تاختالي کؤيدن مکتوب‌لار

بولگه لر سرويسي: اوّلا سالام گؤندرير و عينيندن اؤپورم.

يازار: عزيز نسين اسماعيل شيخلي

بولگه لر سرويسي: اوّلا سالام گؤندرير و عينيندن اؤپورم.
اوّلکي مکتوبومدا مني نئجه بير هاي- کوي‌له تعجيلي يارديم ماشينينا آتيب آپارديقلاريني يازميشديم. ايندي ده اوندان سونرا مئييديمين باشينا گلن احوالاتلاري من دئييم، سن ده قولاق آس. »ايييرمي مين کيلومتر سو آلتيندا« رومانينداکي احوالاتلار منيم تعجيلي يارديم ماشينيندا بير گونلوک سياحتيمين يانيندا، هئچ بير شئي‌دير. مني ماشينين آرخاسينا آتميشديلار. بيردن منه ائله گلدي کي، شوفئرين پول ايسته‌يه‌جه‌ييني ياديما سالاندا قورخويا دوشدوم. سونرا اؤلو اولدوغومو خاطيرلاييب آرخايينلاشديم.هئچ بئش يوز مئتر گئتمه‌ميشديک کي، ماشينين موتورو تيرلاييب داياندي. فيسيلداييب سؤندو. شوفئر اؤز سياسي رقيبينه هوجوم چکن اجتماعي خاديم کيمي کوکره‌‎دي، سؤيوب- سؤيلندي، موتورو قوردالادي. اويان- بويانا فـيرلاندي، نه قده‌ر اللشدي‌سه ماشين يـئريندن ترپنمه‎دي. ائله بيل قازيب يئره بئتونلاميشديلار. بير آندا آداملار باشيميزا جومالاشديلار. شوفئر اوزونو توتدو:
– بير شئي اولان کيمي جاماعات تؤکولوب گلير. بيز معرکه سئويريک. ايندي ييغيليب‌سينيز، کؤمک ائله‌يين، ماشيني دالدان ايته‌له‌يين- دئيه يالواردي. شوفئر بونلاري گؤر‌نده اوزونو کؤمکچيسينه توتدو:– گؤردونمو، بونلاري نئجه داغيتيم. ائله کي باشينا ييغيلانلاري داغيتماق ايسته‌دين، بير بالاجا ايشه بويور گؤر نئجه قاچ‌ ها- قاچ باشلايير…شوفئر ماشينين يانيندان گئتمه‌ييب »وطن«، »ملت«، »وجدان« دئيه- دئيه ال- قول آتان بئش- آلتي کيشي‌يه ياخينلاشدي. کؤمک ائله‌مه‎لريني خواهش ائله‌دي. اونلار دا آياقلاريني سورويه- سورويه اوزاقلاشديلار.
کؤمک‌چي: – اوستا، قوي اؤزوم ماشيني ايته‌له‌ييم- دئدي.– سن اوتور يئرينده. بو ساعآت من اونلاري قئيرته گتيريم، سن ده تاماشا ائله- دئيه شوفئر جاواب وئردي.– ائي آللاهيني سئون‎لر آللاه ريضاسينا ماشينين داليندان بير آز ايته‌له‌يين.
شوفئرين »آللاه ريضاسي«دئمه ايله داغيلماقدا اولان خالقيميزا قئيرت گلدي. قاريشقا شيره‌يه داراشان کيمي ماشينا داراشديلار. هره بير طرفدن- کيمي ماشينين تکريندن، کيمي يانيندان  کيمي ساغ طرفيندن، کيمي سول- ياندان جومولدو. کيمي قاپي‌دان توتدو، کيمي چارخلاردان. بيري قاباغا کئچدي، او بيري دال طرفه. باشلاديلار ايته‌لمه‌يه. اصلينه ايسه هئچ کس ماشيني ايته‌له‌ميردي. اللريني توخوندوروب دايانميشديلار. بارماقلاري‎نين اوجونو قويموشدولار ماشينين اوستونه. دي گل بير هاي- هاراي سالميشديلار کي، آدامين قولاغي توتولوردو. ائله بيل دونيا يئريندن قوپاجاقدي. هم ده بير- بيرينه اورک- ديرک وئريب قئيرته گتيريرديلر.– آي، ائللي‌لر ايته‌له‌يين!– هه، بير، ايکي، اوچ … هووپ!کيميسي امر وئرير، کيميسي يالوارير، کيميسي يول گؤستريردي. کيميسي ده بويوروردو، آمما هئچ بيري ماشيني! اور‌کدن و گئرچکدن ايته‌لمه‌ديييندن ماشين يئريندن ترپنميردي. هئچ بيرجه بارماق دا قاباغا گئتميردي.
– هه! دوستلار! ايته‌له‌يين ائي دين قارداشلاري!
– بير آز دايانين! …– بو ماشين واختيندا خسته‌خانايا چاتماسا نه اولار کي؟…– دايانين بير! آز ال ساخلايين، آي موسلمانلار!
– هه، هامي بيردن…– باشلاديق، هووپ!
اونلارين گورولتوسونو ائشيدنده آداما ائله گليردي کي، آرخمئدين آختارديغي ايستيناد نؤقطه‌سيني تاپيبلار و بو ساعآت کورئي-ي ارضي يئريندن اويناداجاقلار. اصلينده ايسه دؤرد تکر اوستونده دايانان ماشين يئريندن قيميلدانيب، بيرجه بارماق دا، ايره‌لي گئتميردي.
– گلين، تزه‌دن ايته‌له‌يک…– هه، بير يئرده… هووپ…
کابينه‌ده اوتوران شوفئرين بورنوندان، شيپير- شيپير تر آخيردي. اصلينه باخسان ماشيني شوفئردن باشقا ايته‌له‌ين يوخ ايدي. او دا الي رول‌دا ايچري‎دن ايته‌له‌دييي اوچون ماشين ترپنميردي.– آز قالدي، باشينيزا دؤنوم!
– ايته‌له‌يين آي جاماعآت ثاوابدير…
بير آزجا قيميلدانسا، يئريندن ترپنسه الينيزي بوراخين، گئده‌جک- دئيه شوفئر اونلاري هوس‌لنديريريدي.کؤمکچي سؤزه قاريشدي:– اوستا قيميلداسا گئده‌جک‌مي؟
– نئجه يعني گئده‌جک‌مي؟ اوچاجاق. اوچاندا هئچ دايانمير. اوندا گرک آللاه اؤزو کؤمه‌ييميزه گلسين.ياشلي بير کيشي اوزاقدا دايانيب:
– همت الرجال تأک الجبال- دئييرم.
– بو سؤزلر معناسي نه‌دير آي بابا؟
– يعني اوغلوم ايلاهي ايسته‌سه ماشيني داغين کلله‌سينه آتار.– داغين کلله‌سي لازيم دئييل، بيرجه بارماق قيميلداسا بسدير.اوشاقلار دا ماشيني ايته‌له‌ينلري آرخادان ايته‌له‌ييرديلر.آروادلار الک‌چي‌نين قيل وئره‌ني کيمي اوزاقدان- اوزاغا هاي وئريب ماشيني ايته‌له‌ينلري جوشدوروردولار.– دايانين، قارداشلار، ال ساخلايين!– سيز آللاه، قويون نفسيميزي دره‌ک. جهننم اولسون بو ميره‌ت.– ايندي بو آمئريکادا اولسايدي قاناد آچيب اوچموشدو.
– نييه آمئريکادا اوچاردي کي؟
– دئييرم کي، اورادا اوچاردي. آمما بيزه گليب چيخان ماشينلار، موتورلار، سو گؤرموش عناد ائششک کيمي تيرر دئييب دايانيرلار. ناحاق يئره اؤزونوزه اذيت وئرمه‌يين. بوش- بوشونا ايته‌له‌ييريک، يئريندن ترپنمه‌يه‌جک. ايلک ايليکتيريک قاتارينين گليشي يادينيزداديرمي؟ او دا يئريندن ترپنمه‌دي.– آغا، بونلارين هاميسي مملکتين هاواسيندان و سويونداندير.– گؤر اؤزگه نه تاپيرسان.–
 دوغرو سؤزومدور. بير واخت آلمانييادان بير گمي ساتين آلينميشدي. گمي ساعآتدا ايييرمي ميل‌مي، اوتوز ميل‌مي، يوخسا آلتميش ميل‌مي گئديرميش…– يوخ بير … دوه…– دوه يوخ، گمي دئييرم سنه… هه، گمي بيزيم قارا سولاريميزا قد‌ر بو قايدا ايله گلميش، بورايا چاتاندا ايسه هئچ بير ميل ده گئتمه‌ييب يئرينده‌جه دايانميشدي. هئچ دالغالار دا گميني ترپه‌ده بيلمه‌ييب. نه بيزيمکي‌لر، نه ده آلمان کاپيتاني گميني سوره بيليب، سونرا گمي‌نين آغزيني گئري چئويريب‌لر. او ساعآت حرکته گليب، سونرا گميني تزه‌دن بيزه طرف دؤنده‎ريب‌لر. بيزيم قاراسولارا چاتان کيمي گمي يئني‌دن آت کيمي شاهه قالخيب، يئرينده‌جه ميخ‌لانيب قاليب.
– اولا بيلمز.– او واخت قزئت‌لرده يازميشديلار. اوخوماييب‌سينيزمي؟!– ياخشي, آخي نييه گمي بيزيم قاراسولاريميزدا ايشله‌ميرميش؟– مملکتين هاواسيندان، سويوندان آسيلي‌دير بوتون بو ايشلر. ماشين يا دا موتور دوز‌لدنده هر اؤلکه‌نين هاواسيني- سويونو نظره آليرلار.
– باخ بونا سؤزوم يوخدور. عزيزيم بيزيم محلّه‌ده ايشله‌ين اوتوبوسلار، اؤز محله‌ميزدن باشقا هئچ يئرده ايشله‌ميرلر. اونا گؤره کي، کابينه‌نين اوستونه »يا آللاه« سؤزو يازيليب، ماشيني ايشله‌دن بو سؤزدور.– يوخ جانيم مسله ائله دئييل. ايندي کئچميش‌ ده اولان کاپيتانلار يوخدور. بيزيم اوّلکي کاپيتانلاريميز ساغ اولسايديلار، نه اينکي کافير گميسيني، لاپ آدالارين اؤزونو ده يئريد‌رديلر.
اونلار بير گئجه‌نين ايچينده کپيري گتيريب قاراگؤي ليمانينا باغلاييرديلار.– حتّا بيزيم دريا کاپيتانلاريندان هانسي‌نين‌سا بير سؤزو وار…– هه، بيلديم، يا بارباروس‌دور يا دا ميمارسينان.

منبع :