايات اولام، ائله دئييل؟» اوتلاري جيبينه باسيب، داشين دؤره‌سينده قويلانان کيچيک ناخيشلي داش‌لارين ديب‌لرينه ييغيلان تورپاقلاري، اليله سورتمگه چاليشدي. يازيلار ايچينده‌کي يووسونلاري ديرناق-لاري ايله قاشيياـ قاشييا، ديلـ دوداغي آراسيندا دئييـنيردي. بيردن داياندي. فيکري گئتدي قاپيچي‌يا. قبير داشيندان ياپيشيب، اؤزونو آستاجا آياغا قالديردي.
«گئتمه‌لييم سئوگيليم، صاباح گئنه گله‌رم؛ سنه گول ده گتير‌رم. گؤروم آويز گولو تاپا بيلرم!» بارماقلارين اونون آدي‌نين اوزه‌رينه سوروشدوردو. «بيليرم او گوللري نه قدر سئور‌سن.»
«اِديتيم منيم، صاباح گؤروشه‌ريک.» سس‌سيزجه‌سينه اونا بير اؤپوجوک يوللادي. گلديگي يولدان؛ سيرا ايله دوزولموش خاچلارين؛ داشدان يونولموش ملکلرين آراسيندان، گيره‌جـَگه ساري يوللاندي. اورا چاتديقدا، نرده‌لره سؤيکنيب، اؤزونو تاپدي.
«هانسي تاريخده ايدي، گؤره‌سن؟» فيکيرلشدي. «????» شبهه‌لر شئيطان تورو کيمي‌باشي‌نين دؤوره‌سينه هؤرولدو.
«اينانميرام بو تاريخ دوز اولموش اولا … نه زامان ايدي؟ … محاريبه‌دن سونرا … بيز دنيستون ـا داشينميشديق اوندا. تامين دؤرد ياشي اولمالي‌ايدي. گؤرن ?? ايدي؟ يا ??؟» بارماقلاري‌لا حسابلاماغا چاليشارکن، قاپيچي گلدي.
»ياخشي، دئ گؤرَک، بوگون اليوه بير زاد توخدادي، آرتور؟«»دئييرديم به توخدادي … آنجاق ايندي اورَگيم قيزيشمير … ائوه چاتديغدا بير زادلاري حسابلامالييام.«»او دا اولماسا، نئيله‌مک، بو گونون صاباحي دا وار«»هه.«
آرتور مزارليقدان ائشيگه چيخدي. کيشي اونون دالينجا قاپيني باغلادي، زنجيري
دمير چرچيوه‌يه دولادي، تاققـيلتي ايله قيفيلين سالدي.»صاباح گؤروشه‌ريک، آرتور.« آرتوردان جاواب چيخمادي. اؤزونه جومموشدو.
کيشي اوتاغينا دؤندوکده، ديلـ دوداغي آراسيندا دئدي، »بونون دا گونو چاتماقدادير.«
منبع :