بولگه لر سرويسي: پاييزين ايلک گونلريدير. باکي خبرينه گؤره صاباح آغير قار ياغا‌جاق. تبريزه يئتيشن کيمي‌بير باشا شمس بازارينا گئتمه‌لييم….تاخسينين ايچينده، “بؤيوک آغا نه واخت گله‌جک؟ بؤيوک آغا نه واخت گله‌جک؟ “تومجه‌سي، آرد-آردينا دوداقلاريمين آلتيندا يئنه‌له‌نير. بو باشليغي اونوتسام، نازليما پوتون آلاجاغيمي‌دا اونوداجاغام.

 نازليم بو قيش‌دا پوتونسوز قالا‌جاق. اؤز شهريميزدن‌ده بير پوتون آلا بيله‌رم. آنجاق تبريزدن آلاجاغام دئيه، نازليما سؤز وئرميشم. تبريز فهيمه‌نين شهري‌دير. لاپ فهيمه‌نين ديله‌دييي پوتوندان آلاجاغام نازليما. بونو اؤزومله قرار قيلميشام. گؤرن فهيمه‌نين ديله‌دييي پوتون نه بويادايميش. بيلسه‌يديم، دوز او بويادا آلارديم. “بؤيوک آغا نه واخت گله‌جک”دن بير آني اولسون دئيه….ايندي شمس بازاريندايام. آلت قاتي، اوست قاتي، باساماقلي-باساماقسيز توکانلاري، بير-بير دولاشيرام. اولدوقجا بورادا اويونجاقلا پالتار توکاني وار. بير جوت بئله پوتون يوخدور. شاشيريب قالميشام. بيلدير فهيمه اؤز پوتونونو‌هاردان آليب دئيه دوشونورم….بير ساتيجي گنج اوغلان، آغا، بويورون دئيير. نه ايسته سز، بيزده وار.-باغيشلايين آغا، سيز فيليم ساتيرسيز. منسه پوتون آختاريرام. بورادا پوتون ساتان يوخدور؟-نييه! بير آز آختار تاپارسان.بير داها آلت قات، اوست قاتي آختاريرام. يوخدور کي يوخدور. فهيمه مني تانيمير، يوخسا بير ته‌هر تئلفونونو تاپيب سوروشارديم. هله بير آز دا آختاريم داااا دئييرم. بورا‌دان پوتونو آلمايينجا چيخماياجاغام. نازليما سؤز وئرميشم. آغلاما دئميشم، بو قيش اؤزوم‌ده آياق يالين قالسام، سنين پوتونونو آليب اؤزوم گئيديريب، اؤزوم باغيني باغلاييب، اؤزوم….اوووووه، بو نه گؤزل شورت-جوراب! اؤزو‌ده قيپ-قيرميزي. لاپ نازليمين به‌يندييي بويادا. بونو آلسام، بونو گئيسه، پوتونو اونودا بيلر دئيه دوشونورم.-خانيم، بو شورت-جورابيز نئچه‌دير؟-اين؟ سي تومن. اصل اصله. مستقيم از ترکيه خريداري شده.-سي تومن؟ ! …ممنون خانم!شمس بازاريندان چيخسام گره‌ک. بازار آغزيندان‌دا تاپا بيله‌رم. يوخسا سه راه امين‌دن. دئمک بو بويدا تبريزده نازليما بير پوتون تاپيلمايا‌جاق؟ بورادا ان ياساق بيتيکلري بئله، من تاپيب آليب اوخوموشام گنجليک بويو. تبريز تک ده اؤيکوده کي خالچا شهري دئييل کي. گؤن شهري، باشماق شهري، ياساق بيتيکلر شهريدير ده. گل گؤر فهيمه اؤز اؤيکوسونده، تبريزده پوتون وارليغيني اؤزوندن قونداريب! يوخ، بو اولا بيلمز. تبريز پوتونلار شهريدير. پوتونو آلما‌لييام. سؤز وئرميشم. نازليما وئرديييم سؤزو يئرينه يئتيرمزسم، آرتيق اؤله‌رم. داغ دؤشونده، داش ديبينده اولسا بئله، يوز مين تومنه ده اولسا، آلاجاغام. سونو فهيمه‌نين ياخين دوستونا تئلفون آچارام. آدي نه يدي اونون؟ واي، اونو‌دا اونودموشام. اونو اؤزوم ايسته‌مه‌دن اونوتدوغومدا، کسين اودا مني اونودوبدور. من “بؤيوک آغا نه واخت گله‌جک” اؤيکوسونه،‌هانکي وئب-سيته‌ده‌سه کامئنت قوياندا، او منه بير ايمئيل گؤنده‌ريب، فهيمه‌نين يئرينه يانيتلاميشدي. هه، ايندي آنيمساديم. اورادا بير تاخما آد سئچميشدي اؤزونه:دنيز. تئلفونونو دا يازميشدي. بير اس ام اس آتيرام:-سالام! …بالام، من بو شمس بازاريندا هئچ بير پوتون گؤرمورم آخي. هله من بير قوشوغومدا، شمس بازاريندان فهيمه اوچون بير پوتون آلماغي دوشونموشم….-سلام! تبريزده‌سيز؟ تکمي‌گلميسيز، يوخسا عائيله‌يله؟ ايندي‌هاردا‌سيز؟ بيزيم ده بير کاسيب ائويميز وار‌هاااا! …-ساغ اولون. بو گون نازليما بير پوتون آلما‌لييام. يوخسا يئنه اونون گؤزياشيني گؤرسم، بو قيش داها يازا چيخماز منيم اوچون. اؤزو ده باکي خبرينه گؤره آغير قار ياغا‌جاق. وار اولسون ائويز ده. اومود ائويميزدير….-باشقا بير شئيلر آليرسيزسا، آدرس وئرمکله يارديم ائده بيله‌رم کي چوخ زحمته دوشمه‌يه‌سيز. دئسز صاباح اختياريزدا دا اولا بيله‌رم، البته يارديم اوچون و تعاروفسوز ائويمي‌اؤزونوزه عاييد بيلين. گلرسيزسه سئوينه‌رم.– کؤکونده آرتيق نسنه آلماغا بيزلرده پول-پارا اولماز. يالنيز نازليما بير پوتون؛هامي‌سي بو. صاباح‌هاوا موساعيد اولورسا، سيز موساعيد اولورساز، من موساعيد اولورسام، گؤروشه‌ريک.-بو گئجه‌هاردا اولا‌جاقسيز؟ لوطفن دئيين!-بو گئجه ساعت دوققوزدا معلم ائوينده اولاجاغام. کسين ياشام يولداشيم ناماز قيلا‌جاق او ساعاتدا. نازليمسا کارتونا باخيب، دوش آليب، سونرا ياتا‌جاق. منسه بونجا يورقون-آرقين-يوخوسوز، اولا بيلر معلم ائوينين اوچونجو قاتينين بالکونوندا، آنلار-آنيلاريمي، اوره‌ييم-ديله‌ييمي، سيغار توستوسو حالقا‌لاريندان کئچيره‌جه‌يم. اينديسه هپ بورادايام. اوچونجو قاتين بالکونوندا. تبريزين توتقون قاشينا دالميشام. منيم اؤيکوم، ميرزه جليل ممدقولوزاده‌نين اؤيکوسودور. “گؤزومو آچاندان بري، دونياني قارانليق گؤردوم. “اينديسه اوچونجو قاتين بالکونوندا، گؤزلريمي‌قاپاييب، تک بير نازليمين قيش پوتونونو دوشونورم.بو اس‌ام‌اسي آلاندان سونرا، سانکي دنيز خانيم‌دا اؤز گؤزلريني قاپا‌لي توتوب، داها نه‌سه يازيب گؤندرمير. اؤيله‌جه بالکوندا، اوتوردوغوم يئرده ، سيغاريمين دوماني گؤزلريمه چؤکور. کيپريکلريمين اوجونداحالقا-حالقا بورولور. بوسبوتون يئر قارانليقدير. بوراسي تندير داميميز اولماليدير. هه، اورادير. دووارلاريني سانکي توستويله سوواميشلار. بو چيزگيلر نه دير؟ بو قارما-قاريشيقلار، بو قوخولار، بو قورخولار؟ بورادا جيني‌ده آنيمساماق اولور، جهنّمي‌ده.بير بوجاقدا باشماق يئشيکلري اوست-اوسته قالانيب. ايچلريني آراييرام. بير پوتون بولمالييام. اولابيلر آنامين، باجيلاريمين، اوشاقليق چاغيندا بير پوتونلاري وارميش. اونو يويوب، آريتلاييب، ياغلاييب، نازليما آپارارام. قورخو ترينين ايچينده باشماقلاري بير-بير آلت-اوست ائديرم. يوخدور کي يوخدور. اولسايدي دا گؤتورن دئييلديم. من آرتيق فهيمه‌نين پوتونوندان نازليما آلمالييام. بونو اؤزومه سؤز وئرميشم. او بيريسي بوجاقدا گؤزوم باشقا بير يئشييه دوشور. اوزوندور تابوت کيمي. ياخشي تانيييرام بونو. دوققوز ياشيمدا ايچينده ياتميشام. آتام ايسته‌ديييم باشماغي آلماديغي اوچون ائودن کوسوب گليب بو تابوتون ايچينده ائرکن گؤزو آچيلينجا تير-تير تيتره‌ميشم. بونلا باغلي آلمانييادا اولان عم اوغلومون بير رسيمي‌اولماليدير. آلمانيياني‌دا بير آن آنيب دوشونورم. آخي اورادا بير تور پوتون اؤلکه‌سيدير.آلمانيياني بوراخيب تابوتو، تابوتوسا بوراخيب، دووارا باخيرام. قارانليقدا بير آغ چيزگي گؤرونمکده‌دير. اؤزودور. اوتوز نئچه ايلدن سونرا هله ده عم اوغلومون بارماق اوجو ايزلري، دووارين اوستونده دورور. توستو ايچينده آغاران بير شکيل. بير تابوت ايچينده ياتميش بير اؤلونون باشي اوستونده بير بولود چکيلميش، ايچينده‌سه يازيلميش:پوتون! تاريخ يئنه‌له‌نير، گؤزلريم دولور. اوره‌ييم آز قالير پارتلاسين.بوندان آرتيق دؤزه بيلمه‌رم. قارادامدان چيخماق ايسته‌ينده، آياغيم ايليشير تنديرين اوستونه قويولموش ساجا. ييخيليرام. نه‌سه اولماييب. تنديرين ايچيني يوخلاييرام. اولدوقجا اوچولوب تؤکولموش، داها چؤره‌ک ايي گلمير بو تنديردن. ايچينده بير دنيز باشماق اؤلوسو. بير تبريزجه اؤلونو بير تنديره نئجه سيغيشديرماق اولار؟ بير فاتيحه اوخويوب دورمالييام:نئجه‌سيز‌ يازيق اؤلولر؟ سيز بورادا نئيله‌ييرسيز؟ سيز بونجا پوزقون يوخ، داها پارلاق، داها شاواخلي، داها آلليجا-گوللوجه شمس بازاريندا اولمالي‌يديز! اؤلولر، آ…ي اؤلولر! اؤلولر ائله ياتميشلار، هئچ شئيخانه اونلاري ديريلده بيلمز.اؤلولري داها اينجيتمک ايسته‌ميرم. قوي اؤز ياتديقلاري يئرده ياتسينلار. اونلار کسين بوتون نسنه‌لري اونوتموشلاردير. منسه نازليما آلاجاغيم پوتونو هئچ اونودا بيلميرم. تندير داميميزين دومانليغيندان چيخيب، معلم ائوينين بالکونونا دوغرو گلميشم يئنه. بير آز گؤزوم قاماشير. باشيما قوشباشي قار دنه‌جيکلري تؤکولنده اويانيرام. هله قار چوخ‌دا باکي خبرينده دئييلن کيمي‌آغيرلاشماييب. شمس بازارينا دؤنمه‌لييم. دؤنورم. شمس بازاريندا هئچ بير قيش پوتونو يوخ. بازار آغزينا، تربيته، اوممت پاساژينا، اولمازسادا گجيل آغزينا گئتمه‌لييم. تله‌سيک شمس بازاريندان چيخارکن، گنج بير قيزلا قول-قولا توققوشوروق. فهيمه‌دير.-قيز، سنميسن؟ سني گؤيلرده آختاريرديم، يئرده اليمه دوشموشسن. بوندان داها بؤيوک سئوينج اولا بيلمز. کئچن ايل او اؤيکوده کي قيش پوتونونو‌هاردان آلميشدين؟فهيمه‌سه آجيقلي‌دير. قاشلاريني دويونله‌ييب، ديشلريني سيخير:-من فهيمه دئييلم آغا. سيز کيمسيز؟ اؤزوزو سريميسيز؟بورادا اؤزومه گليرم. يوخويلا اوياقليغين آراسيندايام. ياتاغيمدان نئجه‌ده اوزاق دوشموشم. دؤشه‌ييم آلتيمدا، يورقانيم اوستومده دئييل. سويوقدان بوتون هوجئيره‌لريم اسير. پنجره‌دن باخيرام. آغير قار ياغير. بورايا ياغان قارين بئله سانکي ديشي وار. اتيم-اوره‌ييم خينجيلير ياغديقجا. باخ بورايا! من هئچ تبريزده دئييلم. داها دوغروسونو دئسم، هئچ تبريزه گئتمه‌يه، يئترينجه پولوم يوخدور…. .

منبع :