سس پنجردن گلير. بير باخيرام ائيوانا، بير باخيرام أطرافا. بير شئي گؤره بيلميرم. ائيوان بوشدور و اورادا هئچ نه گؤزه گؤرونمور. فكريم سسدن يايينماق ايسته‌ ينده بيردن بير گؤلگه سرعتله پنجردن يان گئچير. بو ايسه مني پنجره يه ساري گئتمه‌يه هوسلنديردي. بئش-آلتي مئتير آراليقدا اولان آلچاق دمير حاصارين اوستونده بير قارقا اوتورموشدو. اوزو منه ساري ايدي. باغچادا قارقا و قجلنين اولماسي و هردن سس كوي سالمالاري مني سئوينديرردي. فيكيرلشديم بلكه سوسوزدور. اولمايا نرده نين اوستونده اوتوروب منه هؤيوت-هؤيوت باخماسي دا اونداندير. اونون باخيشي مني بير آز جين آتينا مينديرن كيمي اولدو. آخي نيه بئله باخير.  ائله بيل من اونا بورجلويام. باخيشي هردن مندن قاچيب يانا دؤنوردو. باشيما دوشدو كي، او بير شئيي مندن گيزلتمك ايسته يير. پنجردن بويلانيب ديوارا ساري قارقانين باخديغي يئره باخديم.  گؤردوم قارقانين هؤيوت-هؤيوت باخماسي چاره سيزليكدندير. ديوارين دبينده بير جويز گؤزومه ساتاشدي. آرتيق هر شئي منه آيدين اولدو. سسين منشأيي ، قارقانين نرده اوستونه اوچماسي و بئله هؤيوت-هؤيوت باخماسي. ايچيمدن جويز يئمك فيكري گئچدي. باخديم جويز لاپ تزه آغاجدان درينيب سويولانا اوخشاييردي. قارقايا گؤزوم ساتاشاندا حيس ائتديم كي، او حيرصلي-حيرصلي منه باخير. من ده اؤزومو الدن قويماديم؛ گؤز تيكديم قارانين گؤزلرينين لاپ ديبينه. او باخدي ، من باخديم. او باخدي ، من باخديم. نئچه دقيقه ائله ايشيميز بير- بيريميزه گؤز تيكمك اولدو. قارقا عنادجيل منه باخيردي. من ده اوزدن گئدن آداما اوخشاميرديم. گؤز تيكميشديم گؤزلرينه. او، هردن يانا باخيب جويزي سئير ائديردي. من ايسه جويزه باخماييب ، داماغيمدا داديني حيس ائديرديم.  بيليرديم كي، يئريمدن ترپنسم قارقا قاجاجاق. من ايسه هله ليك اونون قاچماغيني ايسته ميرديم. دوغروسو اونو قورخوتماق نيتينده دئييلديم. ايسته ييرديم او جويزدن ال چكسين ؛ قورخودان يوخ ، كؤنولدن. بونا گؤره ده اونا باخيرديم. ايچيمده بير حيس منه دئييردي كي، قارقادا منيم فيكريمي اوخويوبدور. او دا ايسته يير من جويزه گؤزوم اولماسين. آخي حيطين باخچاسينده يئكه بير جويز آغاجي وار. حيسيميز بير-بيرينه توققوشوب بيزي بير ياريشا دوغرو آپارير. من اونا باخيرام، او دا منه باخير. بيليرم بو بير ياريشدير. اؤز-اؤزمه دئييرم سن باخ من باخيم گؤرك كيم اوزدن گئدر. ايوانا آچيلان قاپيني آچيرام. قارقا اوچمور كي هئچ ، هله بير قاريلدايير. جويزي أليمده حيس ائدنده گؤردوم قارقا اوچوب اوزاقلاشدي. قلمه آغاجيندا اوتوراندا باخيشيندا بير آجيق ايله كدري گؤردوم. جويزي سينديرماق اوچون اطرافدا بير فايدالي شئي گؤرمديم. اووجومدا جويزي سيخديم. بير چارت سسي چيخدي. قارقا اوچوب يئنيدن نرده نين اوستونده لاپ منيم اوز به اوزومده اوتوردو. اليمده جويز ايكي بولونموشدو. يئنه او منه باخدي، من اونا باخديم. گؤرسن من اونون يئرينده اولسايديم عاقليمدان نه گئچردي؛ يقين منيم ده بير ايش اليمدن گلمزدي. اونون وريندن دوشونورم: ”او، منيم حاققيم ايدي. اونو الده ائتمك اوچون اوچوب آغاجين يئلده اسن بوداغينا اوتورموشدوم. زحمتله، دقتله بير يئتيشميش جويزي تاپيب، زققوم دادينا باخماياراق اونو قابيقدان ائتميشديم. سونرا اونو ديمديكده دامين اوستونه آپارميشديم كي، آجليغيما سون قويوم . بيلميرم نئجه اولدو كي بيردن ديميدگيمدن يووارلانيب آشاغييا ساري اوچدو. هله بيلميرم بو يئكه كيشي‌هاردان تاپيلدي و منيم جويزيمه گؤز تيكدي. داها چوخ اونا گؤره آجيغيم توتوردي كي، اونون حيطينده جويز آغاجي اولا-اولا منيم ماليما گؤز تيكيبدير.“

ايسته ديم ايچيني آريتداييم. بيردن قاريلدادي. اونا ساري باش قالديرديم. گؤزونون ديبينده بير آجيق ألوولانيردي. من اونا باخيرام ، او دا منه باخير.  ائف-ائفين زنگي چاليندي. قارقايا باخديم. جويزي اونا ساري آتديم و ايچري گيرديم. بير نئچه آندان سونرا يئنه پنجره يه ساري قاييتديم. قارقا ايكينجي يارينين ايچيني چيخارتدي و ديمديگلدي. سونرا دونوب منه باخدي. گؤزلرينين ديبينده بير اودوش، سئوينج كوله‌يي  اسيردي….