ايشچيلرين جيريق پالتارلاري يئل اسديکجه اسيرديلر
1398/06/24
بولگه لر سرويسي: ساري‌گوللوک شهردن 30--40 کيلومترکنارلاردا، آق‌اؤرتوکلو داغلارين اتکلرينده بير دوزنگاه‌ايدير. اوردا ساپ- ساري گوللر يئر اوزون بوروموش و هر ياني ساري‌لا بوياميشديلار.
اوشاقلارين گوللره حئييفي گليردي؛ ”ايينه آتسان يئره دوشمزدي“. اودور کي بير آياقلارين گؤتوروب، اوبيري آياقلارين قويوب اوردان- بوردان آتيلا- آتيلا کئچيرديلر. آنجاق بير آزدان هامي مشغول اولموشدور. بير ياندا اوغلانلار توپ اوينايير، اوبيري يانداايسه آيدانين قيرميزي قارمونون آناتومي اوستادي تومروس خانيم چاليردي. قيزلار هاميسي اويونا گيرميشديلر. بير آزدان اوغلانلاردا توپدان ال چکيب، اونلارا ياخينلاشديلار. قيزلار ساري‌گوللوکده بارماقلاري اوستونده سوزور و اوغلانلار اؤز تشويقلريله اونلارا قووت باغيشلاييرديلار.
خئيلک اويناياندان سونرا اونلار يورولوب بير- بير چکيلسه‌لرده، آنجاق آيدا اؤزونو هله يورولماز حيس ائديردي. اونون ال- اياغيني گؤرمک اولموردو؛ فيرلاناندا قارا ساچلاري چيگينلري اوستوندن اوچوردو. بئله بير واخت ”آيدين“ين آتديغي بير دسته ساري‌گول اونون باشينين اوستونده سپه‌لندي. گول لئچک‌لري اوشاقلارين هوراسينا قاريشدي.
اوزاقلاردان گلن هاي- کوي سسي ياخينلاشماقدايدي. بيردن هاي دوشدو:
– چکيلين کنارا، چکيلين کنارا! بوردان دمير يول چکيريک.
يئرسيز گؤرونن بو هايقيريق اوشاقلاري ديسکينديريب، رقصين هاواسيندان آييردي. تعجوبدن يئرلرينده دونوب قالديلار.
ايشچيلر و يول چکن ماشينلار آرتيق گليب دوشرگه‌‌يه چاتميشديلار. تومروس خانيم يول چکنلري ايشده جيددي گؤردوکده، دؤنوب آرخايا- ساري‌گوللوگو- سونونجو دفعه دقتله نظردن کئچيرتدي. آيدا باشا دوشدو کي تومروس خانيم ساري‌گوللوگون ناخيشلاريني گؤزلرينه هوپوزدوروب، اوره‌يينه حک ائله‌مک ايسته‌يير. سانکي چاره‌سيز آدام کيمي‌ايدي.
بير نئچه دقيقه‌دن سونرا اوشاقلار هاميسي يول‌چکنلرين اؤنوندن کنارا چکيليب، بير آز کناردان اونلارا تاماشا قيلديلار.
بولدوزر گولشني سؤکوب، بير خطين اوستو‌ايله ايره‌لي‌له‌ييردي. اونون آردينجا آغير ماشينلار تورپاقلاري ياتيرديب، برکيدير و اونلارين آرخاسينجاايسه ايشچيلر چيگينلرينده تاختالاري گتيريب، يئره باسديريب، اوستوندن دمير خطلري دوزوردولر.آيدا آتاسين اوزاقدان تانيدي. ايشچيلرين جيريق پالتارلاري يئل اسديکجه اسيرديلر. اونلار هاميسي آريق اولسالاردا، آيدانين آتاسي هاميدان آريق و اوستو باشي جيليز گؤرسه‌نيردي. آيدانين اوره‌يي دؤيونتويه دوشدو.
آتا چيگنينده‌کي تاختاني يئره قويوب، اوشاقلارا ساري باخاندا، آيدا اؤزون قيزلارين آراسيندا گيزلتمک ايسته‌ييردي. آتا دوم- دوز دايانيب، اؤيرنجي‌لره ساري باخاراق، آيدا حاقيندا دوشونوردو. آيداايسه قيزلارين آرخاسيندان گؤزلرين آتاسينين هئيکلينه زيلله‌ميشدي. او آتاسين هر زاماندان آريق گؤروردو. آتانين صيفتينين سوموکلريده گؤزه چارپيردي. ساچلاري بام- بياض اولموش، گؤزلري‌ايسه چوخورا دوشموشدو. آيدانين اوره‌يي آليشدي. گؤزلريندن ايکي دامجي ياش آخماق ايسته‌دي. او گؤز ياشلارينا آمان وئرمه‌ييب، الينين داليسيلا اونلاري محو ائتدي.
آتانين اوره‌يي ايسته‌ييردي غرور حيسي‌ايله اؤيرنجي‌لره دئسين کي، اونوندا گؤزه‌ل و گؤيچک اؤيرنجي بير بالاسي وار و ايندي او بالاسي اؤيرنجيلرين آراسيندادير. آنجاق باجارا بيلمه‌‌دي. قاييديب باشقا بير تاختانين اوجوندان ياپيشدي.
آيدانين نيگران باخيشلاري آتاسيندان اوزولمه‌ميشدي کي گؤردو آتاسي نه قده‌ر گوج وئريرسه، تاختاني يئريندن قالديرا بيلمير. و نهايت او اؤزوده تاختانين يانينا ييخيليب، اوزاندي. ايشچيلر آتانين دؤره‌سيني آليب، صلوات سسينه اوخشار هاي- کوي قوپارديلار. بيريسي دعا اوخوياراق آتاني سسله‌يير، بيريسي‌ايسه اوزونه سو سپيردي. آنجاق آتانين چوخدان بدني سويماغا باشلاميشدي. اونون آتا اوره‌يي بير يوللوق ساريليغا قاريشميشدي.
آيدانين آلني دويونله‌نيب، آنجاق هله‌ده فاجعه‌نين نه اولدوغونو باشا دوشموردو. او اؤزونو زورلا ساخلاييردي. اؤزو اوشاقلارين ايچينده اولاراق، اوره‌يي آتاسينين ييخيلديغي يئرده چيرپينيردي. او آيدينين – نييه بيردن حالين پوزولدو آيدا؟- سوالينين جاوابيندا يالنيز دولغون گؤزلريله اوزاقلارا باخيردي. آيدانين آتاسي ايشچيلرين چيگينلرينده يولا دوشموشدو.
گون باتان چاغي هامي دوشرگه‌دن قاييديب، شهره دوغرو گليرديلر. آيدانين گؤزلري اؤنونده، ساري پرده اوزه‌رينده بير آريق کيشي‌نين هئيکلي يولداشلارينين چيگينينده ييرغالانيردي. گوللري سولموش دوزنگاهين اورتاسيندان بير قاطار نعره چکه- چکه گئديردي. قاريشقالار تورپاغين سينه‌سينده نه‌يين سوراغينداايسه قايناشيرديلار.
منبع :