صاباحدان بير دامجي کؤزرتي‌‌

بولگه لر سرويسي:ياشاماق هامييا گؤيچک بير گلينين توي گونونده گولن گؤزلري اولسادا منه ناغيللارداکي، کوپدن چيخميش چيرکين قارينين قيريشميش اوزودور. بير کره بئله‌ يالانداندا آغزيمي آچيب گوله بيلميرم.

اسماعيل خرمي

بير اينجي بولوم

بولگه لر سرويسي:ياشاماق هامييا گؤيچک بير گلينين توي گونونده گولن گؤزلري اولسادا منه ناغيللارداکي، کوپدن چيخميش چيرکين قارينين قيريشميش اوزودور. بير کره بئله‌ يالانداندا آغزيمي آچيب گوله بيلميرم.
 قارشيما چيخان هر کيمسه‌ده بو اوزدن، مني قاش – قاباقلي سايار. حاقليديلاردا. بيرينين اوزونه باخيب گولومسه‌مک ايسته‌سم، ايچيمده فيرتينا قوپار. آلار مني جايناغينا. يئردن قالديريب گؤيه گؤيدن يئره وورار. اونلارين گولومسه‌مه‌لري ده منه اؤگئي گلر. يالاندان گولدوکلري ايچيمه‌ دامار. آخي هانسي خوش گونلرين گؤزونه گولومسه‌ييم. گولمک يالنيز دوداقدا دئييل. گؤزلر ده، اوره‌‌کدن گولمه‌ليدير. بونلارين دا گؤزلري او سئوينجي، او خوشبختلييي گؤسترمير. سئوينج گولوش، اوره‌يي آچيقليق، مندن قاچيب آسانسورسوز يوز مرتبه‌لي بينالارين باشيندا دوروب. نه اليم چاتير نه‌ده قالخيب اورا چيخا بيليرم. بير گون تانيشلارين بيري قاباغيمي کسيب دئدي: »اوزوندن – گؤزوندن زهرمار تؤکولور. بير آز دوداقلاريني اويان ‌‌ بويانا دارت، قوي اوزون گولر گؤرسنسين. ائشيتمه‌‌ييبسن مي »ترازا آنا« دئييب:»بير بيرينيزي گولوشله قارشيلاساز اوره‌‌يينيز عشقله دولار.« ايسته‌ديم دييه‌م سن نه هايدا من نه هايدا، آنجاق واز کئچديم.
صاباحا توکجن اومودوم يوخدو. گؤزومده صاباحدان بير دامجي کؤزرتي‌‌ده يوخدو. صاباح اولجاق نه اولاجاق؟ هانسي کدريمين هانسي آغريمين اليندن ياپيشيب اوونداراجاق؟ بير گون عؤمرومه‌ آرتديقجا آغريلاريمين، کدرلريمين گوجوم چاتمايان يوز مرتبه‌لي ائولرين آغيرليغي قده‌ر بئليمده داشيديغيم يوکون آغيرليغيني چوخالداجاق. ايشيقلا، قارانليغين نه اولدوغونو آنلايا بيلميرم. گؤزلله، چيرکيني آييرد ائده بيلميرم. سولارين دورولوغونا باخيب اؤزومو گؤرنده باشيمي سويا باسيب بوغولماق ايسته‌ييرم. ايسته‌‌مه‌دن، قولاغيما سوخولان قوشلارين سسي، بئينيمه‌ ائلکترو ‌‌ شوک وورور. هر بير جوککولتوسو باشيمين بير يانيندان گيريب او بيري يانيندان چيخير. باشينيزي ندن چوخ آغريديم، ياشاماقدان داد آلا بيلميرم.
دادي او آدام آلسين کي، بورجو يوخدو. بورجلولار، ائوينه ال قويماق اوچون هله بئلينه مينمه‌ييب. آرواد – اوشاغينين قارنيني دويورماق چون، ان اسگيک انسانلارا اوز وورماييب اسگيکجه‌سينه بيرينه خيتيلانماييب. آروادي،کيشي‌سينين اوجباتيندان، اوشاقلاري اوستونه تؤکوب، دده‌سي گيله چيخيب گئتمه‌ييب. اوشاقلارينين گؤزوندن دوشمه‌ييب. منيم قونشولاريم کيمي، قاباغيني کسيب؛ ائويندن گلن گونده‌ليک ساواش هاي ‌‌ کويونون اليندن جانا گلموشوک دييه، بوردان چيخيب گئتمه‌ييني گؤرسک، اؤلمه‌ريک دئمه‌ييبلر.
گونلر اؤنجه، ايش يولداشيم خداکريم منه ساري ياخينلاشيب »کنفسيوس«ون »ياشاماق چوخ ساده‌دير بيزلر اونو چتين توتوروق« جومله‌سيني خاطيرلاديب، بئله‌ دئدي: »آ کيشي سن دئييرسن بيزيم بورجوموز، آغريميز يوخدور؟ گرک علينين بؤرکون ولينين باشينا ولينين بؤرکون علينين باشينا قويوب کئچينه‌سن. الله کريمدي. هر شئي دوزه‌له‌جک.« بو سؤز مني بير آز اؤزومه‌ گتيردي. خالق نئجه، منده اونون بيري.
خداکريمدن ياريم ساعات دانيشيب بيلمه‌ديکلريمي اؤرگه‌شيب، اوشاقلارا سؤز وئرديم؛ آنالاريني ائوه قايتارام. قايين آتام گيله ساري يولا دوشدوم. دئديم؛ بير جور‌‌ بير تهر آروادا يالاندا اولموش اولسا وعده ‌‌ وعيد وئريب ائوه قايتاريم. سؤکوک – سؤکوک ياشاييشيمدان دوشن سون کرپيجدن باشلاييم. آروادلا چوخ دانيشديم. آغزيمي آچيب بالاجا بير يالان سؤيله‌ديکده آغزيمدان ووردو. من دييه‌نده کي گئري دونسن ائوي سنون آدينا سالديرارام  دئدي: »آي بدبخت ائو قاليب منيم آديما سالديراسان؟ سحر – بير گون نوزولچونون بيري الوندن چيخارداجاق. ايندي سن بير حصيرسن بيرده ممدنصير.«آروادين سؤزون نظره آلارق نوزولچويا گئتديم. يالواريب ‌‌ ياخاريب واخت ايسته‌ديم. سؤز وئرديم، بانکدان وام گؤتوروب اونون بورجونو اؤدهدييم. نوزولچودا اولسا ياخشي آدام ايدي. بير نئچه‌ فاييز بورجومون اوستونه چکيب، بورج چئکيمي يئنيلشديريب واخت وئردي. اوندان آيريليب، بير نئچه‌ بانکا باش ووردوم. چوخ قاشديم آمما باجارماديم. تانيش بير بانک ايشچيسي واريميزدي. اونون قاپيسينا گئتديم. دويونجان دانيشاندان سونرا دئدي: »سن دئييرسن بلکه بانک وامي ائله‌ – بئله‌سينه وئرير؟ يوخ قارداشيم! بانکين ده فاييزي وار. نوزولچودان دا قالان دئييل. بورجونون بير آيي يوبانسا چکيب بوغازوندان چيخاردارلار. نوزولچويا يالواريب ياخارماق اولار، آمما بانکين ايشي قانونلادير. قانونا قارشي گله بيلمزسن.« گومانيم بانکا گلميشدي. اودا بوشا چيخدي.
يوخ! بو علي – ولي بؤرکو منليک دئييل. اونو گرک چوخ ‌‌ چوخدان اؤرگه‌شئيميشم. ايللرجه دوز اوتوروب، دوز دانيشان بيريسي، بيردن – بيره يالان دانيشا بيلمز. ائيري اولماغين دا، يالان دانيشماغين دا اؤزماني، مکتبي وار. من آخي او مکتبه گئتمه‌ميشم. ايندي آغزيمي بير يالانا آچاندا، اوز ‌‌ گؤزوم پؤرتور، ال – آياغيم اسير آغزيم سؤز توتمايير. عؤمور بويو آلدانماغا يارانميشام. منيم کيميلر آلدانماسا اونلار نئجه ياشايا بيلرلر؟ اونلارين دا چؤرهيي يالاندان چيخير. آرواد ‌‌ اوشاقلارينين قارنيني آج قويموياجاقلارکي؟ ايندي بو ياشدا، بو ساچ – ساققالدا ائيريلييي باشدييب اؤرگنسم، نه اولار؟ آلتميش ياشيندا زورنا اؤرگه‌شن، گؤروندا چالار دئميشلر. داي نه ائديم؟ منيم کي بوراجان ايميش. اپريميش ياخام بورجلولارين پيرتلاقلي اللرينده قاليب.

منبع :