اؤزلم
اؤزلم
1401/01/28
بولگه لر سرويسي: بيلميرم، منيم تله‌سيک ايشيم يوخدو، اتوبوسون گئجيکيب-گئجيکمه‌مه‌سي، بو گوندن بري منيم اوچون فرق ائتمز، ذاتاً ايکي آيليق عؤمروم قاليب بو دونيادا، اونو دا بو اتوبوس دوراغيندا بئله‌جه اوتوروب، کئچيره بيله‌رم.
ريحانه پورغني
بولگه لر سرويسي: بيلميرم، منيم تله‌سيک ايشيم يوخدو، اتوبوسون گئجيکيب-گئجيکمه‌مه‌سي، بو گوندن بري منيم اوچون فرق ائتمز، ذاتاً ايکي آيليق عؤمروم قاليب بو دونيادا، اونو دا بو اتوبوس دوراغيندا بئله‌جه اوتوروب، کئچيره بيله‌رم.
کؤک قادين دؤنوب گئنَلميش گؤزلري‌ايله اونا باخير. ائله بو آن‌دا رنگي کير و پالچيق آلتيندا ايتميش، اگزوزوندان قارا توستو بوراخان اوتوبوس نريلدييه-نريلدييه گليب دوراقدا دايانير؛ قاپي‌لاري اورتادان ايکييه بؤلونوب، جيريلداييب لاخلايا-لاخلايا آچيلير. جماعت سئل کيمي ائشييه تؤکولوشوب هره‌سي بير يانا سپيليشير. کؤک قادين دوروب، يان‌لاريني باسا-باسا اتوبوسا ساري گئدير. دوروب قادينين داليسيجا اوتوبوسا مينير، اوتورماغا يئر يوخدور، ائله قاپي‌نين قاباغيندا دوروب، اتوبوسون مهجرينه دايانير. بير قادين اوجا سسله تئلفون‌لا دانيشير »هله ياخشي، سونرا، دئديم سونرا، ايندي اولماز، اوتوبوسدايام، گليرم، يومورتا؟ اولسون آلارام.« تلفونو قاپاديب، ائشييه باخير، سونرا دؤنوب يانينداکينا نه‌سه پيچيلدايير، يانينداکي قادين، باشيني ترپه‌دير.
اؤن سيرادا اوتوران ايکي گنج قيز پيچيلداشيب گولورلر. پنجره يانيندا اوتوران قيز، بولکه-بولکه بزنميش ساچلاريني گؤزلري‌نين قاباغينا تؤکوب، دوداقلارينا قيرميزي روژ سورتموشدو.
گؤزلري‌نين ايچي گؤلوردو؛ بير رز گولونو الينده توتوب اويناديردي؛ هردن ده بورنونا توتوب گولو قوخلاييردي. قادينين اونا باخديغيني دويوب، اونا ساري دؤنور، باخيشلاري بير-بيرينه ساتاشير. قادين گولومسه‌يير، قيز سايمازيانا باخشيني اوندان آليب، موبايليني جئبيندن چيخارديب، اونونلا اويناماغا باشلايير.
اوتوبوس ساخلايير؛ کيمسه اوتوبوسدا قالماميشدي. بورا سون دوراغ‌ايدي.
اوتوبوسدان ائنيب، خيابانين اوتايينداکي قبريستانليقا ساري گئدير. قبريستانليقدا بير اؤلونو باسديريرلار.
واي سسي گؤيه قالخيب. قارا پالتارلي قادين و کيشي‌لر قبرين دؤوره‌سيني توتوب آغلاشيرلار. دايانيب تشييع جنازه‌يه ييغيشان آداملارين بير-بير اوزونه باخير.
»گوره‌سن او گؤمولن بخت‌سيز، ديريلييينده بو قار-بوراندا بورا گلمه‌نيزي ايسته‌سئيدي نئچه‌نيز اونون دادينا چاتاردينيز؟ او نئچه‌نيزي ديريليينده اينجيديب؟ سانکي اونو باغيشلاماق اوچون اؤلومونو گؤزله‌ييرميش کيمي، تمام پيسليک‌لريني اونودوب، وجدانيزي راحاتلاتماق اوچون دوروب قاچا-قاچا بورا گلميسيز. بلکه آدام اؤلندن سونرا پيسليک‌لريني‌ده اؤزويله آپارير.« دئيه اؤز-اؤزونه دوشوندو. اوجالميش فاتحه سسي ايله اؤزونه گلدي.
آدام‌لار بيربه‌بير داغيلير. قبريستانليق درين بير سوکوتا چؤکور. اورادان کئچيب، سيرايلا دوزولن، مئييت کيمي آغ کفنه بورونموش، شام آغاجلارينا ساري گئدير. بير نيمکتين قارلاريني الي ايله تميزله‌ييب اوستونده اوتورور. نيمکتين سويوقلوغو سوموک‌لريني سيزيلدادير.
قارين سويوغوندان قيزارميش بارماقلاريني آغزينين قاباغينا توتوب، نفسي‌له ايسيتماغا چاليشير. يئره اوتوران قار، کيمسه‌سيز قبريستانين سس‌سيز اورتاميني داهادا سس‌سيزلشديرير. کولک‌له اوزاقلاردان گلن ياسين‌ين سسي بئله قاردا بوغولور. بورنونون اوجو قيزارميش. پالتوسونون ياخاسيني اوسته چکيب، بوينونو قيسان بير کيشي قاباغيندان کئچيب گؤزآلتي اونا باخير. باخيشي‌يلا نه‌دن بو سويوق هاوا‌دا تک-تنها بو کيمسه‌سيز قبريستانين کؤشه‌سينده اوتوردوغونو سوروشور.
ادين گؤزونو اوزاقلاردا بير يئره زيلله‌ييب اؤز دونياسينا جومور. چييين‌لرينه، شالينا دنه-دنه دوشن قار ياواش-ياواش قادينين هئيکليني آغ رنگه بورويور. »آي گؤزل خانيم، الين وئر فالان باخيم!« سسي ايله اؤزونه گلير. نئچه ساعات اوردا اوتوروب فيکرلرده دالماغيني بيلمير، آمما هاوانين آلا-تورانليغيندان گونشين باتما چاغينا ياخينلاشديغيني بيلير. باشيني دؤنده‌ريب بير قوجا فالچي قاديني يانيندا گؤرور. فالچي‌نين قبريستاندا دولانماغيندان هويوخور.
عموميتله قبريستان ديلنچي‌لري ياسين اوخويانلارديلار يا دا قبير يويانلار؛ فالچي‌لار قبريستانا دولانمازلار، آمما بو قادين سانکي بو عالمين آدامي دئييل. قادينين گؤزلرينده بير ائوره‌نين سيحيرلي قاورامي دولانير. آلا-بولا باش اؤرتوسونون آلتيندان پيرتلاشيق آغ ساچلاري، اوزونه تؤکولوب، قاش‌لاري و چنه‌سي‌نين اورتاسيندا گؤي دؤيمه‌لر گؤزه چارپير.
بوينو-بوغازي، بيلک‌لري رنگ‌به‌رنگ مور-مونجوقلا دولودور. گؤزلرينده غريبه بير حيس واريدي؛ سانکي دونيانين توم گلميشني -گئچميشيني گؤرموش ده اؤز ايچينده قوجالميش. فالچي قادين اليني اوزاديب اونون اوووجونو آچير.
فالچي‌نين الي‌نين ايستي‌لييي قاديني تعجبلنديرير. فالچي قاري بير زادلار ديل آلتي ميزيلداييب، اوزونه اوفلويور. باخيشلاريني گؤزلرينه زيلله‌ييب، »آووجوندا حسرت وار، باخيشيندا دومان. روحون هارالاردا گزير سنين؟ ياشام خطين …..«سؤزونو ياريمچيق قويوب، اليني آووجوندا بير خطين اوستونده گزديريب، سانکي اونو اوزاتماق ايسته‌يير. »اوردا دا ايکي آي عؤمروم‌دن قالماسيني يازيب؟« دئيه فالچي‌نين سؤزونو کسير.
– نه ايکي آيي قيزيم، سن هله جوانسان، ايل‌لر بويو ياشاياجاقسان.
– آمما منيم ايکي آيليق عؤمروم قاليب. من خسته‌يم، اؤله‌جه‌يم.
فالچي قادين بير سؤز دئمه‌دن آياغا دوروب اوندان اوزاقلاشير.
– بلکه ده سن دوز دئييرسن، بلکه اؤلوم بشرين سونو دئييل ده! هارادا ايسه آيري دونيادا اوزون-اوزون ياشاماق واردير.
فالچي دؤنوب قادينا باخير.
– ايکي قاتيني وئريرم.
– نه‌يين ايکي قاتيني؟ تعجبله سوروشور.
– گؤنده‌ليک قازانجي‌نين ايکي قاتيني وئريرم، گل اوتور يانيمدا منيمله دانيش. گليرسن‌مي؟
فالچي قادين بيرآز دوروخوب، سونرا باشي ايله راضيليق وئرير. ايکيسي ياناشي يولا دوشورلر.– آدين، دردين نه‌دير سنين قيزيم؟ فالچي سوروشور.
– آديم اؤزلم‌دير. بختيم حسرت. علاجسيز بير خسته‌لييم اولماسيني دونن بيلميشم. بير آي بوندان قاباق باش آغري‌لاريم باشلادي…
دانيشا-دانيشا اوزاقلاشيب، کولکلي قاردا، کدرلي بولوت‌لارين داليندا سيزيلدايان گونشين قارا ايشيغيندا گؤزدن ايتديلر.
منبع :