هر کسين  الينده گؤي- گؤيرتي وارسا: » هله اؤلمويوب، ديريدي«، دئييرم. بولمورم اينديه‌جان گؤي- گؤيرتي محک داشي کيمي‌ايشله‌نيليب يا يوخ، ندنسه بو گون عنايين خياليم خوشلانير اينسانلارين ياشاييش طرزيني، ديري و يا اؤلو اولماقلاريني، سئودييي محک داشي ايله،گؤي- گؤيرتي‌ايله اؤلچسون. منيمله اوز- اوزه گلن ديري‌لري ساييرام. حتي جينسيّت‌لريني بئله حسابا ساليرام. ديري‌لرين ساييسي اؤلولردن آزاراق‌دير. 

قارشيدان گلن 10- 15 نفر اؤلودن، بير نفر ديري کناريمدان کئچير. ديري‌لرين بير چوخ ساييسي قادين دير. بعضي‌لري گؤي- گؤيرتي‌لري ائله باغريلارينا باسيب گئديرلر، دئييرم بس عزيزله‌ديغي اوولادلاري کيمي‌دير باغريلارينا آلديقلاري گؤي- گؤيرتي.

نئچه آدديم کره‌ني‌خانايا قالميش قارشيدان گلن ايکي‌جانلي بير قادينا والئه اولورام. ائله آستا- آستا، نازلانا- نازلانا گلير کي، اؤز قادينليغيمدان خوشوم گلير. 26 ايل بوندان اوولکي حاليمي‌گؤرورم ايکي‌جانلي قاديندا.

ايکي‌جانلي اولماق، جان ايچينده أته‌نه بير جان داشيماق، اونو دويماق، اونونلا ديل بيليمي‌عاليملرين بئله باش تاپماديغي سؤز‌سوز ديل‌ايله دانيشماق… بو دويغونون ديليني آنجاق ايکي‌جانلي بير قادين باشا دوشر. ايچيمده اته‌نه بير ياراديق وار دئيه، نئجه ده غرورلانارديم!!! او گونلر… او گئري دؤنمه‌ين گونلر…

قادينين کنارينا يئتيشنده، اونون ياناقلاريندا، آلينينداکي قهوه‌اي لکه‌لر گؤزومدن قاچمير. ياشامين داديني يئني‌دن آليم، ايکي جانلي اولماغي يئنيدن آنيمساييم دئيه اليمي‌قارنينا سورتمه‌ييم، ايچينده‌کي ياراديغي حيس ائتمه‌ييم گلير. قادين گؤزونون اوجويلا بئله منه باخمير. سايمازيانا کناريمدان اؤتوب کئچير. آرخاسيجا باخيرام. يئريشي سئومه‌لي بير اردک يئريشيني ياديما سالير.

کره‌نئي‌خانا تيمچه‌سي، ائنسيز، داراشليق‌دير. خياباندان داها آرتيق قالماقال، سس- کوي وار. اؤزومو قورويورام کناريمدان کئچنلرين، اوز- اوزه گلن‌لرين الي منه توخونماسين، دومسوک‌له‌مه‌سينلر مني. بعضي اينسانلارين کناريندان کئچنده، امنيّت حيسيم، بئينيم ده قيرميزي سيقنال چالير. اونلارين کناريندان، يان- پئرتي کئچيرم.

آياغيمي‌آلا- قارانليق تيمچه‌يه قويماقدا، گؤزوم چييه‌لک‌لره ايشيقلانير. آغزيم سولانير. کيچيک بسته‌لرده، اوستونه سئلفون چکيبلر. مقوادا يازيلميش قييمت، دييه‌سن چييه‌لک‌ بؤلگه‌سينين بايراغي‌دير، تاباغين اورتاسيندا ديم- ديک دايانيب. ساييرام. بعضي بسته‌لرده 9، بعضي‌سينده 10 دَنه چييه‌لک وار. آت اوستو حسابلاييرام.» 10 دَنه‌لي بسته، هر بيري… اوووففف آدام قييمتي… « بونونلا بئله هوسله‌نيرم بير بسته آليم. چييه‌لک‌لرين يئکه‌ليک‌لريندن شوبهه‌له‌نيرم. پئشمانلاييرام. آلميرام. کناريمدا تاباغين قارشيسيندا دايانميش بير کيشي‌يه» هورمونلودولار«، دئييرم. دوکان صاحابي منه گؤز داغي وئرير:» باجي آلمياجاخسان بويور! بولموسن توقف مانع کسب است؟!« …

توکانچي‌نين سؤزو غروروما توخونسا دا، سويوق‌قانلي حالدا جوابيني اووجونا قويورام: » بو مقّوا بايراقدا، يازديغين قييمتين آلتينا آرتير کي، چييه‌لک‌لر هورمونلودولار.«

توکان صاحابي :»چييه‌لَح ندي؟« دئيير. تاباق باشيندا دايانميش کيشي مني قاباقلاييب جواب وئرير: »ياني توت فيرنگي دااا«

»باجي اؤز ديلووه نه گليب، اؤز ديليوو دانيش داااا. بو سرياللار دا بيزه لاپ عمل اولوب‌هاااا. کيمي‌دانيشديريسان زيت باشي دئيير، تامام… تامام… ايندي ده چييه‌لَح!«

توکانچي‌ ايله ديل به ديل دئمه‌يه ديل- داماغيم يوخدور. چييه‌لک تاباغيندان اوزاقلاشيرام. آمما هله ده آغزيمين گؤيلو چييه‌لک‌لرده قاليب. ديليمين بزاق غدّه‌لري سولانيب. گؤيلومه توختاخليق وئريرم. اؤز- اؤزومه دئيرم: »هورمونلو اولماسيدي…«

توکانلارا باخا- باخا آستا- آستا کئچيرم. آرا بير آياق ساخلاييب، جئيران داغينا چيخميش قيمت‌لره باخيرام: کاهي 2000 تومن. اؤز- اؤزومه »نه خبردي؟« دئييرم. بامادورون اوستونده قيمت بايراغي يوخدور. سوروشورام. 4500 تومن دئييب،  الينده‌کي حامام فيته‌سي‌ايله بامادورلارين توز- تورپاغيني بير به بير سيلير.

بيرينجي عقيق ساتان توکانين ويترينينين قارشيسيندا دايانيرام. هميشه رنگ به رنگ عقيق‌لره باخماقدان لذت آلارام. تيمچه‌يه يولوم دوشنده، بير آشاغي، بير يوخاري گئديب، گلرم. عقيق‌لره باخارام. باخديقجا نوستالژيک دويغولارا قاپيلارام. سونرا کئچيب، احتياجيم اولدوغو گؤي- گؤيرتيني آلارام. بو گونه جان لاپ چوخ گؤزومو توتان عقيق داشي، قيرميزي‌يا چالار عقيق اولوب. بير يئرلرده اوخوموشام کي، قيرميزي عقيق اينسانلارين عزت نفسين، اينام‌لارين آرتيرار. بونجا گؤي- گؤيرتي توکاني ايچينده، بير بورو ساتان توکاني، بير عطّار، بير ده عقيق ساتان توکانلار، نئچه رنگه چالار ياماق کيمي‌گؤزومه گلر. »بلکه ده گؤي- گؤيرتي توکانلاريني عقيق ساتان توکانلارا ياماخ ووروبلار« دئييرم.

عطّار توکانينين قارشيسيندا بير ايکي توريست دايانيب‌لار. قادين شوکولات رنگينده شاليني هيندوستان مهاراجه‌لري کيمي‌باشينا ساريسادا، هندوستانلي‌لارا بنزه‌مير. کيشي‌نين ساريمتيل ساچي- ساققاليندان، آغ- آپباغ دريسيندن آورپالي اولدوقلاريني تحمين وورورام. توريست‌لرايله دانيشان مترجيم، نفسي کسيله- کسيله عطّار توکانينداکي ادويه‌لري گؤسترير. گؤز اوجو توريست‌لره باخيب کئچيرم. نئچه آدديم گئتمه‌ميش توريست‌لرله دانيشماغا هوس‌له‌نيرم. 

گئري دؤنوب اونلارين کناريندا دايانيرام. اؤز- اؤزومه دئييرم: »سن ده توريست گؤرمه‌ميشي اولدون‌هااا!« مترجيم منه ترسه- ترسه باخير. اونو سايميرام. عطّارين توکانيندان بويلانان کيشي‌نين آغزي، توريست قادينا آخيب. منسه توريست‌لرين آغزيندان چيخان سؤزلره ديققت وئريرم. 

بير کلمه‌سين بئله آنلاميرام. مترجيم منيم اوردا دايانديغيمدان ناراحات کيمي‌گؤرونور. » سنين کيمنن ايشين وار؟ ادووه آلاجاخسان کئچ آل داااا…«، دئيير. يئني دن ادويه ‌بسته‌لرين الينه گؤتورب، منيم آنلاماديغيم بير ديل‌ده دانيشير. اونلارين کناريندا، اؤزومو کور کنددن گلميش بيريسي کيمي‌حيس ائديرم. مترجيمين سؤزلرينين آراسيندا بير تانيش سؤز قولاغيما دَيير: » جينجر… جينجير…« آز قاليرام قانادلانيم. مترجيم زنجفيل توزونون بسته‌سين گؤتوروب، نه اولدوغونو توريست‌لره آچيقلايير. زنجفيلي يئرينه قايتاريب، منه ساري اوز توتور:»خانيم! آلاجاخسان دي کئچ آل داااا، نييه آغزين آخيب؟« اوتانا- اوتانا دئييرم:» ايستيرم توريست‌لرله دانيشيم« مترجيم حيرص بوغازين کسميش کيمي» بويور داااا« دئيير. منسه:» سيز ترجمه ائله‌يين« دئييرم. »‌هانسي اؤلکه‌دن گليب‌لر؟« »سوييس دن گليب‌لر… سوييس‌دن« ائله سو… ييس دئيير کي، دييه‌سن من هئچ سوييسي تانيميرام. 

قادين توريسته باخيب، گولومسه‌ييرم. او دا منيم اوزومه باخيب، دوداغين قاچيردير. دئمک گؤزدن علاوه دوداق ديلي‌ايله ده دانيشماق اولارميش. » سوروشون کي آذربايجان خانيم‌لارين نئجه گؤرور؟«

مترجيم منيم اليمدن، سواليم دان عصبي گؤرونور:» خانيم! بولار ساعات 8 ده يئتيشيب‌لر تبريزه، يورقوندولار. هله تبريزين خانيملارين گؤرمويوبلر!«مترجيمين حيرص‌له دانيشديغينا باخماياراق، موبايليمي‌کيفيمدن چيخاريب، ساعاتينا باخيرام. 

ايکي‌يه بئش دقيقه قالير. گوله- گوله دئييرم:»او خانيم‌لاردان بيريسي من، گؤزونون قاباغيندايام. باخ گؤر، کره‌نئي‌خانا دولودو رنگ به رنگ خانيم لارينان. ياني سيز 4 ساعات دا بونلارا بيزيم خانيم‌لاردان هئچ سؤز دئمه‌ميسيز؟« 

توريست قادين گولومسويه‌رک، مترجيمه آنلاماديغيم بير سؤز دئيير.

»نه دئيير؟« مترجيمدن سورشورام.

»دئيير آذربايجان خانيم‌لاريننان خوشوم گليب. خوش‌سيماديلار. گؤزل- گؤزل ده اوشاخلاري وار«

گئنه ده دوداق واسيطه‌سي‌ايله توريست قادين ايله دانيشماغيم گلير. دوداغيمي‌قاچيرديرام. مترجيمه دئييرم:» من يازيچي‌يام. ماراخلييام بيلم کي آذربايجاننان، تبريزنن نه قدر تانيشديلار؟ ندن گزمک اوچون بوراني سئچيبلر؟«

مترجيمين ديشي- ديشين کسير: »خانيم دئديم کي بولار سحر 8 ده يئتيشيبلر. هله بيلميرلر آذربايجان دا نه وار. أدوووه آلاجاخسان، بويور آل داااا« » ايسته ميسيز ترجمه ائليه‌سيز، اونو دا اخلاقينان دئيين داااا…« دئييرم.

توريست قادين نه لر اولدوغونو آنلاييب، دوروخور. بير چوخ واخت، بعضي اينسانلار بير-بيرلرينين دانيشيق ديليني باشارماسالار بئله، سؤزسوز- سووسوز نه‌لر اولدوغونو باشا دوشرلر. توريست قادين بير منه، بير ده مترجيمه باخير. گئنه منه تبسوم ائلير. گوجو- بيللاهينان يالانچي بير تبسوم منيم ده دوداغيما قونور.

آغزيمين، ديليمين گؤيلونون دادي قاچماييب. نه چييه‌له‌يه سويو آخير، نه ده بير توريست‌ قادين ايله دانيشماغا.تاکسي ده ايليشيب، ائوه دوغرو گئتدييمده ياديما دوشور کي، نه ساريمساق آلميشام، نه باديمجان، نه ده قارني‌ياريق اوچون جعفري…..