قشنگ خوروز
قشنگ خوروز
1401/03/08
بولگه لر سرويسي:بيري وار ايدي, بيري يوخ ايدي, کئچميش زامان‌لاردا ايکي ئوزاق قوحوم وار ايدي. بون‌لارين بيري يوخسول ايدي, اوزو ده مئشده, بالاجا بير داخمادا اولوردو. او بيري دؤولت‌لي ايدي, شهرده, قشنگ, بؤيوک بير ائوده ياشاييردي.گون‌لرين بير گونو يوخسول, مئشه ايله گئديردي, بير‌دن آغاجين آلتيندا پاريلدايان قيزيل بير للک گؤردو. باشيني قال‌ديريب يوخاري باخدي,گؤردو کي, آغاجدا قويروغو قيزيل بير خوروز اوتوروب. يوخسول قيزيل لليي
يازان: نژاد محمد
بولگه لر سرويسي:بيري وار ايدي, بيري يوخ ايدي, کئچميش زامان‌لاردا ايکي ئوزاق قوحوم وار ايدي. بون‌لارين بيري يوخسول ايدي, اوزو ده مئشده, بالاجا بير داخمادا اولوردو. او بيري دؤولت‌لي ايدي, شهرده, قشنگ, بؤيوک بير ائوده ياشاييردي.گون‌لرين بير گونو يوخسول, مئشه ايله گئديردي, بير‌دن آغاجين آلتيندا پاريلدايان قيزيل بير للک گؤردو. باشيني قال‌ديريب يوخاري باخدي,گؤردو کي, آغاجدا قويروغو قيزيل بير خوروز اوتوروب. يوخسول قيزيل لليي
گؤتوروب بيرباش شهره, دؤولت‌لي قوحومونون يانينا گتيردي.دؤولت‌لي قيزيل لليه باخيب دئدي:گؤزل شئي‌دير! آنجاق ديري چوخ آزدير. من سنه بو للک اوچون بيرجه مانات گوموش پول وئررم.يوخسول ايسه عومرونده قيزيل گؤرمميشدي, اونا گؤره ده بيلميردي کي بو للک خالص قيزيل‌دان‌دير. او ائله بيليردي کي بو نه ايسه قشنگ پاريلدايان بير شئي‌دير. اونا گؤره ده او ائله بيلدي کي, اونون قيزيل لليي اوچون گوموش پول ياخشي قييمت‌دير.يوخسول کيشي او بيري گون ائنه ده مئشيه گئتدي, همين آغاجين آلتين‌دان ائنه ده قيزيل للک تاپدي. اونو گؤتوروب دؤولتلي‌نين يانينا آپاردي, ائنه ده عوضينده گوموش پول آلدي. بير نئچه گون دالبادال بو احوالات بئله باش وئردي.بير دفعه ده يوخسول هميشکي کيمي آغاجين آلتينا گلدي گؤردوکي, قيزيل قويروقلو خوروز برک‌دن بانلايير:- کيم منيم اوره ييمي يئسه, او آدام هر گون باليشينين آلتين‌دان ايکي قيزيل يومورتا تاپاجاق! کيم منيم اوره ييمي يئسه, او هر گون باليشينين آلتين‌دان ايکي قيزيل يومورتا تاپاجاق!يوخسول بو ايشه لاپ مات قالدي, تئز شهره قاچيب احوالاتي دؤولت‌لي و آجگؤز قوحومونا دانيشدي. او ايسه جاوابيندا دئدي:اگر سن او خوروزو منيم اوچون توتا بيل‌سن, سنه اونون اوچون مين گوموش پول وئررم!يوخسول اونونلا بئله شرط کسدي:سنين پولون منه لازيم دئييل! ياخشيسي بودور کي, منيم ايکي اوغلومو اوز يانينا آپاريب اونلارا اوز اوشاق‌لارين کيمي باخ. من ايستييرم کي, اونلار عقل‌لي و ساواد‌لي اولسون‌لار.دؤولت‌لي او ساعت سؤز وئردي کي, يوخسولون اوشاق‌لاريني يانينا آپارار و اونلاري اوخوماغا قويار. بونون عوضينده ده يوخسول کيشي دؤولتلييه سؤز وئردي کي قيزيل قويروقلو خوروزو اونون اوچون توتسون.يوخسول سحر تئز‌دن مئشيه, همين آغاجين آلتينا گلدي.
قشنگ خوروز دينمه‌دن يوخاري‌دان اونا باخيردي.يوخسول نيشان آليب اوخلا قيزيل قويروقلو خوروزو ووردو. يوخسول کيشي خوروزو گؤتوروب اوغلان‌لارينا وئردي اونلاري شهره, دؤولت‌لي قوحومونون يانينا گؤندردي.دؤولت‌لي قيزيل قويروقلو خوروزو گؤروب سئوينجين‌دن آتيليب-دوشدو.او اوزو خوروزون قيزيل للک‌لريني بير-بير يولدو سونرا اونو يوخسولون اوغلان‌لارينا وئردي کي خوروزو بيشيريب ناهارا اونا وئرسين‌لر. او,اوزلويونده بئله قرارا گلميشدي کي يوخسولون اوغلان‌لاريني درسه گؤندرميجک: قوي اونون يانيندا قاليب نؤکرچيليک ائلسين‌لر!اوغلان‌لار متبخه کئچيب خوروزو بيشيرميه باشلادي‌لار. اونلار چاليشيردي‌لار کي خؤرک داد‌لي اولسون, دؤولت‌لي قوهوم‌لاري راضي قالسين.آنجاق بخت‌لري گتيرمه‌دي: خوروز بيشيب لاپ حاضر اولانا ياخين, اتين سويو بير‌دن قازاندا پيققاپيق قاينادي, خوروزون اوره يي سيچراييب بيرباش دؤشمه‌نين اوستونه دوشدو!- واي, بو نه بلا‌دير باشيميزا گلدي!دئيه بؤيوک قارداش ديللندي.ايندي گرک خوروزون اوره ييني توللاياق. بير باخ ها, لاپ چيرک‌لي دؤشمه‌نين اوستونه دوشوب. ايندي اونو گؤتوروب آغاميزا وئره بيلمريک...
کيچيک قارداش ايسه يالواردي:خوروزون اوره ييني توللاما! من سحر‌دن هئچ بير شئي يئمه ميشم.ياخشيسي بودور کي, گل اونو گؤتوروب يوياق, اوزوموز يئيک.قارداش‌لار بئله ده ائلدي‌لر: خوروزون اوره ييني يويوب ايکي يئره بؤلدو‌لر, هره بير پارچاسيني يئدي. سونرا دا بيشميش خوروزو دؤولت‌لي قوهوم‌لارينين يانينا آپاردي‌لار.
دؤولت‌لي او ساعت باشلادي بوشقابين ايچيني قوردالاماغا کي, خوروزون اوره ييني تاپسين. آختاردي, آختاردي, خوروزون هاميسيني يئدي, آنجاق اوره يي هئچ يئرده تاپمادي. اوندا دؤولت‌لي, اوزونو قارداش‌لارا طوطوب سوروشدو:- خوروزون اوره يي هاني? اونو نه نئيلميسينيز?قارداش‌لار بو واخت احوالاتي اولدوغو کيمي اونا دانيشدي‌لار.تاماحکار دؤولت‌لي اونلارين الين‌دن ائله حيرصلندي کي آغاجي گؤتوروب اونلارين ايکيسيني ده ائودن قوودو. قارداش‌لار آغلايا-آغلايا مئشيه, اوز يوخسول, بالاجا کوما‌لارينا قاييتدي‌لار. اونلار هئچ باشا دوشه بيلميردي‌لر کي, بير خوروزون اوره يي ندير کي, اونون اوستونده دؤولت‌لي بو قدر حيرصلنيب اونلاري ائوين‌دن قوودو.گئجه کئچدي, سحر قارداش‌لار هره‌سي اوز باليشينين آلتين‌دان بيرقيزيل يومورتا تاپدي. اونلار قيزيل يومورتا‌لاري دا گؤتوروب آتا‌لارينين يانينا گئتدي‌لر و باش‌لارينا گلني اونا دانيشدي‌لار.آتاسي اونلارا دئدي:منيم او دؤولت‌لي قوحوموم‌دان اوره ييم برک اينجيدي سيزي ائوين‌دن قوودوغو اوچون من بو پاريلدايان يومورتا‌لاري هر کس اولسا ساتارام تکجه اونا يوخ.ائله بو واخت ياخينليق‌دان گزرگي بير تاجير کئچيردي. يوخسول کيشي يومورتا‌لاري گؤتوروب اونون يانينا گئتدي. تاجير دئدي:آ, بو يومورتا‌لار کي, خالص قيزيل‌دير! من بو قيزيل يومورتا‌لارا گؤره سنه ياخشي پول وئررم.تاجير بونو دئييب يوخسولون اتيينه او قدر پول تؤکدو کي, او,هئچ عومرونده بو قدر پول گؤرمميشدي.يوخسول کيشي آنجاق ايندي باشا دوشدو کي, دؤولت‌لي قوحومو اونوهميشه آلدا‌ديرميش, قيزيل للک اوچون اونا گوموش پول وئريردي.
ئيبي يوخدور!دئيه يوخسول اوز-اوزونه دوشوندو. - بيز‌لرده بير مسل وار, دئير‌لر کي, باشقاسيني آلدا‌دان اوزو ده آلدانار. ائله بئله ده اولدو.او گون‌دن بري قارداش‌لار هر گون اوز باليش‌لارينين آلتين‌دان هره‌سي بير دنه قيزيل يومورتا تاپيردي‌لار. آتاسي بو قيزيل يومورتا‌لاري ياخشي قييمته ساطيردي. اونلار ايندي لاپ ياخشي دولانيردي‌لار. آنجاق ان باشليجاسي او ايدي کي, قارداش‌لار اوز آرزو‌لارينا چاتميشدي‌لار: ايندي اونلارين ايکيسي ده علم اويرنيردي و خئيلي شئي ده اويرنه بيلميشدي‌لر.
منبع :