روس اشغالچيلاري، مستبد حاكم‌لردن مدافعه و اؤز منافعيني ساخلاماق اوچون تبريزه سوخولموش و هله ده بوراني بوراخميرديلار. اشغالچيلار، استعمارچي‌لار و مستبد حاكم‌لر ال بير اولوب، خلقي اينقيلاب ثمره‌سيندن بهره‌سيز ائتمك اوچون چاليشيرديلار. بئله‌بير زاماندا، ستارخان و باقرخاني تبريزدن تهرانا چاغيريب، تبريزي رهبرسيز ائتميشديلر. روس كونسولخاناسي‌دا تبريز بوش گؤره‌ر‌ك اينقيلابچي‌لاري توتوقلاييب آرادان قالديرماق اوچون مئيدانا گيرير. تبريزده قورولان غيبي مركزين ليدئرلريني توتماق و خالقي رهبرسيز قويماق، روسيا كونسولونون ايلك وئرليشلريندن ساييليردي. بو زامان علي مسيو، ثقه‌الاسلام، شيخ‌سليم، ضياء‌العلما، صادق خان الملك، آقامحمد قافقازلي و آقا محمدخان توتولورلار، آنجاق علي مسيو آرادان چيخيب توتولمايير، روس اشغالچيلاري اونون ايكي يئني يئتمه حسن (14 ياشلي) و قادر (17 ياشلي) اوغلانلاري توتور و هاميسيني 1330 ايلين محرم آيي‌نين عاشورا گونونده تبريزده دارا چكير.

ثقه الاسلام 1238 ايلينده تبريزده آنادان اولوب، ايلك تحصيليني تبريزده بيتيرندن سونرا قوم شهرينه كؤچوب علم و فقه تحصيليني اوخويور، سونرا عتبات عاليه‌يه گئديب و 9 ايل تامام اورادا اصول، فقه، حكمت، كلام، ادبيات، رياضيات، نجوم، هيئت و تاريخ علم‌لريني اؤيره‌نيب و بير ده¬يرلي عالم كيمي اؤز شهري تبريزه دؤنور. مشروطه انقلابيندا جانيندان كئچن بير بيلگين كيمي خالقين اويانماسيندا چاليشير. او، هم منبرلرده دانيشيب خلقي اويادير، هم ده الينده سلاح آليب استبدادين قارشينا چيخير. مشروطه اينقيلابي غلبه چالير، آنجاق ايسته‌ديگي هدفلره اوغرامير. يئنه ده عاليم¬لر مشروطه‌ني قوروماق اوچون آياغا قالخيرلار. ثقه الاسلام يئنه‌ده بو قالخيشدا اؤن سيرالاردا دايانير. نهايت روس كونسولو طرفيندن توتولوب و صحراحربي محاكمه ائده‌رك ثقه السلامي اؤلدورمه قراريني صادر ائديرلر. آنجاق عاشورا گونونده، يولداشلاريلا برابر دارا چكيلير. دارا چكن زامان، ثقه¬الاسلام اوجاسسله روس كوماندانينا بئله دئيير:

»بيزيم اوچون دار آغاجي معراجدير، آللاها گئده‌ن نرديوان‌دير«.

ثقه الاسلام عمر بويو اشغالچيلار قارشيندا دايانيب، هئچ زامان سوسماييب و عمرونون سون آنلاريندا دا اونلارا باش اگمه ميشدير.

ثقه الاسلام، عيني حالدا ده‌يرلي بير شاعردير ده. اونون حتا ليريك شعرلري واردير. آنجاق اونون قلم سلاحيلا يازديغي اثرلر هميشه دوشمني قورخدورموش و خالقي‌نين يولونو ايشيقلانديرميشدير. بوگون اونون اثرلريني بئله سيرالاييب، چاپ‌ ائتمك تكليفي چاغداش آراشديريجيلاريميزين بوينوندادير. ثقه‌الاسلامين ديلي چوخ ساده، آخيجي، عيني حالدا محكم و آخساقسيزدير. شعرلريندن علاوه، مكتوبلاري دا ادبي جهتيندن چوخ ده¬يرلي ديرلر. بورادا ايكي ديللي اثرلرين گؤزه‌ل اؤرنك لريني گؤرمك اولور.

ثقه‌الاسلامين توركجه شعرلري هله¬ليك بير يئره توپلانماييب و ديواني چاپ اولماييبدير، آنجاق اونون مكمل ديوانيني تدوين ائتمك معاصر آراشديرماجيلارين بوينوندا اولان وظيفه‌لردندير. اونون رباعي‌لري ده چوخ گؤزه‌ل و اوره‌يه ياتان دير بيرنئچه سيني بيرگه اوخوياق:

هجراندا كؤنول عشقيله مجنون اولدو،

قان آغلادي او، عرصه¬ده جيحون اولدو.

بيرتك گئجه كي باخدي گؤزه¬ل گول اوزونه

گؤز ياشلاري عؤمرو بويو گولگون اولدو.

***

هجران گئجه¬سينده او قيامتدن اثر وار

اوندا او گؤزه¬ل غمزه¬لي قامتدن اثر وار

اصلاكي چاتا مقصده، مقصوده حياتدا

هر كيمده بير ذره¬جه دهشتدن اثر وار.

گؤردويوموزكيمي، ثقه¬الاسلام رباعي¬لرينده ده ساده¬ليكله برابر، دولغون معنا، درين باخيش و دوشونجه¬لي فكرلر ديله گلير. او، ساده بير شاعر يوخ، بلكه الله آدامي و اسلام بيلگيني¬دير و شعرلرينده دالغالانان حكمت¬لي سؤزلردير. عالمين دنيا گؤروشو شعرلرينده آچيقجاسينا ديله گلير و ساده شاعرانه بير شيوه ايله اوخوجو دا ائتكي يارادير.

ثقه‌الاسلامدان قطعه‌لر و تك بيت‌لرده چوخ واردير. بونلاردا، شاعر چاليشيب آيري ديللردن اؤيره¬نيبسه ده آنا ديلينده تقديم ائتمك ايسته¬يير.

قيزيل قلمين معلومات اساسيندا عصرآذربايجان راپورونا گوره.