اوستومه داغ يئريدي

بولگه لر سرويسي:خييو شهرليسي و ياخود خييو شهرينه گلميش اولسانيز، يقين کي دفه‌لرله آسيلي کؤرپونون اوستوندن اولماسادا، آلتيندان گؤز اوخشايان باغلاري، داغلاري گزيب، گؤروبسونوز.

رحيم خياوي

بولگه لر سرويسي:خييو شهرليسي و ياخود خييو شهرينه گلميش اولسانيز، يقين کي دفه‌لرله آسيلي کؤرپونون اوستوندن اولماسادا، آلتيندان گؤز اوخشايان باغلاري، داغلاري گزيب، گؤروبسونوز.
آسيلي کؤرپو، گيردولي داغينا، ائله‌جه‌ده اونون اوستونده ساوالانين اتک‌لرينده اولان باشقا داغلارا يول آچير. من گيردولي داغينين اطرافينداکي داغلاري و اونون يان- يؤره‌سينده‌کي يايلاق‌لاري، بولاق‌لاري، ايستر ياي، ياز، ايسترسه قيشين قارلي، قيرولي گونلرينده ده، يوزلر دفه گزيب دولانميشام.
آسيلي کؤرپونون آلتينداکي قورخونج و گؤز قاماشديران دره‌ده، ايل بويو، گؤم گوي، گؤز ياشي تک سويو اولان خييو چايي آخار. بو چاي بوللو چيچکلي ساوالانين دؤشلرينده‌کي يايلاقلاردان قيدالانيب، يام ياشيل ياماجلارين قوخوسونو داشيياراق، شهرين قيراغيندان گئچيب و نهايت قاراسويا قاريشيب، آرازلا قول بويون اولور.بورادا مئيوه باغلاري بير بيرينين قوينونا ائله سيغينيبديرلار کي، آسيلي کؤرپونون هوندورلوگوندن سيخ مئشه‌ کيمي‌گؤرونرلر. من‌ايسه بو داغلارين اته‌گينده بويا، باشا چاتميشام. بو باغلارين، داغلارين هر بير کونجونده آجيلي، شيرينلي خاطيره‌لريم اولوب…
بير ياز گونونون تراوتينده گونده‌ليک ايشيم اولاراق، خييو چايي کنارينداکي باغلارين آراسيندا اولان جيغيردا گئديرديم؛ مقصديم گيردولي داغي‌نين زيروه‌سي ايدي. طبيعتين گؤزلليک‌لري ايچيمده خوش دويغولار اوياديردي. يولون آشاغي الينده، نئچه گنج اوغلان ووليبال اويناييرديلار… بير آن گؤزوم قارانليغا گئتدي؛ باشيم فيرلاندي. ايلاهي نه گؤرورم…….!!؟. گوزلريمه اينانميرديم؛ بلکه ده اينانماغا اينجاريم يوخ ايدي. گنج بير اوغلان اؤزونو گيرده‌کان آغاجيندان آسميشدي!. يئره اوتوردوم؛ ايکي اليم‌له باشيمي‌توتدوم. گؤزومده گنجين آغاجدان آسيلي قالميش اوجا بوي هئيکلي جانلاندي. ايختيارسيزجاسينا، آياغا قالخيب، اونا طرف ياواش- ياواش يورودوم. توپ اوينايان اوشاقلار و قونشو باغچي‌لار دا‌هاميسي گلميشدي.‌هاي- کوي‌دن قولاق توتولوردو.– آي بالا قاچين پوليسه خبر وئرين!
– بس آتاسينا؟
– منده او اوره‌ک يوخدو آتاسينا خبر وئرم!،
بو دانيشيقلاري تکجه ائشيديرديم؛ کيملرين طرفيندن دئيييلديک‌لريني اصلا بيلميرديم. سانيرديم سسلر قولاغيما چوخ اوزاقلاردان گلير. بوغولوردوم ايچيمده؛ داها نه اولدوغونو بيلميرديم…..
»رضا« بيزيم ياخين قونشو اوشاقلاريندان ايدي. اوره‌گي جوشغون، اوجا بوي، شووه‌رک و داغ سئور بير گنج ايدي. دئمک آدليم داغچي‌لاردان ايدي. اونون ائورئست داغينادک گئتمه‌گيني ده ائشيتميشديم.رضا ايله بيرليکده گيردولي داغينا قالخيرديق؛ بيرينجي تپه‌ده دينجه‌لک دئيه اوتوردوق. بو اوجا يئردن، خييو شهرينين هر بير طرفي گؤزل گؤرونوردو؛ خيياوانلار و ائولرين بير-بيرلرينه سيخ سؤيکنيلمه‌سي گوزومون اؤنونده بير رئال تابلونو جانلانديريردي. رضا ديللندي:
– چوخ ايسته‌ييرديم اؤزومو آسيلي کؤرپودن آسام.– نه اوچون؟! بس آتان، آنان، سئوگيلين؟
– منجه سئوگيليم داها ايچيمده بوغولوب، داها ايچيمي‌يئين قاداني هئچ کيمسه‌يه آچماق ايسته‌ميرم؛ دردلريم اؤزوم اوچون عزيزدير، اؤزوم ده چکمه‌لي‌يم.رضا ائله دردلي، کدرلي دانيشيردي، قهر ايچينده بوغولان کيمي‌گؤرونوردو.– منيم هئيکليم آنجاق آسيلي کؤرپودن آسيلمالي‌دي؛ سئوگيليم ايله بيرليکده.
رضانين سسي داها جالاق اولموشدو …
– ايللر بويي ايلقاريميزلا ياشاديق، آمما چيرکين خيانتله قارشيلانديم.رضايا سئوگيليسي طرفيندن خيانت اولدوغونو ظن ائديرديم، آمما نئجه اولماغيني بيلميرديم و او ايسه‌ده دئميردي. گونون باتار چاغينا آز قاليردي. گيردولي داغينين زيروه‌سيندن ياواش- ياواش گونون شعالاري ييغيليردي. جانلي بير تابلو گؤزومون اونونده جانلانيردي. آسيلي کؤرپونون اوستونده جماعات آدديملايير، اوشاقلار ايسه اويناييرديلار. رضا بو آندا دولوخسوندو؛ ياش گؤزلرينده لپه‌لندي؛ باشيني ديزلريمين اوستونه قويوب، اوره‌کدن هونکورتو ايله آغلادي، من‌سه اونو باغريما باسارکن، ساچلاريني سيغاللاديم. اوره‌يي‌نين دؤيونمه‌ سسيني ائشيديرديم؛ اؤزومله دوغمالاشميشدي. باشيني قالديريب، دئدي:
-گؤزلريمه دريندن باخسان، سئوگيليمي‌ده گؤررسن، من آغلاياندا سئوگيليم راحاتلاشير.
من گؤزلريمي‌گونشين قان چاناغينا بنزه‌ر درينليکلرينه زيلله‌ميشديم. رضا سايخاش -سايخاش دانيشيردي:
– بيز آسيلي کؤرپودن آسيلساق، بوتون عالم ايکي سئوگيلينين بير- بيرينه چاتماديغيني بيله‌جکدير. بيز آسيلديقدا، دونيا وارکن، ابدييته چئوريله‌جه‌ييک.رضانين حالي اولدوقجا آجيناجاقلي ايدي.– آخي سن بؤيله جينايت تؤرتمکدن قورخمورسان؟ بو ايش ايکي اينسان حاقيندا بير جينايتدي. اينسان دا هئچ اؤزونو آسارمي؟جواب وئرير:– يوخ، يالنيز يوخ، منجه بو ايش سئوگيليمله بيرليکده ابدي ياشاماقدي.
رضانين باخيشلارينداکي ووقار، اونون سيرلي اولدوغونو گؤستريردي، آمما من سيرلرين اوستونونون آچيلماسيني ايسته‌ميرديم. من رضانين سيرلي اولماسيني سئويرديم.
گونون شعالاري باتي‌يا ساري ساللانيردي؛‌هاوا قارانليغا چئوريلمه‌ديدي. رضا ايله گيردولي داغين ائنرکن، اونون تهلوکه‌لي بير اويونا آياق باسما احتمالي مني سارسيلديردي.
ميرده‌شيرخانادا رضانين جنازه‌سي يويولان زامان، اونون دوستلاري، داغچي يولداشلارينين اللري قوينوندا هؤنکور- هؤنگور آغلاملاري ايله برابر گنج قيزلار دا آغلاشيرديلار. اونلار گؤز ياشلاريني گيزله‌دير، آغلاديقجا ايچلريني چکيرديلر. رضانين آناسي‌نين تورپاغي باشينا سووورارکن «بالا واي» ناله‌سي، کيشي‌لرين ديزلريني تيتره‌ديردي. او اوره‌ک يانديريجي اوخشامالار اوخويوردو؛ اينجارسيزليقدان سسي گئت- گئده سيزيلتي‌يا چئوريليردي.
يوسوف‌لا صمد منيمله ياناشي دووارين ديبينده دورموشدولار. درين فيکره دالميش صمد دئيير:– هئچ اينانمالي دئييل! يازيق آتاسي، آناسي، اونلارين بئلي سيندي. قيز بيرينه گئديب کئفين چکه‌جک. تانرينين ايشينه بير باخ؟!
يوسوف ائله صؤحبت ائله‌يير، سانکي اؤلو مجليسينه گلمه‌ييب:– – نئچه آي اؤنجه ايکي گنج اوغلان دا اؤزلريني ائله بو خييو چاييندا آسميشدي. بير گنج قادين دا سيچان داواسي ايله جانينا قصد ائتميشدي. گورونورکي سئودالانماق سؤزو وار آرادا.
من کؤورلميشديم. اوره‌ييم سيخيليردي. پوزغون بير حالدا دئديم:
– آنجاق‌هاميسي سئودالانماق دئييل. ايشسيزليک، احتياج، تحقير، آغير و دؤزولمز معيشت شرايطي ده بونلارين ايچينده گؤرونور.
بونلارا باخماياراق صمد يوسوفا اوز توتوب دئدي:– اولار ياواشجانا بير يانيغلي باياتي اوخوياسان؟
يوسوفون حزين سسي‌له رضانين جنازه‌سي يويولوب، آغ کؤينه‌يه گئيديريليب، يولداشلارينين اللرينده تورپاغا تاپشيريلدي. آتاسينين ايسته‌گينه گؤره، رضانين «داغ ياتاجاغي» اونون قبر ائوينده اوستونه چکيلدي. ايندي تورپاق داها گؤزللشميشدي، رضانين آتاسي ديزي اوسته چؤکوب، اوزونو تورپاق اوزه‌رينه قويموش و تورپاق ايسه اونون دالغين روحونو دينجلديردي.يوسوفون حزين باياتي سسيني اطرافداکيلاردا ائشيديردي. بو سس سانکي سيخيلان اوره‌کلره، سرين مئه کيمي‌اله‌نيردي:
عزيزيم داغ يئريدي
مسکنين داغ يئريدي
گوردوم کي اوردا يوخسان
اوستومه داغ يئريدي.
پاييزين بوغولان گونلر ايدي، خييو چايي سولغون بير حالا چئوريلميشدي. يولو بوتونلوکله خزل دوتموشدو. آرا بير قيزارميش، بوزارميش خزل آغاجلاردان دوشوردو. من ايسه يول قيراغيندا کي آسيلي کؤرپونون آلتيندا، قهوه‌خانادا اوتورموشدوم. يانيلي سيگارئت بارماقلاريمين آراسيندا بوتونلوکله کوله چئوريلميشدي. آغير بير فيکره دالميشديم. باشيمي‌قالديرديقدا گؤزلريم اونون گؤزلرينه ساتاشدي. رضانين آتاسي دوز قنشريمده اوتورموشدو. مني گؤردوکده يئريندن قالخيب، منيمله ياناشي اوتوردو. بو آدام ايکي آي بوندان اؤنجه گؤردويوم آدام دئييلدي. اينانيلماز درجه‌ده ده‌ييشيلميشدي. اينانماديم. ساچلاري آغ آپباغ آغارميشدي؛ پوزغون احوالدا ايدي؛ اوره‌کدن درين آه چکيب، شاشقين بير حالدا اوزون منه توتوب دئدي:– ايسته‌ييرم اوشاقلارين اليندن ياپيشيب، بو شهردن گئدم.– گئده‌سن؟!‌هارا گئده‌سن؟– هئچ اؤزوم ده بيلميرم‌هارا! آنجاق ايسته‌ييرم داها بو شهرده قالمييام.– هر يئرده بيز اؤلولريميزي تورپاغا قويموشوق، او تورپاق بيزه دوغمادير. رضاني خييو تورپاغي آليب باغرينا، گئتمه‌مليسن! هر بير زاد اوز يئرين تاپاجاق، بير آز زامان ايستير!– گئتمه‌يه اوشاقلار دا راضيلاشمير، آمما اوره‌ييم هئچ بير ايشه قيزمير!بارماقلاريمين آراسيندا سيگارئت سؤنموشدو. رضانين آتاسي‌نين نه زامان کؤلگه کيمي‌سوزولوب گئتمه‌سيني هئج دويماميشديم.

منبع :