اؤلولر

بولگه لر سرويسي: بوتون محله‌نين آداملاري ييغيشيب بير بير ايله دانيشيرلار. بيري دئيير:– قبيرسانليغي ايکييه بؤلمگ اولار؟

سعيد فيوضات

 بولگه لر سرويسي: بوتون محله‌نين آداملاري ييغيشيب بير بير ايله دانيشيرلار. بيري دئيير:– قبيرسانليغي ايکييه بؤلمگ اولار؟
او بيري دئيير:– اورتادا قالان قبيرلر نه اولاجاق؟
بيري ده ميکروفونو الينه آليب دانيشير:– بورا کؤهنه بير قبيرسانليقدي.
بيز خياباني بورانين اورتاسيندان بئله چکمه‌لي‌ييک. آخي شهر دئديگين خيابان ايستير، يول ايستير. بو ميللي بير ايشدير، بونو پوزماق اولماز. بو ايشي گؤرمه‌سَک شهريميز ناکؤندم اولار. اورتادا قالان قبيرلري يا اوتايا يا بوتايا داشيياجاييق. آخي بو قبيرلر همي چوخ کؤهنه‌ديلر همي ده يـييه‌لري يوخدور. والاه شهرداري ائله آللاه يولوندا بو ايشي بوينونا آليب.
جماعت ال چاليب سونرا داغيليشيرلار. صاباحيسيندان بؤيوک ماشينلارلا لودرلر گليب اورتادا دورورلار. ايشچيلر ايشله‌مه‌يه باشلاييب، تورپاغي داشيييب، يئرينه ده قوم، سونرا دا آسفالت تؤکورلر. دويونجا دا برکيديرلر. نئچه گوندن سورا خيابان چکيليب، قبيرسان ايکييه بؤلونوب؛ ماشينلار دا يئيين- يئيين اوردان سوووشورلار!
***
– سلام قارداش، خبرين واردي خبردن؟
– يوخ نه اولوب؟
– دونن ايرحمتليک حسن‌آغا، قبيريندن دوروب گئده آتاسي حاجي دهنزين قبيرينين اوستونه، اونا‌ديه. جانيم سنه دئسين خياباندان کئچنده ماشين ويريب، يازيق بير ده اؤلوب!
– واي، بئناوا. ايندي نه اولاجاق، تزه‌دن باسديراجاقلار؟
– واللاه هله هئچ کيم بيلمير!
– حاجي آدي‌بؤيوک نه دئيير؟
– هئچ زاد، ائله هوب توتوب قاليب، هله تزه اؤلنلر هئچ، قديم اؤلنلر ده آوارا قاليبلار!
– منه قالسا گرک اؤز قبيرينده باسديرالار.
– واللاه بئلَنچي ايشلرده سر اصلان قاباغا دوشور.
– هه واللاه، ائله کيشي دوغوردان دا ائلدار آدامدي، هه باخ، بوداها اؤزو ده گلدي، سلام عليکوم مشه سراصلان آللاه سنه ايرحمت ائله‌سين.– سلام حاجي آياز، آللاه سنه ده ايرحمت ائله‌سين. مشه تاپدوق سن نئجه‌سن؟
– ساغ اول مشدي، واللاه ائله قاباغينجاق يازيق حَسنين خبرين ائشيتميشم.
– آي مشدي سراصلان، ائله ايستيرديک سن دئيه‌سن کي بو اؤلونو نه تَهَر يئردن گؤتورک؟
– نه بيليم، ائله قالميشام آوارا، آما گرک بير ايش گؤرک، واللاه منيم غيرتيم چکمير؛ يازيق اؤز بو ساغاسيندان‌ديگرگين دوشوب!
– منيم فيکريم ايرحمتليک اسييه يئتيشير، يازيق ياخشي اؤلو يووان ايدي، منيم اؤزومو ائله او يوووب، بو ايشين چَمين او بيلر.
– آي حاجي آياز، دوز دئيسن، باخ گل، بو دا ايرحمتليک اسي؛ آديني توت قولاغين بور. آي کيشي آللاه سنه ايرحمت ائله‌سين. باخ، ائله سني گودوردوک.
– آللاه سيزه ده غني- غني ايرحمت ائله‌سين، نه‌يوووز مني گودوردوز؟
– بابام او يازيق مشدي حسني يئردن گؤتورک داي! سن بيلمه‌سن هئچ کيم بيلمز.
– آي ايرحمتليک، من بو ايشي او دونياده باشاريرديم. گونون بو گونو نه تهر ائله‌يه‌جه‌يَم؟ بيلميرم! مننن سورووشساز بيزه بير‌ديري اؤلو يوووب، باسديران لازيمدير. هه، ياخشيسي ائله بورانين اؤز اؤلو يوواني کلبه‌قاسيمدير، گرک اونلا دانيشاق، آخي هئچ اولماسا، اوزو، اوزوموزه اؤيرهشيب اؤزو ده کي ائله بير آياغي بوتايدادير.
– اوداها، باخ گلير.
– قوي من اوني چاغيريم مشه اسي. سلام عليکوم آي کلبه قاسيم. منم سراصلان، اؤلولرين سؤزو وار سنه.
– نه سؤزو؟
– آي کلبه قاسيم منم اسي، سنه ايشيميز توشوب، سن آللاه کؤمک ائله.
– مشه اسي آخي سيزلر اؤلوبسوز، نه ايشوز دوشه‌جک منه؟
– نه اولار اؤلنده، ايندي بيز اؤلموشوک دئييبن بيزه کؤمک ائله‌مه‌يه‌جکسن؟
– ايشيز نه‌دي مشه اسي؟
– اؤلوموز وار، ايستيريک اونو يئردن گؤتورک، سن ده باسديراسان!
– مشه اسي سنه قوربان اولوم به آخي‌ديريلر قاليب، اؤلولر نييه دوشوبلر قاباغا؟ به اؤز آداملاري هاردادي؟
– بابا بو رحمتليک يئتيميش ايل بوندان قاباق اؤلوب، دونن بير ده اؤلوب.
– آي گؤروم بو قبيرسانليغي آييرانلار مَلَر قالسينلار، ائله من ده گون بويو، هئي قاچيرام اوتايا، هئي قاچيرام بوتايا، آخيردا بير گون مني ده ماشين باسلاياجاق. ياخشي، اؤلو هاردادي مشه اسي.– باخ ائله بوردا. اؤز قبيرينين يانيندا. سن قبيري قاز، بيز ميّيتي قوياق قبيره، اوندان باسدير.
– آخي آي باشووا دولانيم مشه اسي، اؤزون بيليرسن، قايدا وار قانون وار. کاغاذسيز من نئجه قبيري آچيم آخي؟ ايستيرسن مني توتوب باسالار قودوقلوغا؟
– آي کلبه قاسيم آخي بو رحمتلييين اؤز قبيرين آچيب تزه دن اورا قويماغا نه کاغاذ؟
– وئي، مشه اسي سن بو سؤزو دئمه، سن اؤزون بوردا سوموک سينديريبسان. سني آللاهون، دئنن، کاغاذ‌سيز قبير آچيبسان؟
– يوخ!
– هه‌ديلينه قوربان، بابام آدامين دريسينه سامان تَپَرلر.
– کلبه قاسيم قاداني آليم، او قانون‌ديرينين اؤلمه‌يينهدير، اؤلونون اؤلمه‌يينه دؤوورکي؟!
– من بيلميرم، اؤلو اؤلودور. کاغاذ آل گتير، منيم بو کور گؤزلريم اوسته.
– آي بالا بو کلبه قاسيم ايش گؤره‌نه اوخشامير، نئيله‌يَک؟
– ساققيز آلاق چئينه‌يَک. نئيلَيه‌جه‌ييک مشه اسي، گئدک اؤلولر ايداره‌سينه، بو يازيغي دا گؤرسه‌ديب دئيَک بيزه بير پيتيک وئرسينلر. نه دئييرسن مشه سراصلان؟
– هه گئدک، گل، بو دا اؤليلر ايداره‌سي. قويون مشه اسي دانيشسين.
– ياخشي مشه سراصلان، قوي گؤروم نه دئيه‌جَکلر: -“آي بالا، آي بو ايداره‌نين بيلنده‌لري، بيزيم بير اؤلوموز وار، اوني باسديرماغا بير پيتيک وئرين بيزه.”
– بولار هئچ بيزي سايميرلار، ائله بيل هئچ‌ديليميزي ده باشا دوشمورلر؟
– آي مشه تاپدوق، هله‌ديري اولاندا سؤزوموزه باخان يوخ ايدي قالميشدي ايندي اولا؟
– آي حاجي آياز ائله بيل بولار ناشيديلار، قورخوب ووروب بيزي بير ده اؤلدوررلر، قالاريق حسنين گونونه، ايندي کيم بيزي باسديراجاق؟آردي وار

منبع :