واغ قوشو

بولگه لر سرويسي: قونشو، قيزي‌نين آديني دنيز قويموشدو، من ده آسلانميشديم کي: - آديمي دنيز قويماديز، بس آپارين دنيزي گؤروم. آتام دئييردي: - آي منيم تانريجا قيزيم، سني آپاراجايام دنيزلرين لاپ آناسيني گؤره‌سن! من ده بو آرزويلا کي، دولانماغا گئده‌جه‌يم گئجه‌م- گوندوزوم دنيز دوشونجه‌سي‌يله کئچيردي. بير آخشام اوستو آتام گولومسه‌يه‌رک دئدي: - آي خانيم يير- ييغيشيق ائله‌يين، ايکي گون يولا چيخاق. آتيليب توشدوم کي: - دنيزه گئده‌جه‌ييک! دنيزه گئده‌جه‌ييک! سئوينديييمدن گئجه‌ني ياتا بيلمه‌ديم، او اوزدن ماشين‌دا اوتوردوغوم کيمي يوخو مني گيره¬له‌دي... اوندا گؤردوم آنام دئيير:

يازان: رضوان حاجي‌قاسملو

بولگه لر سرويسي: قونشو، قيزي‌نين آديني دنيز قويموشدو، من ده آسلانميشديم کي: - آديمي دنيز قويماديز، بس آپارين دنيزي گؤروم. آتام دئييردي: - آي منيم تانريجا قيزيم، سني آپاراجايام دنيزلرين لاپ آناسيني گؤره‌سن! من ده بو آرزويلا کي، دولانماغا گئده‌جه‌يم گئجه‌م- گوندوزوم دنيز دوشونجه‌سي‌يله کئچيردي. بير آخشام اوستو آتام گولومسه‌يه‌رک دئدي: - آي خانيم يير- ييغيشيق ائله‌يين، ايکي گون يولا چيخاق. آتيليب توشدوم کي: - دنيزه گئده‌جه‌ييک! دنيزه گئده‌جه‌ييک! سئوينديييمدن گئجه‌ني ياتا بيلمه‌ديم، او اوزدن ماشين‌دا اوتوردوغوم کيمي يوخو مني گيره¬له‌دي... اوندا گؤردوم آنام دئيير:
– دور قيزيم بودا دنيز! باخ نه اوجو وار نه بوجاغي!
سانکي دونيا منيم اولموشدو، قاچديم ساحيله، باليق قولاق‌لاري بئله گؤزل گؤرونوردو سانکي ايسلاق قوم گئجه‌دير اونلار دا اولدوز، آنام گيل چادير قوروب، اوتورموشدولار. بيرآز اويناق‌لاييب، گلديم آنام‌گيلين يانينا، آخشام اوستو آنام‌لا چيخديق دولاناق، هر نه منيم ايچين چوخ ماراقلي‌يدي؛ گاه آنامين ساغينا کئچيرديم گاه سولونا، بيردن گؤردوم داش اوسته قوش وار، آما بئله باخير دنيزه سانکي گؤزلريندن واي ياغير، بئله غمل ي اوتورموشدو کي، اولمايان کيمي، آناما دئديم:
– آي آنا بو نه قوشودو؟ نييه بئله باخير سويا؟
آنام دئدي:
– گل اوتوراق، سن باليق قولاغي ييغ من ده او قوشون ناغيليني دانيشيم:“ايل¬لر اؤنجه، گون¬لرين بيرينده، تام باهارين آستاناسيندا، داغ¬لارين قاري اَريييب، بولاق¬لار شاققيلداييب، آغاج¬لار چيچک¬لنيب، داغ¬لار يام- باشيل گئيينيرديلر.
 هر داشين يانينا باخسايدين بير گؤيرنتي وار ايدي. هاوا دا چوخ گؤزل ايدي، هردن بير ياغيش چيله‌ييردي، هردن گون چيخيردي هردن بير يئل اسيردي. آنام دئييردي ائله هر آن بير تهر اولدوغونا خاطير آديني »آغلار- گولر« قويوبلار.
 آي نه گؤزل اولور يازين گلمه‌سي. اوغلان¬لار داغا- اوچغونا گئديرلر، قيزلار تره در‌مه‌يه. بيري سئل تاماشاسينا گئدير، بيري آت چاپير.
بير گؤزل قيز گئدر چيچک درسين، کؤرپه- کؤرپه کهليک اوتو درسين، تره¬لردن دريب گتيرسين. کوله‌ش سبتين آلار چينينه گئدر داغا آي نه گؤزل اولور داغ¬لار، سرت قايا¬لاردا بئله چيچک¬لر بيتيب اوت‌لار گؤيريب. قيز باشلار خوشونا گلن¬لردن در‌مه‌يه؛ چوخ چکمز کي  سبتي دولار؛ قاياليق‌دا بير گؤزل چيچک گؤرر گئدر اونودا دريب، سبته قويسون کي، اوزونه بير دامجي ياش دوشر. باخار گؤرر واي ياغيش باشلادي، ديير “آي بولود باشينا دولانيم نه اولاردي بو چيچه‌يي درندن سونرا ياغايدين، ايندي من نئجه اونو دريم يئر ياش اولدو آياغيم زويور!”
بيرآز چاليشار گؤرر کي، يوخ دا قايادان اوسته چيخماق ممکن دئييل . گلر سبتيني آلار چينينه دوشر يولا آما آياق¬لاري هئي آخيردي. بير دفعه ده دوشر، زورلا سبتي ساخلار کي، ايچينده‌کي‌لر داغيلماسين. آما پالتارلاري باتار. کنده ده سئل گليرميش، بير اوغلان گلر سئل تاماشاسينا. بير داشين اوستونده اوتورار دالار سئلين بورولماسينا، سسينه… اوغلان بو فيکيرلرله سئله باخيردي کي، بيردن گؤرر بير قيز سبت چيينينده گلير کؤرپودن کئچسين “آي آمان بو قيز بو ‌آغير سبتله هاردان گلير؟ سبت‌ده نه گتيرير؟” دورار اونا کؤمک اوچون گئتسين کي، قيزين آياغي آخار سبتي‌يله دوشر سئله. بير آن ايچينده سانکي اوغلانين بوغازينا سورمه ياخيبلار سسي چيخماز، آما قاچار سئله دوغرو “آمان تانريم بس بو قيز نييه گؤرسنمير؟” سئل دئيه‌سن بير نهنگ اولدو قيزي اوتدو، نه سبتي گؤرسندي نه قيز! اوغلان سئل¬له آشاغي قاچار، يوخاري گلر، قيزي تاپماز آما داي او‌گون‌دن بري سسي ده چيخماز و هئچ کيم داي اوغلانين سسيني ائشيتمز و هئچ بيرينه ده دانيشا بيلمز کي، تره‌دن گلن بير قيزي سئل قاپدي، قاچدي…
آما اوغلان همئشه‌ليک گلر اوتورار قيزين سئله دوشدويو يئرده سودان دا ايچمز اوره‌يينده ديير “بلکه بو سودا او قيزين بير ايزي وار ايچرسم ايز ايتر.”
ايل¬لر بئله¬سي کئچر بير گون سحر تئزدن گؤررلر داي اوغلان يوخ اولوب و يئرينده بير قوش اوتوروب کي، هردن بير واغ دئيير. او قوشون آدي «واغ قوشو» قالار. دئيرلر تانري هئچ اوندان اؤنجه بو قوشو ياراتماميشدي!

منبع :