صياد، احمد و بايرام‌دا بير- بيرلرينه قار گولله‌سي آتيرديلار. اونلار اوينايا- اوينايا گليب، کندين اورتاسيندان آخان چايين قيراغينا چاتديلار. اورادا يورولوب، بو اويوندان ال گؤتوردولر.چايدان کئچيب ائولرينه ساري گئتديلر. اونلار يول اوزونو دانيشرديلار. صياد دئدي:- گلين گون‌اورتادان سونرا اووا گئده‌ک!

احمدله بايرام‌دا راضيليق وئرديلر. قرارا گلديلر ناهار يئديکدن سونرا کوچه باشينا ييغيشيب، بيرليکده گئتسينلر.

گون‌اورتادان بير او قده‌ر کئچمه‌ميش، صياد کوچه باشينا گلدي. اونون آردينجا بايرام، سونرادا احمد گلدي.آزجا دانيشديلار. صيادلا احمد قاييديب، ايت‌لريني سسله‌ديلر. سونرا کندين ايچيندن کئچيب دره يوخاري يولا دوشدولر. چوخ گئتديکدن سونرا بير داغ اته‌يينه چاتديلار. بير آز اويان بوياني گزديلر. کول- کوسا باش اوزاتديلار.‌هارادا تله گؤردولر باخديلار. بير نئچه ککليک‌دن، دووشاندان گؤروب قوودولار. آمما هئچ بير شئي توتا بيلمه‌ديلر. گون باتانا ياخين يورغون- آرغين قاييتديقدا، بايرامين گؤزو بير دووشانا دوشدو. تئز سسله‌دي:- اوشاقلار! دووشان، دووشان!

اوشاقلار دووشانين داليسينجا قاچيب ايت‌لري کوشکورتدولر. دووشان يئيين- يئيين قاچديغينا گؤره، اوشاقلار بئله فيکر ائتديلر کي، اونلاري گؤروب، قاچير. آمما نئچه آدديم قاچماميش دووشاني بير تولکونون قووالاديغيني گؤردولر. بيلديلر دووشان هئچ اونلاري گؤرمه‌ييبدير. بو آندا تولکو اؤزونو دووشانا يئتيريب، اونو بوغالادي. دووشان تولکونون اليندن قورتاريب، دؤندو اوزو يوخاري قاچماغا. تولکو بيرده اونو قووالاييب توتدو. دووشان چاليشيردي يئنه‌ده تولکونون اليندن قورتاريب، قاچسين. آنجاق تولکو دووشانين بوينونو آغزينا سالميشدي.

دووشانين داليسينجا قاچان اوشاقلار، اونلارا يئتيشديلر. تولکو اوشاقلاري گؤره‌ن کيمي دووشاني بوراخيب قاچدي. دووشان کيري‌ييب قالميشدي. صياد اؤزونو يئتيريب دووشاني توتدو.

يارالي دووشانين اوره‌يي تاپ- تاپ چيرپينيردي. اونون اوره‌يي‌نين دؤيونتوسونو ائشيتمک اولوردو. دووشان تمنالي باخيشلاري‌ايله صيادين اوزونه باخيردي…

ايت‌لرده تولکونو بوراخماييب، داليسينجا قاچديلار. احمدله بايرام داغين بؤيروندن تولکونون قاباغيني آلماق ايسته‌ديلر.ايت‌لر تولکونو قوووب، داغ يوخاري چيخماغا مجبور ائتديلر. تولکو داغين او اوزونده‌کي مئشه‌لييه آشماق ايسته‌ييردي. آنجاق احمدله بايرام الي آغاجلي اونون قاباغينا چيخديقلاري اوچون، درحال دؤنوب، بير اوچوروما ساري قاچدي. بيرکولون اوستوندن آتيلدي. يئره دوشنده قول‌لاري ايکي داش آراسينا کئچيب، بورخولدو. او حالدا             اؤزونو ساخلايا بيلمه‌ييب اوچورومدان توللاندي. گوپپولتو ايله يئره ديدي. احمدله بايرام گليب اوچورومدان آشاغي باخديلار. تولکو قايانين آياغيندا يئره سريلميشدي. اونلار احتياطلا قايادان ائنيب، تولکونون يانينا گئتديلر. ايت‌لر اونلاردان قاباق چاتميشديلار و تولکويه هوروردولر. 

احمد تولکونو بلله‌دي. چوخدان اؤلموشدو. ائله بو آن قوجاغيندا دووشان اولان صياد يئتيشدي. اوچوده سئوينيرديلر. 

احمد دئدي:- تولکونو نئيله‌يک؟

بايرام دئدي:- آپاراق کنده! 

صياد دئدي:- اؤلو تولکونون نه‌ييني آپاراق، نه اوچون اؤزوموزه يوک ائده‌ک؟

احمد دئدي:- تولکونو آپارماق چتيندير. گلين قويروغونو کسيب آپاراق. 

صيادلا بايرام بو سؤزله راضيلاشديلار. تولکونون قويروغونو کسيب يولا دوشدولر.

 بايرام دئدي:-کنده يئتيشن کيمي دووشاني کاباب ائله‌ييب، يئيه‌ريک. احمد دئدي:- هن! بيز گلنده آنام تندير ساليردي!

– هئچ اوره يينيزدن گلر بو حئيواني کسه‌سينيز؟ گؤرون نئجه اوره‌يي چيرپينير! باخين، گؤزلري‌ايله آداما يالوارير.

 بايرام دئدي:- بس گون اورتادان ايندييه قده‌ر نه‌يه اؤزوموزو يورموشوق؟

صياد دئدي:- يورولساقدا، من قويمارام بو حئيواني اؤلدوره‌سيز.

احمد دئدي:- بايرام! صياددا پيس دئمير؛ دوزدور بيز اؤزوموزو چوخ يورموشوق، آمما آدامين اوره‌ييندن‌ده گلمير بونو کسه.

بايرام سوروشدو:- بس اونو نئيله‌مک ايسته‌ييرسينيز؟

صياد دئدي:- ياراسيني باغلاياق ساغالسين. اوچوموزون اولسون؛ هر گون مدرسه‌دن قاييداندا اونونلا اويناياريق.

احمد دئدي:- او چؤل حئيواني‌دير، ائوده قالماز؛ اوره‌يي توتولار.

صياد دئدي:- ياواش-  ياواش اؤيره‌نر.

احمد دئدي: -گؤزوم سو ايچمير.

بايرام دئدي:- اولسون، گؤرسک چوخ داريخير، گتيريب يئنه بوراخاريق چؤله.

ايشيغين يايديغي معلومات اساسيندا عصرآذربايجان راپورونا گوره ،اونون بو سؤزونو احمدله صياددا قبول ائتديلر.  سونرا گولدولر. اونلار دره اوزو آشاغي يولا دوشدولر. يول اوزونو بئله اوخويوردولار:

صيادلاري توولارام،

داغدا- داشدا قوولارام.

من خيرداجا  اووچويام

اووچولاري اوولارام.