ائويمدن ائوينه
ائويمدن ائوينه
1400/09/07
بولگه لر سرويسي:ياشماق کتاب ائوينين يئنيجه اوخوجو آيديتورياسينا بوراخديغي کتابين مولفي دوغما يوردوم ميانامين ليريک رايحه‌لي قلم صاحبي حسين رزمي »ياراي«ين باياتيلار توپلوسودور.
ميانالي عليرضا
بولگه لر سرويسي:ياشماق کتاب ائوينين يئنيجه اوخوجو آيديتورياسينا بوراخديغي کتابين مولفي دوغما يوردوم ميانامين ليريک رايحه‌لي قلم صاحبي حسين رزمي »ياراي«ين باياتيلار توپلوسودور.
من اونو اوخودوم؛ آخارينا قوشولدوم. سانکي اولو داغلارين اَته‌ييندن آخيب گلن بولاقلارين شاريلتيسي ده‌يدي قولاغيما؛ بوزگوشومون، قافلانتيمين نفسي توخوندو نفسيمه:
بنووشه بنده دوشدو/بنده، کمنده دوشدو/گونو شَهرده کئچدي/کولگه‌سي کنده دوشدو.
اوزون ايللردن بري اونوتدوغوموز گلين قيزلارين ياراي-دئميشکن بايرام گونلرينده رقص ائديب شاقراق احوال- روحيه‌لي جانلاندي گوز اونومده. گونو-گوزه‌راني شَهرده کئچن يولونو ايتيرَن يولچولار کيمي اولدوم؛ -منده. يولوم کنده دوشن کيمي اوزومه قاييتديم سانکي. قوشولدوم بو کره »ياراي«ين ايلهام قاناديلا يوللانديم قوشابولاق کندينه. گنجليييمده گزيب-دولاشديغيم خاطره‌لره يون آلديم. خيال مني آلدي گوتوردو گور هاردان هارالارا. او دوغما، او عزيز، او مونس گونلره قاييتديم؛ بو کره »ياراي«ين ايزيايله او احوال –روحيه‌ني درديم گوزلريمه؛ اونون آچديغي جيغيرلا او نفسي، او تامي قوجدوم قولاريمين آراسيندا هوپدوردوم اوره‌ييمه.
بو داغلار مئشه داغلار/درديمي دئشه داغلار/خالقي آتش داغلاسا/بيزي بنووشه داغلار.
طبيعته مفتونلوق بلکه ده شاعيرلره تانريدان پاي‌ايميش؛ درهلرين اووسونو اونلاري بوراخمير؛ نئجه-کي، »ياراي«دا بوراخمير. او سوز گليشي اولسون دئيه ياخود قافيه دوزومونو دوزسون دئيه شعير مصراعلارينا يوکلنمير؛ اوره‌يي‌نين ان ديلبر گوشه‌سيندن، اونون ان مونس قاتيندان يول آلير و يازير:
خالقي آتش داغلاسا/بيزي بنووشه داغلار.
ياخود بو باياتييا بير نظر سالاق:
بير کولگه آخار گئدر/گونشي ياخار گئدر/ائوين تيکيلسين گئدن/ائويمي ييخار گئدر.
گونشي ياخيب گئدن او خيال قاناديلا دويغو بيچيمينده قلمه آلينان کولگه نه‌ديرکي، »ياراي« اونو ائويني ييخيب گئدنله فورماجا قافيه انديرمه‌سه ده معناجا قافيه انديرير؟…
هله:
ائوين تيکيليب گئدن
ائويمي ييخار گئدر. آنلاشينداکي ايفاده‌ده نه‌وار؟ بو شکايتده کي مفهومدا نه گيزليدير؟ مولفين عاغلي، ادراکي، دوشونجه‌سي نه دئييرسه دئسين گورونکي، اوره‌يي نه‌دن، ياخود هانسي ايلهامدان قيدالانير؛ هانسي ايستکله مصراع‌لانير.
اوخوجويلا مولف آراسيندا يارانان گيزلي کود هانسي يوندن يول آلير؟ هانسي معنادان کئچير؟ هانسي دويغويا سويکه‌نير؟ هئچ شبهه‌سيز کي، بو کئچيد يولو، بو گيزلي کودو آچماق آنلاشي هاميدا عيني اولمور. هر اوخوجودا اوزونه مخصوص، اوز حسّينه، اوز اينانجينا، اوز قاورامينا اويغون معنا کسب ائدير؛ نه ياخشي کي، بو ائله بئله‌دي. عيني اولسايدي شعير عالمي اولان بو حس، بو دويغو کانکرئت علملر عالمي يولوندان يول آلاردي؛ اوندا ايسه بديعي ياراديجيليقدا بو عالمده اوز معناسين ايتيرردي.
ادبياتا ياخين علملردن دانيشيليرسا، دئمک اولارکي، هله فلسفه ياخود تاريخي مثال گوتورمک اولار؛ آذربايجانين ياش اعتباري ايله ان گنج پروفسوري »نظامي جعفر اوف« دئميشکن: تاريخين و او جمله‌دن فلسفه‌نين ديلي قورو ديلدي هله قالسين باشقا علم‌لره؛ ادبياتين ايسه ديلي مونس ديلدي. بديعي ياراديجيليق ايسه ادبيات ژانريدير. اصلينده شفاهي خالق ادبيات ژانري ساييلان باياتيدا يازيلي ادبياتيميزا بئله کئچميشدي. مونس، دوغما بو صنعت يولو ادبياتيميزين هوشئيمي سايلان آغيز ادبياتيندان يازيلي ادبياتيميزا سئويله-سئويله، اوخونا-اوخونا گله‌رک اوزونه مخصوص مووقع کسب ائتميشدي:
باخ شعرين آهنگينه/يئددي هيجا جنگينه/سنده قالان گوزلرين/رنگينه باخ، رنگينه.
بو مصراعلارا دوزولن دوشونجه، فيکير مکتوب ادبيات نمايندهسينين باياتي قورماسيندا مصراعلانان شعري‌دير-دئسک يانيلماريق. جمله قورولوشو، دئييم طرزي، مرکب فيکير- ايفادهسي بونو ثبوت ائتمکدهدير.
باياتينين آلتيندا »ياراي«ين امضاءسيدا اولماسايدي اونون مولفينين مکتوب ادبياتيميزا عائيد اولدوغو آچيق، آيدين حس اولوناردي، ياخود داها ياخين دئييم حس اولونماقدادير.
بيزي بيزدن ائدن وار/بو يوخلوقلار نه‌دن وار/هر توتولان شاعيري/بير بوراخيب گئدن وار.
بو شعرده تظاهر ائدن مفهوم، دوشونجه، فيکير ايسه آيدين گوسترير کي، بوغاز ادبياتينا عائيد دئييلدير بو باياتي. يعني آغيزا گلن کيمي مصراعلانماييب بو صنعت اثري. فيکير احاطه‌سيندن کئچيب، کونول بولاغيندان سو ايچيب قلمه دوشموشدور.
هر توتولان شاعيري/بير بوراخيب گئدن وار.
اوتانجاقليق، اوز قيزارتيسي کيميدير. نه ائتسن اوزونو گوسترير. معين موضوعلار وار کي، اونو اجتماعي فوندا ايره‌لي سورمک چتين اولور؛ ياخود بئله دئييم بيزه چتين گلير.
منجه: هر توتولان عاشيقي – بير بوراخيب گئدن وار؛ ايفادهسي بو باياتيدا داهادا يئرينه دوشردي. اونا گوره کي، بو مفهوم خالق آراسيندا داها چئويک قاورانان آنلاشيدي. هر حالدا «ياراي» بو صفتي شاعيره منسوب ائتديکده هئچ ده يالنيش فيکير ايره‌لي سورمه‌ميشدي. شاعيري عاشيقليک سوييه‌سينه قدر يوکسکده توتماق هئچ ده يالنيش ايفاده دئييلدير. بيز ايسه »ياراي«لا راضيلاشمايادا بيلمه‌ريک.
کتابدا توپلانان باياتيلار بيزي اوز کئچميشيميزه، تاريخيميزه، معنوي عنعنه‌لريميزه سسله‌مکده، اوزوموزه قايتارماقدا گوزه‌ل، مونس بير چاغريشدي؛ منجه کئچميشيميزه چکه-چکه گله‌جه‌ييميزه سسله‌مکدي. بو چاغريش اصلينده بيزده آپ-آيدين مثبت تأثير بوراخميشدير دئمه‌يه بيلمه‌رم.
بيزيم اينانجيميزين فونوندا گلين قوشولاق »ياراي«ين باياتي چلنگينه:
بو ياغيش، يا ترديمي؟/گوز ياشي بيترديمي؟/اوز دوردوغو يئرينده/آدامدا ايترديمي؟
بو باياتيدا بيرينجي مصراع ايله ايکينجي مصراع آراسيندا باغليليق فيکير اعتباري ايله تام معنادا اوست-اوستده دوشمه‌سه ده اوچونجو مصراعايله دوردونجو مصراع آراسينداکي، مصافه اولدوقجا سيخ بير-بيري ايله باغليدير. سانکي ايکي مصراع دئييل فيکير بير مصراعدا تقديم اولونماقدادير. بيرينجي مصراع ايله ايکينجي مصراع آغيز ادبياتي فونوندا قلمه آلينسادا اوچونجو مصراع ايله دوردونجو مصراعلار تام مکتوب ادبياتيميزا اويغون شکيللنميشدير. بو ايسه ياراديجي انسانين ياراديجيليق قابليتيني نمايش ائتديرمکده‌دير.
اوز دوردوغو يئرينده/آدامدا ايترديمي؟
بو ايکي مصراعدا گئدن فيکير او قدر اوز يئرينده، او قدر آيدين و او قدر مکمّل دئييم طرزي تاپميشدير کي، حاقيندا اوزون اوزاديجي سوز يازماغا شرايط ياراتماقدادير. شاعير »ياراي«ايسه بو قدر گئنيش احاطه‌سي اولان دوشونجه‌ني ايکي مصراعدا تقديم ائتميشدير.
آرزولارديم، سيزده منيم کيمي بو باياتي چلنگيني اوخوياسينيز؛ اونون آخارينا قوشولاسينيز. بيزيم اولو داغلارين اته‌ييندن آخان بولاقلارين صاف، دورو، شفاف شاريلتيسيني دينله‌يه‌سينيز؛ بوزگوشومون، قافلانتيمين نفسيني حس ائده‌سينيز. نييه کي، بو باياتي‌لارين احاطه دايره‌سي بيزيم مياناميزدان کئچير؛ شاعير »ياراي«ايسه اونون ليريک دوشونجه‌لي ياراديجي صنعتکار اوغلودور کي، بو کتابي بيزه ارمغان ائتميشدير.
کتابين عرصه‌يه گلمه‌سينده اَمه‌يي اولان علي محمد بياني‌يه ايشيق اوزو گورمه‌سينده ترتيبچي اولدوغونا گوره؛ جميله خانيم رضائي‌يه و او جمله‌دن محمدعلي قره‌داغي‌يه منّتدارليغيمي بيلديرير؛ ياشماق کتاب ائوينه ايسه تشکرلريمي و شوکرانليغيمي بيلديرمک ايسترديم.
سوندا ايسه قلم دوستوم حسين رزمي »ياراي«يا قلمين آخارلي، دوشونجه‌ن ايناملي، اوره‌يين ايسه وطن دويغولو اولسون! دئيرديم.
منبع :