بيرگون سحر تئزدن

بولگه لر سرويسي: ماغازانين قاباغيندان کئچمه‌گي مصلحت بيلمه‌ييب، يون پاپاغيني قاشلاري‌نين اوستونه قدر ائنديريب، خياوانين او تايينا آتدادي.

حبيب فرشباف

بولگه لر سرويسي: ماغازانين قاباغيندان کئچمه‌گي مصلحت بيلمه‌ييب، يون پاپاغيني قاشلاري‌نين اوستونه قدر ائنديريب، خياوانين او تايينا آتدادي.
پيادارودا جاماعاتين ايزداحامينا قاريشيب فيت چالا- چالا، آستا- آستا بالا باغا طرف آدديملاسا دا، آنجاق بوتون ديقّتيله او تاي ماغازالاريني گؤز آلتينا آلميشدي. شاه خياواني‌نين قاباغيندان کئچرکن او تايدا »شمس« ين کرکره‌سي‌نين آشاغي اولدوغونو آچيق- آيدين گؤردوکده آدديملاري‌نين سورعتينه آرتيريب اورادان اوزاقلاشماغا چاليشدي.
دونن آخشام چاغي »شمس« ين قاباغينا بير آمبولانس ماشيني گلديکده پوليس قووّه‌لري بوتون هنده‌وري قوروق ائتميشديلر. بئله‌ليکله ده توققوشما شايعه‌سي آغيزدان- آغيزا بوتون تبريزي بوروموشدو.
بو گون سحر همين خبري هم‌صينيف‌لري‌نين پيچيلتي‌لاريندا ائشيتديکده اوره‌گي چيرپينتي‌يا دوشسه ده، او اؤزونو ياخشي اَله آليب چوخ نورمال گؤرونمگه چاليشميشدي. صينيفده صبري- قراري توکنسه ده »بلکه ائله ساواکين اؤز شايعه‌سي‌دير«،- دئيه، مدرسه تعطيل اولانادک دؤزموشدو.
آنجاق ايندي‌سه ماغازانين باغلي اولدوغونو اؤز گؤزلريله گؤردوکده، نه‌سه آجي بير حاديثه‌نين باش وئردي‌گينه هئچ شوبهه‌سي اولا بيلمزدي.
بئله اولدوقدا، او بير آن چاش- پاش اولوب نه ائده‌جه‌گيني بيلمه‌دي. ايندي ايسه‌هاردان اولورسا اولسون دوزگون معلومات اله گتيرمه‌گي هر شئيدن واجيب سانيردي.
باشيني ايتيرميش حالدا شهناز خياوانين نئچه دؤنه آشاغيدان يوخاري‌يا آدديملادي. داش‌ماغازالاريني گؤزدن کئچيرتدي. سئيدين چايخاناسينا باش ويردي. آنجاق هئچ يئرده بير دوست- تانيش گؤزونه دَيمه‌دي. نهايت، دالدا يئرده بير تلفون تاپيب مجيد آغانين ائوينه زنگ ائتمک قرارينا گلدي. بارناوادا خلوت بير تلفونا بير ايکي قيرانليق سيکّه‌سي ساليب، نومره توتوب، دسته‌گي الينه آلدي.
– آلو؟– آلو!– …– جنابيز؟
»جنابيز« سؤزونو شهين خانيمدان ائشيتديکده داها دانيشيغا داوام وئرمه‌گي مصلحت بيلمه‌ييب دسته‌گي يئرينه آسدي.
ائله همين بو ايکي کلمه تلفون دانيشيغيندان اوره‌گي بير آز يئرينه گلسه ده، آنجاق هله مسئله‌نين نه اولدوغوندان هئچ نه الده ائده بيلمه‌ميشدي.
مجيد آغانين ماغازاسي‌نين يان- يؤره‌سينه ياخينلاشماغي احتياطدان اوزاق گؤرسه ده  آنجاق بوندان باشقا هئچ بير يول فيکرينه چاتمادي. او، مجيد آغانين باشماقچي دوکان قونشوسونون پيس آدام اولماديغيني ياخشي بيليردي. درس کيتابلاريني کاپيشني‌نين آلتيندا گيزله‌ديب، ايستر- ايسته‌مز باشماقچي دوکانينا گيردي.     – سالام عليکم، مني تهران کاراژيندان گؤنده‌ريبلر. بو کيتابچي‌نين بير بيجه‌گي وار. بيليرسيز ماغازاني نه زامان آچار؟
باشماقچي، اؤنجه اونو باشدان آياغا سوزوب اونون ايپ پاپاغيني، نيمداش کاپشنيني، کؤهنه کتان باشماقلاريني نظردن کئچيرده‌رک، اَييليب قولاغينا پيچيلدادي:
– دونن مجيد آغاني بير قارا ماشين‌نان گليب آپارديلار … منجه ماغازا بو تئزليکده آچيلاسي دئييل!
ايندي، داها هر شئي بَللي ايدي. مجيد آغانين ساغلامليق خبريندن اونون ديزلرينه قووّت گلدي. آرتيق، اورادا نَم- نوم ائديب واخت اؤلدورمه‌گه هئچ بير ضرورت گؤرموردو. اونا گؤره ده باشماقچي‌لا ويداعلاشيب، سورعتلي آدديملارلا دوکاندان چيخيب، اورادان اوزاقلاشدي.
ايندي‌سه تکجه آمبولانس مسئله‌سي اونا آچيلماميش قاليردي.
او، گونلرله، هفته‌لرله چوخ آختاريب- آراسادا بو سورغونون جاوابيني هئچ بير يئردن تاپا بيلمه‌دي. دئمک بو دويونون آچيلماسينا اوچ آي زامان گرک ايميش!
اوچ آيدان سونرا شهين خانيم مجيدآغانين تهران مولاقاتيندان قاييديب گليب، مجيدآغادان مولاقاتدا ائشيتديکلريني اونا دانيشدي. مجيدآغا دئميشدي:
– منيم بير ايشيمه- عمليمه باخ! ياپيشيبلار ياخامدان کي، سن بيله- بيله نردووانين پيلّه‌سيني سينديريبسان کي مأمور نردووانا چيخاندا ييخيليب قيچي سينسين!
بو سؤزلردن اونون دوداغي قاچسادا، بير آزدان درين خيالا جومموشدو … ياخشي خاطيرلاييردي کي، نئچه ايل بوندان اوّل، اؤز گؤزويله گؤرموشدو کي، مجيدآغا صمدين گيزلي چاپ اولونموش کيتابيني باش رفدن ائنديرمک اوچون دمير نردووانا چيخاندا، اونون بئشينجي پيلّه‌سيني آتداييب، آياغيني آلتينجي‌ پيلّه‌يه قويموشدو. نه‌ايسه او زامان مجيدآغادان بو ايشين سيرّيني سوروشماميشدي. آنجاق،- بلکه مجيدآغانين پيلّه‌ني دوزلتديرمه‌گه واختي چاتمير،- دئيه مسئله‌دن واز کئچميشدي.
سون زامانلار او مجيدآغانين نردووانا چيخارکن بئشينجي پيلّه‌ني آتداديغي‌نين دؤنه دؤنه شاهيدي اولسادا، دئمک، بو ايشين سببيني ايندي باشا دوشوردو …
مجيدآغانين سفري اوزون چکسه‌ده تبريزه قاييداندان سونرا يئنه اوشاقلارين ماغازايا گل گئدي باشلاندي.
ايندي مجيدآغا نردوواني دوزلتديرسه ده، او هوندور کيتاب رفلرينه چيخاندا يئنه ده عادت اوزره بئشينجي پيلّه‌يه آياق باسميردي. او ايندي‌ مجيدآغانين بو ايشيندن اوُغونوب، کئچينيردي.
او، هله ده گون‌آشيري مجيدآغانين ماغازاسينا باش ويريردي.
بير گون ماغازايا گيررکن ميزين ايلک اوجوندا »اصول مقدماتي فلسفه«ني گؤرجک سئوينجيندن گؤزلري ايشيقلاندي. تئز کيتابي گؤتوروب پولونو وئرمک اوچون ماغازانين يوخاري باشينا يؤنلدي. اليني جيبينه آتاندا بيردن يئرينده قورويوب قالدي.
مجيدآغا ماغازانين پستوسوندا اونون ادبيّات موعلّيمي‌ايله اَيله‌شيب شيرين- شيرين صؤحبت ائديردي. او ايسه وضعيّتي بئله گؤردوکده موعلّيمي‌نين حوضوروندا کيتابي نيسيه آليب آپارماغا ديليندن وار گلمه‌ييب، گئري قاييتدي. کيتابي يئرينه قويوب ماغازادان باييرا چيخدي.
مجيدآغا اوشاقلارا دؤنه- دؤنه »سئوديگيز کيتابي آلماسازدا، آپاريب اوخويوب، يئنه قايتارا بيلرسينيز«،- دئسه‌ده، اوشاقلار ايسه،- بو ساواکين تله‌سي‌دير؛ ايسته‌ييرلر مجيدآغايا دوسيه دوزلتسينلر،- دئييب، بو ايش‌له راضي‌لاشميرديلار.
او، ماغازانين قاباغيندا گؤزلريني يئره زيلله‌ييب فيکره جومدو: »اولماسا قويوم گئديم، صاباح گليب کيتابي آلارام«،- دئسه‌ده، يئنه اؤزويله راضي‌لاشا بيلمه‌دي: »يوخ! نه معلوم کي، صاباحا کيمي‌ساواکي‌لار تؤکولوب کيتابي ييغيشديريب آپارمايالا؟«،- دئدي.
بئله اولدوقدا، بير آز فيکيرله‌شيب، بو دؤنه مؤحکم آدديملارلا ماغازايا دؤندو. مجيدآغا هله ده قوناغي‌له صؤحبته مشغول ايدي. او، فلسفه کيتابيني درس کيتابلاري‌نين قاتينا قويوب  »نئينک، اليمه پول چاتارکن، گتيريب کيتابين پولونو وئره‌رم«،- دئييب، اؤزونو ماغازادان باييرا سالدي.
ايل‌لر، ايل‌لري اوسته‌لرکن، گليب اينقيلاب گونلرينه چاتميشدي.
او، درس- مشقدن باش آچسادا، يازي  پوزودان بير آن باش آچا بيلميردي. تکجه گوذراني قدر ايشله‌ييب، قالان واختيني کيتاب اوخوماقدا، ترجومه ائتمکده، کيتاب آردينجا قاچماقدا صرف ائديردي.
بير گون سحر تئزدن ايشه گئدرکن دارايي خياواني‌نين آغزيندا آقا فرنودلا راستلاشدي. آقا فرنود »نينا«نين ترجومه‌سي‌نين نه دورومدا اولدوغونو اوندان سوروشدو. او گولومسه‌يه‌رک: – چؤرک پولو قازانماق قويسا، بئش- اون گونلوک ايشي قالير،- دئميشدي. آقا فرنود اليني جيبينه آتارکن اونون ياناقلاري پؤرتوب، آيريلماق ايسته‌ديکده، آقا فرنود اونون قولوندان توتوب بير دسته اسکيناسي گوج- بلاي‌نان اونون جيبينه قويوب،- »اليوه پول گلنده، قايتارارسان!«- دئميشدي. او ايسه بيرباش ائوه قاييتميشدي.
بو گون اوتوز نئچه ايل او زامانلاردان اؤتوب کئچسه ده او، ائله گنج چاغلاريندان ايليک- سوموگونه هوپموش اينسان عشقيندن يورولوب، اوسانماييبدير هله.
هله ده وار قووّه‌سيله، ماعاش ايشلريله برابر يئنه يازيب- ياراتماقدادير. آرتيق پول الينه چاتماسا دا، او هله ده دوستلارينا اولدوغو بورجو اونوتماميشدير. بونونلا بئله، گؤندرديگي يورولاري دوستلاري‌نين هئچ بيري قبول ائتمه‌ميشدي.
آفا فرنود: – »منيم نه بيرينه وئره‌جاغيم وار، نه ده بيريندن آلاجاغيم«،- دئميشدي.
مجيدآغا: – »من او کيتابلاري، پول‌سوز اوخوجولار اوچون اؤزوم بيله- بيله اَل ائوينده قويوردوم«،- دئميشدي.
آرتيق، يورولار منيم اليمده قالدي. بئله اولدوقدا رييسه موراجعت ائديب اوندان مصلحت آلماقدان باشقا بير يولوم قالماميشدي. آنجاق رييس ده،- نينانين ايکينجي چاپيندان منيم ده اليمده اونون بير ميقدار پولو وار،- دئييب  علاوه ائتميشدي: »اوندا گل بير ايش گؤرک؛ منيم قاراداغدا بير موعلّيم دوستوم وار. بو پول‌لاري بير يئره ييغيب اونون مدرسه‌سينده مجيد ايرواني نامينه »شمس کيتاب ائوي« آچديراق. نه مصلحت گؤرورسن؟
رييسين ايشي آواند اولسون، منيم ايشيمي‌آواند ائله‌دي.

منبع :