مني آگورادا يانديرين

بولگه لر سرويس:چاره‌سيزليکدن نئجه دوغولدوغومون ماجراسيني ياريمچيليق قويدوم. ندنسه من دانيشديقجا کارمند خانيمين پؤرتوشمه‌سي بترله‌شيردي.

نه بيليم… بلکه ده تانسيونو يوخاري قالخميشدي. آللاهدان اؤتور ميز اوسته بير ليوان سو دا يوخ ‌ايدي کي دئييم بويور بير قورتوم ايچ سورا من سني باشا ساليم.
هاردانسا بيردن- بيره عاغليما گلدي کي بلکه کارمند خانيم منيم سؤزومو جيدّي توتوب آنامين ديريليک عکس‌لرين قبول ائله‌مه‌دي! بلکه دئدي اونون دا اؤلولوک عکسيني ساليب، گتيرين. چونکي سفيرليک‌لر ويزا اوچون جوهري قوروماميش عکس ايسته‌ييرلر. بو فيکيرلر عاغليما چاتينجا مني ده بتردن هؤوشنه باسدي.
اؤز- اؤزومه دئديم:»ديلين شيشسين! آخي بو دا سؤز ايدي تاپيب دئدين؟! سنه نه کيم اؤلوسونون عکسيني پروفايليندا پايلاشير..! سن اؤز قوْتورووي قاشي دا..! گئت اؤز‌هاييوا قال کي بو أنه‌شوش وصيت‌نامه سنين وار- يوخووا هولا قوشاجاخ! اگر ايندي دئسه کي گئت رحمت‌ليک اؤلوزون لاپ بئله تازا بير عکسيني گتير، اوندا‌هانسي عکاسا يالواراجاخسان کي گئديب سردخانانين دولابيني ائشييه چکيب، عکس سالسين؟!«
عاغليما گلن فيکرلر سببيندن ائله حالا قالميشديم کي، حتي آيناسيز دا صيفتيمين ساراليب بوزارديغيني حيس ائله‌ييرديم.کارمند خانيم عصبي بير حالدا دئدي:»پروفايل عکسيندن منه نه خانيم؟! بولاري ديري آداميزا اؤلمه‌ميشدن دييه‌جک ايديز وصيت يازاندا ائله‌سيني يازسين کي، بير مؤسسه‌نين بوتون کارمندلريني ايشدن قويوب، اسير- سرگردان ائله‌مه‌سين!»يالاندان فايدا يوخ، ايندييه‌جن گؤرمه‌ميشديم عصبانيتله پؤرتوشمه‌، ايکيسي بير يئرده، بو قدر بيريسينه ياراشسين. پؤرتوشمه آرتديقجا کارمند خانيمين گؤزللييي بير ايدي اگر، يوز اولوردو. ياشيل چرقدله ياشيل لئنز ده کي… دئمه!»خانيم، لطفاً سيز بير قورتوم سو ايچين بير آن نفس آلين، سورا من سيزه عرض ائله‌ييم کي ردّ اولمونموش ويزاني نئجه دؤور ويرماخ اولار.«»منه سو- زاد لازيم دئييل. سيز باشا دوشموسوز! بير ده بونو بولمه‌لي‌سيز کي بو مؤسسه دؤور ويرماخ يئري دئييل!«
»من بير سؤز دئييرم، سيز ده لطفاً بير سؤز ائشيدين دا… خرج- مخاريج‌نن ده ايشيز اولماسين. بو اؤلکه‌لرين بيري ويزا وئرسه، والـلاه خجالتيزدن چيخارام. سيز فقط تقاضالاري سفيرليک‌لره گؤندرين. هر‌هانسي ويزا وئرسه، آنامي‌او اؤلکه‌‌دن آتن شهرينه چاتديريب، وصيتينه عمل ائله‌ريخ.«»ائله آتن شهرينه چاتديرارام دئييرسيزکي، دييه‌سن اؤلونو تبريزدن مرنده آپاريسيز!«»سن آللاه مرند اؤلوسونو ياديما سالما. اونسوز دا بير هفته‌دي اؤلو سردخانادا قاليب.«»بولوسوز من سيزين يئريزه اولسام نه ايش گؤره‌رم..؟«منسه ساکيتجه اونون پؤرتوشموش گؤزل سيماسينا دالميشام. گؤره‌سن منيم يئريمه اولسا نه ايش گؤرر..!؟»من سيزين يئريزه اولسام، آپاريب اؤلونو وادي رحمتده تورپاغا تاپشيرارام. يونان ويزاسينا خرشله‌ديييز پوللاري دا احتياجي اولان بير يئره باغيشلارام. نه اؤزومو زحمته ساللام نه ده باعث اوللام بو مؤسسه‌نين کارمندلري امکانسيز ايشلرنن واخت‌لاريني تلف ائله‌سينلر. بير ده کي، مه‌يه سيزين اؤلوز مسلمان دئييل وصيت ائله‌ييب اونو يانديرسينلار؟«کارمند خانيمين بوغازيندا قالميش سؤز سونوندا آغزيندان چيخميشدي.
سؤزلري قورتولاندان سونرا، توالتده اؤزونو راحاتلايان آدام کيمي‌آسوده بير نفس چکدي. معلوم ايدي ايچينده‌کي سؤزلردن اؤزونو راحاتلاميشدي.»بورا باخين گؤروم،‌هاردا يازيب مسلمان اولوب- اولماماغين ويزا آلماغا دخلي وار؟ آمما ايندي کي سيز هر ايشي بوراخيب، بو مسئله‌نين اوستونه أل قويوبسوز، دئمه‌لي‌يم کي، آنام دا دونيايا گلنده بوتون کؤرپه‌لر کيمي‌بؤيوک ده‌ده‌سي ساغ قولاغينا اذان، سوْل قولاغينا ايقامه اوخوموشدي.«»آخي بيزلرده يانديرماق ده‌ب دئييل کي! اؤلونون ده اؤزونه گؤره تدفين يول يؤندمي‌وار يا يوخ..؟«»ده‌ب اولا- اولمويا من حلال سود أمميش بير ورثه کيمي‌وصيتي يئرينه گتيرمه‌لي‌يم. سيزه دئديم کي، بيزيم عايله‌ده وصيت، گؤيدن نازيل اولونموش آيه کيمي‌ارزشليدي.«»دئيرم ياني آدام اؤلندن سورا بيلمير کي اوننان سورا نه اولور! ايستر وادي رحمت، ايستر آگورا؛ ايکيسي ده آللاهين يئري‌دي دااا. آدام اؤلندن سورا‌هاردان بوله‌جاخ اونو يانديريبلار يوخسا قويلاييبلار؟ هله هر زاد بير يانا، يانديريلميش اؤلو قبرين اوّل گئجه‌سينده نئجه احوالات گئچيره‌جاخ؟ بغيشله‌يين‌هااا… ربّون کيست سوالينا نئجه جواب وئره‌جاخ؟«
حيرص باغيرساغيمي‌کسير. بيري يوخدو بو فضول خانيما دئسين سن کارمندسن يوخسا أنکير منکير..؟ بير ساعاتدي ويزا آلماغين قاباغينا داش ديغيرلادير. ايندي او لئنزلي گؤزونو منه تيکيب، خجّه‌باجي‌لار کيمي‌»ربّون کيست« سوروشور. آز قاليرام دئييم سن اؤز ايشيوه يئتيش! مايا قوي ويزا تقاضالاريني سؤزسوز صؤحبتسيز گؤندر. »ربّون کسيت«ين جوابيني منيم آنام وئره‌جک، سن کي يوخ! آمما ايسته‌ميرم خانيمين اوره‌يينه توخونام.
آخي بو کارمندلرنن بير آز يک‌به‌دو ائله‌سن داش ديغيرلاتماق سهلدي دووار تکيرلر. بونونلا بئله خانيمي‌بتر ساشماغيم گلير. دئييرم:»اگر اؤلو گئديب بانک حسابي‌نين پرينتيني آلا بيلمه‌سه، امضا وورماغا قادير اولماسا، لابيد سوالا دا جواب وئره بيلمز دا.«دئيه‌سن منيم جوابيمدان اونا فلسفي بير يأس اوز وئريب. بير آز فيکره جوماندان سونرا دئيير: »دوز دييسيز‌هااا… بوراسينا هئچ فيکير وئرمه‌ميشديم!«
آردي وار

منبع :