نيسگيل

بولگه لر سرويسي: بوگون سحر آچاندان قارا بولودلار داغين داليندان آغنايير، ايره‌لي‌ييرديلر. گونش ايسه بولودلارين دالينا گيريب چيخيردي. گئتديکجه هاوا توتولوردو. ندنسه سياره‌نين اوره‌يي چيرپينيردي.گاهدان بالاسيني ايتيرميش جئيران کيمي او تاي بو تايا بويلانيردي. نهايت گؤزله‌مه سونا چاتدي. سياره نرگيز‌له بيرليکده پنجره‌يه ياناشديلار: »داوود يونسي«- دئيه، سجيللي‌لريني مامورا طرف اوزاتدي. مامور الين سجيللي‌لري آلماغا اوزاتديقدا بير لحظه دونوخدو: »داوود يونسي؟! ننه، اونو بوردان آپاريبلار.«- دئيه، سياره‌نين الينده تيتره‌ين سجيلليني آلماقدان چکيندي.

نريمان ناظيم

بولگه لر سرويسي: بوگون سحر آچاندان قارا بولودلار داغين داليندان آغنايير، ايره‌لي‌ييرديلر. گونش ايسه بولودلارين دالينا گيريب چيخيردي. گئتديکجه هاوا توتولوردو. ندنسه سياره‌نين اوره‌يي چيرپينيردي.گاهدان بالاسيني ايتيرميش جئيران کيمي او تاي بو تايا بويلانيردي. نهايت گؤزله‌مه سونا چاتدي. سياره نرگيز‌له بيرليکده پنجره‌يه ياناشديلار: »داوود يونسي«- دئيه، سجيللي‌لريني مامورا طرف اوزاتدي. مامور الين سجيللي‌لري آلماغا اوزاتديقدا بير لحظه دونوخدو: »داوود يونسي؟! ننه، اونو بوردان آپاريبلار.«- دئيه، سياره‌نين الينده تيتره‌ين سجيلليني آلماقدان چکيندي.
– آپاريبلار؟! هارا، هارا آپاريبلار؟
– هاراسين بيلميرم. آنجاق بوردان آپارمالارين بيليرم.
– نئجه ياني بيلميرسن. بس کيم بيلير منيم اوشاغيمي هارا آپاريبلار؟
– اونو دا بيلميرم.
– بيلميرم ده اولدو سؤز؟ به من هارا گئتمه‌لي‌يم؟
»دئديم کي بيلميرم. منيم واختيمي آلما، قوي ايشيمه يئتيشيم!« – دئيه، گؤزتچي‌يه اشاره ائله‌دي:
– گل اوغلان، گل بونو سوووشدور گؤره‌ک!
گؤزتچي سياره‌نين قولوندان ياپيشيب پنجره‌نين قاباغيندان رد ائله‌مک ايسته‌‌دي. سياره قولونو چکدي.
– چک اليوي! گؤرمورسن مگر سؤز دانيشيرام؟!
گؤزتچي آجيدي: »دئديم رد اول!« باغيرتيسي‌يلا، سياره‌ني ايته‌له‌دي. سياره ييخيلدي. نرگيز دالدان گؤزتچي‌نين پالتاريندان آسلاندي:
– نئيه ائله ائليرسن اوتانماز؟
گؤزتچي توفنگ دورتمه‌سي‌له نرگيزين سينه‌سينه گوپسه‌دي. خيار پاکاتي نرگيزين اليندن قورتولدو. خيارلار حيطه سپه‌لندي. گؤروشچولر ايچينده همهمه قوزاندي. آلينلار قيريشدي؛ قاش‌لار چاتيلدي؛ گؤزلردن اود پارلادي‌سا، کيمسه‌ده دانيشماغا جسارت اولمادي. آنجاق بير قوجا کيشي قاباغا گليب گؤزتچي‌نين قولوندان ياپيشدي:
– اؤزوندن چيخما اوغول؛ کيشي آرواد اوستونه ال آچماز.
– لازيم دئييل منه کيشي‌ليک درسي وئره‌سن. جهنم اول گئت دايان يئرينده!
– مربوط دانيش اوغلان! سن منيم نوه‌م يئرينده‌سن. آغزيوين سؤزون بيل!
-»الله ائله‌مه‌سين من سنين نوه‌ن اولام. يوخسا مني ده او خائن کيمي قودوخلوغا باسارديلار.« – دئيه، گؤزتچي استهزايلا گولدو. قوجانين ديل – دوداغي اسدي، اؤزون ساخلييا بيلمه‌ييب دئدي:
– تلسمه! گئجي تئزي بللي اولار خائن کيمدير، خادم کيم.
-»آغيزيندان بؤيوک دانيشيرسان قوجا!.« – دئيه، گؤزتچي قوجاني ياخالاييب ايچري آپارماق ايسته‌دي:
– گل ايچري، سنه دئييم خائن کيمدير، آخماق کيشي!
قوجانين عائله‌سي بو صحنه‌ني گؤرجک قاباغا گلدي. قوجاني گؤزتچي‌نين اليندن قورتارماغا چاليشيرديلار. سس – سووون قووزانماسيندان ايچري‌دن يوکسک وظيفه‌لي بير مامور چيخدي:
– نه اولوب، بوردا نه هاي – کوي‌دي؟
-»بو آغا بيزه خائن آدي قويور.« – دئيه، گؤزتچي جاواب وئردي. مامور قوجانين پاتلئتين سوزدو:
– کيمين مولاقاتينا گليبسن؟
– نوه‌مين.
– نوه‌ن کيمدي؟
– سارا، سارا احمدي.
-»گئت قوربان اول او آغ سققليوه! يوخسا وئررديم آسارديلار سني! آنجاق داي سنه مولاقات يوخدو!« دئييب، سونرا گؤزتچي‌يه خطابن: »سال ائشيگه بو قانمازي! قوي گئتسين آدام اولسون!« – دئدي.
قوجا -»ائشيگه سالماق لازيم دئييل. اؤزوم گئده‌رم. يوز ايل اونو گؤرمه‌سم ده دؤزه‌رم، آمما بونو بيل کي سيزه يالوارمام.« دئييب، قاپي‌يا ساري گئتدي. يوکسک وظيفه‌لي مامور گؤزتچي‌دن سوروشدو:
– داوود يونسي‌نين مولاقاتچيسي کيمدير؟
سياره قاباغا گليب دئدي:
– منم آغا. آناسي‌يام.
– مگر سنه دئمه‌ديلر اونو بوردان آپاريبلار؟
– هارا آپاريبلار آغا ؟ آخي بس من هارا گئديم؟ هئچ اولماسا يئرين منه دئيين!
– گئت اوتور گؤزله! دفتره باخيب دئيه‌رم. گئت اوتور!
– خئير گؤره‌سن آغا. الله بالالاريوي ساخلاسين!
سياره دووارين ديبينده اوتوردو. گؤزلري‌نين ياشين سيلدي. گؤزلري قيزارميشدي. نرگيز ايسه خيارلاري ييغيشديريب چاديراسي‌نين اته‌يينه ييغميشدي؛ آياق اوسته دايانيب، بوغازيندا دويونلنميش قه‌هرله کينلي گؤزلريني گؤزتچي‌يه تيکميشدي.
***
قارا بولودلار آغناييب، گؤي اوزونو توتموشدولار. گؤروشچولر بير به بير گؤروشلرين بيتيريب، کيميسي آغلار گؤزله، کيميسي گولر اوزله قاپي‌دان چيخيب گئديرديلر. سياره‌نين حسرتلي گؤزلري اونلاري ايزله‌ييردي. اونجا زامان سانکي دايانيب، لحظه‌لر ايسه اونون اوره‌يين رحمسيزجه‌سينه آياقلاييب کئچيرديلر. اوچ – دورد دؤنه پنجره‌نين قاباغينا گئديب سوروشموشدو: »بس دفتره باخماديلار؟ بس او آغا هارا گئتدي؟« مامور دا -»دؤز! قوي باشلاري آييلسين، باخارلار!« جاواب وئرميشدي.
گون‌باتاردا هله ده ايلديريم شاخيردي. قارا بولودلار قات – قات قاتلانيرديلار. ايندي ايسه سونونجو گؤروشچولر قاپي‌دان چيخيرديلار. گؤزتچي قاپيني باغلادي. سياره‌نين گؤزلري ايچري حيطين قاپي‌سينا زيللنميشدي. اوره‌يي اوخلانميش قوش کيمي چيرپينيردي. نهايت قاپي آچيلدي. يوکسک وظيفه‌لي مامور حيطه چيخدي. سياره يئريندن قالخيب قاباغا قاچدي. مامور سياره‌نين قولوندان توتوب دانيشا – دانيشا اونو حيط‌‌ين ان اوزاق گوشه‌سينه آپاردي. نرگيز اونلارين آردينجا گئتدي. مامور داياندي. سياره‌نين قولون بوشلادي. بير آدديم‌جا اوندان آرا آچدي. اوز به اوز دايانديلا. يالنيز اوچ – دؤرد کلمه سؤز دانيشيلدي. دولما قابلاماسي سياره‌نين اليندن اوزولوب، گومبولتويله يئره دوشدو. ديزلري قاتلاندي، يئره چؤکدو. اونون »يا حسين« شئيهه‌سيندن مامورلارين ديزلري تيتره‌دي. گؤيون گورولتوسوندان دام -دووار ترپشدي. شيديرغي ياغيش سياره‌نين خرمن اولموش ساچلارين يئره ياپدي.
هله ده شيمشک قارا بولودلاري قيلينجلاييردي… سون

منبع :